കാലാവസ്‌ഥയിലുണ്ടാകുന്ന മാറ്റങ്ങൾ ചർമ്മത്തെയാണ് ആദ്യം ബാധിക്കുക. സംവേദന ക്ഷമതയേറിയ ചർമ്മത്തിന് കാലാവസ്‌ഥാ മാറ്റങ്ങളുമായി പൊരുത്തപ്പെടാൻ കഴിയാതെ വരുമ്പോഴാണ് പ്രശ്‌നങ്ങൾ ഉടലെടുക്കുന്നത്. ഉപ്പുറ്റി പൊട്ടുക, ചർമ്മം വരളുക, വിണ്ടുകീറുക, ചർമ്മത്തിന്‍റെ തിളക്കം നഷ്‌ടപ്പെടുക എന്നീ പ്രശ്നങ്ങളുണ്ടാകാം. അതുകൊണ്ട് ചർമ്മ സംബന്ധമായ തകരാറുകൾ അകറ്റാൻ സ്ക്രബ്ബിംഗ് ആവശ്യമാണ്. ഇത് ഏത് കാലാവസ്‌ഥയിലും ചെയ്യാം.
ഈർപ്പക്കുറവ് സംവേദന ക്ഷമതയേറിയ ചർമ്മത്തിന്‍റെ തിളക്കം നഷ്‌ടപ്പെടുത്തും. അതുകൊണ്ട് ചർമ്മത്തിലെ മൃതകോശങ്ങളെ നീക്കി രക്‌തസഞ്ചാരം വർദ്ധിപ്പിക്കുന്നതിന് സ്ക്രബ്ബിംഗ് ഫലവത്തായ മാർഗ്ഗമാണ്. ആഴ്‌ചയിലൊരു തവണ ശരീരം മുഴുവനും സ്ക്രബ്ബിംഗ് ചെയ്യുന്നത് പതിവാക്കണം.
ചർമ്മത്തിന് പുതുപുത്തൻ തേജസ്സും മൃദുത്വവും പകരാൻ സഹായകമായ ചില സ്ക്രബ്ബുകളെക്കുറിച്ചാണ് ചുവടെ പറഞ്ഞിരിക്കുന്നത്. സ്‌പാ ട്രീറ്റ്‌മെന്‍റിന്‍റെ ഒരു ഭാഗമാണ് ബോഡി സ്ക്രബ്ബ്. ബ്യൂട്ടി പാർലറിൽ ബോഡി സ്ക്രബ് ചെയ്യാൻ താല്പര്യമില്ലാത്തവർക്ക് വീട്ടിലിരുന്ന് ചെയ്യാവുന്നതേയുള്ളു. പല മേൽത്തരം കമ്പനികളുടെയും ബോഡി സ്ക്രബ്ബുകൾ മാർക്കറ്റിൽ ലഭ്യമാണ്.
സാൾട്ട് സ്ക്രബ്ബ്
ചർമ്മത്തിന് മൃദുത്വവും ഉണർവും ഈർപ്പവും ലഭിക്കാൻ ഏറ്റവും ഉചിതമായ സ്ക്രബ്ബാണ് സാൾട്ട് സ്ക്രബ്ബ്. കുളി കഴിഞ്ഞശേഷം ചർമ്മത്തിൽ പ്രത്യേകിച്ച് ബോഡിലോഷനോ കോൾഡ് ക്രീമോ പുരട്ടേണ്ടതില്ല.
സീ സാൾട്ട്, കോഷേർ സാൾട്ട്, ഈസോം സാൾട്ട്, പ്ലെയിൻ സാൾട്ട് എന്നിവയിൽ ഏതെങ്കിലുമൊന്നിൽ ആൽമണ്ട് ഓയിലോ, സൺഫ്ളവർ ഓയിലോ, ജോ ജോബാ ഓയിലോ, വെളിച്ചെണ്ണയോ ചേർത്ത് സ്ക്രബ്ബ് വീട്ടിൽത്തന്നെ തയ്യാറാക്കാം. സാൾട്ട് സ്ക്രബ്ബ് വളരെക്കുറച്ചെടുത്ത് ശരീരത്തിൽ മൃദുവായി തേച്ചുപിടിപ്പിച്ച് കുളിക്കാം. സാൾട്ട് സ്ക്രബ്ബ് ഡിറ്റോ ക്സിഫൈയിംഗ് ആണ്. മാംസപേശികൾക്ക് റിലാക്സേഷൻ പകരാൻ ഇത് ഉപകരിക്കും. എന്നാൽ തണുപ്പുകാലത്ത് വിണ്ടു കീറിയതും പൊട്ടിയതുമായ ചർമ്മത്തിൽ സാൾട്ട് സ്ക്രബ്ബ് പ്രയോഗിക്കാതിരിക്കുന്നതാണ് ഉചിതം.
