ഉച്ചച്ചൂട് അലിഞ്ഞു തീർന്നെങ്കിലും അന്തരീക്ഷത്തിലെ ചൂടപ്പോഴും ശമിച്ചിരുന്നില്ല. പൂമരപൂക്കളും പഴുത്ത ഇലകളും കൊഴിഞ്ഞുവീണ വഴിത്താരകളിലൂടെ ഞങ്ങൾ വീട്ടിലേക്ക് നടന്നു. ഞാൻ എന്‍റേതായ മനോവ്യാപാരങ്ങളിലും ട്രീസ അവളുടേതായ ചിന്തകളിലും മുഴുകി ഉരിയാടാതെ നടന്നു ഫ്ലാറ്റുപറ്റി. ശർക്കരയും നാളികേരവുമിട്ട മധുരഅട അമ്മയുണ്ടാക്കി ടേബിളിൽ അടച്ചുവച്ചിരിക്കുന്നു. വാഴയിലയിൽ വിലയിച്ചു ചേർന്ന ഹരിതകത്തിന്‍റെ ജൈവ സാന്ദ്രതയുൾക്കൊണ്ട് വെന്ത അട എനിക്കേറെ ഇഷ്ടമുള്ള വിഭവമാണ്. രണ്ടുമൂന്നെണ്ണം കഴിച്ച് ഒരു കടുംകാപ്പിയും കുടിച്ച് റൂമിൽ വന്ന് കിടന്നു. വെയിലേറ്റിട്ടാണോ എന്തോ? നേരിയ തലവേദനയുണ്ട്.
ട്രീസ അമ്മയെ സഹായിക്കാനായി അടുക്കളയിലേക്ക് പോയി. മിയ തന്ന ഫയലുകൾ അലമാരയിൽ എടുത്തുവച്ചു. ഇന്ന് അവരുടെ വിഷയത്തെക്കുറിച്ച് ഒന്നുംതന്നെ ചിന്തിക്കേണ്ടതില്ലെന്ന് മനസ്സിലുറപ്പിച്ചിരുന്നെങ്കിലും അത് തീർത്തും ഫലവത്തായില്ല.
അടക്കാൻ ശ്രമിച്ചിട്ടും ഒരുപാട് ചോദ്യങ്ങൾ കടൽത്തിരപോലെ മനസ്സിൽ തിരയടിച്ചെത്തി. ഇതിൽ വിരുന്നിന്‍റെ ദിവസം ബഹളത്തിനു കാരണക്കാരനായ ആൽഫ്രഡ് ഒരു ചോദ്യചിഹ്നമായി നില്ക്കുന്നു.
മിയയുടെ അമ്മയുടെ രഹസ്യ കാമുകൻ. അയാളാണ് ഭാര്യയുടെ കാമുകനെന്ന് റൊസാരിയോ എങ്ങനെ അറിഞ്ഞു? കാമുകി കാമുകന്മാർ തമ്മിലുള്ള രഹസ്യ സമാഗമനങ്ങൾ അയാൾ കണ്ടുകാണുമായിരിക്കും. അയാളുടെ ഭാര്യ തന്നെ ആൽഫ്രഡിനെ വിരുന്നിനു ക്ഷണിച്ചതാവാം. അവർ തമ്മിൽ നിഗൂഢമായ എന്തെങ്കിലും പരസ്പര ധാരണകൾ ഉണ്ടാകും ഏതായാലും വിരുന്നിനു ശേഷമുള്ള റോസ് വില്ലയിലെ രാത്രി സംഭവബഹുലമാണ്. അതെല്ലാംനടക്കുമ്പോൾ ഒന്നുമറിയാതെ മിയ മുകളിലെ കിടപ്പുമുറിയിൽ തളർന്നുറങ്ങുകയാണ്.
അന്ന് വിരുന്നിനു വന്നവരിൽ മിയക്കു പരിചയമുള്ളവരും കാണില്ലേ അവരിൽ ആരെയെങ്കിലും അൽപ്പനേരം സംസാരിക്കാൻ കിട്ടുമെങ്കിൽ ആൽഫ്രഡിനെകുറിച്ചുള്ള വിവരമെന്തെങ്കിലും കിട്ടിക്കൂടായ്കയില്ല. പക്ഷേ ഇത്രയേറെ വർഷം മുൻപുള്ള സംഭവം. മാത്രമല്ല കേസും കൂട്ടവും. ആരുംതന്നെ സഹകരിക്കില്ല. അതുറപ്പാണ്. ആർക്കാണ് ഇത്തരം മലീമസത പുറത്തെടുത്തു ചർച്ച ചെയ്യാൻ താല്പര്യം? പ്രത്യേകിച്ചു ഈ വിഷയത്തിന്‍റെ ഗുണഭോക്താവ് ഞാൻ മാത്രമായ സ്ഥിതിക്ക്. ആൽഫ്രഡ് അങ്ങനെ ദുരൂഹമായിത്തന്നെ തുടരുന്നു. റിസ്വാന….
