2002ൽ കഹ്ത്താ ഹെ ദിൽ എന്ന സീരിയലിലൂടെയാണ് കാമ്യ പഞ്ചാബി കരിയറിന് തുടക്കം കുറിക്കുന്നത്. അതിനു ശേഷം ഒരു പിടി സീരിയലുകൾ. എന്നാൽ ബനു മേം തേരീ ദുൽഹനിൽ സിന്ദൂര എന്ന കഥാപാത്രം അവരുടെ അഭിനയ ജീവിതത്തിൽ വഴിത്തിരവായി. ബിഗ്ബോസിൽ വന്നതോടെ കാമ്യയ്ക്ക് അരാധകരുടെ വൻ നിര തന്നെയുണ്ടായി. കോമഡി ഷോസിൽ സ്റ്റന്‍റ് അപ് കോമഡി ചെയ്തു. ബിഗ് ബോസിലെ സുഹൃത്ത് പ്രത്യുഷ ബാനർജിയുടെ ആത്മഹത്യയെ തുടർന്ന് കാമ്യ അവരുടെ ജീവിതം അടിസ്ഥാനമാക്കി എടുത്ത ചിത്രം വളരെ ശ്രദ്ധിക്കപ്പെട്ടു
2003 ൽ ബണ്ടി നെഗി എന്ന വ്യക്തിയെ വിവാഹം ചെയ്തു. ആ ബന്ധത്തിൽ ഒരു മകൾ ഉണ്ടായി. 2013 ൽ ഇവർ വിവാഹ മോചിതരായി. കഴിഞ്ഞ വർഷം കാമ്യ വീണ്ടും വിവാഹിതയായി. 41-ാം വയസ്സിലെ വിവാഹം ചിലരൊക്കെ വിമർശിച്ചെങ്കിലും കാമ്യ അതിനൊന്നും മറുപടി നൽകാൻ മെനക്കെടുന്നില്ല. ഭർത്താവ് ഡോക്ടർ ശലഭ് ഡാംഗ് ഡൽഹിക്കാരൻ ആണ്. അദ്ദേഹത്തിന്‍റെയും രണ്ടാം വിവാഹമാണ്. രണ്ടു പേർക്കും മുൻബന്ധത്തിൽ ഓരോ കുട്ടികൾ ഉണ്ട്. ഈ കുട്ടികൾ ഇവർക്കൊപ്പം ആണ്.
സ്വന്തം ജീവിതത്തിൽ ധാരാളം ഉയർച്ചകളും താഴ്ച്ചകളും കണ്ടിട്ടുണ്ടല്ലോ. അതൊക്കെ എങ്ങനെയാണ് നേരിട്ടത്?
ഞാൻ ധൈര്യശാലിയാണ്. ആരെയും പേടിക്കാറില്ല. ഒരുപേക്ഷ അതുകൊണ്ടാകാം വിഷമതകളെ അതിജീവിക്കാനായതും. എനിക്ക് അമ്മയിൽ നിന്നാണ് ഇത്തരം ഗുണങ്ങൾ കിട്ടയത്. ഞങ്ങൾ ചെറുതായിരുന്നപ്പോൾ ധാരാളം പ്രശ്നങ്ങൾ വീട്ടിൽ ഉണ്ടായിട്ടുണ്ട്. പക്ഷേ അതൊക്കെ നല്ല രീതിയിലാണ് അമ്മ മാനേജ് ചെയ്തത്. അമ്മയ്ക്ക് തോൽക്കാൻ ഇഷ്മായിരുന്നില്ല എനിക്കും.
മകളെ പരിപാലിക്കുമ്പോൾ എന്തൊക്കെ കാര്യങ്ങളാണ് ശ്രദ്ധിക്കുക?
ഒരമ്മ കുഞ്ഞിനെ വളർത്തുമ്പോൾ കുഞ്ഞിന്‍റെ സന്തോഷം മാത്രമേ ശ്രദ്ധിക്കൂ. ചുറ്റുമുള്ള തിന്മകളിൽ നിന്നും കുഞ്ഞിനെ മാറ്റി നിർത്താനാണ് ആഗ്രഹിക്കുക. ഞാനും അതേ ആഗ്രഹിക്കുന്നത്. എന്‍റെ മകളുടെ നല്ല കൂട്ടുകാരിയാകുന്നതിൽ എനിക്ക് സന്തോഷമാണ്. എന്‍റെ മകളാണ് എന്‍റെ ഏറ്റവും വലിയ നിധി. എന്‍റെ ശക്‌തിയും ദൗർബ്ബല്യവും അവൾ തന്നെ.
വീട്ടുകാര്യങ്ങൾക്കൊപ്പം ജോലി എങ്ങനെ മാനേജ് ചെയ്യുന്നു?
വീട്ടിലെ കാര്യവും പുറത്തെ ജോലിയും ഞാൻ ഭംഗിയായി നിറവേറ്റുന്നു, ഞാൻ സൂപ്പർ വുമണാണ് എന്നൊക്കെ കരുതിയാൽ തീർച്ചയായും സ്വന്തം ജോലി നിങ്ങൾക്ക് ഭാരമായി തോന്നും. യഥാർത്ഥത്തിൽ രണ്ട് ജോലിയും ഒരുമിച്ച് ചെയ്യാൻ ഒട്ടും പ്രയാസമില്ല. പക്ഷേ മികച്ച ടൈം മാനേജ്മെന്‍റ് വേണമെന്ന് മാത്രം. വീടും ജോലിയും മാത്രമല്ല ഞാൻ നോക്കി നടത്തുന്നത് മറ്റ് പല കാര്യങ്ങളും ഒരുമിച്ച് ചെയ്യുന്നുണ്ട്.
വ്യക്‌തിജീവിതമാണോ പ്രൊഫഷണൽ ജീവിതമാണോ കൂടുതൽ പ്രധാനം?
പ്രൊഫഷണൽ ലൈഫ് എന്നെ സംബന്ധിച്ച് എന്‍റെ ഐഡന്‍റിറ്റിയാണ്. എന്‍റെ സന്തോഷമാണത്. ജീവിതത്തിൽ പല സന്ദർഭങ്ങളിലും ഞാൻ വെല്ലുവിളികളെ നേരിടുന്നുണ്ട്. പക്ഷേ അപ്പോഴൊന്നും ഞാൻ ജോലി ഉപേക്ഷിച്ചില്ല. എന്നെ സംബന്ധിച്ച് ജോലി ഏറ്റവും പ്രധാനമാണ്. ജോലി ചെയ്തുകൊണ്ടിരിക്കെ മരിക്കാനാണ് ആഗ്രഹം. ക്യാമറയ്ക്ക് മുന്നിൽ സെറ്റിൽ മരിക്കുകയെന്നതാണ് സ്വപ്നം.
