ചർമ്മത്തിലുണ്ടാകുന്ന നിറവ്യത്യസങ്ങൾ മിക്കവരുടെയും ഉറക്കംകെടുത്തുന്ന ഒരു പ്രധാന പ്രശ്നമാണ്. ഇതിന് പിന്നിലെ ഒരു കാരണം പിഗ്ന്‍റെഷൻ പ്രശ്നങ്ങളായിരിക്കാം. ചർമ്മത്തിന് നിറം പകരുന്ന മെലാനിൻ എന്ന പിഗ്മെന്‍റ് അമിതമായി ഉൽപാദിപ്പിക്കപ്പെടുമ്പൊഴാണ് ചർമ്മത്തിൽ കറുപ്പ് നിറം അഥവാ സ്കിൻ പിഗ്മെന്‍റേഷൻ ഉണ്ടാവുക.
അമിതമായി മെലാനിൻ ഉൽപ്പാദിപ്പിക്കപ്പെടുമ്പോൾ ചർമ്മത്തിൽ പിഗ്മെന്‍റേഷൻ തകരാറുകൾ ഉണ്ടാകും. ഇതിനെ ഹൈപ്പർ പിഗ്മെന്‍റേഷൻ എന്നാണ് വിശേഷിപ്പിക്കുക. ഇത് ചർമ്മത്തിൽ കറുത്ത പാടുകൾ, അടയാളങ്ങൾ, നിറവ്യത്യാസം തുടങ്ങിയ പ്രശ്നങ്ങളിലേക്ക് നയിക്കുന്നു. കാലക്രമേണ, ഇത് ചർമ്മത്തിന്‍റെ നിറത്തെ ബാധിക്കുകയും അസമമായ ചർമ്മനിറത്തിന് കാരണമാവുകയും ചെയ്യും. ഹൈപ്പർ പിഗ്മെന്‍റേഷൻ ഒരു ദോഷകരമായ അവസ്ഥയല്ലെങ്കിലും, മറ്റൊരു രോഗാവസ്‌ഥയുടെ സൂചനയായിരിക്കാം. അതിനാൽ, പിഗ്മെന്‍റേഷനിന് പിന്നിലെ കൃത്യമായ കാരണം കണ്ടെത്തുന്നതിന് ഒരു ഡെർമറ്റോളജിസ്റ്റിനെ കാണുന്നത് ഉചിതമായിരിക്കും.
പിഗ്മെന്‍റേഷൻ എത്രവിധം
വ്യത്യസ്തതരം പിഗ്മെന്‍റേഷനുകൾ ഉണ്ട്. പിഗ്മെന്‍റേഷനുള്ള ചികിത്സാ തുടങ്ങുന്നതിന് മുമ്പായി അതിന്‍റെ സ്വഭാവവും കാരണങ്ങളും മനസ്സിലാക്കേണ്ടത് ആത്യാവശ്യമാണ്.
ഹൈപ്പോ പിഗ്മെന്‍റേഷൻ
ഹൈപ്പോ പിഗ്മെന്‍റേഷനിൽ, മെലാനിൽ ഉത്പാദനം കുറയുന്നതിനാൽ ചർമ്മത്തിന് നിറം നഷ്ടപ്പെടും. ഇത് വ്യക്തികളെ അവരുടെ ജനനം മുതൽ അല്ലെങ്കിൽ ജീവിതത്തിന്‍റെ പിന്നീടുള്ള ഘട്ടത്തിൽ ബാധിക്കാം. രോഗം അല്ലെങ്കിൽ മറ്റെന്തെങ്കിലും കാരണം കൊണ്ട് ഹൈപ്പോ പിഗ്മെന്‍റേഷൻ ഉത്തേജിക്കപ്പെടാം.
ആൽബിനിസം: മെലാനിന്‍റെ അഭാവം മൂലമുണ്ടാകുന്ന അപൂർവ പാരമ്പര്യ രോഗമാണിത്. ഇത് ചർമ്മത്തിലും മുടിയിലും കണ്ണിലും പിഗ്മെന്‍റേഷന്‍റെ പൂർണ്ണമായ അഭാവത്തിന് കാരണമാകുന്നു. നിർഭാഗ്യവശാൽ, ആൽബിനിസത്തിന് ചികിത്സയില്ല.
വിറ്റിലിഗോ: പിഗ്മെന്‍റ് ഉത്പാദിപ്പിക്കുന്ന കോശങ്ങൾക്ക് കേടുപാടുകൾ സംഭവിക്കുന്നതിനാൽ ചർമ്മത്തിൽ മിനുസമാർന്ന വെളുത്ത പാടുകൾ പ്രത്യക്ഷപ്പെടുന്ന ഒരു തരം ഹൈപ്പോ പിഗ്മെന്‍റേഷനാണ് വിറ്റിലിഗോ.
