നിറങ്ങൾക്ക് ഒരു മാജിക്കുണ്ട്. അതെന്താണെന്നല്ലേ? നിറങ്ങൾക്ക് നമ്മുടെ ചിന്തകളേയും ഭാവനകളേയും ബുദ്ധിയേയും ഉണർത്താൻ കഴിയുമത്രേ! എന്നു മാത്രമല്ല അവയുടെ വികാസത്തിൽ നിർണായകമായ പങ്കും വഹിക്കും. മറ്റൊരു കാര്യം നിറങ്ങൾക്ക് പ്രത്യേകതരം ഊർജ്‌ജം പുറപ്പെടുവിക്കാനുള്ള കഴിവുണ്ടെന്നതാണ്. നമ്മുടെ മനസ്സിനേയും മസ്തിഷ്കത്തേയും സ്വാധീനിക്കാൻ നിറങ്ങൾക്ക് കഴിയും. ശരിയായ അനുപാതത്തിൽ നിറങ്ങളെ ലയിപ്പിക്കുമ്പോൾ ഉണ്ടാകുന്ന പ്രത്യേക നിറവും അതിന്‍റെ മിശ്രിത രൂപങ്ങളും ചുറ്റും ജീവസ്സുറ്റ അന്തരീക്ഷമൊരുക്കുന്നു.
അലങ്കാരങ്ങൾക്ക് ആവശ്യമായി വരുന്ന പെയിന്‍റിംഗ്, ലാംപ്, ഫ്ളവർ വേസ്, വാൾ പേപ്പർ, പൂക്കൾ, ചെടികൾ, ലൈറ്റ്, കലാവസ്‌തുക്കൾ, കുഞ്ഞ് ഫർണ്ണീച്ചർ എന്നിവയുമായി ഇണങ്ങി നിൽക്കുന്ന വ്യത്യസ്തങ്ങളായ നിറങ്ങൾ പകരാവുന്നതാണ്. ഇതോടൊപ്പം വീടിന് ശോഭ കൂട്ടുന്ന അലങ്കാര വസ്‌തുക്കൾ, മെഴുകുതിരികൾ തുടങ്ങി സോഫ്റ്റ് ഫർണ്ണിഷിംഗ് വസ്തുക്കളായ കർട്ടൻ, ഡ്രേപ്, ബാത്റൂം ലിനൻ, ഡൈനിംഗ് ടേബിൾ സെറ്റ്, മാറ്റ്, റണ്ണർ എന്നിവയുമായും നിറങ്ങളെ കൂട്ടിയിണക്കാം.
സർവ്വ് വെയർ, ക്രോക്കറി, ബേക്ക് വെയർ, മഗ്, ട്രേ തുടങ്ങിയ കിച്ചൺ വെയറുകളുടെ നിറവുമായി ഇണങ്ങുന്ന ഷെയിഡുകളും അടുക്കളയ്ക്ക് മനോഹാരിത പകരും. മികച്ച കലാരൂപങ്ങൾ നിറഞ്ഞതാണീ ലോകം. അവയിൽ നിന്നും വീടിന് യോജിച്ചവ തെരഞ്ഞെടുത്ത് വീടിന് സൗന്ദര്യവും ആകർഷണീയതയും പകരാം. ട്രെൻഡി ഷെയിഡ്സിലും പാറ്റേണിലും പ്രിന്‍റിലും ലഭ്യമായ ഇന്‍റീരിയർ ഫാബ്രിക്ക് വെയർ വീടിന്‍റെ അലങ്കാരത്തിൽ വലിയ മാറ്റുളവാക്കും. വളരെ ലാഭകരമായ വിലയിലും വലിയ പരിരക്ഷയൊന്നും ആവശ്യമില്ലാത്തതുമായവയും ലഭ്യമാണ്.
വളരെ സങ്കീർണ്ണമായ നിറത്തിലുള്ളതായിരിക്കും ആർട്ട് പീസുകൾ. അതുകൊണ്ട് ശരിയായ വസ്‌തു ശരിയായ അളവിൽ തെരഞ്ഞെടുക്കാം. അതിനായി എക്സ്പെർട്ടിന്‍റെ അഭിപ്രായവും ആരായാം. നിറത്തിന് യോജിച്ചതേത്, അല്ലാത്തതേത് അതിന്‍റെ ഊർജ്‌ജം, അതിന്‍റെ പ്രഭാവം എന്താണ് എന്നിങ്ങനെയുള്ള കാര്യങ്ങൾ സൂക്ഷ്മമായി മനസ്സിലാക്കണം. ഓരോ നിറവും വ്യക്തിത്വത്തെ തിരിച്ചറിയാൻ സഹായിക്കും. അതെങ്ങനെയെന്നല്ലേ?
ചുവപ്പ്
വേഗത, ഉത്സാഹം, ദൃഢനിശ്ചയം എന്നിവയെ പ്രതിനിധാനം ചെയ്യുന്ന നിറമാണ് ചുവപ്പ്. വളരെ തീക്ഷ്ണമായ നിറമാണിത്. ആധുനിക കാലഘട്ടത്തിൽ ഇതിന്‍റെ അർത്ഥം സ്വേച്ഛാധിപത്യം, മനസ്സിന്‍റെയും ബുദ്ധിയുടെയും ശരിയായ സന്തുലനം എന്നിവയെ പ്രതിഫലിപ്പിക്കുന്നു. അവർ പ്രകൃതി സ്നേഹികളായിരിക്കും. അതുപോലെ സംവേദനക്ഷമതയുള്ളവരും അനുകരണീയമായ വ്യക്‌തിത്വമുള്ളവരും, നല്ല പെരുമാറ്റം കാഴ്ച വയ്ക്കുന്നവരും കുടുംബത്തിനു വേണ്ടി സ്വയം സമർപ്പിക്കുന്നവരുമായിരിക്കും.
