വർഷങ്ങൾക്കു ശേഷം ജ്യോതിയെ മുന്നിൽ കണ്ടപ്പോൾ ഞാൻ ശരിക്കും ഞെട്ടിപ്പോയി. വിനീതിന് നല്ല ദാമ്പത്യം ആശംസിക്കാൻ ആണ് അവൾ അമേരിക്കയിൽ നിന്ന് എത്തിയത്. അവന്‍റെ കല്യാണം കഴിഞ്ഞ് രണ്ടു വർഷം കഴിഞ്ഞ്.
ഞാൻ കുറെ നാളായി യുഎസിലായിരുന്നു. ഇപ്പോൾ കുറച്ച് നാളായി പൂനെയിലാണ്. വിനീത് വിവാഹിതനായ വിവരം ഞാൻ അടുത്തിടെയാണ് അറിഞ്ഞത്. വളരെ സന്തോഷം തോന്നി. പിന്നെ മാഡത്തിനെ ഒന്ന് കാണണമെന്നും. അതാണ് ഓടി വന്നത്. ഇത് ചില കത്തുകൾ ആണ്. ഇതിനി മാഡത്തിന്‍റെ സ്വത്താണ്. മാഡത്തിന് അത് സൂക്ഷിച്ചു വയ്ക്കുകയോ നശിപ്പിക്കുകയോ ചെയ്യാം. ഞാൻ അവളുടെ മുഖത്ത് മിഴിച്ചു നോക്കിയിരുന്നു.
കുറച്ചുനേരം ഇരിക്കരുതോ… ചായ എന്തെങ്കിലും… ഞാൻ ആതിഥ്യ മര്യാദ പാലിക്കാൻ ശ്രമിച്ചു എങ്കിലും അവൾ അത് സ്നേഹപൂർവ്വം നിരസിച്ചു. എന്തോ ജോലി ചെയ്തു തീർക്കാൻ ഉണ്ടെന്ന് പറഞ്ഞ് തിടുക്കപ്പെട്ട് ഇറങ്ങിപ്പോയി.
അവൾ പോയ ശേഷം ടീപോയിൽ വെച്ചിരുന്ന കത്തുകൾ എടുത്ത് ഓരോന്ന് തുറന്നു നോക്കി. എനിക്ക് എന്‍റെ കണ്ണുകളെ പോലും വിശ്വസിക്കാനായില്ല . വിനീത് ജ്യോതിക്ക് അയച്ച പ്രണയ ലേഖനങ്ങൾ ഒന്ന് രണ്ടെണ്ണം വായിച്ച ശേഷം ഞാൻ അതെല്ലാം എടുത്ത് അലമാരയിൽ ഭദ്രമായി വെച്ചു.
വിദ്യാർത്ഥികളുടെ പുസ്തകങ്ങളിൽ നിന്നും ഇത്തരം കത്തുകൾ പിടിച്ചെടുക്കുകയും വായിക്കുകയും ചെയ്തിരുന്നു. അന്ന് അതിൽ നേരിയ രസം തോന്നിയിരുന്നു എന്നത് സത്യമാണ്. പക്ഷേ ഇപ്പോൾ സ്വന്തം മകൻ എഴുതിയ കത്തുകൾ വായിക്കേണ്ടി വരിക. ജീവിതത്തിൽ ഒരിക്കലും വിചാരിച്ചതല്ല. ഒന്ന് രണ്ട് കത്തുകളിൽ നിന്നും അവരുടെ പ്രണയത്തിന്‍റെ ആഴത്തെക്കുറിച്ച് എനിക്ക് ഊഹിക്കാൻ കഴിഞ്ഞു. പക്ഷേ വിനുമോൻ ഇതേപ്പറ്റി ഒരിക്കൽ പോലും എന്നോട് സൂചിപ്പിക്കാതിരുന്നതിൽ എനിക്ക് ആശ്ചര്യം തോന്നി.
കോളേജിൽ ചെന്നിട്ടും സ്വസ്ഥത കിട്ടിയില്ല. ഔദ്യോഗിക തിരക്കുകളിൽ മുഴുകുമ്പോൾ പ്രശ്നം തൽക്കാലത്തേക്ക് എങ്കിലും മറക്കാം എന്ന് വിചാരിച്ചിരുന്നതാണ്.
അവൾ മുമ്പത്തേതിലും കൂടുതൽ സുന്ദരി ആയിരിക്കുന്നു. നടപ്പിലും എടുപ്പിലും തികഞ്ഞ ആത്മവിശ്വാസം. അവളുടെ വ്യക്തിത്വത്തിന് അഭൗമ്യമായ പ്രൗഡി കൈവന്നിരിക്കുന്നു. ജ്യോതിയെക്കുറിച്ച് കൂടുതൽ ചോദിക്കാതിരുന്നതിൽ എനിക്ക് കുറ്റബോധം തോന്നി.
ജ്യോതി എന്‍റെ പ്രിയ ശിഷ്യയായിരുന്നു. പിന്നീട് എപ്പോഴോ എനിക്ക് അവളോട് ഇഷ്ടക്കേട് തോന്നിയത് നേരാണ്. ഇതേ കോളേജിൽ പഠിക്കുന്ന എന്‍റെ മകന്‍റെയും കൂട്ടുകാരുടെയും ഒപ്പം കാണാനിടയായതായിരുന്നു കാരണം. വിനീത്… എന്‍റെ മകൻ എനിക്കെന്നും ദൗർബല്യമായിരുന്നു. ജയശങ്കറിന്‍റെ മരണശേഷം ഞാൻ അവനു വേണ്ടി മാത്രമാണ് ജീവിച്ചത്. എല്ലാമെല്ലാമായ പൊന്നു മോനെ മറ്റാരെങ്കിലും തട്ടിയെടുക്കുമോ എന്ന ഭയം എന്നെ എപ്പോഴും വേട്ടയാടിയിരുന്നു. ഒരിക്കൽ ആരുമില്ലാത്ത നേരത്ത് അവളെ ഓഫീസ് മുറിയിൽ വിളിച്ചുവരുത്തി ശകാരിക്കുക വരെ ചെയ്തു.
നീ കോളേജിൽ പഠിക്കാനോ അതോ സൗന്ദര്യം പ്രദർശിപ്പിക്കാനാണോ വരുന്നത്? പഠിപ്പിൽ ശ്രദ്ധിയ്ക്ക്, അല്ലാതെ വല്ല ആമ്പിള്ളേരുടെയും പുറകെ തൂങ്ങി നടക്കുകയല്ല വേണ്ടത്. എനിക്ക് നിന്‍റെ ബാക്ക്ഗ്രൗണ്ട് നന്നായി അറിയാം. ഇനി മേലിൽ ഇത് ആവർത്തിക്കരുത്. ആവർത്തിച്ചാൽ ചിലപ്പോൾ നീ കോളേജിൽ നിന്നും പുറത്താവും. നൗ ഗെറ്റ് ലോസ്റ്റ് ഒരു പ്രിൻസിപ്പാളിന്‍റെ കാർക്കശ്യം നിറഞ്ഞ മൂടുപടമായിരുന്നു എങ്കിലും ആശങ്കകൾ അനുഭവിക്കുന്ന ഒരു സാധാരണ അമ്മയുടെ മനസ്സായിരുന്നു എനിക്കപ്പോൾ.
