പ്രിയതമനൊപ്പം ആടിയും പാടിയും ജീവിതത്തിന്‍റെ ഓരോ നിമിഷവും ആസ്വദിക്കാനാവുക എന്നായിരിക്കും സ്നേഹസമ്പന്നമായ പങ്കാളി ആഗ്രഹിക്കുക. ആഹ്ലാദ ലഹരിയിൽ സ്വയം അലിഞ്ഞ് ചേരുക, എന്നാൽ വിവാഹമെന്നത് ജീവിതത്തിന്‍റെ നീണ്ട യാത്രയെയാണ് സൂചിപ്പിക്കുന്നത്. എന്നാൽ മനോഹരമായ ഈ യാത്രയിൽ ചില പോരായ്മകൾ ഉണ്ടാകാം. അത് തിരുത്തുകയെന്നുള്ളത് രണ്ട്പേരുടെയും ഉത്തരവാദിത്തമാണ്. പങ്കാളികൾ പരസ്പരം നിലക്കണ്ണാടികളാവുകയെന്നത് ജീവിതത്തെ കൂടുതൽ മധുരമുള്ളതാക്കും.
വിവാഹമൊരു പാർട്ണർഷിപ്പ്
വിവാഹമെന്നത് ഒരു 50-50 പാർട്ണർഷിപ്പാണ്. പരസ്പരം മികച്ച ധാരണയും വിശ്വാസവും ആദരവുമാണ് ഇവിടെ ആവശ്യം. എന്നാലെ യാതൊരു സങ്കോചവുമില്ലാതെ അവർക്ക് പരസ്പരം സ്വന്തം മനസ്സ് തുറക്കാനാവൂ. പരസ്പരം ഇഷ്ടാനിഷ്ടങ്ങൾ പങ്ക്‍വയ്ക്കാനാവൂ. സങ്കടങ്ങളും ആഗ്രഹങ്ങളും പരസ്പരം മനസ്സിലാക്കാനാവൂ.
ഒരു ഉദാഹരണം പറയാം. കമലും സനലും ഉറ്റചങ്ങാതിമാരായിരുന്നു. ഓരേ കമ്പനിയിൽ ജോലി. എന്നാൽ വീട്ടിലായാലും ഓഫീസിലായാലും എല്ലാവരും കമലിനെ ഒരേപോലെ ഇഷ്ടപ്പെട്ടിരുന്നു. കമൽ എവിടെപ്പോയാലും ആ അന്തരീക്ഷം തന്നെ ഹൃദ്യമാകും. എല്ലാവരും കമലിന്‍റെ സാമർത്ഥ്യത്തെയും ലുക്കിനെയും പ്രശംസിക്കും.
എന്നാൽ സനലിന്‍റെ സ്വഭാവം നേർ വിപരീതമായിരുന്നു. ആരിലും അയാളുടെ വ്യക്‌തിത്വം മതിപ്പുളവാക്കിയില്ല. സനൽ വളരെ അറിവുള്ളവനാണെങ്കിലും വളരെ വിരളമായേ ജോലികളിൽ വിജയം വരിച്ചിരുന്നുള്ളൂ. വളരെ കുറച്ചുപേരെ അയാളെ ഇഷ്ടപ്പെട്ടിരുന്നുള്ളൂ.
ഒരു ദിവസം ഒരു സെമിനാർ നടക്കുന്നതിനിടെ ആരോ കമലിനോട് അയാളുടെ ലുക്കിന്‍റെ രഹസ്യത്തെക്കുറിച്ച് ആരാഞ്ഞു. കമൽ ചിരിച്ചുകൊണ്ട് മറുപടി പറഞ്ഞു.
