പുരുഷ വന്ധ്യതയ്‌ക്ക് കാരണമായിത്തീരുന്ന ലൈംഗിക ബലഹീനതയ്‌ക്ക് ആധുനിക ചികിത്സ ലഭ്യമാണ്. ദോഷ വശങ്ങളില്ലാത്ത ചില സർജിക്കൽ ട്രീറ്റ്‌മെന്‍റുകൾ വഴിയും ഇത്തരം ലൈംഗിക പ്രശ്നങ്ങൾ പരിഹരിക്കാനാവും.
പുരുഷന്മാരിലെ ലൈംഗിക പ്രശ്നങ്ങൾ പ്രധാനമായും രണ്ട് തരത്തിലാണ് കാണപ്പെടുന്നത്. മാനസികവും ശാരീരികവുമായ പ്രശ്നങ്ങൾ. ഉദ്ധാരണശേഷി ഇല്ലായ്‌മയാണ് ഈ വിഭാഗത്തിൽ എത്തുന്ന രോഗികളിൽ പകുതി പേരുടെയും പ്രശ്നം എന്നാണ് പഠനങ്ങൾ പറയുന്നത്. പുരുഷന്മാരുടെ ഉദ്ധാരണക്കുറവു പരിഹരിച്ചാൽ തന്നെ പല ദമ്പതികളുടെയും വന്ധ്യതാ പ്രശ്നത്തിനു പരിഹാരം കണ്ടെത്താൻ സാധിച്ചേക്കും.
നിസ്സാരമായ ലൈംഗിക ബലഹീനതകൾ പരിഹരിച്ചാൽ തന്നെ ചെലവേറിയ വന്ധ്യതാ നിവാരണ ചികിത്സ ഒഴിവാക്കാം എന്ന കാര്യം പലരും ആലോചിക്കാറില്ല. മടി മൂലമോ നാണക്കേടുമൂലമോ ആവാം പലരും തുടക്കത്തിൽ തന്നെ ഡോക്‌ടറെ സമീപിക്കാൻ വിമുഖത കാട്ടുന്നത്. ഇത്തരത്തിലുള്ള മാനസിക പെരുമാറ്റവും ചികിത്സയ്‌ക്ക് തടസ്സമാണ്.
ഐടി പോലെയുളള പുതിയ തൊഴിൽ മേഖലകൾ ദമ്പതിമാരിൽ ലൈംഗിക പ്രശ്നങ്ങൾ സൃഷ്‌ടിക്കുന്നുണ്ട്. അമിത ജോലിഭാരം, അധികനാൾ അകന്നു നിൽക്കേണ്ടി വരുന്ന അവസ്‌ഥ ഇതെല്ലാം ലൈംഗിക വിരക്‌തി സൃഷ്‌ടിക്കുന്നു. അതുപോലെ പ്രവാസികളായ ഭർത്താക്കന്മാർ ഉളള കുടുംബങ്ങളിൽ ലൈംഗിക, വന്ധ്യതാ പ്രശ്നങ്ങൾ കൂടുതലായി കാണുന്നുണ്ട്.
ജീവിതരീതി
40 മുതൽ 60 വയസു വരെ പ്രായമുള്ള പുരുഷന്മാർ ചികിത്സയ്‌ക്ക് എത്തുന്നുണ്ടെന്ന് പല ഡോക്‌ടർമാരും പറയുന്നു. പ്രായമേറിയവരിൽ അധികവും ബി.പി, പ്രമേഹം തുടങ്ങിയ രോഗങ്ങൾ ഉളളവരാണത്രെ. സംതൃപ്‌തമായ ലൈംഗിക ജീവിതം നയിക്കുവാൻ പുരുഷന്മാർ കൃത്യമായ ഭക്ഷണരീതികളും വ്യായാമമുറകളും സ്വീകരിക്കേണ്ടതുണ്ട്. ജീവിതരീതിയും ലൈംഗിക ജീവിതത്തെ ബാധിക്കുന്ന കാര്യമാണ്.