പിത്രിയാസിസ് ആൽബ: ഇരുണ്ട ചർമ്മമുള്ള കുട്ടികളിലാണ് പിത്രിയാസിസ് ആൽബ സാധാരണയായി കാണപ്പെടുന്നത്. മുഖത്ത് വെളുത്തതും ചെറുതായി പൊങ്ങിയതുമായ പാടുകൾ ഉൾപ്പെടുന്നു. പിത്രിയാസിസ് ആൽബയുടെ കാരണം അജ്ഞാതമാണെങ്കിലും ഇത് വരണ്ട ചർമ്മവുമായി ബന്ധപ്പെട്ടിരിക്കാം.
ഹൈപ്പർ പിഗ്മെന്‍റേഷൻ
ചുറ്റുമുള്ള ഭാഗത്തേക്കാൾ ഇരുണ്ടതായി മാറിയ ചർമ്മത്തെ വിവരിക്കാൻ ഉപയോഗിക്കുന്ന പദമാണ് ഹൈപ്പർ പിഗ്മെന്‍റേഷൻ. മുഖത്തോ ചർമ്മത്തിന്‍റെ വലിയ ഭാഗങ്ങളിലോ പിഗ്മെന്‍റേഷന്‍റെ ചെറിയ പാടുകളായി രൂപപ്പെടാം. മാത്രമല്ല ഇത് മുഴുവൻ ശരീരത്തേയും ബാധിച്ചേക്കാം.
ഹൈപ്പർ പിഗ്മെന്‍റേഷൻ വിവിധതരം
മെലാസ്മ: ഹോർമോൺ വ്യതിയാനം മൂലമോ ഗർഭധാരണം മൂലമോ അസമമായ മെലാനിൻ പിഗ്മെന്‍റേഷന്‍റെ ഉൽപാദനത്തിന്‍റെ ഫലമായി സംഭവിക്കുന്നതാണിത്. സൂര്യപ്രകാശം ഏൽക്കുന്നതും മെലാസ്മയുടെ കാരണമായി കണക്കാക്കുന്നു.
പുള്ളികൾ(ഫ്രക്കിൾസ്): വളരെ സാധാരണയായി സംഭവിക്കുന്ന പിഗ്മെന്‍റേഷനാണിത്. ചർമ്മത്തിൽ പാടുകൾ രൂപം കൊള്ളുന്നതിന് ജനിതകം ഒരു കാരണമാകാറുണ്ട്. ആവർത്തിച്ച് സൂര്യപ്രകാശം ഏൽക്കുമ്പോൾ ചെറിയ ഡോട്ടുകളായി പ്രത്യക്ഷപ്പെടുകയും നല്ല നിറമുള്ള വ്യക്‌തികളിൽ വ്യാപകമാവുകയും ചെയ്യുന്നു.
സോളാർ ലെന്‍റിജൈനുകൾ: സൂര്യപ്രകാശം അധികമായി ഏൽക്കുന്നതിനാൽ കാലക്രമേണ രൂപംകൊള്ളുന്ന ഇത് ലിവർ സ്പോട്സ് പാടുകൾ അല്ലെങ്കിൽ സൺസ്പോട്ടുകൾ എന്നും അറിയപ്പെടുന്നു. സാധാരണയായി, ഇത് കൈകളിലും മുഖത്തും പ്രത്യക്ഷപ്പെടുന്നു.
പോസ്റ്റ്- ഇൻഫ്ളമേറ്ററി ഹൈപ്പർ പിഗ്മെന്‍റേഷൻ: മുഖക്കുരു, പൊള്ളൽ അല്ലെങ്കിൽ ഡെർമബ്രേഷൻ, കെമിക്കൽ പീൽസ്, ലേസർ മുതലായ തീക്ഷ്ണങ്ങളായ ക്ലിനിക്കൽ ചികിത്സകൾ കാരണം ഉണ്ടാകുന്നതാണിത്.
