ആശയ്ക്ക് ആകെ ദേഷ്യം വന്നിരിക്കുകയാണ്. ഒരു വശത്ത് കൊടുംമഴ തുടരുന്നു. വൈദ്യുതി പോയിട്ട് മൂന്നു മണിക്കൂറായി. അയൽവക്കത്തെ വീട്ടിലെല്ലാം വെളിച്ചമുണ്ട്, ഈ വീട്ടിൽ മാത്രം ഇല്ല. ഈ മഴയിൽ ഒരു ഇലക്ട്രീഷ്യനെ വിളിച്ചിട്ട് കിട്ടുന്നുമില്ല. തുണി അലക്കാൻ ഇട്ടത് ഉണങ്ങിയിട്ടുമില്ല. അകത്തൊരു അയകെട്ടാൻ ഭിത്തിയിൽ സീൽ വയ്ക്കാൻ ശ്രമിച്ചിട്ട് ശരിയാകുന്നുമില്ല.
ഇങ്ങനെ ആകെ ഭ്രാന്ത് പിടിച്ചിരിക്കുമ്പോഴാണ് തൊട്ടടുത്ത വീട്ടിലെ ചിത്രചേച്ചി അങ്ങോട്ട് വന്നത്. ആശയുടെ മാത്രം വീട്ടിൽ കറന്‍റ് ഇല്ലെന്ന് മനസ്സിലായ ചിത്ര മെയിൻ സ്വിച്ച് തുറന്ന് നോക്കി ഫ്യൂസ് പരിശോധിച്ചു. സംഗതി അതു തന്നെ. ഫ്യൂസ് പോയതാണ്. ചിത്ര ഉടനെ തന്നെ ഫ്യൂസ് ശരിയാക്കി മെയിൻ സ്വിച്ച് ഓണാക്കി. കറന്‍റും വന്നു. പിന്നെ ചിത്ര വീട്ടിലേക്ക് ഫോൺ ചെയ്‌ത് തന്‍റെ ടൂൾ ബോക്സ് എടുപ്പിച്ചു. ഡ്രിൽ മെഷീൻ കൊണ്ട് രണ്ടു ആണി ഉറപ്പിച്ച് അയ കെട്ടി നനഞ്ഞ തുണി നിവർത്തിയിടാനുള്ള സൗകര്യവും ഉണ്ടാക്കി. ആശ മൂന്നുമണിക്കൂറായി ആലോചിച്ചു വിഷമിച്ചു നിന്ന കാര്യങ്ങൾ അരമണിക്കൂറിനുള്ളിൽ ചിത്ര ചെയ്‌തു കൊടുത്തു.
ചിത്രയിൽ നിന്ന് ആശയ്ക്കൊരു ഉപദേശവും കിട്ടി. ജോലിക്കാരിയാണോ, വീട്ടമ്മയാണോ എന്നൊന്നും ഇല്ല, ഇത്തരം ചില കാര്യങ്ങൾ എല്ലാ സ്ത്രീകളും പഠിച്ചിരിക്കണം. ഇതുപോലെ അടിയന്തിര ഘട്ടങ്ങളിൽ മറ്റുള്ളവരുടെ സഹായം ലഭ്യമായില്ലെങ്കിലും കാര്യം നടത്താൻ കഴിയുമല്ലോ.”
റിപ്പയറിംഗ്
ഇതൊക്കെ, പഠിക്കേണ്ട വിഷയം ആണോ എന്ന് സംശയം തോന്നിയോ? എങ്കിൽ ഒരു കാര്യം ഓർത്തോളൂ റിപ്പയറിംഗ് വിദേശ രാജ്യങ്ങളിൽ ഒരു കോഴ്സ് ആയി പഠിപ്പിക്കുന്നുണ്ട്. വീടുകളിൽ ആവശ്യമായി വരുന്ന പല ലൈഫ് സ്കില്ലുകളും പരിശീലനത്തിലൂടെ സ്വായത്തമാക്കാവുന്നതേയുള്ളൂ. പോയി പഠിക്കാൻ ഇടമില്ലെങ്കിൽ അറിയാവുന്നവരോട് ചോദിച്ച് മനസ്സിലാക്കാം. യുട്യൂബ് വഴിയും കുറെയൊക്കെ സ്കിൽസ് സ്വായത്തമാക്കാം.
ഹൗസ് പെയിന്‍റിംഗ്, പ്ലമ്പിംഗ്, കാർപ്പന്‍ററി, ഇലക്ട്രിക്കൽ ജോലികൾ, വീട്ടിലെ മറ്റു അറ്റകുറ്റപ്പണികൾ ഇതൊക്കെ ചെയ്യാൻ കുറച്ചെങ്കിലും പഠിച്ചിരുന്നാൽ വളരെയധികം പ്രയോജനപ്പെടും. ഭിത്തിയിൽ ഒരു ക്ലോക്ക് വയ്ക്കേണ്ടി വന്നാൽ ആണി തറയ്ക്കാൻ പോലും മറ്റൊരാളെ വിളിക്കുന്നവരുണ്ട്. ഇതു പോലുള്ള എല്ലാ പണികളുടെയും അടിസ്ഥാന കാര്യങ്ങൾ മനസ്സിലാക്കിയിരുന്നാൽ ജീവിതം കുറച്ചു കൂടി എളുപ്പമാവും.
വാഹനം കേടായാൽ
എല്ലാ വീട്ടിലും കാണും, ഉറപ്പായും ഒന്നോ രണ്ടോ വാഹനം എന്ന നിലയിലെക്കെത്തിയിരിക്കുന്ന കാലമാണിത്. ഉദ്യോഗസ്‌ഥരായവർക്ക് സ്വന്തം വാഹനം ഒരു അത്യാവശ്യം ആണ്. യാത്രയ്ക്കിടയിൽ വണ്ടി നിന്നു പോയാൽ ടയർ പഞ്ചറായാൽ പെട്ടു പോയതു തന്നെ. പ്രത്യേകിച്ച് അടുത്തൊന്നും ആരും സഹായത്തിന് ഇല്ലെങ്കിൽ പിന്നെ പറയുകയും വേണ്ട.
കാറും സ്ക്കൂട്ടറുമൊക്കെ ഓടിക്കാൻ പലർക്കും അറിയാം. എന്നാൽ അതിനൊരു ചെറിയ തകരാറുണ്ടായാൽ എങ്ങനെ പരിഹരിക്കണമെന്നറിയില്ല. വാഹനം ഭംഗിയായി കഴുകി വൃത്തിയാക്കാൻ പോലും അറിയില്ല. എന്നാൽ ഇതും കൂടി അറിഞ്ഞിരുന്നാൽ കാര്യങ്ങൾ എത്ര ഈസി ആവുമെന്നോർത്തു നോക്കൂ. ഓരോ തവണയും സർവീസ് സെന്‍ററുകൾ അന്വേഷിച്ചു നടക്കാനുള്ള മെനക്കേട് തോന്നിയാൽ കുറച്ചു കാര്യങ്ങൾ സ്വയം പഠിച്ചു വയ്ക്കാം.
