പ്രകൃതി നിയമമാണ് സെക്സ്. കൂടുതൽ നല്ല ജീവിതത്തിനും വഴിയൊരുക്കുന്ന ആഹ്ലാദകരവും ആരോഗ്യദായകവുമായ ഒരു പ്രക്രിയയാണിത്. ആരോഗ്യകരമായ ലൈംഗിക ബന്ധം സ്ട്രെസ്സും ടെൻഷനും കുറയ്ക്കുന്നു. മറ്റു വ്യക്തികളോടും സമൂഹത്തോടും അനായാസം ഇടപഴകാൻ സഹായിക്കുന്ന അനുഭവമാണ് സെക്സ് എന്നും തെളിയിക്കപ്പെട്ട സംഗതിയാണ്. ആരോഗ്യകരമായ സെക്സ് ഒരാളുടെ ജീവിതത്തെ തന്നെ മാറ്റി മറിയ്ക്കാം. നല്ല ആത്മവിശ്വാസത്തോടെ ജീവിതത്തെ നോക്കി കാണാൻ ആരോഗ്യകരമായ സെക്സ് സഹായിക്കുന്നു. നല്ല സെക്സ് നല്ല ആരോഗ്യം നൽകും എന്നർത്ഥം.
ലൈംഗികതയും ആരോഗ്യപ്രശ്നങ്ങളും
സ്വപ്നങ്ങളും, പ്രതീക്ഷകളും പങ്കു വയ്ക്കുന്നതു പോലെയാണ് വിവാഹ ബന്ധത്തിലെ ലൈംഗികതയും. മനസ്സിലെ ഉൽകണ്ഠ, ഭയം എന്നിവയെല്ലാം മറ നീക്കി പുറത്ത് വരണമെങ്കിൽ ആകാംക്ഷയെ പരസ്പരം പങ്കു വയ്ക്കുക.
ലൈംഗികതയെക്കുറിച്ചുള്ള തുറന്ന സംസാരമാണ് ദാമ്പത്യത്തിൽ ഉണ്ടാകേണ്ടത്. രണ്ടാളുടേയും മാനസികവും ശാരീരികവുമായ ആരോഗ്യവും കൂടി കണക്കിലെടുത്തു വേണം ലൈംഗിക ബന്ധത്തിലേക്ക് കടക്കേണ്ടത്. വളർന്നു വന്ന സാഹചര്യങ്ങളും സാമൂഹിക വിലക്കുകളുടെ അതിപ്രസരവും ലൈംഗികത സംബന്ധിച്ച ചർച്ചകൾക്ക് തടസ്സം സൃഷ്ടിക്കുന്നുണ്ട്. ഇത് മറികടക്കണമെങ്കിൽ വിവാഹ ജീവിതത്തിലെ പൂർണ്ണതയ്ക്ക് ലൈംഗികത അനിവാര്യമാണെന്നുള്ള അറിവ് വളർന്നു വരണം.
ശരീര ഭാഷയേക്കാൾ സംസാര ഭാഷയ്ക്ക് ഇടം നൽകുക. ലൈംഗിക ബന്ധത്തിലെ ഇഷ്‌ടാനിഷ്ടങ്ങൾ പങ്കു വയ്ക്കുക. സാമീപ്യവും സ്പർശനവുമാണ് പ്രധാനം. ലഘു ചുംബനങ്ങളും സ്നേഹ പ്രകടനങ്ങളും ലൈംഗിക ജീവിതത്തിന് അത്യാവശ്യമാണ്. ലൈംഗിക ഉത്തേജനം നൽകുന്ന ഭക്ഷണങ്ങളും വായനയും നല്ലതാണ്.
