അമീർ ഖാൻ ചിത്രമായ ദംഗലിൽ ഗീത ഫൊഗോട്ടിന്‍റെ കുട്ടിക്കാലം അവതരിപ്പിച്ച കാശ്മീരി പെൺകുട്ടിയെ പ്രേക്ഷകർക്ക് മറക്കാൻ കഴിയില്ല. രണ്ടാമത്തെ ചിത്രമായ സീക്രട്ട് സൂപ്പർസ്‌റ്റാറിലും ആ പെൺകുട്ടി ശ്രദ്ധിക്കപ്പെട്ടു. താൻ ഒരു അഭിനേത്രിയാവുമെന്ന് സിനിമയിൽ അഭിനയിക്കാൻ ചാൻസ് എത്തുന്നവരെ അവൾ വിചാരിച്ചതേയില്ല. അതാണ് സൈറ വസിം.
എന്തു ചെയ്‌താലും അത് വ്യത്യസ്തമായിരിക്കണം എന്ന ചിന്ത ബാല്യം മുതൽ സൈറയ്ക്കുണ്ട്. പക്ഷേ ആ ചിന്തയിലൊന്നും അഭിനയമോ സിനിമയോ കടന്നു വന്നിരുന്നില്ല.
വളരെ ചെറുപ്രായത്തിൽ ഏതാനും പരസ്യങ്ങളിൽ പങ്ക് ചേരാൻ കഴിഞ്ഞിരുന്നു. അതിൽ നിന്നാണ് സിനിമാ ലോകത്തേക്കുള്ള വാതിൽ തുറക്കപ്പെട്ടത്. അമീർ ഖാൻ തന്‍റെ ചിത്രമായ ദംഗലിലേക്ക് പുതിയ മുഖങ്ങൾ തെരയുന്ന സമയത്താണ് സൈറയുടെ സ്ക്കൂൾ പ്രിൻസിപ്പൽ, സൈറയോട് അവളുടെ പേര് കൊടുക്കാൻ നിർദ്ദേശിച്ചത്. സൈറ തന്‍റെ ചിത്രം അയച്ചു കൊടുത്തു. ഓഡിഷനിൽ വിജയിക്കുകയും ചെയ്‌തു. പക്ഷേ വീട്ടുകാർക്ക് സൈറയെ അഭിനയ ലോകത്തേക്ക് അയക്കാൻ താൽപര്യമില്ലായിരുന്നു. പിന്നെ ബന്ധുക്കളും സുഹൃത്തുക്കളും പ്രിൻസിപ്പലും നിർബന്ധിച്ചപ്പോൾ വീട്ടുകാർ സമ്മതം മൂളുകയായിരുന്നു.
കാലത്തിനൊപ്പം ജീവിക്കണമെന്ന പക്ഷക്കാരിയാണ് സൈറ. മുൻകൂട്ടി ഒന്നും പ്ലാൻ ചെയ്യാറില്ല. ജോലിയും പഠനവും ഒരുമിച്ച് കൊണ്ടു പോകണമെന്നാണ് ആഗ്രഹം. പത്താം ക്ലാസ്സ് പരീക്ഷയിൽ 92 ശതമാനം മാർക്ക് നേടിയാണ് കഴിഞ്ഞ വർഷം സൈറ വിജയിച്ചത്. നല്ല പാട്ടുകാരി കൂടിയാണ് ഈ കൊച്ചു മിടുക്കി.
ശ്രീനഗറിലെ ഒരു യാഥാസ്‌ഥിതിക മുസ്ലീം ജന്മി കുടുംബത്തിലാണ് സൈറ ജനിച്ചത്. അച്‌ഛൻ വസിം ബാങ്ക് ഉദ്യോഗസ്‌ഥനാണ്. അമ്മ ജർക്കാ വസിം. സിനിമാ ലോകത്തെ തന്‍റെ എൻട്രിക്കും പ്രശസ്തിക്കും കാരണം തന്‍റെ കുടുംബത്തിന്‍റെ പിന്തുണ മാത്രമാണെന്ന് സൈറ കരുതുന്നു. 16-ാം ജന്മദിനം തന്‍റെ സുഹൃത്തുക്കൾക്കൊപ്പമാണ് ആഘോഷിച്ചത്. ചുരുങ്ങിയ സമയം കൊണ്ട് വിവാദത്തിലും പെട്ടു സൈറ. കൊച്ചു നായികയ്ക്കൊപ്പം ചെറിയൊരു ചാറ്റ്.
