പാറ്റ്നയിലെ ഒരു ഹൈസ്ക്കൂൾ ടീച്ചറായിരുന്നു മനീഷാ ഗോസ്വാമിയുടെ മരണവുമായി ബന്ധപ്പെട്ട് പോലീസ് അവരുടെ ഭർത്താവ് രവി ഗോസ്വാമിയെ അറസ്റ്റ് ചെയ്‌തിരുന്നു. പക്ഷേ മറ്റ് ആരോപിതർ മുങ്ങി. അവർ മനീഷയുടെ മക്കളായ 2 വയസ്സുകാരി അന്ധരയേയും 10 മാസമായ വിശാഖയെയും കൊണ്ടാണ് പോയത്.
മനീഷയുടെ അനിയൻ മനീഷ് പറയുന്നത്, മനീഷ ജോലി ചെയ്യാന്‍ ആഗ്രഹിച്ചിരുന്നുവെന്നും ഭർത്താവ് രവി അതിനു സമ്മതിച്ചില്ലെന്നുമാണ്. മാത്രമല്ല സ്വന്തം വീട്ടിൽ വരാൻ പോലും മനീഷയെ രവി സമ്മതിച്ചിരുന്നില്ലത്രെ. ഈ കാര്യവും പറഞ്ഞ് രവിയും മനീഷയും എപ്പോഴും വഴക്കടിച്ചിരുന്നു.
കഴിഞ്ഞ മാസം മനീഷ വീട്ടിൽ പോകാൻ ഉറച്ച തീരുമാനം എടുത്തു. അപ്പോൾ വഴക്ക് മൂത്ത് ഉന്തും തള്ളുമായി. രവി മനീഷയെ മൂന്നാമത്തെ നിലയിൽ നിന്നും തള്ളിയിട്ടു. അങ്ങനെയാണ് മനീഷ മരണപ്പെട്ടത്. രവി പോലീസിനോട് പറഞ്ഞത് മറ്റൊരു കഥയാണ് “മനീഷ വീട്ടിൽ പോകാൻ ശ്രമിച്ചപ്പോൾ വഴക്കായി. പോവണ്ട എന്ന് പറഞ്ഞതിനാൽ ദേഷ്യം വന്ന് മനീഷ മൂന്നാനിലയിൽ നിന്ന് എടുത്തുചാടി.”
മനീഷ ഈ ലോകത്തോട് വിട പറഞ്ഞു. രവി ജയിലായി. പോലീസും നിയമവും അതിന്‍റേതായ വഴിക്ക് നീങ്ങി. ഇതിന്‍റെയെല്ലാം നൂലാമാലയിൽ കുടുങ്ങിയത് ഒന്നും അറിയാത്ത പാവം കുഞ്ഞുങ്ങളാണ്. ഇനി അവരുടെ ഭാവി എന്താവും? ഈ വിഷയത്തിൽ നിയമത്തിന് എന്ത് ചെയ്യാൻ കഴിയും? കുഞ്ഞുങ്ങളെ മുത്തശ്ശനും മുത്തശ്ശിയും അടുത്ത ബന്ധുക്കളും എത്ര കാലം നോക്കും? ചെലവിനു കൊടുക്കും? അവരുടെ പഠനവും ആരോഗ്യപരിപാലനവും ആര് ഏറ്റെടുക്കും? ഇത്തരം കേസുകളിൽ പെട്ടുപോകുന്ന കുഞ്ഞുങ്ങളടെ കാര്യം വലിയ കഷ്ടമാണ്. നിയമത്തിന്‍റെ ഒരു പുസ്‌തകത്തിലും ഇതിനൊന്നും യാതൊരു പരിഹാരവുമില്ല.
“മാതാപിതാക്കളുടെ വഴക്കിനിടയിൽ ഞെരിഞ്ഞമരുന്നത് കുട്ടികളാണ്. അവരാണ് യഥാർത്ഥ്യത്തിൽ തകർന്നു പോകുന്നത്. ഇത് പല രക്ഷിതാക്കളും മനസ്സിലാക്കാറില്ല.” മനശാസ്ത്രജ്ഞനായ അജയ് മിശ്ര പറയുന്നു.
ഇങ്ങനെ കുട്ടികളെ ബാധിക്കുന്ന അനേകായിരം കേസുകളാണ് കോടതികളിൽ കെട്ടിക്കിടക്കുന്നത്. തന്‍റെ കേസ് ഡയറിയിൽ നിന്ന് ഒരു സംഭവം ഡോ.അജയ് മിശ്ര പറയുന്നു.
