സ്റ്റുഡന്‍റ് ഓഫ് ദി ഇയർ എന്ന ചിത്രത്തിലൂടെയാണ് ഗ്ലാമറസ് സിനിമാരംഗത്തേക്കുള്ള ആലിയ ഭട്ടിന്‍റെ കടന്നു വരവ്. അതിനെ തുടർന്ന് നിരവധി വിജയചിത്രങ്ങളുടെ ഭാഗമായി. ബോളിവുഡിൽ തികച്ചും വ്യത്യസ്തയായ ഒരു നായിക തന്നെയാണ് ആലിയ. അനന്യമായ അഭിനയ ശൈലിയിലൂടെ സ്വന്തം സ്പെയ്സ് കണ്ടെത്തിയവൾ. സിനിമാ കുടുംബത്തിൽ ജനിച്ചു വളർന്ന ആലിയക്ക് അഭിനയമല്ലാതെ മറ്റൊന്നും ഇഷ്ടമായിരുന്നില്ല. പഠനം എങ്ങനെയും അവസാനിപ്പിച്ച് സിനിമാരംഗത്തേക്ക് വരികയായിരുന്നു. ഈ അഭിമുഖത്തിലേക്ക് താരത്തെ വിളിക്കുമ്പോൾ, ആലിയയുടെ പുത്തൻ പടം സടക് 2 ഡിജിറ്റൽ റിലീസിന് തയ്യാറായിരിക്കുകയാണ്.
ഈ ചിത്രത്തിന്‍റെ റിലീസുമായി ബന്ധപ്പെട്ട് അങ്ങേയറ്റത്തെ ത്രില്ലിലാണ് താരം. കാരണം വ്യക്‌തമാണ്. ഒന്നാമതായി തന്‍റെ അച്‌ഛൻ മഹേഷ് ഭട്ടാണ് ചിത്രത്തിന്‍റെ സംവിധായകൻ. മറ്റൊരു സന്തോഷം, സഹോദരി പൂജാ ഭട്ടിനൊപ്പമുള്ള ആദ്യ ചിത്രം. ഇതെല്ലാം കണക്കിലെടുക്കുമ്പോൾ പ്രേക്ഷകരുടെ പ്രതികരണമറിയാനുള്ള താൽപര്യം വർദ്ധിക്കുമല്ലോ. മഹേഷ് ഭട്ട് 20 വർഷങ്ങൾക്കു ശേഷം ഡയറക്ടർ റോളിൽ മടങ്ങിയെത്തിയ ചിത്രം എന്ന പ്രത്യേകത കൂടി സഡക് 2 വിന് ഉണ്ട്. “സഡക്” എന്ന പഴയ ഹിന്ദി ചിത്രം റിലീസ് ചെയ്യുന്ന സമയത്ത് താൻ സ്ക്കൂളിൽ പഠിക്കുകയായിരുന്നു. ആലിയ വിർച്വൽ പ്രസ് കോൺഫറൻസിൽ അതേക്കുറിച്ച് ഇങ്ങനെ പറഞ്ഞു.
എന്‍റെ സ്വപ്ന സാഫല്യം
“അന്ന് എന്നെ സഡക്കിലെ ഗാനങ്ങൾ എന്നെ വളരെയധികം ആകർഷിച്ചിരുന്നു. പപ്പയ്ക്കൊപ്പം ഒരു സിനിമാ ചെയ്യാൻ കഴിയുക എന്നത് വളരെ വ്യത്യസ്തമായ സന്തോഷമുള്ള അനുഭവമാണ്. ആദിത്യ, സഞ്ജയ് ദത്ത്, പൂജ ഇവരൊക്കെ എന്‍റെ കുടുംബാംഗങ്ങളാണ്. സീനിയറായ കലാകാരന്മാർക്കൊപ്പം വർക്ക് ചെയ്യുമ്പോൾ നെർവസ് ആകുന്നത് സ്വഭാവികമാണ്. ഇവിടെയും അതു സംഭവിച്ചു. എന്നാൽ അവർ എന്നെ സപ്പോർട്ട് ചെയ്തതോടെ എന്‍റെ ആത്മവിശ്വാസം വർദ്ധിച്ചു.
ഇന്‍റർനാഷണൽ പ്രൊജക്ടുകളിലും എനിക്ക് വർക്ക് ചെയ്യാൻ താൽപര്യമുണ്ട്. എന്നാൽ അക്കാര്യത്തിൽ ഒരാഗ്രഹമുണ്ട്. തന്‍റെ കഥാപാത്രവും പ്രൊജക്ടിന്‍റെ കണ്ടെന്‍റും തമ്മിൽ ബന്ധം വേണം!