മിയയുടെ അന്വേഷണത്തിൽ നിന്നു തന്നെ അവരെന്നേ രക്ഷപ്പെട്ടു പോയിക്കഴിഞ്ഞിരിക്കുന്നു. ഈ വിഷയത്തിൽ ദുരൂഹതയുടെ ഇരുമ്പു മറയെല്ലാം കനത്ത താഴിട്ടു പൂട്ടിയിട്ടിരിക്കുകയാണ്. പൂട്ടു തുറക്കാൻ ഏറെ പണിപ്പെടേണ്ടിവരും.
ട്രീസ പകർന്നു തന്ന ഒരു കടുപ്പമുള്ള ചായയിൽ തലവേദന തെല്ലു ശമിച്ചപ്പോൾ മിയ ഏൽപ്പിച്ച പേപ്പർ കട്ടിംഗുകൾ എല്ലാം എടുത്തു വായിച്ചു. ഡോക്ടറുടെ ഫോട്ടോയുണ്ട്. മിയ പറഞ്ഞത് ശരിയാണ്. കുഞ്ഞിനെപ്പോലെ നിഷ്കളങ്കമായ മുഖം. ഇയാൾക്ക് സ്വന്തം ഭാര്യയെ വധിക്കുക എന്നത് തികച്ചും അചിന്തനീയമായിരിക്കും. നിലവറയിൽ നിന്നും കണ്ടെത്തിയത് ചില വെട്ടിമുറിക്കപ്പെട്ട മാംസപിണ്ഡങ്ങളാണ്.
ശരീരഭാഗങ്ങളോടൊപ്പം നിലവറയിൽ നിന്നും മൃതദേഹത്തിന്‍റെ തല കണ്ടെത്തിയില്ല. കുറെ മുടിയിഴകൾ കണ്ടെത്തിയതായി പറയുന്നു. മാംസഭാഗങ്ങൾ ഏറെ ഇല്ല, ഒരു സ്ത്രീയുടെ മാംസഭാഗങ്ങൾ ആണെന്ന് സ്ഥിരീകരിച്ചിട്ടുണ്ട് . അവയുടെ പഴക്കത്തിന്‍റെ കാലയളവ് ഡൊമനിക് തിരോഭവിച്ച ദിവസവുമായി ഒത്തുചേരുന്നുണ്ട് എന്നാൽ അതു മാർഗരീറ്റയുടെ ആണെന്നുള്ളതിനു തെളിവില്ല.
ഡി.എൻ.എ പരിശോധന നടത്തിയോ എന്നതിനെക്കുറിച്ച് മിയയൊന്നും പറഞ്ഞു കേട്ടില്ല. അത് അവരോടു തന്നെ ചോദിച്ചു ഉറപ്പു വരുത്താവുന്നതേ ഉള്ളു. ശരി. എങ്കിൽ ഡി.എൻ.എ തെളിവുപ്രകാരം ആ ശരീരാവശിഷ്ടങ്ങൾ മാർഗരീറ്റയുടേതു തന്നെയെന്നു കരുതുക. കൊലപ്പെടുത്തിയത് ഡൊമനിക് റൊസാരിയോ ആണെന്നു ഉറപ്പു പറയുന്നതെങ്ങനെ?
ഇതിനെല്ലാമുപരി എഴുത്തിൽ വ്യക്തമായിത്തന്നെ എഴുതിയിരിക്കുന്നു, ആൽഫ്രഡിന്‍റെ കൂടെ ഒളിച്ചോടി പോയെന്ന്! ഈ ആൽഫി എന്ന ആൽഫ്രഡുമൊത്തുള്ള രഹസ്യബന്ധം ആരോപിച്ചാണ് ഡൊമനിക് റൊസാരിയോ നിരന്തരം മാർഗരീറ്റയുമായി കലഹിച്ചിരുന്നത്.