“എന്‍റെ ഭാര്യ തന്നെ” കമലിന്‍റെ മറുപടി ഞെട്ടിക്കുന്നതായിരുന്നുവെങ്കിലും അത് പരമമായ സത്യമായിരുന്നു. വിവാഹത്തിന് മുമ്പ് വളരെ സുന്ദരനും സുമുഖനും ആരോഗ്യദൃഢഗാത്രനുമായി കാണുന്ന ഭർത്താവ് വിവാഹം കഴിഞ്ഞ് ഒരു വർഷമാകുമ്പോൾ ആ സ്മാർട്ട്നസും ചൊടിയുമൊക്കെ നഷ്ടപ്പെട്ട് ശരീരമൊക്കെ ദുർമേദസ് നിറഞ്ഞവനെപ്പോലെയാകുന്നു. ഒപ്പം തളർച്ചയും ക്ഷീണവും. ഓഫീസിൽ നിന്ന് മടങ്ങി വീട്ടിലെത്തിയാലും ഒന്ന് മധുരമായോ സന്തോഷത്തോടെയാ സംസാരിക്കാൻ പോലുമാകാത്ത ക്ഷീണം. ഒന്ന് മൂടി പുതച്ച് കിടന്നുറങ്ങാൻ ശനിയാഴ്ചയെയോ ഞായറാഴ്ചയെയോ കാത്തിരിക്കുന്ന വരായിരിക്കും ഇക്കൂട്ടർ. മുറിയ്ക്ക് പുറത്തിറങ്ങാത്ത മുഴുവൻ നേരവും കട്ടിലിൽ കിടപ്പായിരിക്കും. ഇവരുടെ ഇത്തരമൊരവസ്ഥയ്ക്ക് വീട്ടിലെ അന്തരീക്ഷം കാരണമാകുന്നുവെന്നാണ് മനസ്സിലാക്കാനാവുക.
വിവാഹത്തിന് മുമ്പ് ഇതേ ജോലി ഉത്സാഹത്തോടെ ചെയ്തിരുന്നയാൾ, നന്നായി ശരീരം മെയിന്‍റയിൻ ചെയ്തിരുന്നയാൾ വിവാഹശേഷം കുത്തഴിഞ്ഞ രീതിയിൽ കാര്യങ്ങൾ പോകുന്നുവെങ്കിൽ അതിൽ പങ്കാളിക്കുള്ള പങ്ക് വളരെ വലുതാണ്.
വിവാഹത്തിനു മുമ്പ് ഭർത്താവിന്‍റെ വേഷത്തിലും നടപ്പിലും എടുപ്പിലുമൊക്കെ ഭാര്യ അതീവ ശ്രദ്ധ പുലർത്തിയിരുന്നു. എന്നാൽ വിവാഹം കഴിഞ്ഞതോടെ ആ താൽപര്യമൊക്കെ പോയി. ഭർത്താവിന് കുടുംബഭാരത്തിന്‍റെ ചുമതലയും കൂടിയതോടെ സ്വന്തം കാര്യത്തിൽ അയാളും അലംഭാവം പുലർത്തി തുടങ്ങി. ഇത്തരമൊരു സാഹചര്യത്തിൽ ചുവടെ കൊടുത്തിരിക്കുന്ന ടിപ്സ് പ്രയോഗിച്ചാൽ ഭർത്താവ് ഹാൻസം ആന്‍റ് സ്മാർട്ടും ആകും.
ഡ്രസ് സെൻസിൽ ശ്രദ്ധിക്കാം
സ്മാർട്ട് ലുക്കിന് ഏറ്റവുമാവശ്യം ഭർത്താവിന്‍റെ വേഷത്തിൽ ശ്രദ്ധയർപ്പിക്കുകയെന്നതാണ്. അതിനർത്ഥം വേഷത്തെക്കുറിച്ച് കുറ്റവും കുറവും പറയണമെന്നല്ല. കുട്ടികളെ പറഞ്ഞ് മനസ്സിലാക്കുന്ന പോലെയല്ല മറിച്ച് നല്ല നിർദ്ദേശങ്ങൾ നൽകുക. അതായത് പാന്‍റിനൊപ്പം ഇന്ന ഷർട്ട് ഇണങ്ങും. ഈ ഷർട്ടിനൊപ്പം ടൈ ഇണങ്ങും എന്നിങ്ങനെയുള്ള ശരിയായ അഭിപ്രായങ്ങൾ പറയാം. ഭർത്താവ് തയ്യാറായി പുറത്തുപോകുമ്പോൾ പ്രശംസിക്കാൻ മറക്കണ്ട. ഭർത്താവിൽ അദ്ഭുതകരമായ മാറ്റങ്ങൾ ഉണ്ടാകും.
എപ്പോഴും അപ്ഡേറ്റ് ചെയ്യുക
പുറത്തുള്ള വാർത്തകളെക്കുറിച്ചും ഫാഷൻ ട്രെന്‍റുകളും ശ്രദ്ധിക്കുക. അത്തരം കാര്യങ്ങൾ ഭർത്താവിനൊടും പങ്ക് വയ്ക്കുക. ചില പ്രധാനപ്പെട്ട വാർത്തകളെപ്പറ്റി അപ്ഡേറ്റാകാൻ ഭർത്താവിനത് സഹായകമാകും. കുടുംബത്തിൽ നടക്കുന്ന വിശേഷങ്ങൾ പങ്കാളിയുമായി പങ്ക് വയ്ക്കുക.