മഞ്ഞ
ശുഭാപ്തി വിശ്വാസത്തിന്‍റെയും അശുഭാപ്തി വിശ്വാസത്തിന്‍റെയും മിശ്രിത നിറമാണ് മഞ്ഞ. പ്രതീക്ഷയുടേയും ഉത്സാഹത്തിന്‍റെയും ബുദ്ധി ശക്‌തിയുടേയും യുക്തിയുടേയും പ്രതീകമാണീ നിറം.
വെള്ള നിറം
ഇത് പൂർണ്ണതയുടെ നിറമാണ്. പ്രേരണയും ആഴവും പരപ്പും പ്രതിഫലിപ്പിക്കുന്നു. സ്വാതന്ത്യ്രത്തിന്‍റേയും പവിത്രതയുടേയും പ്രതീകവും കൂടിയാണ് വെളുപ്പ് നിറം. ഒപ്പം ഏകത, സമത്വം, സദ്ചിന്ത, പൂർണ്ണത എന്നിവ കൂടിയും വെളുപ്പ് നിറം പ്രതിനിധാനം ചെയ്യുന്നു.
വയലറ്റ്
വയലറ്റ് നിറം ഇഷ്‌ടപ്പെടുന്നവർ സൗമ്യ സ്വഭാവവും ഉത്സാഹവും അദ്ഭുതകരമായ വ്യക്‌തിത്വവും ഉള്ളവരായിരിക്കുമത്രേ. ഇത്തരക്കാർ മറ്റുള്ളവരെ ആശ്രയിക്കുന്നവരായിരിക്കും. അതുകൊണ്ട് ദൈനംദിന ഉത്തരവാദിത്തങ്ങൾ വഹിക്കാൻ ഇവർ മടിക്കും. ആളുകളെ പെട്ടെന്ന് മനസ്സിലാക്കും. മറ്റൊന്ന് ഇക്കൂട്ടർ രാഷ്ട്രീയം ഇഷ്ടപ്പെടുന്നവരാണ്.
ഗ്രേ
ഏറ്റവും ഗ്ലാമറസ്സായ നിറമാണിത്. കാഴചയിൽ നിരാശയുളവാക്കുന്നതാണെങ്കിലും വളരെ സുന്ദരമായ നിറമാണിത്. ബോറിംഗ് നിറമാണെങ്കിലും പക്വമായ നിറമാണ്. സ്‌ഥിരതയുടെയും ശാലീനതയുടെയും തരംഗങ്ങൾ സൃഷ്ടിക്കുന്നതിനൊപ്പം പ്രൗഢിയേയും ഈ നിറം പ്രതിനിധാനം ചെയ്യുന്നുണ്ട്. ഈ നിറം അനിശ്ചിതത്വവും വേർപാടും പ്രതിഫലിപ്പിക്കുമെന്നതാണ് ഒരു ന്യൂനത.
ചാര നിറം ഇഷ്‌ടപ്പെടുന്നവർ ഗൗരവ സ്വഭാവക്കാരും വളരെ ഡൗൺ ടു എർത്തായ വ്യക്‌തികളുമായിരിക്കും. ഒപ്പം വിനയമുള്ളവരുമായിരിക്കും. വളരെ ലാളിത്യവും ആശ്രയത്വവും പ്രകടിപ്പിക്കുന്നവരുമാണെങ്കിലും ഇക്കൂട്ടർ പിശുക്കന്മാരും ഭൗതികവാദികളുമായിരിക്കുമെന്ന മറ്റൊരു ന്യൂനതയുമുണ്ട്. പുരുഷന്മാരുടെ ഇഷ്ട നിറം കൂടിയാണിത്.
കറുപ്പ്
ദൃഢനിശ്ചയം, സന്തുലിതം, സൗന്ദര്യം, ആകർഷണീയത, പ്രശാന്തത എന്നിവയുമായി കറുപ്പ് നിറം ബന്ധപ്പെട്ടിരിക്കുന്നു. പലരും കറുപ്പ് നിറത്തെ അശുഭ നിറമായി കാണാറുണ്ട്. ശുഭാപ്തി വിശ്വാസമില്ലായ്മ, നിരാശ, യാഥാസ്‌ഥിതിക മനോഭാവം എന്നിവയേയും ഈ നിറം സൂചിപ്പിക്കുന്നു.
ലെമൺ യെല്ലോ
അത്യധികം തീക്ഷ്ണ വർണ്ണമാണിത്. രോമാഞ്ചകരമായ അനുഭവങ്ങൾ ഇഷ്‌ടപ്പെടുന്നവരുടെ നിറമാണിത്. പ്രതീക്ഷ, സന്തോഷം, സഹൃദയ മനോഭാവം, സ്വീകാര്യത എന്നിവയാണ് ഈ നിറത്തിന്‍റെ മുഖമുദ്രകൾ. ധിക്കാരികളുടെയും നിറമാണ് ലെമൺ യെല്ലോ. ഈ നിറം ഇഷ്ടപ്പെടുന്നവരും നന്നേ കുറവല്ല.