“ഭർത്താവും ഭാര്യയും വഴക്കടിക്കുന്നതിനാൽ മനം മടുത്ത് വീട്ടുകാർ അവരെ കൗൺസിലിംഗിനു കൊണ്ടുവന്നതായിരുന്നു. 2 കുട്ടികളും അവരുടെ കൂടെ വന്നിരുന്നു. എല്ലാവരുമായി സംസാരിച്ച ശേഷം ഞാൻ കുട്ടികളോടും കാര്യങ്ങൾ തിരക്കി. വീട്ടിൽ ആരാണ് കൂടുതൽ വഴക്കടിക്കുന്നതെന്ന് ചോദിച്ചപ്പോൾ രണ്ട് കുട്ടികളും കണ്ണ് മിഴിച്ച് രക്ഷിതാക്കളെ നോക്കാൻ തുടങ്ങി. കുട്ടികളെ മറ്റൊരു മുറിയിലേയ്‌ക്ക് കൊണ്ട് പോയി ഞാൻ വിശദമായി ചോദിച്ചപ്പോൾ അച്ഛനും അമ്മയും എന്നും വഴക്കാണെന്നാണ് അവർ സങ്കടത്തോടെ പറഞ്ഞത്. വഴക്കിനു ശേഷം അവർ മക്കളോട് ആരാണ് കൂടുതൽ വഴക്കടിച്ചത്? ആരാണ് ആദ്യം വഴക്കടിച്ചത്? എന്നെക്കാൾ വഴക്കാളി അമ്മയല്ലേ? എന്നൊക്കെ കുട്ടികളോട് അച്‌ഛൻ ചോദിക്കുമത്രേ.
അമ്മയും ഇതേ ചോദ്യമാണ് കുട്ടികളോട് ചോദിക്കുന്നത്. “മിക്കപ്പോഴും വഴക്കടിച്ച ശേഷം രണ്ടാളും രണ്ടിടത്ത് പോയി കിടന്നുറങ്ങും. അമ്മ അന്ന് ഒന്നും ഉണ്ടാക്കുകയില്ല. ഞങ്ങൾക്ക് ആഹാരമൊന്നും ലഭിക്കില്ല. പലപ്പോഴും 6-7 ദിവസം വരെ അച്ഛനും അമ്മയും മിണ്ടാതെയിരിക്കും. ഈ ദിവസങ്ങളിൽ ഞങ്ങളെ സ്കൂളിലും വിടാറില്ല. അമ്മ ഭക്ഷണമൊന്നും ശരിയായി ഉണ്ടാക്കുകയുമില്ല.” 8 വയസ്സുകാരൻ പറഞ്ഞു. രണ്ടാമത്തെ കുട്ടിക്കും ഇതേ അഭിപ്രായമായിരുന്നു.
മാതാപിതാക്കൾ കുട്ടികളുടെ കണ്ണിൽ ഹീറോമാരാണ് എന്ന് പോലീസ് ഓഫീസറായ ജോൺ സെബാസ്‌റ്റ്യൻ പറയുന്നു. അവരുടെ കണ്ണിൽ മാതാപിതാക്കൾ ഏറ്റവും മികച്ച മനുഷ്യമാരാണ്. പക്ഷേ കുട്ടികളുടെ മുന്നിൽ വച്ച് വഴക്കടിക്കുമ്പോൾ മാതാപിതാക്കളെ പറ്റിയുള്ള കുട്ടികളുടെ നല്ല സങ്കൽപ്പങ്ങളാണ് ഇടിഞ്ഞു പൊളിയുന്നത്. ഇങ്ങനെ സംഭവിക്കുമ്പോൾ മാനസികമായും കുട്ടികൾ തളർന്നു പോകുന്നു. മാനസികവും ശാരീരികവുമായ കുട്ടികളുടെ വികാസത്തെയും ഇത് ബാധിക്കുന്നു. ഏതു വീട്ടിലാണോ കൂടുതൽ വഴക്കുണ്ടാവുന്നത് ആ വീട്ടിലെ കുട്ടികൾക്ക് ഡിപ്രഷൻ കൂടുതലായിരിക്കും. മാനസിക രോഗങ്ങളും ഇവരെ വേട്ടയാടാം. ഇങ്ങനെയുള്ള കുട്ടികളാണ് ക്രിമിനൽ സ്വഭാവവും ദേഷ്യവും അമിതമായി പ്രകടിപ്പിക്കുന്നത്.