ഫിറ്റ്നസ് ശ്രദ്ധിക്കാം
സ്മാർട്ടായിരിക്കാൻ ബോഡി ഫിറ്റിംഗിൽ ശ്രദ്ധിക്കുക. അതുകൊണ്ട് ഭർത്താവിനെ മോണിംഗ് വോക്കിനോ ജിമ്മിലോ മറ്റ് വ്യായാമങ്ങൾ ചെയ്യാനോ പ്രേരിപ്പിക്കുക. പോകാൻ മടി കാട്ടുന്നുവെങ്കിൽ ഭർത്താവിന് ഫുൾ സപ്പോർട്ടായി കൂടെ പോകാം.
പെരുമാറ്റവും ചിന്തയും പക്വമായിരിക്കുക
ചില ഭർത്താക്കന്മാർ വിവാഹശേഷം അലസസ്വഭാവം കാട്ടാറുണ്ട്. ഭർത്താവ് ഇത്തരക്കാരനെങ്കിൽ അതിന് തടയിടുക. കാരണം ഇത്തരക്കാരെ മറ്റുള്ളവർ പരിഹസിക്കും.
ബോഡി ലാംഗ്വേജ് ശ്രദ്ധിക്കുക
മറ്റുള്ളവരെ ഇംപ്രസ് ചെയ്യുന്ന രീതിയിൽ വേണം ഏതൊരാളുടെയും ബോഡി ലാംഗ്വേജ്. സ്വന്തം ബോഡി ലാംഗ്വേജിൽ എന്തെങ്കിലും കുറവുണ്ടെങ്കിൽ ഭർത്താവിനെ ഇക്കാര്യം ഓർമ്മിപ്പിക്കുക. സ്മാർട്ട്ലുക്കിനും കരിയറുടെ വിജയത്തിനും പോസിറ്റീവായ ബോഡി ലാംഗ്വേജ് ഉണ്ടായിരിക്കേണ്ടാതവശ്യമാണ്.
സന്തോഷമായിരിക്കേണ്ടതാവശ്യമാണ്
സ്നേഹം തുളുമ്പുന്ന ഒരു പുഞ്ചിരി ഭർത്താവിന്‍റെ വ്യക്‌തിത്വത്തെ തന്നെ മാറ്റിമറിക്കും. ഭർത്താവ് എവിടെ പോയാലും അവിടത്തെ അന്തരീക്ഷം സന്തോഷപ്രദമാകും. ആളുകൾ അത്തരക്കാരെ ഏറെ ഇഷ്ടപ്പെടും. സ്വയം സന്തുഷ്ടനായാൽ മാത്രമേ വീട്ടിലെ അന്തരീക്ഷവും ഹൃദ്യമാകൂ.
വൃത്തിയും വെടിപ്പും
മത്സരാധിഷ്ഠിതമായ കാലമാണിന്ന്. വൃത്തിയില്ലാത്ത നഖം, ചീകിയൊതുക്കാത്ത മുടി, വായ്നാറ്റം എന്നിവ ഒരു വ്യക്‌തിയുടെ വ്യക്‌തിത്വത്തിന് മങ്ങലേൽപ്പിക്കും. കൃത്യമായി മുടി ട്രിം ചെയ്യുക, ഷേവ് ചെയ്യാം. നഖം വെട്ടി വൃത്തിയുള്ളതാക്കണം.
വിവാഹജീവിതത്തിന്‍റെ അടിത്തട്ടാണ് സ്നേഹം
ഭാര്യാഭർതൃബന്ധത്തിൽ സ്നേഹത്തിന്‍റെ ഊഷ്മളമായ പ്രവാഹമുണ്ടെങ്കിൽ അവർ പരസ്പരം നല്ലത് മാത്രമേ കാണൂ. തെറ്റുകൾ കണ്ണിൽ പെടുകയില്ല. സ്നേഹനിർഭരമായ രണ്ട് ഹൃദയങ്ങൾക്ക് എന്നും വാലന്‍റൈൻ ദിനങ്ങളായിരിക്കും.