ഒരുപാടു സ്നേഹിച്ചിരുന്ന മകളെ കരുതിയായിരിക്കണം അയാൾ എല്ലാം ക്ഷമിക്കാനും പൊറുക്കാനും ഒപ്പം അവിശുദ്ധബന്ധങ്ങൾ ഒഴിവാക്കാനും തീരുമാനിച്ചത്. പക്ഷേ മാർഗരീറ്റ തന്‍റെ രഹസ്യബന്ധം ഉപേക്ഷിക്കാൻ തയ്യാറായില്ല. അതുകൊണ്ടു തന്നെയാണല്ലോ ആൽഫിയെ വിരുന്നിനു വിളിച്ചത്? അവരുടെ ചങ്കുറപ്പ് അപാരം തന്നെ! ആ ക്ഷണത്തിനു പിന്നിൽ മറ്റെന്തെകിലും ഗൂഢ ഉദ്ദേശം ഉണ്ടോ എന്നുള്ളത് ചിന്തിക്കേണ്ട വിഷയമാണ്.
ആ വിരുന്നിന്‍റെ ദിവസം അവരുടെ ഗൂഢ താൽപര്യങ്ങൾക്കു ഒരു മറയാക്കിയതാണോ എന്നതും സാധ്യത നൽകുന്ന ചോദ്യമാണ്. ആ ഒരു രാത്രിയാണ് എല്ലാം തകിടം മറിഞ്ഞത്. ഇങ്ങനെ കുടുംബബന്ധങ്ങളെ നിഷ്ക്കരുണം വിഛേദിച്ച്, ഒളിച്ചോടി പോകുന്നവരെ മിക്കവാറും കാത്തിരിക്കുന്നത് നല്ല അനുഭവങ്ങളാകില്ല. സമാധാനമായി ജീവിതം മുന്നോട്ടു പോകാൻ അവർക്ക് കഴിയാറില്ല. അതിന്‍റെ കാരണങ്ങൾ പലതാണ്.
ഒന്നാമതായി അന്യന്‍റെ ഭാര്യയൊടൊപ്പം ജീവിതം മുന്നോട്ടു കൊണ്ടുപോകാം എന്നൊക്കെ ചിന്തിക്കുന്ന വ്യക്തി ഒരിക്കലും ഒരു നല്ല മനുഷ്യനല്ല. ഇത്തരക്കാരുടെ ഭൂതകാലജീവിതവും ചരിത്രവും ധാർമ്മികത മുൻനിർത്തി പരിശോധിച്ചാൽ ഒന്നിലേറെ സ്ത്രീകൾ അവരുടെ ജീവിതത്തിൽ വന്നുപോയിട്ടുള്ളതായി കാണാം. നല്ലൊരു ക്രിമിനൽ പശ്ചാത്തലവും അയാൾക്കുണ്ടാകാം.
മറ്റൊന്ന് കളങ്കമില്ലാത്ത സ്നേഹമല്ല അത്തരം ആളുകളെ ഇത്തരം പ്രവൃത്തികൾക്ക് പ്രേരിപ്പിക്കുന്നത്. എന്തെങ്കിലും ഗൂഢലക്ഷ്യങ്ങൾ ഇതിപിന്നിൽ ഉണ്ടെന്നുള്ളത് നിശ്ചയമാണ്. ഒന്നുരണ്ടു സംഭവങ്ങൾ എനിക്ക് നേരിട്ടുതന്നെ അറിവുള്ളതാണ്. ഗവർമെന്‍റിൽ ഉന്നതദ്യോഗസ്ഥനായ ഭർത്താവിനെ ഉപേക്ഷിച്ച് തന്‍റെ കാർ ഡ്രൈവറോടൊപ്പം പോയ ലക്ചറായ വീട്ടമ്മ വൈകിയാണറിഞ്ഞത് ഒരൊന്നാന്തരം ക്രിമിനലിനെയാണ് താൻ കൂടെ കൂട്ടിയതെന്ന് എല്ലാം തിരിച്ചറിയുമ്പോഴേക്കും ഒരു മടങ്ങിപ്പോക്ക് അസാധ്യമായിരുന്നു.