സിനിമ സ്വപ്നം എപ്പോഴെങ്കിലും മനസ്സിലുണ്ടായിരുന്നോ?
ഇല്ലേയില്ല. അതൊരു അതിശയം തന്നെയാണ്. ദംഗലിന്‍റെ ഓഡിഷനു പോയപ്പോൾ ആ ചിത്രത്തിലേക്ക് സെലക്ട് ആയേക്കും എന്ന് പ്രതീക്ഷിച്ചിരുന്നു. അങ്ങനെ തന്നെ സംഭവിച്ചു. സീക്രട്ട് സൂപ്പർ സ്റ്റാറിന്‍റെ ഓഡിഷനു പോയപ്പോഴും അതായിരുന്നു അനുഭവം. കിട്ടിയ അവസരങ്ങളിൽ ഞാൻ അങ്ങേയറ്റം ഹാപ്പിയാണ്.
ഈ ചിത്രങ്ങളിൽ അഭിനയിക്കാൻ ഒരുപാട് തയ്യാറെടുപ്പ് വേണ്ടി വന്നോ?
ദംഗലിന്‍റെ സമയത്ത് റസ് ലിംഗ് പഠിക്കേണ്ടി വന്നു. ഒരുപാട് വിയർപ്പൊഴുക്കിയാണ് ആ റോൾ ചെയ്‌തത്. സീക്രട്ട് സൂപ്പർ സ്‌റ്റാറിൽ ഗിറ്റാർ വായിക്കാൻ പഠിച്ചു.
ഒരു കാര്യം ചെയ്യാൻ പറ്റുമെന്ന് വിശ്വാസം വന്നാൽ മാത്രമേ അതു ഞാൻ ഏറ്റെടുക്കുകയുള്ളൂ. സീക്രട്ട് സൂപ്പർ സ്‌റ്റാറിൽ ഗായികയുടെ റോൾ ആയിരുന്നല്ലോ. ആരെങ്കിലും എന്നോട് തമാശയ്ക്ക് എന്നാൽ ഒന്ന് പാടൂ കേൾക്കട്ടെ എന്നു പറഞ്ഞാൽ അതു ചെയ്യണമെന്ന് ഞാൻ ആഗ്രഹിക്കുന്നു. ഞാൻ നല്ല ഗായികയല്ല. പക്ഷേ ഈ റോൾ ചെയ്‌തപ്പോൾ ഞാൻ പാട്ട് പഠിച്ചു.
രണ്ടു വിജയ ചിത്രങ്ങളുടെ ഭാഗമായതിനു ശേഷം ജീവിതത്തിൽ വന്ന മാറ്റമെന്താണ്? കാശ്മീർ ജനത എന്തു പറയുന്നു?
എന്‍റെ ഡെസ്റ്റിനി എന്താണോ അതാവാം എന്നെ ഇവിടെ വരെ എത്തിച്ചത്. അതിനൊപ്പം എന്‍റെ പരിശ്രമവും കൂടി ചേരുമ്പോൾ ഞാൻ വിചാരിക്കാത്തത്ര കാര്യങ്ങൾ എനിക്കൊപ്പം വന്നു. വളരെ കുറച്ച് ആളുകൾ മാത്രമാണ് എന്നെ ഇപ്പോൾ അഭിനേത്രി എന്ന നിലയിൽ തിരിച്ചറിയുന്നത്. എന്‍റെ നാടായ കാശ്മീരിൽ എന്നെ പരിചയമുള്ളവരൊക്കെ വളരെ ഹാപ്പിയാണ്. അതെനിക്കും സന്തോഷമാണ്.
യഥാർത്ഥ ജീവിതത്തിൽ സൈറ എങ്ങനെയാണ്?
ഞാൻ ഭയങ്കര നാണക്കാരി തന്നെയാണ്. മറ്റുള്ളവരോട് മിണ്ടാൻ ഭയമുണ്ട്. ക്യാമറ ഓൺ ആയി കഴിഞ്ഞാൽ ഞാൻ എന്‍റെ കഥാപാത്രത്തെക്കുറിച്ച് മാത്രമേ ചിന്തിക്കാറുള്ളൂ. എന്നെക്കുറിച്ച് ആലോചിക്കാറില്ല.
