പലവിധ ഉത്തരവാദിത്തങ്ങൾ ഒരേ സമയം ഏറ്റെടുത്ത് മാനസിക സമ്മർദ്ദത്തിനു അടിപ്പെടുന്നുണ്ടോ? എങ്കിൽ അതു പരിഹരിക്കാനുള്ള ചില മാർഗ്ഗങ്ങളിതാ:-
പ്രതികരിക്കുക
നിങ്ങൾക്ക് ചുറ്റും സംഭവിക്കുന്ന ഏത് കാര്യത്തിനോടും പ്രതികരിക്കുക. എല്ലാം നിശബ്ദമായി റോബോട്ടിനെ പോലെ സ്വീകരിക്കരുത്. മാനസിക സമ്മർദ്ദം കൊണ്ട് ഉണ്ടാകുന്ന വൈകാരിക മാറ്റങ്ങൾ തിരിച്ചറിയുക. നിങ്ങളുടെ മനസ്സിനെ നിങ്ങളല്ലാതെ മറ്റാർക്കാണ് മനസിലാക്കാനാവുക.
കഴിവിന്‍റെ പരമാവധി ജോലി ചെയ്യരുത്
വീടായാലും ഓഫീസായാലും താൻ ചെയ്താലെ എല്ലാം പെർഫക്റ്റാകൂ എന്ന് കരുതി മുഴുവൻ ഉത്തരവാദിത്തവും സ്വന്തം ചുമലിൽ ഏറ്റെടുക്കരുത്. ഓർക്കുക, സ്വന്തം കഴിവിന് അപ്പുറത്തായി കഠിനമായി ജോലി ചെയ്‌തതു കൊണ്ട് നിങ്ങൾക്ക് പ്രത്യേകിച്ച് മെഡലൊന്നും ലഭിക്കാൻ പോകുന്നില്ല. മറിച്ച് ആളുകൾ നിങ്ങളിൽ നിന്നും കൂടുതൽ പ്രതീക്ഷിക്കും.
മറ്റൊന്ന് കുറ്റപ്പെടുത്തലുകൾ അഭിമുഖീകരിക്കേണ്ടി വരും. ഇന്ന് ടീം വർക്കിന്‍റെ കാലഘട്ടമാണ്. പരസ്പരം മനസിലാക്കാനും അറിയാനുമുള്ള അവസരമാണ് അതുവഴി ഒരുങ്ങുന്നത്. മാനസിക പിരിമുറുക്കവും സംഘർഷവും ഒഴിഞ്ഞു കിട്ടും. വീട്ടുജോലി ചെയ്യുന്നതിനു പോലും കുടുംബാംഗങ്ങളുടെ സഹായം സ്വീകരിക്കാം.
പോസിറ്റീവായ കാഴ്ചപ്പാട്
തെറ്റുകുറ്റങ്ങൾ ഉണ്ടായാൽ അതിന് താൻ മാത്രമായിരിക്കും ഉത്തരവാദിയെന്ന ചിന്ത മനസിൽ നിന്നും ഉപേക്ഷിക്കണം. ഇപ്രകാരം ഓഫീസിൽ വച്ച് ഏതെങ്കിലും പ്രൊജക്റ്റ് കയ്യിൽ നിന്നും നഷ്ടപ്പെട്ടാൽ “ഈ ജോലി എനിക്ക് ചെയ്യാനെ പറ്റില്ല,” അല്ലെങ്കിൽ “എനിക്കതിനുള്ള അർഹതയില്ല” എന്നിങ്ങനെയുള്ള നെഗറ്റീവ് ചിന്തകൾ മനസിൽ പ്രതിഷ്ഠിക്കരുത്.
