കണ്ടുകൊണ്ടേൻ കണ്ടുകൊണ്ടേൻ എന്ന ചിത്രത്തിലെ ഒരു രംഗം തകർത്തഭിനയിച്ചു സോഷ്യൽ മീഡിയയിൽ വൈറൽ ആയതോടെ ആണ് അമൃത താരമായത്. എൻഡി ടിവി, പോളിമർ ന്യൂസ് എന്നീ ദേശീയമാധ്യമങ്ങളിൽ അമൃത വാർത്തയായി.
കേരളത്തിനകത്തും പുറത്തും വൻ ആരാധകരുള്ള അമൃതയ്ക്ക് 1.4 മില്യൺ ഫോളോവേഴ്സ് ടിക്ടോക് നിരോധിക്കുന്നതിന് മുമ്പ് ഉണ്ടായിരുന്നു. കഴിഞ്ഞ 2 വർഷമായി ടിക്ടോക്കിൽ അത്രയും സജീവമായിരുന്നു അമൃത സജു എന്ന ഇടുക്കിക്കാരി. ടിക്ടോക്കിൽ അമ്മൂസ് അമൃതയെന്നാണ് അമൃത അറിയപ്പെട്ടിരുന്നത്. ടിക്ടോക് ഇപ്പോൾ ഇല്ലെങ്കിലും അതിലെ പ്രശസ്തി പിക്കാസോ എന്ന മലയാള സിനിമയിലേക്ക് അമൃതയ്ക്ക് എൻട്രി നൽകി.
വൈറൽ വിഡിയോ
ഏതാനും മാസം മുമ്പാണ് ഒരു പ്രത്യേക ആംഗിളിൽ കണ്ടുകൊണ്ടേൻ കണ്ടുകൊണ്ടേൻ എന്ന ചിത്രത്തിലെ ഒരു രംഗം അഭിനയിച്ച് ടിക്ടോക്കിലാക്കിയത് അനിയത്തി അപർണ്ണയുടെ നിർദ്ദേശങ്ങളനുസരിച്ചായിരുന്നു. എന്നാൽ ഒറ്റയടിയ്ക്ക് ഈ വീഡിയോ വൈറലാകുമെന്ന് അമൃത ഒട്ടും പ്രതീക്ഷിച്ചിരുന്നില്ല. ഏതാനും ദിവസങ്ങൾ കൊണ്ട് വീഡിയോ കണ്ടവരുടെ എണ്ണം 13 ലക്ഷം കവിഞ്ഞു.
“പ്രത്യേക ആംഗിളിൽ ടിക്ടോക് ചെയ്തത് കണ്ട് കഴിഞ്ഞാണ് ഐശ്വര്യ റായ്ടെ കട്ടുണ്ടെന്ന് ആളുകൾ പറഞ്ഞുതുടങ്ങിയത്. ലെൻസ് വച്ചാൽ ഒറിജിനാലിറ്റിയുണ്ടാവുമെന്നൊക്കെയുള്ള കമന്‍റുകളും വന്നു. എങ്കിൽ അത്തരം വീഡിയോ ചെയ്തു നോക്കിയാലോയെന്ന് അനിയത്തി പറഞ്ഞു. “ആകെ മൂന്നോ നാലോ എണ്ണം മാത്രമാണ് ഞാൻ ഐശ്വര്യ റായ്ടെ അഭിനയ രംഗങ്ങൾ ചെയ്തത്. ബാക്കിയൊക്കെ എന്‍റെ സ്വന്തം രീതിയിൽ മറ്റ് ഗാനരംഗങ്ങളാണ് ചെയ്തത്”
“മോഡേൺ സ്റ്റൈലിലാണ് ഞാൻ മിക്ക വീഡിയോകളും ചെയ്തിരുന്നത്. നാടൻ സ്റ്റൈലൊന്നും അധികം ചെയ്തിട്ടില്ല. അങ്ങനെ സ്റ്റൈലൊന്ന് മാറ്റി പിടിച്ചപ്പോൾ ഐശ്വര്യ റായ്ടെ ചില നാടൻ കഥാപാത്രങ്ങളോട് സാമ്യതയുള്ളതുപോലെ എല്ലാവർക്കും തോന്നി. അങ്ങനെയാണ് കണ്ടുകൊണ്ടേൻ കണ്ടുകൊണ്ടേൻ വീഡിയോ ഇത്രയധികം വൈറലായത്” അമൃത പറയുന്നു.
