പ്രകൃതി അതിന്‍റെ സൗന്ദര്യ സമ്പത്ത് ജാർഖണ്ഡിൽ നിറയെ വർഷിച്ചിട്ടുണ്ട്. ഇടതൂർന്ന വനങ്ങൾ, മനോഹരമായ താഴ്‌വരകൾ, വെള്ളച്ചാട്ടങ്ങൾ, വന്യജീവികൾ, ധാതു സമ്പത്ത്, സംസ്കാരം എന്നിവയാൽ സമ്പന്നമായ ഈ സംസ്ഥാനം വിനോദസഞ്ചാരികൾക്ക് കാണാൻ ധാരാളം കാഴ്ചകൾ സമ്മാനിക്കുന്നു
റാഞ്ചി
ജാർഖണ്ഡിന്‍റെ തലസ്ഥാനമായ റാഞ്ചി സമുദ്രനിരപ്പിൽ നിന്ന് 2064 അടി ഉയരത്തിലാണ് സ്ഥിതി ചെയ്യുന്നത്. എല്ലാ വശങ്ങളിലും കാടുകളാലും മലകളാലും ചുറ്റപ്പെട്ടിരിക്കുന്നു. താഴികക്കുടത്തിന്‍റെ ആകൃതിയിലുള്ള നിരവധി പർവതങ്ങൾ പ്രദേശത്തിന്‍റെ ഭംഗി കൂട്ടുന്നു. ഹിന്ദി, നാഗ്പുരി, ഭോജ്പുരി, മഗാഹി, ഖോർത്ത, മൈഥിലി, ബംഗ്ലാ, മുണ്ടാരി, ഒറോൺ, പഞ്ച്പർഗനിയ, കുടുഖ്, ഇംഗ്ലീഷ് ഇങ്ങനെ പല ഭാഷകൾ സംസാരിക്കുന്നവരെ ഈ ജില്ലയിൽ എളുപ്പത്തിൽ കണ്ടെത്താനാകും. ഇവിടെയുള്ള നിരവധി വെള്ളച്ചാട്ടങ്ങളും പൂന്തോട്ടങ്ങളും വിനോദസഞ്ചാരികളെ റാഞ്ചിയിലേക്ക് ആകർഷിക്കുന്നു.
ഹുൻഡ്രു വെള്ളച്ചാട്ടം
റാഞ്ചി നഗരത്തിൽ നിന്ന് 40 കിലോമീറ്റർ അകലെ സ്ഥിതി ചെയ്യുന്ന ഈ വെള്ളച്ചാട്ടത്തിന്‍റെ പ്രത്യേകത. നദിയിലെ വെള്ളം 320 അടി ഉയരത്തിൽ നിന്ന് താഴേക്ക് പതിക്കുകയും മനോഹരമായ കാഴ്ച നൽകുകയും ചെയ്യുന്നു എന്നതാണ്. റാഞ്ചിപുരുലിയ റോഡിൽ അനഗഡയ്ക്ക് സമീപം സ്ഥിതി ചെയ്യുന്ന ഈ വെള്ളച്ചാട്ടത്തിൽ കാർ, മോട്ടോർ സൈക്കിൾ, ബസ്, ട്രാക്കർ (10-12 പേർക്ക് ഇരിക്കാവുന്ന ബഗ്ഗി കാർ) എന്നിവയിൽ എത്തിച്ചേരാം.
ജോൻഹ ഫാൾ (ഗൗതം ധാര)
ഇവിടെ രാധു നദി 140 അടി ഉയരമുള്ള ഒരു പർവതത്തിൽ നിന്ന് താഴേക്ക് പതിക്കുകയും വെള്ളച്ചാട്ടം രൂപപ്പെടുകയും ചെയ്യുന്നു. വെള്ളച്ചാട്ടത്തിനും അരുവിക്കും സമീപം എത്താൻ 489 പടികൾ ഒരുക്കിയിട്ടുണ്ട് എന്നതാണ് ഇതിന്‍റെ ഭംഗി. പടികൾ കയറുമ്പോഴും ഇറങ്ങുമ്പോഴും പ്രത്യേകം ശ്രദ്ധിക്കണം, കാരണം വെള്ളത്തിൽ നനഞ്ഞതിനാൽ പടികൾ വഴുക്കലുണ്ട്. റാഞ്ചിപുരുലിയ റോഡിൽ സ്ഥിതി ചെയ്യുന്ന ഈ വെള്ളച്ചാട്ടം റാഞ്ചി നഗരത്തിൽ നിന്ന് 49 കിലോമീറ്റർ അകലെയാണ്, കാർ, മോട്ടോർ സൈക്കിൾ, ബസ്, ട്രെക്കർ എന്നിവയിൽ എത്തിച്ചേരാം.
ദസം വെള്ളച്ചാട്ടം
നഗരത്തിൽ നിന്ന് 46 കിലോമീറ്റർ അകലെ സ്ഥിതി ചെയ്യുന്ന ഈ വെള്ളച്ചാട്ടം കാഞ്ചി നദിയുടെ ശേഖരണത്തിൽ നിന്നാണ് രൂപപ്പെടുന്നത്. ഇവിടെ കാഞ്ചി നദി 144 അടി ഉയരമുള്ള ഒരു കുന്നിൽ നിന്ന് താഴേക്ക് പതിക്കുകയും അതിമനോഹരമായ ഒരു കാഴ്ച സമ്മാനിക്കുകയും ചെയ്യുന്നു. പ്രകൃതിസൗന്ദര്യം നിറഞ്ഞ ഈ വെള്ളച്ചാട്ടത്തിലെ വെള്ളത്തിനടിയിൽ അപകടകരമായ കൂർത്ത പാറകൾ ഉള്ളതിനാൽ ഒരിക്കലും വെള്ളത്തിലിറങ്ങാൻ ശ്രമിക്കരുത്. വെള്ളച്ചാട്ടത്തിന് സമീപമുള്ള കല്ലുകളും വളരെ മിനുസമാർന്നതിനാൽ അവയിൽ പ്രത്യേക ശ്രദ്ധയോടെ നടക്കേണ്ടതുണ്ട്.കാർ, മോട്ടോർ സൈക്കിൾ, ബസ് അല്ലെങ്കിൽ ചെറിയ വാഹനങ്ങൾ എന്നിവയിൽ വെള്ളച്ചാട്ടത്തിലെത്താം.
ഹിർനി വെള്ളച്ചാട്ടം
റാഞ്ചി ചൈബാസ റോഡിൽ സ്ഥിതി ചെയ്യുന്ന ഈ വെള്ളച്ചാട്ടം റാഞ്ചിയിൽ നിന്ന് ഏകദേശം 70 കിലോമീറ്റർ അകലെയാണ്. കാർ, മോട്ടോർ സൈക്കിൾ, ബസ്, ട്രാക്കർ എന്നിവയിലൂടെയും ഇവിടെയെത്താം. 120 അടി ഉയരമുള്ള പർവതത്തിൽ നിന്ന് വീഴുന്ന വെള്ളത്തിന്‍റെ സംഗീതം വിനോദസഞ്ചാരികളുടെ ഹൃദയത്തെ ത്രസിപ്പിക്കുന്നതാണ്.
