ക്രിസ്മസ് ഷൂട്ടിന് വ്യത്യസ്തത വേണം എന്ന ചിന്തയാണ് ഡിസൈനർ ദീപ്തി അനുരാഗിനെ ഇത്തരമൊരു പരീക്ഷണത്തിലേക്ക് എത്തിച്ചത്. ആശയം സുഹൃത്തുക്കൾ ആയ സെലിബ്രിറ്റി മേക്കപ്പ് ആർട്ടിസ്റ്റ് അബീൽ റോബിനും ഫോട്ടോഗ്രാഫർ ജിത്തുവുമായി ഷെയർ ചെയ്തപ്പോൾ അവർ കട്ടക്ക് കൂടെ നിൽക്കാം എന്ന് ഉറപ്പു നൽകി.
സിനിമ ടെലിവിഷൻ നൃത്ത വേദികളിലെ സ്ഥിരം സാന്നിധ്യമായ വിസ്മയ ദേവൻ തന്‍റെ ആദ്യ ഫോട്ടോഷൂട്ടിന് തയ്യാറായപ്പോൾ ഈ മനോഹര ചിത്രം പിറക്കുകയായിരുന്നു. മൈ ഡോറ പ്രൊഡക്ഷൻ കമ്പനി ആയിരുന്നു നിർമാണ നിർവഹണം നടത്തിയത്.
മൂന്നുദിവസം നീണ്ടു നിന്ന നാലുപേരുടെ അധ്വാനം ആയിരുന്നു ഈ പ്രകൃതിദത്ത വസ്ത്രാലങ്കാരം പൂർത്തിയാക്കുവാൻ വേണ്ടി വന്നത്. ഭർത്താവും സഹോദരിയും ഒന്നിച്ചു കേരളത്തിൽ അപൂർവം ആയി വളരുന്ന ക്രിസ്മസ് ട്രീ ഇലകൾ തേടി പല വീടുകൾ കയറി ഇറങ്ങിയ അനുഭവം ജീവിതത്തിൽ മറക്കാൻ കഴിയാത്തത് ആണെന്ന് ദീപ്തി പറയുന്നു.
വൈവിധ്യമാർന്ന കോസ്റ്റ്യൂം ഉപയോഗിച്ച് വേദികളിൽ നൃത്തച്ചുവടുകൾ വച്ചപ്പോൾ ഒന്നും ഉണ്ടാകാതിരുന്ന പരിഭ്രമം ഷൂട്ടിന്‍റെ മുഴുവൻ സമയത്തും എന്നെ ബാധിച്ചിരുന്നു എന്ന് വിസ്മയ. ആദ്യ ഷൂട്ട് എന്ന ടെൻഷൻ ഒപ്പം 30 കിലോ ഭാരം ഉള്ള കോസ്റ്റ്യൂം ആയിരുന്നു കാരണം.
എന്‍റെ മേക്കപ്പ് ജീവിതത്തിലെ ഏറ്റവും ആകാംഷ നിറഞ്ഞ വർക് ആയിരുന്നു ഇതെന്ന് അബിൽ റോബിൻ. കോസ്റ്റ്യൂമിന്‍റെ വ്യത്യസ്തത ഉൾകൊള്ളുന്ന തരത്തിൽ മേക്കപ്പ് ചെയ്യേണ്ടി വന്നത് വലിയ വെല്ലുവിളി ആയിരുന്നു. അവസാനം ചിത്രം പുറത്ത് വന്നപ്പോൾ മികച്ച അഭിപ്രായങ്ങൾ ആണ് എല്ലാവരും പറഞ്ഞത്.
ഫോട്ടോഗ്രഫിയിൽ പരീക്ഷണങ്ങൾ ഇഷ്ടപ്പെടുന്ന വ്യക്തി എന്ന നിലയിൽ പുതിയ അനുഭവങ്ങൾ നൽകിയ ഒരു ഷൂട്ട് ആയിരുന്നു ഇത്. നല്ല ഒരു ടീം സ്പിരിറ്റോടെ കോസ്റ്റ്യൂം, മേക്കപ്പ് അപ്പ് എന്നിവ മികവോടെ നിർവഹിച്ച സഹപ്രവർത്തകർക്ക് ഏറ്റവും മികച്ച ചിത്രം നൽകുക എന്നത് വലിയ ഉത്തരവാദിത്വം ആയിരുന്നു. അതിന്‍റെ മുഴുവൻ ടെൻഷനും ചിത്രം പുറത്ത് ഇറങ്ങിയതോടെ അവസാനിച്ചു. എല്ലാവരും നൽകിയത് മികച്ച അഭിപ്രായങ്ങൾ മാത്രം. ഇനിയും നല്ല ചിത്രങ്ങൾ എടുക്കുവാൻ ഇതൊരു പ്രചോദനം ആണെന്നാണ് ഫോട്ടോഗ്രാഫർ ജിത്തുവിന്‍റെ അഭിപ്രായം..
