ഓണക്കാലത്താണ് മലയാളികൾ, കേരളത്തിന്‍റെ പരമ്പരാഗത ഭക്ഷണ രീതികളിലേക്ക് ഗൃഹാതുരതയോടെ ഇറങ്ങിച്ചെല്ലുന്ന സമയം. അത്തം മുതൽ പത്തു ദിനങ്ങളിലെ ഓണാഘോഷത്തിന്‍റെ പൊലിമ മുറ്റത്തെ പൂക്കളത്തിലും അടുക്കളയിലെ സദ്യ വട്ടങ്ങളിലും ഓണാക്കോടിയിലും ആണ്. എല്ലാവരും ഒരുമിച്ചു ചേർന്ന് ഗംഭീര വിഭവങ്ങൾ ഉണ്ടാക്കുകയും കഴിക്കുകയും ചെയ്യുന്ന സന്തോഷം മറ്റെവിടെ കിട്ടും?
ചേരുവകൾ:
കടല - ഒരു കപ്പ്
ചേന ചെറുതായി ചതുരക്കഷണങ്ങൾ ആക്കിയത് - 1 കപ്പ്
പച്ചക്കായ ചതുരക്കഷണങ്ങളാക്കിയത് - ഒരു കപ്പ്
തേങ്ങ ചിരകിയത് - ഒരു മുറി
പച്ചമുളക് - 4
ജീരകം - ഒരു ടീസ്പൂൺ
കുരുമുളക് - ഒരു ടീസ്പൂൺ
ചെറിയ ഉള്ളി - 3 എണ്ണം
കടുക് - രണ്ട് ടീസ്പൂൺ
തേങ്ങ ചിരകിയത് - ഒരു ടേബിൾ സ്പൂൺ
വറ്റൽ മുളക് - രണ്ട്
തയ്യാറാക്കുന്ന വിധം:
ചേനയും പച്ചക്കായയും മഞ്ഞൾപൊടിയും ഉപ്പും ചേർത്ത് വേവിക്കുക. (ചേനയ്ക്ക് വേവ് കൂടുതലായതിനാൽ കുക്കറിൽ വച്ച് ചേന മാത്രം വേവിച്ചെടുക്കുക. പിന്നെ കായ അതിൽ വച്ച് വേവിച്ചാലും മതി)
അതിലേക്കു കടല വേവിച്ചത് ഇട്ട് നല്ല പോലെ തിളപ്പിക്കുക. തേങ്ങയും പച്ചമുളകും ജീരകവും കുരുമുളകും ഉള്ളിയും ചെറുതായി അരച്ചെടുത്ത് വെന്ത കൂട്ടിലേക്ക് ചേർത്ത് നന്നായി ഇളക്കുക. കഷണങ്ങളിൽ അരച്ചത് നന്നായി ചേർന്നാൽ വാങ്ങി വയ്ക്കുക.
ഒരു ചീനച്ചട്ടിയിൽ വെളിച്ചെണ്ണ ഒഴിച്ച് കടുക് പൊട്ടിയാൽ അതിലേക്കു വറ്റൽ മുളകും ചിരകിയ തേങ്ങയും ഇട്ടു വറുക്കുക. തേങ്ങ ബ്രൗൺ നിറമായാൽ കറിവേപ്പിലയും ഇട്ട് വാങ്ങി കറിയിലേക്ക് ചേർക്കാം.
