ഋതുക്കളിൽ ഏതാണ് കൂടുതൽ ഇഷ്ടം എന്ന് ചോദിച്ചാൽ മിക്കവരും ആദ്യം പറയുക വസന്തകാലം എന്നാവും. അതുപോലെ ജീവിതത്തിലെ ഏറ്റവും മനോഹരമായ കാലം എതാണെന്ന് ചോദിച്ചാൽ എല്ലാവർക്കും ഒരൊറ്റ ഉത്തരമേ കാണൂ. ബാല്യകാലം ജീവിതത്തിന്‍റെ വസന്തകാലമാണിത്. മനുഷ്യ ജീവിതത്തിലെ ഏറ്റവും മനോഹരമായ കാലമാണ് ബാല്യകാലം. മനുഷ്യ മനസ്സിനെ അവന്‍റെ ബാല്യകാലത്തിന്‍റെ നിഴൽ എപ്പോഴും സ്വാധീക്കുന്നു.
ഒരു കാര്യത്തെക്കുറിച്ചും യാതൊരുവിധ ചിന്തയുമില്ലാത്ത കാലവും കൂടിയാണ് ബാല്യകാലം. കളിയും ചിരിയും പഠനവുമൊക്കെയായി ബാല്യകാലം കടന്നു പോകുകയാണ്. കടലാസ് തോണിയുണ്ടാക്കി വെള്ളത്തിലിടുക, പാവയെ ഒരുക്കുക, കള്ളനും പോലീസും കളി, സാറ്റ് തുടങ്ങി കുട്ടിക്കാലത്ത് കളിച്ച പലതരം കളികളും നമുക്ക് ഗൃഹാതുരത്ത്വം പകരുന്ന ഓർമ്മകളാണ്.
കുട്ടിക്കാലം നഷ്‌ടപ്പെടാതിരിക്കട്ടെ
അൽപനേരം കണ്ണടച്ചിരുന്ന് കുട്ടിക്കാലം ഒന്ന് ഓർത്തെടുക്കുകയാണെങ്കിൽ നമ്മുടെ സകല ടെൻഷനും ഒരൽപസമയത്തേക്കെങ്കിലും മറക്കുന്നതു പോലെ തോന്നാം. കുസൃതിയും തമാശയും നിറഞ്ഞ കുറേയേറെ കുട്ടിക്കാല ഓർമ്മകൾ മനസ്സിൽ ഓടിയെത്തും. മനസ്സിന്‍റെ പിരിമുറുക്കം അകലുകയും ചെയ്യും. എന്നാൽ നിങ്ങളുടെ ടെൻഷൻ നിറഞ്ഞ അന്തരീക്ഷത്തിൽ വളരുന്ന കുഞ്ഞുങ്ങളുടെ ബാല്യം സുരക്ഷിതവും സുന്ദരവും ആരോഗ്യകരവുമാണോ? മാതാപിതാക്കളിൽ നിന്നും കുഞ്ഞുങ്ങൾക്ക് ശരിയായ വാത്സല്യവും ശ്രദ്ധയും പരിരക്ഷയും ആരോഗ്യകരമായ അന്തരീക്ഷവും ലഭിക്കുന്നുണ്ടോ? ഇല്ല, തീർത്തും ഇല്ല. ഭൂരിഭാഗം കുടുംബങ്ങളിലും ഭാര്യാഭർത്താക്കന്മാർ തമ്മിലുള്ള സ്വരചേർച്ചയില്ലായ്മയും അസംതൃപ്തിയും കുട്ടികളെ സ്വാധീനിക്കുന്നുണ്ട്.
ടെൻഷനും തിരക്കും നിറഞ്ഞ ജീവിതശൈലിയാണ് ഭൂരിഭാഗം മാതാപിതാക്കളും നയിക്കുന്നത്. ഉദ്യോഗസ്‌ഥരായ മാതാപിതാക്കൾക്കാകട്ടെ സ്വന്തം കുഞ്ഞുങ്ങൾക്കൊപ്പം മതിയായ സമയം ചെലവഴിക്കാൻ സാധിക്കാറുമില്ല. ഇത്തരം കുഞ്ഞുങ്ങൾ അസ്വസ്ഥരും ഉദാസീനരുമാകുന്നു. അതിന്‍റെ ഫലമായി കുഞ്ഞുങ്ങൾ ശരിയായ രീതിയിൽ ഭക്ഷണം കഴിക്കാതെ വരും. അവരുടെ ആരോഗ്യസ്‌ഥിതിയും അതോടെ അവതാളത്തിലാകും. കുഞ്ഞുങ്ങളുടെ കുസൃതികളും ചാഞ്ചല്യവും ബാല്യകാലവും പതിയെ പതിയെ നഷ്‌ടപ്പെടുന്നു. അവരുടെ മനസ്സിലും മസ്‌തിഷ്‌കത്തിലും ഒരു തരം ഭയം പടരുന്നു. അതോടെ അവർ പഠനത്തിലും പിന്നോക്കം പോകും.