ധീരയാവുക
മാതാപിതാക്കളുടെ കാഴ്ചപ്പാടുമായി നമ്മുടെ പെരുമാറ്റത്തിന് അഗാധമായ ബന്ധമുണ്ടാകാം. മുതിർന്നു കഴിഞ്ഞാലും അതിൽ നിന്നും മോചനം നേടുക അത്രയെളുപ്പമായിരിക്കുകയില്ല. ഇന്നത്തെ തിരക്കു പിടിച്ച ജീവിത സാഹചര്യത്തിൽ മറ്റുള്ളവരെക്കുറിച്ച് ചിന്തിക്കാൻ ആർക്കാണ് സമയം. എല്ലാവരും തന്നെ സ്വന്തം ലോകത്ത് ഒതുങ്ങി കൂടുന്ന കാഴ്ചയാണ്. ഇപ്രകാരം ഓഫീസ് അന്തരീക്ഷവുമായി ഇണങ്ങിച്ചേരാൻ കഴിയുന്നില്ലെങ്കിൽ പരാജയം ഉറപ്പായിരിക്കും. ഏത് പ്രതിസന്ധിയേയും മറികടക്കാനുള്ള മനഃകരുത്ത് ആർജ്‌ജിക്കുകയാണ് വേണ്ടത്.
പ്രകൃതിയുമായി ഇണങ്ങി കഴിയാം
രാവിലെ സൂര്യോദയത്തിന് മുമ്പായി എഴുന്നേറ്റ് പ്രഭാത സവാരിക്കിറങ്ങാം. നല്ല പച്ചപ്പുള്ള സ്‌ഥലങ്ങളിൽ പ്രഭാത സവാരി നടത്തുക, നദി, കുളം, അരുവി, സമുദ്രം, പൂന്തോട്ടങ്ങൾ എന്നിവ സ്‌ഥിതി ചെയ്യുന്ന ഇടങ്ങളിൽ സവാരി നടത്തുന്നത് മനസിനും മസ്തിഷ്കത്തിനും ആശ്വാസം പകരും.
പരിഹാരം കാണുക
എത്രയൊക്കെ പ്രശ്നങ്ങൾ ഉണ്ടായാലും അതൊക്കെ വളരെ ലൈറ്റായി കാണാൻ ശ്രമിക്കുക. അത്തരം പ്രശ്നങ്ങളെ ചൊല്ലിയുള്ള ആധിയും തിടുക്കവും കൂടുതൽ പ്രശ്നങ്ങൾക്ക് വഴി വയ്ക്കും. ധൈര്യപൂർവ്വം പ്രതികൂല പരിതസ്‌ഥിതികളെ അഭിമുഖീകരിക്കാം. പ്രശ്നങ്ങളെപ്പറ്റി ശാന്തമായി ചിന്തിച്ച് വേണ്ട കാര്യങ്ങൾ ചെയ്യുക. അതുവഴി പ്രശ്നം പരിഹരിക്കപ്പെടും.
ദിനചര്യ മാറ്റുക
ദിവസവും ഒരേ ജോലി ചെയ്ത് മടുത്തിരിക്കുകയാണെങ്കിൽ ഓഫീസിലും മടുപ്പ് അനുഭവപ്പെടുകയാണെങ്കിൽ കുറച്ച് ദിവസം അവധിയെടുത്ത് കറങ്ങാൻ പോകാം. വല്ലപ്പോഴും ചെറിയ ഗെറ്റ് റ്റുഗദറുകൾ സംഘടിപ്പിക്കുക. മനസിന് ഇത്തരം ഒത്തുകൂടലുകൾ ആഹ്ലാദം പകരും.
നല്ലൊരു ശ്രോതാവാകുക
മറ്റുള്ളവർ പറയുന്നതിനോട് നിങ്ങൾ അനുകൂലിക്കുന്നില്ലെങ്കിൽ കൂടി അവർ പറയുന്ന കാര്യം ശ്രവിക്കുക. പറയുന്നതെന്താണെന്ന് അറിയാൻ ശ്രമിക്കുക. അവർ പറയുന്ന കാര്യം നിങ്ങൾ സശ്രദ്ധം ശ്രദ്ധിക്കുന്നുണ്ടെന്ന കാര്യം അവരെ ബോധ്യപ്പെടുത്തുക.