മാതാപിതാക്കളുടെ വഴക്കിൽ ഭയപ്പെടുന്ന കുട്ടികൾ
മാതാപിതാക്കളുടെ വഴക്ക് നേരിട്ട് ബാധിക്കുന്നത് കുട്ടികളെയാണ്. വഴക്കടിക്കുന്ന മാതാപിതാക്കൾ തങ്ങളാണ് ശരിയെന്ന് സ്ഥാപിക്കാനായി കുട്ടികളിൽ വിഷം കുത്തിവയ്‌ക്കുന്നു. കുറ്റപ്പെടുത്തുമ്പോഴുള്ള സംസാരവും പങ്കാളിയെ താറടിക്കാൻ പറയുന്ന കാര്യങ്ങളും കുട്ടികളുടെ മുന്നിലുള്ള മാതാപിതാക്കളടെ സങ്കൽപ്പം ഉടയാന്‍ ഇടയാക്കുന്നു. വഴക്കിനു ശേഷം അച്‌ഛൻ ശരിയല്ലെന്ന് അമ്മ കുട്ടികളോട് പറയുന്നു. നിങ്ങൾ അച്‌ഛനോട് മിണ്ടണ്ടാ അച്‌ഛൻ വഴക്കാളിയാണ് എന്ന് കുട്ടിയോട് പറയുമ്പോൾ തന്നെ ആരാണ് ശരി, ആരാണ് തെറ്റ് എന്ന് സങ്കോചം കുട്ടികളെ ബാധിക്കുന്നു. അച്ഛനും മോശമാവാറില്ല. അദ്ദേഹം അമ്മക്കെതിരെ കുട്ടികളെ പറഞ്ഞ് തിരിപ്പിക്കുന്നു. അമ്മയാണ് എപ്പോഴും വീട്ടിൽ ആദ്യം വഴക്ക് തുടങ്ങുന്നതെന്ന് അച്‌ഛൻ കുട്ടികളോട് പറയുന്നു. അമ്മ മോശക്കാരിയാണെന്ന് സ്‌ഥാപിക്കുന്നതും അച്‌ഛൻ തന്നെ. അതെല്ലാം കുട്ടികള്‍ വെറുക്കാൻ തുടങ്ങുന്നു. പിന്നെ വിശ്വാസത്തിലെടുക്കുകയുമില്ല. കുട്ടികളോട് ദുഷിച്ച വാക്കുകൾ പറഞ്ഞു കൊടുക്കുന്നത് ബഹുമാനം കാട്ടാതിരിക്കാൻ അവരെ പ്രേരിപ്പിക്കും.
വിവാഹമോചനത്തിനു ശേഷം കുട്ടികൾ സങ്കടപ്പെടുന്നു.
മാതാപിതാക്കൾ വേർപിരിഞ്ഞാൽ ഏറ്റവും കൂടുതൽ വെല്ലുവിളികൾ നേരിടേണ്ടി വരുന്നത് കുഞ്ഞുങ്ങൾക്കാണെന്ന് ഹൈക്കോടതിയിലെ മുതിർന്ന അഭിഭാഷകനായ രവീന്ദ്രനാഥ് പറയുന്നു. മിക്ക കേസുകളിലും കുട്ടികളെ തങ്ങളുടെ കൂടെ നിർത്താനാണ് ഭാര്യയും ഭർത്താവും മൽപിടുത്തം നടത്തുന്നത്. കുട്ടികളെ നോക്കുന്ന കാര്യത്തിൽ തങ്ങളാണ് മികച്ചത് എന്ന് വേർപിരിയാൻ തീരുമാനിച്ച പങ്കാളികൾ സ്‌ഥാപിക്കാൻ ശ്രമിക്കും. കുട്ടികൾ ഭർത്താവിന്‍റെ കൂടെ കഴിഞ്ഞാൽ ശരിയാവില്ലെന്ന് ഭാര്യയും, അതല്ല തന്‍റെ കൂടെ കഴിയുന്നതാണ് കുട്ടികളുടെ ഭാവിക്ക് നല്ലതെന്ന് ഭർത്താവും നിലപാടെടുക്കും. ഈ നിയമത്തിൽ പെട്ടു പോകുന്നതും. കുട്ടികൾ തന്നെ. ഈ അവസ്‌ഥയിലും കുട്ടികൾക്ക് യഥാർത്ഥ സ്നേഹം ലഭിക്കുകയില്ല.
രക്ഷിതാക്കൾ കുട്ടികളെ കൂടെ നിർത്താൻ കളിപ്പാട്ടങ്ങളും മിഠായികളും ഉടുപ്പുകളും വാരിക്കോരി നൽകും. തങ്ങൾ നല്ലവരാണെന്ന് സ്‌ഥാപിക്കാനുള്ള അടവ് കൂടിയാണിത്. കുട്ടികളെ വളർത്തേണ്ടത് നല്ല സ്വഭാവം രൂപികരിച്ചു കൊണ്ടാണ് അല്ലാതെ വിലപിടിപ്പുള്ള വസ്‌തുക്കൾ നൽകി സ്വാധീനിച്ചു കൊണ്ടല്ല.
