ശരീരഭാരം വർദ്ധിക്കുന്നത് മിക്കവരേയും അലട്ടുന്ന ഒരു പ്രധാന പ്രശ്നമാണ്. ശരീരഭാരം കുറയ്ക്കാനുള്ള ഏറ്റവും വേഗതയേറിയ മാർഗ്ഗം കഴിക്കുന്നതിനേക്കാൾ കൂടുതൽ കലോറി എരിച്ചു കളയുക എന്നതാണ്. അതിനാദ്യം വേണ്ടത് എന്താണ് കഴിക്കുന്നതെന്ന് സ്വയം നിരീക്ഷിക്കുകയെന്നതാണ്. മികച്ചൊരു ഭക്ഷണശീലം സ്വീകരിക്കാൻ അത് ഓരോരുത്തരേയും പ്രാപ്തമാക്കും.
വീട്ടിൽ എങ്ങനെ വേഗത്തിൽ ശരീരഭാരം കുറയ്ക്കാമെന്നതിന് ചില കാര്യങ്ങൾ ശ്രദ്ധിക്കേണ്ടതുണ്ട്.
ഭക്ഷണരീതി
ശരീരഭാരം നിയന്ത്രിക്കുന്നതിന് ഭക്ഷണം ഒഴിവാക്കരുതെന്നത് പ്രധാനമാണ്. ഒരു ദിവസം നാല് തവണ കഴിക്കേണ്ടതുണ്ട്. രാവിലെ, ഉച്ചയ്ക്ക്, വൈകുന്നേരം 4 മണി, രാത്രി 8 മണി എന്നീ ക്രമത്തിൽ. ശരീരത്തിൽ പോഷകങ്ങൾ സ്വാംശീകരിക്കപ്പെടുന്നതിന് ഈ രീതി പ്രധാനമാണ്. ശരീരഭാരം കുറയ്ക്കുന്നതിന് ഡയറ്റിൽ നിന്നും പഞ്ചസാര, കൊഴുപ്പ് എന്നിവ പാടെ ഒഴിവാക്കാം. ദിവസത്തിൽ നിർദ്ദിഷ്ട ഭക്ഷണങ്ങൾ കഴിക്കുക.
പൂർണ്ണമായും പഞ്ചസാര ഒഴിവാക്കാൻ കഴിയുന്നില്ലെങ്കിൽ പഞ്ചസാരയുടെ അളവ് ഗണ്യമായി കുറച്ചു കൊണ്ടുവരാം. ഒന്നോർക്കുക, നാം കഴിക്കുന്ന ഒട്ടുമുക്കാൽ മധുരപലഹാരങ്ങളിലും പഞ്ചസാര നല്ലയളവിൽ അടങ്ങിയിട്ടുണ്ട്. ഇവ കഴിക്കുമ്പോൾ ശരീരത്തിൽ പഞ്ചസാരയുടെ അളവ് വർദ്ധിക്കും. ഒപ്പം ശരീരഭാരം വർദ്ധിക്കുകയും ചെയ്യും. പഞ്ചസാര ഒഴിവാക്കാൻ സാധ്യമല്ലെങ്കിൽ ഉപയോഗിക്കുന്ന അളവ് ഗണ്യമായി കുറയ്ക്കാം.
രാവിലെ ഊർജ്ജം വൈകുന്നേരം ലഘുഭക്ഷണം
വ്യായാമത്തിന് മുമ്പായി ചെറിയൊരു പ്രോട്ടീൻ ബാർ കഴിക്കുന്നത് ഉചിതമായിരിക്കും. വ്യായാമത്തിനു ശേഷം മിനറൽ സോൾട്ട് നിറഞ്ഞ വെള്ളമോ മറ്റ് ആരോഗ്യദായക പാനീയമോ കുടിക്കുന്നത് ശരീരത്തിലെ ജലനഷ്ടത്തെ ലഘൂകരിക്കും. സ്വന്തം ലക്ഷ്യങ്ങൾക്കനുസൃതമായി വ്യക്തിഗത ഡയറ്റ് പ്ലാൻ ചെയ്യാൻ ഒരു ന്യൂട്രിഷ്യനിസ്റ്റിന്‍റെ സഹായം തേടാം.