സ്കിൻ പിഗ്മെന്‍റേഷന് കാരണങ്ങൾ
ചർമ്മത്തിന്‍റെ പിഗ്മെന്‍റേഷനു കാരണമാകുന്ന ചില പൊതു ഘടകങ്ങൾ:
ബാഹ്യഘടകങ്ങൾ: മുറിവ്, ചതവ്, മുടി നീക്കം ചെയ്യുന്നതിനുള്ള അനുചിതമായ രീതി, ചില പ്രത്യേക ക്രീമുകൾ എന്നിവ മൂലം ചർമ്മത്തിൽ കേടുപാടുകൾ ഉണ്ടാകാം. ഇത് ചർമ്മത്തിലെ ഹൈപ്പർപിഗ്മെന്‍റേഷന് കാരണമാകുന്ന മെലാനിൻ ഉൽപാദനം വർദ്ധിപ്പിക്കുന്നു.
അലർജികൾ: സൗന്ദര്യവർദ്ധക വസ്തുക്കൾ, ഹെയർ ഡൈകൾ മുതലായവയിൽ അടങ്ങിയിരിക്കുന്ന അലർജി ഉണ്ടാക്കുന്ന വസ്തുക്കൾ കോണ്ടാക്റ്റ് ഡെർമറ്റൈറ്റിസിന് ഇടവരുത്താം.
മരുന്ന്: ടെട്രാസൈക്ലിൻ ആന്‍റിബയോട്ടിക്കുകൾ അല്ലെങ്കിൽ കീമോതെറാപ്പിയിൽ ഉപയോഗിക്കുന്ന ചില മരുന്നുകളിൽ നിന്നുള്ള പാർശ്വഫലങ്ങൾ കൊണ്ടും ചർമ്മത്തിൽ അനാവശ്യ പിഗ്മെന്‍റേഷൻ ഉണ്ടാക്കാം.
സൺ എക്സ്പോഷർ: സൂര്യപ്രകാശത്തിൽ ലോംഗ് വേവ് അൾട്രാവയലറ്റ് എ (യുവിഎ), ഷോർട്ട് വേവ് അൾട്രാവയലറ്റ് ബി (യുവിബി) രശ്മികൾ അടങ്ങിയിരിക്കുന്നു. യുവിഎ രശ്മികൾ ചർമ്മത്തിൽ ആഴത്തിൽ പതിഞ്ഞു അമിതമായ മെലാനിൻ ഉൽപാദനത്തിന് കാരണമാവുകയും ചെയ്യും.
ആന്തരിക ഘടകങ്ങൾ: ഹോർമോൺ ഏറ്റക്കുറച്ചിലുകൾ – ശരീരത്തിലെ ഈസ്ട്രജന്‍റെയും പ്രൊജസ്ട്രോണിന്‍റെയും അളവ് വർദ്ധിക്കുന്നത് മൂലമുണ്ടാകുന്ന ഹോർമോൺ അസന്തുലിതാവസ്‌ഥ, മെലാസ്മ എന്നറിയപ്പെടുന്ന പിഗ്മെന്‍റേഷന് കാരണമാകും.
പാരമ്പര്യ ഘടകങ്ങൾ: ചർമ്മത്തിലെ പിഗ്മെന്‍റേഷനെ ബാധിക്കുന്ന പ്രധാന ഘടകങ്ങളിലൊന്നാണിത്. ഉദാഹരണത്തിന്, ശരീരത്തിലെ സൂര്യപ്രകാശം ഏൽക്കുന്ന ഭാഗങ്ങളിൽ സംഭവിക്കുന്ന ലെന്‍റിജൈൻസ് എന്നറിയപ്പെടുന്ന പിഗ്മെന്‍റഡ് പാടുകൾ പാരമ്പര്യ മൾട്ടിസിസ്റ്റമിക് സിൻഡ്രോമുകളുമായി ബന്ധപ്പെട്ട ഒരു അവസ്ഥയാണ്.
രോഗം: എൻഡ്രോക്രൈൻ രോഗങ്ങളും അഡിസൺസ് രോഗം പോലുള്ള ചില മെഡിക്കൽ അവസ്‌ഥകളും ശരീരത്തിലെ ഹോർമോൺ നിലയെ ബാധിക്കുന്നു. ഇത് മെലാനിൻ ഉൽപാദനത്തിനും ചർമ്മത്തിന്‍റെ പിഗ്മെന്‍റേഷനും കാരണമാകുന്നു.
മെലാനിൻ ഉൽപാദനത്തിലെ അസന്തുലിതാവസ്‌ഥ കാരണം സാധാരണയായി ആളുകളിൽ പിഗ്മെന്‍റേഷൻ സംഭവിക്കുന്നു. ഇത് വളരെ സാധാരണമായ ഒരു അവസ്‌ഥയാണെങ്കിലും, ചർമ്മത്തിന്‍റെ പിഗ്മെന്‍റേഷൻ എങ്ങനെ കൈകാര്യം ചെയ്യണമെന്ന കാര്യം പലർക്കും അറിയില്ല. പിഗ്മെന്‍റേഷനെക്കുറിച്ചുള്ള ചില വസ്തുതകളെപ്പറ്റി മനസിലാക്കുന്നത് ഉചിതമാണ്.