തുടക്കത്തിൽ ഒരു രസത്തിനുവേണ്ടിയാണ് ചെയ്ത് തുടങ്ങിയത്. പിന്നെ പിന്നെയത് ലക്ഷക്കണക്കിന് ആരാധകരിലേക്ക് എത്തി. അവരുടെ നിറഞ്ഞ പ്രോത്സാഹനവും കയ്യടിയും കൂടിയായതോടെ കേരളത്തിന്‍റെ സ്വന്തം ആഷ് ദേശീയതലത്തിലും ശ്രദ്ധേയയായി. ദേശീയ മാധ്യമങ്ങളിലടക്കം അമൃതയുടെ അഭിമുഖങ്ങളും വന്നു. ഏതോ നോർത്തിന്ത്യൻ ആരാധിക ട്വിറ്ററിൽ അമൃതയുടെ വൈറലായ വീഡിയോയെപ്പറ്റി പോസ്റ്റിട്ടതോടെയാണ് ദേശീയ മാധ്യമങ്ങളിൽ അമൃത ശ്രദ്ധിക്കപ്പെട്ടത്.
ആഷിന്‍റെ കടുത്ത ആരാധികയാണ് അമൃത. “ഐശ്വര്യ റായ്ടെ കണ്ണുകളുടെ ചലനങ്ങൾക്ക്പോലും എത്ര ഭംഗിയാണ്. അതേപ്പോലെ എനിക്ക് ചെയ്യാൻ പറ്റിയില്ലെങ്കിൽ ആരും ഇടിക്കാൻ വരാതിരുന്നാൽ മതിയായിരുന്നു.” അമൃത കുസൃതിച്ചിരിയോടെ പറയുന്നു. ഐശ്വര്യയുടെ സ്ക്രീൻ പെർഫോമൻസ് ശ്രദ്ധയോടെ കണ്ടുപഠിച്ചാണ് ഈ സുന്ദരി അവതരിപ്പിച്ചത്. കൂടെ പിന്തുണയുമായി ഇളയ സഹോദരി അപർണയും കൂടും. “അപർണയാണ് ക്യാമറാ വുമൺ. ഒപ്പം അവളുടെ ചില നിർദേ ദ്ശങ്ങളുമൊക്കെയുണ്ടാവും.
സിനിമയിലേക്ക് അവസരങ്ങൾ
വീഡിയോകൾ വൈറലായ ശേഷം ഞെട്ടി നിൽക്കുകയാണ്, സന്തോഷമുണ്ട്. സിനിമയിലേക്ക് ഓഫറുകൾ വന്നിരുന്നു. ലോക്ഡൗണായതുകൊണ്ട് തീരുമാനമായിട്ടില്ല. അതുപോലെ പരസ്യങ്ങളിലേക്കും ഓഫറുകളുണ്ട്. ഞാൻ നേരത്തെ തന്നെ മോഡലിംഗൊക്കെ ചെയ്തിട്ടുണ്ട്. “പിക്കാസോയെന്ന ചിത്രത്തിൽ നേരത്തെ അഭിനയിച്ചിരുന്നു. ചിത്രത്തിൽ നായിക കഥാപാത്രമാണ്. ബോൾഡ് ആന്‍റ് സൈലന്‍റ് ആയിട്ടുള്ള കഥയാണ്. നടൻ ഉണ്ണിമുകുന്ദന്‍റെ ഇളയ സഹോദരൻ സിദ്ധാർത്ഥ് ആണ് നായകൻ. .