ജങ്ക്ഫുഡ് ഉപേക്ഷിക്കുക
ശരീരഭാരം കുറയ്ക്കണമെന്ന തീവ്രമായ ആഗ്രഹം ഉണ്ട്, എന്നാൽ ചില പലഹാരങ്ങൾ/ ജങ്ക്ഫുഡ് കഴിക്കാതിരിക്കാനും പറ്റുന്നില്ല. ഇങ്ങനെയുള്ള സാഹചര്യത്തിൽ ഒരു കാര്യം ഓർക്കുക. ജങ്ക്ഫുഡ് കഴിക്കുന്നത് കുറയ്ക്കുമ്പോൾ നിങ്ങൾ ഓരോ ദിവസവും കഴിക്കുന്ന കലോറിയുടെ അളവ് ഗണ്യമായി കുറയുകയാണ്. ജങ്ക്ഫുഡിന് യാതൊരു പോഷകമൂല്യവുമില്ലെന്ന് മനസിലാക്കുക. കഴിക്കാൻ രുചികരമാണെങ്കിലും അവ ശരീരത്തിന് ദോഷമെ ചെയ്യൂ. ജങ്ക്ഫുഡ് കഴിക്കണമെന്നുണ്ടെങ്കിൽ കഴിക്കുന്ന അളവ് ക്രമേണ കുറച്ച് കൊണ്ടുവരിക. തുടർന്ന് അവ കഴിക്കുന്നത് തീർത്തും ഒഴിവാക്കിയാൽ മതി. എന്നിട്ടും ജങ്ക്ഫുഡിനോടുള്ള താൽപര്യം കുറയുന്നില്ലെങ്കിൽ കലോറി അളവ് നിയന്ത്രിച്ചു കൊണ്ട് ഉള്ള ചേരുവകൾ വച്ച് അത് വീട്ടിൽ തയ്യാറാക്കി കഴിക്കാം.
കൃത്രിമ പാനീയങ്ങൾക്ക് പകരം വെള്ളം ധാരാളം കുടിക്കാം
വെള്ളം പ്രകൃത്യാ കലോറി ഫ്രീ ആയിട്ടുള്ള പാനീയമാണ്. ദാഹം തോന്നുമ്പോഴൊക്കെ വെള്ളം ധാരാളമായി കുടിക്കാം. ഉയർന്ന അളവിൽ കലോറിയും പഞ്ചസാരയുമടങ്ങിയ പാനീയങ്ങൾക്ക് പകരമായി വെള്ളം കുടിക്കുക.
നിത്യവും 10 മിനിറ്റ് കായികാഭ്യാസം
പ്രഭാത ഭക്ഷണത്തിന് മുമ്പായി വീട്ടിൽ 10 മിനിറ്റ് നേരം കായികാഭ്യാസം നടത്താം. അതിനായി ആധുനിക ഉപകരണങ്ങളൊന്നും ആവശ്യമില്ല. 500 മില്ലി ലിറ്ററിന്‍റെ ചെറിയ 2 കുപ്പികളിൽ വെള്ളം നിറച്ച് ഇരു കൈകളിലുമെടുത്ത് വശങ്ങളിലേക്ക് വൃത്താകൃതിയിൽ ചലിപ്പിക്കുക. കൈകൾ മുന്നോട്ടും വശങ്ങളിലേക്കും നീട്ടുക. അതുപോലെ കൈകൾ ഉയർത്തി പിടിക്കാം. ചെറിയ വോക്കിംഗ് എക്സർസൈസും ഈ 10 മിനിറ്റിൽ ഉൾപ്പെടുത്താം. ഇത്രയും ചെയ്യുന്നത് ദിവസത്തിന്‍റെ നല്ലൊരു തുടക്കത്തിന് സഹായിക്കും. ഇതൊരു ശീലമാക്കുക. കാർഡിയോയേക്കാൾ പേശികളുടെ ശക്തി വർദ്ധിപ്പിക്കാൻ ഇത് സഹായിക്കും. സമയമുള്ളവർ 10 മിനിറ്റിന് അധികമായി വ്യായാമങ്ങൾ ചെയ്യാം.
