കെമിക്കലുകളില്ലാത്ത പ്രകൃതി ദത്തമായ മാർഗ്ഗങ്ങളാണ് ചർമ്മ സംരക്ഷണത്തിന് ഏറ്റവും അനുയോജ്യം. ഷിയാ ബട്ടർ ആ കൂട്ടത്തിൽ പെടുത്താം. മങ്ങിയ വെളുപ്പ് കലർന്ന നിറത്തോടു കൂടിയ ഷിയാ ബട്ടർ ആഫ്രിക്കയിലെ ഷിയാ മരങ്ങളിൽ നിന്നാണ് ശേഖരിക്കുന്നത്. അറുപതടിയോളം വളരുന്ന ഷിയാ മരങ്ങൾ ഇരുനൂറ് വർഷം വരെ ജീവിക്കും. ആദ്യത്തെ 20 വർഷത്തോളം ഷിയാ മരങ്ങൾ പൂക്കുകയില്ല. ഷിയാ മരങ്ങളിലെ കായ്കൾ പറിച്ച് അവ നുറുക്കിയും ഇടിച്ചും വേവിച്ചുമൊക്കെയാണ് ഷിയാ ബട്ടർ തയ്യാറാക്കുക. സ്ത്രീകളാണ് ഷിയാമരങ്ങളുടെ കായ്കൾ ശേഖരിക്കുക. ഷിയാ മരത്തെ ഒരു പുണ്യമരമായാണ് ആഫ്രിക്കൻ ജനത കണ്ടുപോരുന്നത്. നിരവധി ആരോഗ്യ സംബന്ധമായ ഗുണങ്ങളാണ് ഷിയാ ബട്ടറിനുള്ളത്. ഇപ്പോൾ നമ്മുടെ സൂപ്പർമാർക്കറ്റുകളിലും മാളുകളിലും ഓൺലൈൻ സ്റ്റോറുകളിലും ലഭ്യമാണ്.
ആന്‍റി ഓക്സിഡന്‍റുകൾ
വിറ്റാമിൻ എ,ഇ,എഫ് തുടങ്ങി നിരവധി ആന്‍റി ഓക്സിഡന്‍റുകളുടെ കലവറയാണ് ഷിയാ ബട്ടറുകൾ.
ത്വക്കിനൊരു ഡോക്‌ടർ
ഷിയാ ബട്ടർ കൊണ്ട് നിരവധി ചർമ്മ സംബന്ധമായ അസുഖങ്ങൾക്ക് പരിഹാരം ലഭിക്കും. വരണ്ട ചർമ്മത്തിനും മുഖക്കുരുവിനും, പാടുകൾക്കും, ചർമ്മത്തിലെ മൃതഭാഗങ്ങൾക്കും ഷിയാ ബട്ടർ നല്ലൊരു മരുന്നാണ്. വായു മലിനീകരണം, അൾട്രാവയലറ്റ് കിരണങ്ങൾ എന്നിവ മൂലം സംഭവിക്കുന്ന ചർമ്മ ദോഷങ്ങൾക്ക് ഷിയാ ബട്ടർ പരിഹാരം നൽകും. ത്വക്കിന്‍റെ യുവത്വവും, ഭംഗിയും വീണ്ടെടുക്കാൻ ഷിയാ ബട്ടർ സഹായിക്കും അതുപോലെ ത്വക്കിലെ കോശങ്ങൾക്ക് വേണ്ട പ്രോട്ടീൻ നൽ കാനും ഷിയാ ബട്ടർ ഉത്തമമാണ്.
മുറിവിനാശ്വാസം പകരും
ഷിയാ ബട്ടർ പല പ്രമുഖ മരുന്ന് കമ്പനികളും ഒരു ഹീലിംഗ് കണ്ടന്‍റായി ഓയിൽമെന്‍റുകളിൽ ഉപയോഗിക്കുന്നുണ്ട്. പൊള്ളലിനും, പാടുകൾക്കും ചെറിയ മുറിവുകൾക്കും, വിഷ വസ്‌തുക്കളുടെ സാന്നിദ്ധ്യത്തിനും ത്വക്കിലെ അലർജി മൂലം ഉണ്ടാകുന്ന അസ്വസ്ഥതകൾക്കും ഷിയാ ബട്ടർ മരുന്ന് കൂട്ടായി ഉപയോഗിക്കുന്നു.
കുഞ്ഞുങ്ങൾക്ക് ഉപയോഗിക്കാം
പ്രകൃതിദത്തവും വളരെ സോഫ്റ്റുമായ ഷിയാ ബട്ടർ കുഞ്ഞുങ്ങളുടെ ശരീരത്തിൽ ഉപയോഗിക്കാവുന്നതാണ്. വളരെ സെൻസിറ്റീവായ കുഞ്ഞു ശരീരത്തിന് ഏറ്റവും അനുയോജ്യമായ ഷിയാ ബട്ടർ ത്വക്കിനെ ഒരു കവചം പോലെ സംരക്ഷിക്കുന്നു. രോഗാണുക്കളെ ചെറുക്കാനും ഷിയാ ബട്ടറിനു കഴിയും.
മസിലുകൾക്ക്
കായികമായ അഭ്യാസങ്ങൾക്കിടയിൽ മസിലുകളെ സംരക്ഷിക്കാൻ ഷിയാ ബട്ടർ ഉപയോഗിക്കുന്നുണ്ട്. വർക്കൗട്ട് ചെയ്യുന്നതിന് മുമ്പും പിമ്പും ഉണ്ടാകുന്ന പേശി സംബന്ധമായ വേദനക്ക് ശമനം നൽകുവാനും മസിലുകൾക്ക് ആയാസമില്ലാത്ത വിധത്തിൽ ഷിയാ ബട്ടർ പ്രയോജനകരമാക്കാം.
ചുണ്ടുകളിലെ പരിചരണം
ലിപ് ബാമുകൾക്കും വിലകൂടിയ ലിപ് ക്രീമുകൾക്കും ഗുഡ്ബൈ പറയാം. ഇവയേക്കാൾ നൂറിരട്ടി ഗുണമുള്ളതാണ് ഷിയാ ബട്ടർ. തണുപ്പു സമയങ്ങളിൽ ചുണ്ടിനേൽക്കുന്ന ആഘാതം കുറയ്ക്കാൻ ഷിയാ ബട്ടറിനു കഴിയും.
മുടി പരിചരണം
മുടിക്ക് വേണ്ട പരിചരണം നൽകാൻ ഷിയാ ബട്ടറിനും സാധിക്കും. മുടി പൊട്ടിപ്പോകുന്നത് തടയാനും, മുടി വേരുകൾക്ക് ബലം നൽകുവാനും മുടിയിഴകളെ ഒരു കോട്ട പോലെ പൊതിഞ്ഞ് സംരക്ഷിക്കുവാനും ഷിയാ ബട്ടറിനു കഴിയും. ശരീരത്തിലെന്ന പോലെ സ്കാൽപ്പിലും മസാജ് ചെയ്യാനും ഉപയോഗിക്കാം.
