ചർമ്മ സൗന്ദര്യം നിലനിർത്താനും ചർമ്മത്തിലെ ചുളിവുകൾ അകറ്റാനും പലരും ക്രീമുകളും മറ്റ് കോസ്മെറ്റിക്കുകളും ആശ്രയിക്കാറാണ് പതിവ്. ഇത്തരം പ്രകൃത്തിദത്തമല്ലാത്ത ഉൽപ്പന്നങ്ങൾ പലപ്പോഴും ഗുണത്തേക്കാൾ ഏറെ ദോഷമാണുണ്ടാക്കുക. ചർമ്മത്തിന്‍റെ സ്വാഭാവിക സൗന്ദര്യം കാത്തു സൂക്ഷിക്കാൻ പ്രകൃതിയെ ആശ്രയിക്കാം. വീട്ടിൽ തന്നെ ലഭ്യമായ ഭക്ഷ്യവസ്തുക്കൾ ഉപയോഗിച്ച് സുന്ദരചർമ്മം കരസ്‌ഥമാക്കാം.
തവിട് കളയാത്ത അരി
തവിട് കളയാത്ത തവിട്ട് നിറത്തിലുള്ള അരികൾക്കുള്ളിൽ സെറാമൈഡ്സ് എന്നറിയപ്പെടുന്ന മോളിക്ക്യൂളുകൾ അടങ്ങിയിട്ടുണ്ട്. ചർമ്മത്തിന്‍റെ തിളക്കവും ഇലാസ്തികതയും നഷ്‌ടപ്പെടുത്താതെ തൊലി പുറമേ ലെയറുകളുമായി യോജിച്ചാണ് ഈ മോളിക്ക്യൂളുകൾ പ്രവർത്തിക്കുന്നത്.
തക്കാളി
വളരെ കൂടിയ അളവിൽ ഓക്സിഡന്‍റുകൾ അടങ്ങിയ തക്കാളിക്ക് ചർമ്മത്തിന്‍റെ തിളക്കം കൂട്ടാൻ സാധിക്കും. തക്കാളി പച്ചയ്ക്ക് കഴിക്കുകയോ സാലഡിന്‍റെ കൂടെ ചേർക്കുകയോ ചെയ്യാം. വിപണിയിൽ ഗുണമേന്മയുള്ള തക്കാളി സോസുകളും, ജ്യൂസുകളും ലഭ്യമാണ്. വില കൂടിയ ക്രീമുകൾക്ക് പകരമായി തക്കാളി അരച്ചിട്ട് ഫെയ്സ്പാക്കുപോലെ
ഉപയോഗിക്കാം.
ഗ്രീൻ ടീ
ഗ്രീൻ ടീ ശരീരത്തിലെ ഒട്ടേറെ പ്രവർത്തനങ്ങളെ നോർമലാക്കി നിർത്തുന്നതിന് സഹായിക്കും. പ്രായമാകുമ്പോൾ വർദ്ധിക്കുന്ന ഡീഹൈഡ്രോ ടെസ്റ്റിസ്റ്റെറോണിന്‍റെ അളവ് കൂടാതെ ചർമ്മത്തിന്‍റെ യുവത്വം കാത്തു സൂക്ഷിക്കാൻ ഗ്രീൻ ടീ നല്ലതാണ്. കണ്ണിനു കീഴെയുള്ള കറുത്ത പാടുകളിലോ കരുവാളിപ്പ് പടർന്നിട്ടുള്ള മറ്റു സ്‌ഥലങ്ങളിലോ മുപ്പത് മിനിറ്റ് ഫ്രിഡ്ജിൽ സൂക്ഷിച്ച ചെറിയ ഗ്രീൻ ടീ ബാഗുകൾ മുകളിൽ വയ്‌ക്കുക. പല ദിവസങ്ങളിലും ഇത് ആവർത്തിക്കുക. കറുത്തപാടുകൾ മാറും.
ബ്ലൂബെറീസ്
ബ്ലൂബെറീസ് ഓക്സിഡന്‍റുകളുടെ കലവറയാണ്. ചർമ്മത്തിലെ ചുളിവലവുകൾ ഇല്ലാതിരിക്കുവാൻ ബ്ലൂബെറീസ് സഹായിക്കും. ഇലാസ്തിവകത നഷ്ടപ്പെടാതിരിക്കാനും ചർമ്മത്തിന്‍റെ മിനുസം അതേപോലെ നിലനിൽക്കാനും ബ്ലൂബെറീസ് സഹായകമാണ്. സ്ട്രോബെറിയും ഇതേ ഗണത്തിൽപെടുന്നവയാണ്. നമ്മുടെ നാട്ടിൽ ലഭിക്കുന്ന ഞാവൽപ്പഴം ഇതേ വിഭാഗത്തിൽ ധാരാളം ഓക്സിഡന്‍റുകൾ അടങ്ങിയ ഒന്നാണ്.
തേങ്ങ
തേങ്ങയിൽ നിന്ന് ലഭിക്കുന്ന വിവിധ ഘടകങ്ങൾ ചർമ്മത്തിന്‍റെ സൗന്ദര്യം നിലനിർത്താൻ സഹായിക്കും. തേങ്ങാപ്പാലോ, കരിക്കിൻ വെള്ളമോ ഉപയോഗിച്ച് ഫേഷ്യൽ ചെയ്യാവുന്നതാണ്. വിറ്റാമിൻ എ യും, വിറ്റാമിൻ കെ യും അടങ്ങിയിട്ടുള്ളതിനാൽ ചർമ്മത്തിന്‍റെ പ്രവർത്തനങ്ങളെ സഹായിക്കാൻ വെളിച്ചെണ്ണയ്ക്ക് കഴിയും. വെളിച്ചെണ്ണ ഉപയോഗിച്ച് തലമുടിയിഴകൾക്കിടയിലൂടെ മസാജ് ചെയ്യുന്നത് മുടിവേരുകൾക്ക് ഉറപ്പ് നൽകും.
ഒഴിവാക്കേണ്ടത്
പാലുൽപ്പന്നങ്ങൾ, വറുത്തു പൊരിച്ച പലഹാരങ്ങൾ, മൈദ പോലുള്ള പശിമയുള്ള പദാർത്ഥങ്ങൾ കൊണ്ട് തയ്യാറാക്കിയ ബേക്കറി സാധനങ്ങൾ, പഞ്ചസാര, ഫുഡ് കളറുകളും, പ്രിസർവേറ്റീവ്സും അടങ്ങിയ സോഫ്റ്റ് ഡ്രിങ്കുകൾ, അസിഡിക്ക് ആയിട്ടുള്ള സോഡാ ഉൽപ്പന്നങ്ങൾ നിങ്ങളുടെ ചർമ്മത്തിന് നല്ലതല്ല. തിളക്കവും, മിനുസവും സ്വഭാവികമായ സൗന്ദര്യവും ചർമ്മത്തിന് വേണമെന്ന് ആഗ്രഹമുള്ളവർ ഇതൊക്കെ ഒഴിവാക്കുന്നതാണ് നല്ലത്.