ലോക്ക്ഡൗൺ കാലം
മനസിന് ആഗ്രഹം തോന്നിയിട്ടും മാറ്റി വച്ചിരുന്ന നിരവധി കാര്യങ്ങൾ ചെയ്യാൻ ലോക്ക്ഡൗൺ വേള ഉപയോഗിക്കാൻ കഴിഞ്ഞു. ഗിറ്റാർ പഠിച്ചു. ബേക്കിംഗ് ചെയ്യാൻ പഠിച്ചു. ടിവി ഷോകൾ നിരവധി കണ്ടു. പിന്നെ എന്നെ ഏറ്റവും ആഴത്തിൽ സ്പർശിച്ച കാര്യം എന്‍റെ കുടുംബാംഗങ്ങൾക്കൊപ്പം യാതൊരു തിരക്കുമില്ലാതെ കുറേ ദിനങ്ങൾ ചെലവഴിക്കാൻ കഴിഞ്ഞു എന്നതു തന്നെയാണ്.
എല്ലാ കഥാപാത്രവും വ്യത്യസ്തം
നിരവധി വ്യത്യസ്തങ്ങളായ കഥാപാത്രങ്ങൾ ചെയ്യാൻ കഴിഞ്ഞിട്ടുണ്ട്. അതിന്‍റെ കാരണം, കഥാപാത്രങ്ങളെ തെരഞ്ഞെടുക്കുന്ന രീതി തന്നെയാണ്. ഓരോ ചിത്രം എൻക്വയറി വരുമ്പോഴും സ്ക്രിപ്റ്റ് മുഴുവനായി മനസിലാക്കാൻ ശ്രമിക്കാറുണ്ട്. കഥാപാത്രത്തിനു വേണ്ട പൂർണ്ണമായ തയ്യാറെടുപ്പുകൾക്ക് ഇത് സഹായമാവുന്നു. ഇഷ്ടപ്പെട്ട കഥാപാത്രങ്ങൾക്കായി റിസ്ക്ക് എടുക്കാൻ എനിക്ക് താൽപര്യമാണ്. വെറുതെ റിസ്ക് എടുക്കാൻ വേണ്ടി മാത്രം അതിനൊന്നും പോകാറില്ല. സ്ക്രിപ്റ്റും കഥാപാത്രവും നല്ലതാണ്. അതിലെന്തോ എലമെന്‍റ് ഉണ്ടെന്ന് പ്രഥമ ദൃഷ്ട്യാ തോന്നിയാൽ പിന്നെ റിസ്ക് ഫാക്ടർ ഒന്നും ചിന്തിക്കാറില്ല. എക്സ്പെരിമെന്‍റ് ചെയ്യാൻ തയ്യാറായില്ലെങ്കിൽ സ്വന്തം കഴിവിനെക്കുറിച്ച് കൃത്യമായ ധാരണ നമുക്ക് ലഭിക്കില്ല.
അമ്മക്കുട്ടി
ഞാന്‍ ഇപ്പോഴും ഒരു അമ്മക്കുട്ടിയാണ്. അമ്മയുടെ ഓമന. എന്തു ചെറിയ പ്രശ്നം വന്നാലും ഞാൻ അമ്മയുടെ അടുത്തേക്ക് ഓടും. പ്രയാസങ്ങളും സങ്കടങ്ങളും സന്തോഷങ്ങളും അമ്മയോട് ആദ്യം പങ്കിടുന്നതാണ് ഇഷ്‌ടം. പിന്നെ സഹോദരിമായ പൂജയും ഷാഹിനും ഒരുപാട് പ്രോത്സാഹിപ്പിക്കാറുമുണ്ട്. ആലിയ പറയുന്നു.
നല്ല മരുമകൾ
റൺബീറും ആലിയയും തമ്മിലുള്ള റൊമാൻസ് പരസ്യമായ സംഗതിയാണ്. ഇരുവരും നിരവധി സ്ഥലങ്ങളിൽ ഒരു മിച്ച് പോകുന്നത് സീക്രട്ടായിട്ടൊന്നുമല്ല. മാത്രമല്ല റൺബീറിന്‍റെ കുടുംബവുമായി നല്ല ബന്ധത്തിലാണ് ആലിയ. റൺബീറിന്‍റെ മുൻകാല പ്രണയിനികളെക്കാൾ ഋഷി കപൂർ അംഗീകരിച്ചത് ആലിയയെയാണ്. ഋഷി കപൂറുമായും ഭാര്യ നീതു സിംഗുമായും റൺബീറിനേക്കാൾ കാര്യങ്ങൾ പങ്കുവയ്ക്കുന്നത് ആലിയയാണ്. റൺബീറിന്‍റെ വീട്ടിലെ രക്ഷാബന്ധൻ ആഘോഷത്തിൽ ആലിയയും കരീനയും പങ്കെടുക്കുകയും ചെയ്‌തിരുന്നു.