അമീർ ഖാനൊപ്പം അഭിനയിച്ച അനുഭവം?
ഞാൻ അദ്ദേഹത്തിന്‍റെ പാഷൻ ഫോളോ ചെയ്യുകയാണ്. അദ്ദേഹം ജോലി ചെയ്യുന്ന രീതി, ഓരോ കാര്യത്തെയും സമീപിക്കുന്ന രീതി ഇതൊക്കെ ഞാൻ ശരിക്കും ശ്രദ്ധിക്കാറുണ്ട്. അതു പിന്തുടരാൻ ഞാൻ ശ്രമിക്കുന്നുണ്ട്.
ഇതുവരെ കിട്ടിയതിൽ ഏറ്റവും നല്ല കോംപ്ലിമെന്‍റ് എന്താണ്?
സീക്രട്ട് സൂപ്പർ സ്‌റ്റാറിലെ പല രംഗങ്ങളും വളരെ ഇമോഷണൽ ആണ്. അതു കണ്ടിട്ട് എന്‍റെ അച്‌ഛന്‍റെ കണ്ണു നിറഞ്ഞു. എന്നെ സംബന്ധിച്ച് ഏറ്റവും വലിയ കോംപ്ലിമെന്‍റ് അതാണ്. എന്‍റെ അച്‌ഛൻ കരയുന്നത് ഞാൻ ഇതുവരെ കണ്ടിട്ടില്ലായിരുന്നു. അച്‌ഛൻ കരഞ്ഞുകൊണ്ട് എന്നെ കെട്ടിപ്പിടിച്ചു.
ഇപ്പോൾ ഡ്രീം റോൾ വല്ലതും മനസ്സിലുണ്ടോ?
ഇതുവരെ അങ്ങനെ ഒന്നും ചിന്തിച്ചിട്ടില്ല. ആകെ തോന്നിയ ഒരു ആഗ്രഹം, കങ്കണ റണാവത്തിനൊപ്പം അഭിനയിക്കണമെന്നാ.
കാശ്മീരിൽ ഒരു മാറ്റം ആഗ്രഹിക്കുന്നുണ്ടോ?
കാശ്മീരിൽ ആരും തന്നെ ആ നാടിനൊരു മാറ്റം വേണമെന്ന് ആഗ്രഹിക്കുന്നുണ്ടാവില്ല. ഓരോരുത്തരും സ്വയം മാറ്റം ആഗ്രഹിക്കുന്നുണ്ടാകണം. ഞാനും അങ്ങനെയാണ്. ആ മാറ്റത്തിൽ സന്തോഷം കണ്ടെത്താമല്ലോ.
അഭിനയമല്ലാതെ വേറെ എന്തു മേഖലയാണ് ഇഷ്‌ടം?
പഠിക്കണം. അതിൽ മാത്രമാണ് ശ്രദ്ധ. അഭിനയവും, പഠനവും കഴിഞ്ഞാൽ പിന്നെ വേറൊന്നിനും സമയമില്ല. രണ്ടും കൂടി കൊണ്ട് പോകാൻ വളരെ പ്രയത്നം വേണം. എങ്കിലും എങ്ങനെ മുന്നേറണമെന്നതിനെപ്പറ്റി ഇപ്പോൾ വ്യക്‌തമായ ധാരണ ഉണ്ട്.
ഭക്ഷണപ്രിയയാണെന്ന് കേട്ടല്ലോ?
ശരിക്കും എനിക്ക് ഭക്ഷണം ഉണ്ടാക്കാൻ വലിയ ഇഷ്‌ടമൊന്നുമില്ല. പക്ഷേ കഴിക്കാൻ നല്ല താൽപര്യമുണ്ട്.
കൂട്ടുകാരോട് പറയാനുള്ളത്?
നമ്മൾ എന്തെങ്കിലും ചെയ്യാൻ ആഗ്രഹിക്കുന്നുണ്ടെങ്കിൽ അതിനോട് ശരിക്കും പാഷൻ വേണം. എന്നാലേ ലക്ഷ്യത്തിലെത്താൻ കഴിയൂ.