സന്തോഷവും ശാന്തവുമായ സാഹചര്യമാണ് ലൈംഗിക ബന്ധത്തിന് ഏറ്റവും അനുയോജ്യം. പകൽ യാത്ര ചെയ്തത്തിന്‍റെ ക്ഷീണവും, അമിത ഭക്ഷണവും ലൈംഗിക സംതൃപ്തിയെ ബാധിച്ചേക്കാം. നല്ലൊരു ഉറക്കത്തിനു ശേഷം ഉണരുന്ന സമയത്ത് ലൈംഗിക ഉത്തേജനത്തിന് സഹായിക്കുന്ന ടെന്റ്റോസ്റ്റിറോൺ ഹോർമോണ് ധാരാളമുണ്ടാകും. രണ്ടു പേരുടേയും പൊതുവായ താൽപര്യങ്ങൾക്ക് മുൻഗണന നൽകുക എന്ന കാര്യം മറക്കാതിരിക്കുക. ഇണയുടെ ആരോഗ്യാവസ്‌ഥയും മാനസികാവസ്‌ഥയും കണക്കിലെടുക്കണം.
പുതിയ പരീക്ഷണങ്ങൾ?
ഇക്കാര്യത്തിൽ നമ്മളെ കടത്തിവെട്ടുന്നവരാണ് പാശ്ചാത്യർ. ദാമ്പത്യ ജീവിതം (അഥവാ പ്രണയ ജീവിതം) തന്നെ അവർക്കു പരീക്ഷണങ്ങളുടെ സുവർണ്ണ ഘട്ടമാണ്. വ്യത്യസ്‌ത രീതിയിലും ആകൃതിയിലുമുള്ള ലൈംഗിക ഉപകരണങ്ങളുടെ ലഭ്യത ഒരുപരിധി വരെ ഇതിന് അവരെ സഹായിക്കുന്നുണ്ട്. സെക്സ് ക്രിയാത്മകമാണ്. നിങ്ങളുടെ ഭാവനകൾക്കനുസരിച്ച് അതിനെ സമീപിക്കൂ.
ഗുണങ്ങൾ
- രക്തസമ്മർദ്ദം കുറയ്ക്കുന്നു.
- ശരീരത്തിന്‍റെ രോഗപ്രതിരോധ ശേഷി വർദ്ധിപ്പിക്കുന്നു.
- ഏറ്റവും നല്ല വ്യായാമമാണ് നല്ല സെക്സ്.
- ഹൃദയത്തിനും രക്ത ധമനികൾക്കും ആരോഗ്യകരം. സ്ഥിരമായി ലൈംഗിക വേഴ്ചയിൽ ഏർപ്പെടുന്നവർക്ക് ഹൃദയാഘാത സാദ്ധ്യത കുറവാണെന്ന് പഠനങ്ങൾ തെളിയിക്കുന്നു.
- സുഖ നിദ്രയിലേക്കുള്ള ഏറ്റവും നല്ല വഴിയാണ് മനോഹരമായ രതി. നല്ല ഉറക്കം നല്ല ആരോഗ്യത്തിലേക്കുള്ള കവാടമാണല്ലോ.
- സന്ധിവാതം പോലെ ശാരീരിക വേദനയുണ്ടാക്കുന്ന പല രോഗങ്ങളിലും നല്ല വേദന സംഹാരിയാകാൻ സെക്സിനു കഴിയും.
- ആരോഗ്യകരമായ ലൈംഗിക ജീവിതം നയിക്കുന്നവർക്ക് പലയിനം ക്യാൻസറുകളേയും ഒരളവുവരെ പ്രതിരോധിക്കാനാവുമത്രേ.
- പങ്കാളികൾ തമ്മിലുള്ള മാനസിക അടുപ്പം വർദ്ധിപ്പിക്കുന്നതിൽ സെക്സ് വലിയ പങ്ക് വഹിക്കുന്നുണ്ട്.
- ചുംബിക്കുമ്പോൾ കൈമാറ്റം ചെയ്യപ്പെടുന്ന ഉമിനീർ പല്ലുകളുടെ ക്ഷതം കുറയ്ക്കുന്നു. വായ്ക്കകം വൃത്തിയാക്കാൻ സഹായിക്കുന്നു.
- രതിമൂർഛ ലഭിക്കുന്ന ലൈംഗിക ബന്ധം സ്ത്രീകളുടെ തലവേദന അകറ്റാൻ സഹായിക്കുന്നു. രതിമൂർഛയ്ക്കിടെ വേദന സംഹാരിയായ എൻഡോർഫിൻ സ്ത്രീ ശരീരത്തിൽ ഉൽപാദിപ്പിക്കപ്പെടുന്നു അതിനാല്‍ വേദന അകലുന്നു.