മാതാപിതാക്കൾ എന്ത് ചെയ്യണം
കുട്ടികളുടെ ബാല്യകാലം സുന്ദരമാകുകയെന്നത് മാതാപിതാക്കളുടെ ഉത്തരവാദിത്തമാണ്. കുട്ടിക്കാലം തുടങ്ങി കുഞ്ഞുങ്ങളുടെ ജീവിതത്തിന് പുത്തൻ ദിശ പകരുന്നതിന് ആദ്യം മാതാപിതാക്കൾ സ്വന്തം ജീവിതം മധുരതരമാക്കണം. സ്വന്തം കുഞ്ഞുങ്ങൾക്ക് മുന്നിൽ അനാവശ്യങ്ങളായ വാഗ്വാദങ്ങളോ കലഹങ്ങളോ സംഘർഷഭരിതമായ സ്‌ഥിതിവിശേഷമോ സൃഷ്ടിക്കാൻ പാടില്ല. ഇക്കാരണത്താലാണ് മിക്ക കുടുംബങ്ങളിലും കുഞ്ഞുങ്ങൾക്ക് രക്ഷിതാക്കളിൽ നിന്നും ശരിയായ പരിചരണമോ വാത്സല്യമോ സ്നേഹപൂർണ്ണമായ സാമീപ്യമോ ലഭിക്കാത്തത്. എന്തിനേറെ തിരക്കുമൂലം മാതാപിതാക്കൾക്ക് സ്വന്തം കുഞ്ഞുങ്ങൾക്കൊപ്പം സമയം ചെലവഴിക്കാൻപ്പോലും കഴിയാറില്ല. ഇപ്പോഴത്തെ നവ മാതാപിതാകളാകട്ടെ വളരെ ആധുനികരും ഏറെ തിരക്കു പിടിച്ച ജീവിതശൈലി പിന്തുടരുന്നവരുമാണ്. ഇത്തരം സാഹചര്യത്തിൽ കുഞ്ഞുങ്ങൾക്ക് സ്വന്തം ബാല്യകാലം നഷ്‌ടപ്പെടുകയാണ് ചെയ്യുന്നത്. പതിയെ അവർ വിഷാദാവസ്‌തയിലേക്കും അസ്വസ്ഥകളിലേക്കും നയിക്കപ്പെടുന്നു.
മാതാപിതാക്കൾ തമ്മിലുളള അഭിപ്രായ ഭിന്നതയാണ് കുഞ്ഞുങ്ങളുടെ സ്വഭാവത്തിൽ ഇത്തരത്തിലുള്ള മാറ്റങ്ങൾ ഉണ്ടാക്കാൻ കാരണം. ഇത്തരം മാതാപിതാക്കൾ സ്വന്തം കുഞ്ഞുങ്ങളുടെ മനോഹരമായ ബാല്യകാലം നഷ്‌ടപ്പെടുത്തുകയാണ് ചെയ്യുന്നത്. കുഞ്ഞുങ്ങൾക്ക് വളരെ ചെറുതിലെ തന്നെ തെറ്റും ശരിയും തിരിച്ചറിയാൻ കഴിയണം. അവരുടെ സ്വഭാവ രൂപീകരണത്തിനു ആരോഗ്യകരമായ വളർച്ചയ്ക്കും മാതാപിതാക്കൾ മുൻതൂക്കം നൽകണം.
കുഞ്ഞുങ്ങൾക്ക് സ്നേഹ നിർഭരമായ സുരക്ഷിതത്വവും ശരിയായ വിദ്യാഭ്യാസവും നൽകാൻ മാതാപിതാക്കൾ ശ്രദ്ധ ചെലുത്തേണ്ടതാണ്. അല്ലാതെ അവരെ കുട്ടിക്കാലം തുടങ്ങി തനിച്ചാക്കുകയല്ല വേണ്ടത്. മനുഷ്യ ജീവിതത്തിലെ ഏറ്റവും സന്തുഷ്ടി നിറഞ്ഞ തുടക്കമാണ് ബാല്യകാലം. അത് മാതാപിതാക്കൾ മറക്കാതിരിക്കുക.
