വെള്ളം കുടിക്കാൻ തുടങ്ങുമ്പോഴാവും നൂറ് സംശയങ്ങൾ ടെൻഷനടിപ്പിക്കുന്നത്. ഈ വെള്ളം അണുവിമുക്തമാണോ, ഗുണനിലവാരം ഉള്ളതാണോ? കോളിഫോം രഹിതമാണോ എന്നിങ്ങനെ നൂറ് സംശയങ്ങൾ ഉടലെടുക്കാം. നമുക്ക് ലഭ്യമായ കുടിവെള്ളം പരമാവധി ശുദ്ധീകരിച്ച് ഉപയോഗിക്കുകയാണ് ഏക മാർഗ്ഗം. ഇതിനായി വാട്ടർ പ്യൂരിഫയറുകൾ ഉപയോഗിക്കാം.
വാട്ടർ പ്യൂരിഫയറുകൾ പലവിധം ഉണ്ട്. നമ്മുടെ ആവശ്യത്തിന് അനുസരിച്ചുള്ളത് വാങ്ങാം. വെള്ളത്തിന്‍റെ സ്വഭാവം അറിഞ്ഞു വേണം പ്യൂരിഫയർ തെരഞ്ഞെടുക്കേണ്ടത്.
ആർഒ ഫിൽട്ടർ
ഇതിനു രണ്ടു ഭാഗങ്ങൾ ഉണ്ട്. റിവേഴ്സ് ഓസ് മോസിസ് തത്വം ഉപയോഗിച്ചാണ് ഇത് പ്രവർത്തിക്കുന്നത്. കാഠിന്യമേറിയ വെള്ളം, ലോഹാംശങ്ങളും രാസവസ്തുക്കളും അടങ്ങിയ ഉപ്പുവെള്ളം എന്നിവ ശുദ്ധീകരിക്കാൻ ആർഒ ഫിർട്ടറാണ് ഉത്തമം. ലോഹാംശം അടങ്ങിയ വെള്ളം ശുദ്ധീകരിക്കാൻ ഇതിനു മാത്രമേ സാധിക്കൂ. ശുദ്ധീകരണത്തിനു ശേഷം വേസ്റ്റ് വാട്ടർ ഉണ്ടാവും. 10 ലിറ്റർ ശുദ്ധീകരിച്ചാൽ 5 ലിറ്ററോളമേ നല്ല വെള്ളം ലഭിക്കുകയുള്ളൂ.
ആക്ടിവേറ്റഡ് കാർബൺ വാട്ടർ പ്യൂരിഫയർ
കീടനാശിനികൾ, ഘന ലോഹങ്ങൾ എന്നിവ വെള്ളത്തിൽ നിന്ന് നീക്കാൻ ഇതിനു സാധിക്കും. ക്ലോറിനും മറ്റ് രാസവസ്തുക്കളും നീങ്ങി കിട്ടും. കീടാണുക്കളെയും അകറ്റും. വെള്ളത്തിന്‍റെ മണവും രുചിയും മെച്ചപ്പെടുത്താനും ഈ പ്യൂരിഫയറു കൊണ്ട് സാധിക്കുന്നു. ഇതു വെള്ളത്തിന്‍റെ ലവണാംശത്തെ നീക്കുകയില്ല. ബാക്ടീരിയ, വൈറസ് എന്നിവയെ നീക്കാനും കാർബൺ വാട്ടർ പ്യൂരിഫയറിനു സാധിക്കുകയില്ല. ദീർഘകാലം ഉപയോഗിച്ചില്ലെങ്കിൽ ഫിൽട്ടറിന്‍റെ നിലവാരം മോശമാകും.
അൾട്രാ വയലറ്റ് പ്യൂരിഫയർ
വെള്ളം ശുദ്ധീകരിക്കാൻ രാസവസ്തുക്കൾ ഉപയോഗിക്കാതെ അൾട്രാ വയലറ്റ് രശ്മികളാണ് ഇതിൽ ഉപയോഗിക്കുന്നത്. കായൽ, പുഴ, തടാകം എന്നിവിടങ്ങളിലെ വെള്ളം ഉൾപ്പെടെ ധാതു ലവണങ്ങൾ കൂടുതൽ അടങ്ങിയ ജലം ശുദ്ധീകരിക്കാനാണ് ഈ ഫിൽട്ടർ ഉപയോഗിക്കുന്നത്. ഒരു മിനിറ്റിൽ 4 ലിറ്റർ വെള്ളം വരെ ശുദ്ധീകരിക്കാൻ സാധിക്കും. ഒരു ബൾബ് കത്താനെടുക്കുന്ന വൈദ്യുതി മാത്രമേ ആവശ്യമുള്ളൂ. കാഠിന്യം കൂടിയ വെള്ളം ശുദ്ധീകരിക്കാനാവില്ല. ക്ലോറിൻ, ഫ്ളൂറൈഡ് എന്നിവ നീക്കാനാവില്ല. രാസവസ്തുക്കൾ നീക്കം ചെയ്യാനും പറ്റില്ല.
അൾട്രാ ഫിൽട്രേഷൻ വാട്ടർ പ്യൂരിഫയർ
പ്രത്യേക ഫൈബർ പാളി ഉപയോഗിച്ച് വെള്ളത്തിൽ അടങ്ങിയ വിവിധ ഘടകങ്ങളെ വേർതിരിക്കുന്ന രീതിയാണിതിൽ പ്രവർത്തിക്കുന്നത്. രാസവസ്തുക്കളുടെ സാന്നിധ്യം കുറവുള്ള വെള്ളം ശുദ്ധീകരിക്കാനാണിത് ഉത്തമം. വെള്ളത്തിലെ അണുക്കൾ, മണ്ണ് എന്നിവയെ ഫൈബർ പാളി തുടയ്ക്കും. അതിനാൽ ചെളി അടങ്ങിയ വെള്ളം ശുദ്ധീകരിക്കാൻ സാധിക്കും. 5 വർഷം വരെ ഉപയോഗിക്കാം. കഠിന ജലം ശുദ്ധീകരിക്കാനുള്ള കഴിവില്ല. അതിനാൽ കുഴൽ കിണറിലെ വെള്ളം ശുദ്ധീകരിക്കാൻ സാധിക്കില്ല. കായൽ, പുഴ, പൊതുവിതരണ ജലം എന്നിവ ശുദ്ധീകരിക്കാൻ ഉപയോഗിക്കാം. ആഴ്ചയിൽ രണ്ടുതവണ പ്യൂരിഫയറുകൾ കൃത്യമായി വൃത്തിയാക്കണം.