അപ്പോൾ ഈ വിഷയത്തിലുള്ള ആൽഫ്രഡിനെ ഒരിക്കലും ഒരു നല്ല മനുഷ്യനായി കാണാനാവില്ല. ഒരൊന്നാന്തരം ക്രിമിനലാണയാൾ. ഒരു നിഷ്കളങ്കനായ ഡോക്ടറുടെ ഭാര്യയെ വശീകരിച്ചു. സമ്പത്തും ഒരു ലക്ഷ്യമായിരിക്കാം. കാര്യമായ സമ്പത്ത് മാർഗരീറ്റ കൂടെ കൊണ്ടുപോയിരിക്കാം. തനിക്കെതിരെ ഡോക്ടറുടെ ഭാഗത്തു നിന്നും തിരിച്ചടി പ്രതീക്ഷിച്ച അയാൾ ജീവിതകാലം മുഴുവൻ ഡോക്ടറെ കുടുക്കാൻ സ്ത്രീയുടെ മാംസഭാഗങ്ങൾ നിലവറയിൽ കൊണ്ടുതള്ളി. ഒരുപക്ഷേ ആ നിലവറ അയാൾക്ക് ഏറെ പരിചിതമായ ഇടമായിരിക്കാം!
ഇനിയൊരുപക്ഷേ ഉദ്ദേശിച്ച കാര്യം സാധിച്ച ശേഷം അയാൾ തന്നെ മാർഗരീറ്റയെ കൊന്നു നിലവറയിൽ തള്ളിയതാകം. ഇങ്ങനെ തുണ്ടമാക്കണമെങ്കിൽ ജന്മനാ ക്രിമിനലായ ഒരാൾക്കേ കഴിയൂ. ഏതായാലും നനഞ്ഞു, ഇനി കുളിച്ചു കയറുകയേ മാർഗ്ഗമുള്ളൂ.
ട്രീസയുടെ സുഹൃത്തെന്ന നിലക്ക് ഈ വിഷയം ഒഴിവാക്കാനും സാധ്യമല്ല. ഏതായാലും ആദ്യമായി സംഭവ പരമ്പരകൾ നടന്ന രാത്രിക്കു ശേഷം റോസ് വില്ലയിലെത്തിയ ഏലിയാന്‍റിയെ ഒന്നു കാണണം. പിന്നെ റോസ് വില്ല. അവിടെ ഒരു കോടിയുടെ റിനോവേഷൻ ചെയ്താലും എനിക്കു പ്രയോജനം ചെയ്യുന്ന എന്തെങ്കിലും എനിക്കായി അവശേഷിച്ചു കാണും.
അതിനു ശേഷം പെട്ടെന്ന് അപ്രത്യക്ഷയായ റിസ്വാന ഒരു അന്വേഷണം അർഹിക്കുന്നുണ്ട്. റൊസേരിയോ നടത്തിയിരുന്ന ക്ലിനിക്കിനു സമീപം താമസിച്ചിരുന്ന അവർ വിറ്റുപെറുക്കിപോയി എന്നാണ് മിയ പറഞ്ഞത്. അവർ അവിടെ വച്ച് അവരുടെ കണ്ണിൽ ഏറ്റവും വെറുക്കപ്പെട്ട ഒരു വ്യക്തിയെക്കുറിച്ചുള്ള അന്വേഷണം ധൃതിയിൽ അവസാനിപ്പിച്ചു. അവർ അന്വേഷണം അവസാനിപ്പിച്ചിടത്തു നിന്നും എനിക്ക് അന്വേഷണം തുടരേണ്ടതുണ്ട്. അതൊരു അടഞ്ഞ അദ്ധ്യായമായി കാണാനാവില്ല.
സന്ധ്യയാകാറായിരിക്കുന്നു. അത്താഴം കഴിച്ചെന്നു വരുത്തി വന്നു കിടന്നു. ആ ദിവസത്തെ സംഭവ പരമ്പരകളിൽ മനസ്സ് കാകനെപോലെ ചുറ്റിത്തിരിയുന്നു.
ട്രീസ കിടക്കയിൽ വന്നിരുന്നു. മുഖത്ത് ഉറക്കക്ഷീണം കലശലായുണ്ട്. ഞാൻ ഉദ്യോഗത്തോടെ ആരാഞ്ഞു.
“എന്താണ് അഭിപ്രായം?”
“കേക്ക് ഒന്നാന്തരമായിരുന്നു. എന്താ അതിന്‍റെ ഒരുരുചി. നാക്കിൽ വച്ചാലലിയുന്നത്ര സോഫ്റ്റ്. കുറച്ച് വീട്ടിൽ കൊണ്ടുവരാമായിരുന്നു. ഫ്രിഡ്ജിൽ വക്കാമായിരുന്നു.”
അവളുടെ മറുപടി എന്നെ നിരാശയിലാഴ്ത്തി
എന്‍റെ ഉദ്യോഗഭരിതമായ മനസ് തണുത്തു. ഞാൻ പിറുപിറുത്തുകൊണ്ട് തിരിഞ്ഞു കിടന്നു
“ശരി… കിടക്കാം.”
