ആധുനിക ലോകത്ത് ആരോഗ്യ സംരക്ഷണത്തിന് നിരവധി മാർഗങ്ങൾ ഉണ്ടെങ്കിലും രോഗം വരുമ്പോൾ മാത്രമാണ് നമ്മൾ അതേക്കുറിച്ച് ബോധവാന്മാരാകുന്നത്. വ്യായാമക്കുറവു കൊണ്ടും ദീർഘനേരം ഇരുന്നു ജോലി ചെയ്യേണ്ടി വരുന്നതിനാലും സ്ത്രീകളിൽ ഹോർമോൺ നില അസന്തുലിതമാകാറുണ്ട്. വേദനയോടു കൂടിയ മാസമുറ, ആർത്തവുമായി ബന്ധപ്പെട്ട മറ്റ് അസ്വസ്ഥതകൾ, ഈസ്ട്രജൻ അളവിലെ വ്യതിയാനങ്ങൾ ഇങ്ങനെ വന്ധ്യതയടക്കം പലതിലേക്കും ഈ അസന്തുലിതാവസ്‌ഥ കൊണ്ടെത്തിക്കും.
ജീവിതശൈലി കൊണ്ടുണ്ടാകുന്ന രോഗങ്ങളെ നിയന്ത്രിക്കേണ്ടത് മാറിയ ജീവിതശൈലി കൊണ്ടു തന്നെയാണ്. ഇതിന് ഏറ്റവും മികച്ചത് പ്രകൃതിദത്തമായ മാർഗങ്ങളാണ്. സ്ത്രീകളുടെ ഹോർമോൺ പ്രശ്നങ്ങൾക്ക് നല്ല പരിഹാരമാണ് ശതാവരി.
ഔഷധസസ്യങ്ങളുടെ രാജ്ഞി എന്നാണ് ശതാവരിയെ വിളിക്കുന്നത്. 50 ഓർഗാനിക് മൂലകങ്ങൾ ഈ ചെടിയിൽ അടങ്ങിയിരിക്കുന്നു. സ്റ്റീരിയേയിഡൽ സാപോണിൻസ്, ഗ്ലൈക്കോസൈഡ്, ആൽക്കലോയിഡുകൾ പോളിസാക്കറൈഡുകൾ തുടങ്ങിയവയുടെ സാന്നിധ്യം യഥേഷ്ടമുള്ള ശതാവരിയുടെ രോഗനിവാരണ ശേഷി അദ്ഭുതാവഹമാണ്.
പ്രാചീനകാലം തൊട്ടേ ഇന്ത്യക്കാർ ശതാവരിയുടെ മേന്മ മനസിലാക്കി ഉപയോഗിച്ചിരുന്നു. പ്രത്യേകിച്ചും പ്രത്യുൽപ്പാദനാവയവങ്ങളുടെയും പ്രത്യുൽപാദന വ്യവസ്ഥയുടെയും ആരോഗ്യ സംരക്ഷണത്തിന് ശതാവരിയോളം മികച്ച മറ്റൊരു പ്രകൃതിദത്ത മാർഗ്ഗമില്ല. അതിനാൽ ആയുർവേദത്തിൽ ശതാവരി ചേർത്ത ധാരാളം മരുന്നുകളും രസായനങ്ങളും ഇറങ്ങുന്നുണ്ട്.
ശതാവരി എന്നാൽ നൂറു ഭർത്താക്കന്മാർ ഉണ്ടാവാൻ പ്രാപ്തിയുള്ളവൾ എന്ന അർത്ഥം കൂടിയുണ്ട്. യുവതികൾക്കു മാത്രമല്ല, പ്രായഭേദമെന്യേ എല്ലാ സ്ത്രീകൾക്കും ശതാവരി ഉപയോഗിക്കാവുന്നതാണ്. ആർത്തവ വിരാമവുമായി ബന്ധപ്പെട്ട അസ്വസ്ഥതകൾക്കും ഇത് നല്ലതാണ്.
ശതാവരി കൊണ്ടുള്ള നേട്ടം
• പെൺ പ്രത്യുൽപ്പാദന വ്യവസ്‌ഥ സന്തുലിതമാക്കുന്നു.
• മുലപ്പാൽ വർദ്ധിപ്പിക്കുന്നു.
• ഹോർമോൺ സന്തുലിതമാക്കുന്നു.
• പുരുഷ പ്രത്യുൽപ്പാദന വ്യവസ്‌ഥയും മികവുറ്റതാകുന്നു.
• ദഹനേന്ദ്രിയവും അന്നനാളവും ആരോഗ്യമുള്ളതാക്കുന്നു.
• സുഖകരമായ മലശോധന നൽകുന്നു.
• ശ്വാസകോശങ്ങൾക്കും നാളങ്ങൾക്കും ആശ്വാസം പകരുന്നു.
• പ്രതിരോധ ശേഷി വർദ്ധിപ്പിക്കുന്നു
• ആന്‍റി ഓക്സിഡന്‍റുകൾ ലഭ്യമാക്കുന്നു.
സ്ത്രീയുടെ ആരോഗ്യത്തിൽ ഏറ്റവും അനിവാര്യമായ ഈസ്ട്രജൻ ഹോർമോൺ നില സന്തുലിതമാക്കുക എന്ന കാര്യമാണ് ശതാവരി ഉപയോഗിക്കുന്നതിലൂടെ ലഭിക്കുന്നത്. വീട്ടിൽ വളരെ എളുപ്പം വച്ചു പിടിപ്പിച്ച് വളർത്താവുന്ന ചെടിയാണിത്. പടർന്നു പിടിക്കുന്ന തരത്തിലുള്ള ഈ ചെടി അലങ്കാര സസ്യം പോലെയും ഉപയോഗിക്കാം. ഇതിന്‍റെ വേര് ചതച്ചിട്ട് വെള്ളം കുടിക്കുന്നത് വളരെ ഉത്തമമാണ്.