ശരിയായ ചികിത്സ
വ്യാജ ചികിത്സകൾ തേടരുത്. ഏതുവിധത്തിലുള്ള ലൈംഗിക പ്രശ്നങ്ങൾക്കും ശാസ്‌ത്രീയമായ പരിഹാരം ഉണ്ട്. ഹോർമോൺ ഇംബാലൻസ് പോലെയുളള പ്രശ്നങ്ങൾക്ക് മരുന്നു കഴിക്കേണ്ടി വരും. ചില കേസുകളിൽ ശസ്‌ത്രക്രിയയും ആവശ്യമായി വരാം. ഭയം, മാനസിക പ്രശ്നങ്ങൾ, ഡിപ്രഷൻ തുടങ്ങിയ പ്രശ്നങ്ങൾക്ക് ചികിത്സ തേടണം. നിസ്സാരമായ ലൈംഗിക ബലഹീനതകൾ പരിഹരിച്ചാൽ ദീർഘകാല ചികിത്സകളും ഒഴിവാക്കാൻ സാധിക്കും. ശുക്ലത്തിൽ ഒട്ടും ബീജാണു ഇല്ലാത്ത അവസ്‌ഥയെ നോൺ ഒബ്‌സ്‌ട്രക്‌ടീവ് അഡൂസ്‌പേമിയയ്‌ക്കു MICRO- TESEI CSI (micro testicular sperm extraction and ICSI) എന്ന ചികിത്സാ വിധിയും ഇന്നുണ്ട്.
പുരുഷ വന്ധ്യതയ്‌ക്കു കാരണമായി തീരുന്ന ലൈംഗിക ബലഹീനതയ്‌ക്ക് ആധുനിക ചികിത്സാ സൗകര്യങ്ങൾ ലഭ്യമാണ്. അതിനാൽ ഇത്തരം പ്രശ്നങ്ങൾ നേരിടുന്ന ദമ്പതികൾ നിരാശരാവേണ്ടതില്ല.
ആരോഗ്യകരമായ ലൈംഗികത
ആരോഗ്യകരമായ ദാമ്പത്യബന്ധത്തിന് ആരോഗ്യകരമായ ലൈംഗികതയും അനിവാര്യമാണ്. നല്ല ലൈംഗിക ജീവിതത്തിന് ഉണർവ്വും ആത്മവിശ്വാസവും നൽകും. ലൈംഗിക ജീവിതം മനോഹരമാക്കാനുള്ള ചില വഴികൾ…
- പങ്കാളിയുടെ ഇഷ്‌ടാനിഷ്‌ടങ്ങൾ അറിയാൻ മറക്കരുത്.
- ലൈംഗികമായി പെരുമാറാൻ പഠിക്കുക, ഇത് ഭിന്നതകൾ കുറയ്‌ക്കും.
- പരസ്‌പരം കുറ്റപ്പെടുത്താതിരിക്കുക.
- ലൈംഗികാവയവങ്ങൾ വൃത്തിയായി സൂക്ഷിക്കുക.
- ശരിയായ ലൈംഗിക അറിവ്, ഭയവും ഉത്കണ്ഠയും ഇല്ലാതാക്കുന്നു.
- മദ്യ ലഹരിയിൽ ലൈംഗിക ബന്ധത്തിനു ശ്രമിക്കരുത്.
- നിർബന്ധപൂർവ്വമുള്ള രതി ആസ്വാദ്യകരം ആയിരിക്കുകയില്ല.
- ബലം പ്രയോഗിച്ചും കെട്ടിപ്പുണർന്നും നിർബന്ധിച്ചും ഒരാളിൽ ലൈംഗികവികാരം ഉണർത്താൻ കഴിയില്ല. അതിനാൽ മനസ്സിനെ ആദ്യം തൊടുക. ശരീരം തനിയെ ഉണർന്നുകൊള്ളും. സെക്‌സ് ആഗ്രഹിക്കുന്ന സമയത്ത് പങ്കാളികൾ ഇക്കാര്യവും ശ്രദ്ധിക്കണം.
- തന്‍റെ ശരീരത്തിന്‍റെ രതി കേന്ദ്രങ്ങളെ കുറിച്ച് പങ്കാളിയോട് തുറന്നു പറയാം.
- സാമ്പത്തിക പ്രതിസന്ധിയെ ലൈംഗിക ജീവിതത്തിലേക്ക് വലിച്ചിടാതിരിക്കുക.