ഷുഗർ സ്ക്രബ്ബ്
വിള്ളലും പൊട്ടലുമുള്ള ചർമ്മത്തിന് ഷുഗർ സ്ക്രബ്ബാണ് ഏറ്റവും അനുയോജ്യം. പലതരം ഷുഗർ സ്ക്രബ്ബുകളുണ്ട്. ബ്രൗൺ ഷുഗർ സ്ക്രബ്ബ്, വൈറ്റ് (തരിതരിയായുള്ള) ഷുഗർ സ്ക്രബ്ബ്, നാച്ചുറൽ ആന്‍റ് കേൻ ഷുഗർ സ്ക്രബ്ബ് എന്നിവയാണവ. ഇവയിൽ സോയാബീൻ ഓയിൽ, ഗ്രേപ്‌സീഡ് ഓയിൽ എന്നിവ ചേർത്ത് ഷുഗർ സ്ക്രബ്ബുകൾ തയ്യാറാക്കാം. വൈറ്റ് ഷുഗർ സ്ക്രബ്ബ്, നാച്ചുറൽ കേൻ ഷുഗർ സ്ക്രബ്ബ് എന്നിവയെ അപേക്ഷിച്ച് ബ്രൗൺ ഷുഗർ സ്ക്രബ്ബാണ് ഏറ്റവും നല്ലത്. സാൾട്ട് സ്ക്രബ്ബിനെ അപേക്ഷിച്ച് വളരെ മൃദുവാണ് ഈ സ്ക്രബ്ബ്. ചർമ്മത്തിന് ഫ്രഷ്‌നസ്റ്റും ലഭിക്കും.
കോഫി സ്ക്രബ്ബ്
വരണ്ട ചർമ്മത്തിന് കോഫി സ്ക്രബ്ബിംഗിണ് ഏറ്റവും അനുയോജ്യം. ചർമ്മത്തിന് ഫ്രഷ്‌നസ്സും തിളക്കവും പകരുന്നതോടൊപ്പം ഫാറ്റ് സെല്ലുകളെ ലഘുവായി വിഘടിപ്പിച്ച് സെല്യൂലൈറ്റ് രൂപീകരണത്തെ തടയുകയും ചെയ്യും. അതോടൊപ്പം രക്തയോട്ടം വർദ്ധിപ്പിക്കാനും സഹായിക്കും. ഇതിനൊക്കെ പുറമെ വരണ്ട ചർമ്മക്കാർക്ക് ഓട്ട്മീൽ സ്ക്രബ്ബും പരീക്ഷിച്ച് നോക്കാവുന്നതാണ്.
വീട്ടിലുണ്ടാക്കാവുന്ന സ്ക്രബ്ബുകൾ
- എണ്ണമയമുള്ള ചർമ്മം: അരക്കപ്പ് ചെറുപയർ പൊടിച്ചെടുത്ത് അതിൽ 1 ടീസ്പൂൺ തൈരും വെള്ളവും ചേർത്ത് പേസ്റ്റ് ഉണ്ടാക്കുക. കൈകളാൽ ഈ പേസ്റ്റ് മുഖത്ത് അപ്ലൈ ചെയ്യുക. മുഖം സ്ക്രബ്ബ് ചെയ്യുക. തണുത്ത വെള്ളത്തിൽ കഴുകുക. സോപ്പ് ഉപയോഗിക്കരുത്.
- അരക്കപ്പ് പപ്പായ പൾപ്പാക്കി അതിൽ നാരങ്ങാനീര് കലർത്തുക. മുഖം ലഘുവായി മസാജ് ചെയ്ത് ഈ പേസ്റ്റ് ഉപയോഗിച്ച് സ്ക്രബ്ബ് ചെയ്യുക.
- സാധാരണ ചർമ്മം: കഞ്ഞി വെള്ളത്തിൽ 1 ടീസ്പൂൺ തേനും 1 ടീസ്പൂൺ പാലും ചേർത്ത് മുഖത്ത് പുരട്ടുക. കുറച്ച് സമയത്തിന് ശേഷം കൈകളാൽ തടവി മെല്ലെ സ്ക്രബ്ബ് ചെയ്യാം.
- 3 ടീസ്പൂൺ ബദാം പൗഡർ, 3 ടീസ്പൂൺ പാൽപ്പൊടി.2 ടീസ്പൂൺ ഉണങ്ങിയ റോസ് ഇല, ബദാം ഓയിൽ എന്നിവ ചേർത്ത് തയ്യാറാക്കിയ മിശ്രിതം ഒരു ഗ്ലാസ് പാത്രത്തിൽ സൂക്ഷിച്ച് ആഴ്ചയിൽ ഒരിക്കൽ ഉപയോഗിക്കുക.
- വരണ്ട ചർമ്മം: ഒരു തുള്ളി വിറ്റാമിൻ ഈ ഓയിൽ അൽപം നാരങ്ങാനീരും ഒരു തുള്ളി ഗ്ലിസറിനും മിക്സ് ചെയ്യുക. ഇതുപയോഗിച്ച് മുഖം മസാജ് ചെയ്ത് തണുത്ത വെള്ളത്തിൽ കഴുകുക.
- അര ടീസ്പൂൺ ബദാം പൊടി 1ടീസ്പൂൺ തേനും 1 ടീസ്പൂൺ റോസ് വാട്ടറും ചേർത്ത് മുഖത്ത് ഇട്ടശേഷം 20 മിനിറ്റ് കഴിഞ്ഞ് നനഞ്ഞ കോട്ടൺ പാഡ് ഉപയോഗിച്ച് തുടയ്ക്കുക.