ചർമ്മത്തിന്‍റെ നിറം നിർണ്ണയിക്കുന്നതിൽ മെലാനിൻ നിർണായകമായ ഒരു പങ്കുവഹിക്കുന്നു. ചർമ്മത്തിന്‍റെ പുറം തൊലിയിലെ സ്ട്രാറ്റം ബേസലെ എന്ന് വിളിക്കപ്പെടുന്ന താഴത്തെ പാളിയിൽ മെലനോസൈറ്റുകൾ അടങ്ങിയിരിക്കുന്നു. അവ മെലാനിൻ ഉത്പാദിപ്പിക്കുന്ന കോശങ്ങളാണ്. ചർമ്മത്തിന്‍റെ നിറം ഇരുണ്ട് പിഗ്മെന്‍റിന് കാരണമാകുന്നു.
ചില കാരണങ്ങളാൽ മെലനോസൈറ്റുകൾക്ക് കേടുപാടുകൾ സംഭവിക്കുമ്പോഴോ അനാരോഗ്യകരമായ മാറ്റങ്ങളിലൂടെ ചില ഭാഗങ്ങളിലോ ശരീരത്തിലോ കറുത്ത പാടുകൾ ഉണ്ടാകും.
സൂര്യപ്രകാശം വിറ്റാമിൻ ഡിയുടെ സമന്വയത്തെ സഹായിക്കുന്നു. പക്ഷേ അത് അമിതമായാൽ ദോഷകരമാണ്. അമിതമായി സൂര്യപ്രകാശം ഏൽക്കുന്നത് പല വിധത്തിലുള്ള ചർമ്മ പ്രശ്നങ്ങൾക്കും കാരണമാകും. അതിനാൽ, പിഗ്മെന്‍റേഷൻ സാധ്യതയുള്ള ചർമ്മമുള്ള ആളുകൾ ഒരു കുട ചൂടുകയോ സൺസ്ക്രീൻ പുരട്ടുകയോ ചെയ്യുന്നത് ഉചിതമാണ്.
പുറത്ത് വെയിലില്ലാത്തപ്പോൾ പോലും അൾട്രാവയലറ്റ് രശ്മികളുടെ സാന്നിധ്യം ഉണ്ടാകും. അതിനാൽ, മൂടിക്കെട്ടിയ ദിവസങ്ങളിൽ പോലും ചർമ്മത്തെ സംരക്ഷിക്കേണ്ടതുണ്ട്.
പിഗ്മെന്‍റേഷൻ ഒരു കഠിനമായ അവസ്‌ഥയാണെങ്കിലും പക്ഷേ ഇത് ചികിത്സിക്കാവുന്നതാണ്. വീട്ടുവൈദ്യം ഉപയോഗിച്ചും കെമിക്കൽ പീൽസ്, മൈക്രോഡെർമാബ്രേഷൻ, ക്രയോതെറാപ്പി, ലേസർ റീസർഫേസിംഗ് മുതലായവ ഉപയോഗിച്ചും ഇതിന് പ്രതിവിധി കാണാവുന്നതാണ്.
പിഗ്മെന്‍റേഷൻ ചികിത്സയ്ക്കുള്ള വീട്ടുവൈദ്യങ്ങളെക്കുറിച്ച് പറയുകയാണെങ്കിൽ അവ പരീക്ഷിക്കുന്നതിന് മുമ്പ് വളരെ ശ്രദ്ധ പുലർത്തണം. കാരണം, പിഗ്മെന്‍റേഷന് ഫലപ്രദമായ വീട്ടുവൈദ്യമായി നിർദ്ദേശിച്ചേക്കാവുന്ന പല പഴങ്ങളിലും പച്ചക്കറികളിലും പ്രശ്നത്തെ കൂടുതൽ വഷളാക്കുന്ന ചില എൻസൈമുകളും ആസിഡുകളും അടങ്ങിയിരിക്കാം. അതിനാൽ, അത്തരം ചികിത്സാ രീതി അവലംബിക്കും മുമ്പ് ഒരു സർട്ടിഫൈഡ് ഡെർമറ്റോളജിസ്റ്റിനെ കണ്ട് വേണ്ട മാർഗ്ഗ നിർദ്ദേശങ്ങൾ സ്വീകരിക്കാം.
