മുളയ്ക്കാത്ത വിത്തുകൾ

റീത്തയുടെയും മീനയുടെയും അവസാന പരീക്ഷയാണിന്ന്. പരീക്ഷാഹാളിൽ നിന്ന് സംതൃപ്തിയോടെ പുറത്തിറങ്ങുമ്പോൾ രണ്ടു മാസത്തെ കഠിന്വാധാനം വെറുതെയായില്ല എന്നവർക്ക് ഉറപ്പായിരുന്നു. പ്ലസ്2 ആയതിനാൽ വളരെ ഗൗരവത്തോടെയാണ് പഠനം തുടർന്നത്. റിസൾട്ട് വരുമ്പോൾ ഒട്ടും പിന്നിലായിപ്പോകരുതല്ലോ.

നല്ല മാർക്കുണ്ടെങ്കിലെ മെറിറ്റിന്‍റെ അടിസ്‌ഥാനത്തിൽ നല്ല കോളേജിൽ സീറ്റ് കിട്ടുകയുള്ളൂ. അതിനാൽ വാശിയോടെയാണ് ഇരുവരും പരീക്ഷയ്‌ക്ക് പഠിച്ചത്. രാപകൽ പഠനമായിരുന്നു. ഇനി വിശ്രമത്തിന്‍റെയും വിനോദത്തിന്‍റെയും നാളുകളാണ്. ആ സന്തോഷമാണ് ഇരുവർക്കും. രണ്ടാളും അന്നുതന്നെ ഒരു സിനിമയ്‌ക്ക് പോകാൻ തീരുമാനിച്ചു.

റീത്തയും മീനയും ഒരു അഡൾറ്റ് മൂവിയാണ് കാണാൻ പോയത്. അവരുടെ കൂട്ടുകാർക്കിടയിൽ ആ ചിത്രം ഒരു ചർച്ചയായിരുന്നു. റീത്തയും മീനയും സ്വയം മുതിർന്നവരായി കരുതാൻ തുടങ്ങിയിരുന്നു. ശരീരത്തിൽ സംഭവിക്കുന്ന ഹോർമോൺ വ്യതിയാനങ്ങൾ അവർക്ക് അറിയാൻ കഴിഞ്ഞിരുന്നു.

സിനിമ ഹാളിൽ ചെന്നപ്പോൾ ഭൂരിഭാഗം പ്രേക്ഷകരും 12-ാം ക്ലാസുകാരായിരുന്നു. പടം തുടങ്ങിയതും ഹാളിൽ ഇരുട്ട് പടർന്നു. സ്ക്രീനിലെ വെളിച്ചത്തിൽ രണ്ട് ചങ്ങാതിയും തോളിൽ കൈയ്യിടിരുന്നു.

നായികാ നായകന്മാരുടെ പ്രണയവും ചുംബനവും യുവഹൃദയങ്ങളെ മദിക്കുന്നതായിരുന്നു.

ആദ്യമായിട്ടായിരുന്നു അവർ ഇത്തരമൊരു രംഗം കാണുന്നത്. സ്ക്രീനിലും കാണികളിലും ചുടുനിശ്വാസം ഉയർന്നു കൊണ്ടിരുന്നു. എല്ലാവരും തന്നെ മറ്റൊരു ലോകത്തായിരുന്നു.

തിയേറ്ററിൽ നിന്ന് പുറത്തിറങ്ങിയ വിദ്യാർത്ഥികളിൽ പലരുടെയും മുഖം പ്രണയത്താൽ ചുവന്ന് തുടുത്തിരുന്നു. ചിലർ നാണം കൊണ്ട് തല താഴ്ത്തിപ്പിടിച്ചാണ് തിയേറ്റർ വിട്ടത്. ഇങ്ങനെയൊരു സിനിമ കണ്ടത്തിൽ ചില കുട്ടികൾക്ക് കുറ്റബോധവും തോന്നിയിരുന്നു.

റീത്തയും മീനയും പ്രണയാതുരമായ മനസ്സോടെയാണ് വീട്ടിലെത്തിയത്. സിനിമ അവരെ ശരിക്കും ഹരം കൊള്ളിച്ചിരുന്നു. അന്ന് രാത്രി അവരൊന്നിച്ചാണ് കഴിയുന്നത്. വീട്ടിലെത്തിയതും രണ്ടാളും സിനിമയിലെ ഡയലോഗുകൾ പരസ്‌പരം പറയാൻ തുടങ്ങി. രണ്ടാൾക്കും ചിരിച്ച് ചിരിച്ച് വയറു വേദനിക്കാൻ തുടങ്ങി.

രാത്രി ഭക്ഷണം കഴിക്കുമ്പോൾ റീത്തയുടെ അച്ഛനും അമ്മയും കൂടെ കഴിക്കാനിരുന്നു. രണ്ടാളും ഡോക്ടർമാർ ആയിരുന്നു. ഒരേ ആശുപത്രിയിലാണ് അവർ ജോലി നോക്കിയിരുന്നത്. റീത്തയുടെ അമ്മ സ്ത്രീരോഗ വിദഗദ്ധയായിരുന്നു.

“ഇന്ന് രണ്ടാളുടെ മുഖത്തും എന്തെന്നില്ലാത്ത സന്തോഷമുണ്ടല്ലോ. ഇനി രണ്ട് മാസം ശരിക്കും ആഘോഷിക്കാമല്ലോ. റിസൾട്ട് വന്നാൽ പിന്നെ, അഡ്മിഷന്‍റെ ഓട്ടപാച്ചിലായിരിക്കും.” റീത്തയുടെ അമ്മ പറഞ്ഞു.

“ അല്ല നിങ്ങൾ രണ്ടാളും ഇന്ന് ഏതു സിനിമയാണ് കണ്ടത്?” റീത്തയുടെ അച്ഛൻ ചോദിച്ചു. ഇത് കേട്ട് രണ്ടാളും പരസ്പരം നോക്കി. എന്നിട്ട് പെട്ടെന്ന് തന്നെ റീത്ത മറ്റൊരു പടത്തിന്‍റെ പേര് പറഞ്ഞു. കള്ളം പറഞ്ഞത് അച്ഛനും അമ്മയും അറിഞ്ഞില്ല.

റീത്തയുടെ അച്ഛനും അമ്മയും തിരക്കുള്ള ആൾക്കാരായിരുന്നു. അതിനാൽ തന്നെ മകളുടെ പല കാര്യങ്ങളിലും തലയിടാൻ അവർക്ക് നേരം കിട്ടിയിരുന്നില്ല. അതിനാൽ തന്നെ കള്ളം പറഞ്ഞപ്പോൾ റീത്തയുടെയും മീനയുടെയും കള്ളചിരി അവർക്ക് കാണാനായില്ല.

രാത്രി മീനയ്‌ക്ക് അമ്മയുടെ ഫോൺ വന്നു. മീനയുടെ അമ്മ നഗരത്തിലെ ഏറ്റവും വലിയ ബുട്ടീക്കിന്‍റെ ഉടമയായിരുന്നു. അമ്മ ബിസിനസ് തിരക്കുള്ള ആളായിരുന്നു. മീനയ്‌ക്ക് ഏറ്റവും നല്ല സാധനങ്ങൾ വാങ്ങി കൊടുക്കുന്നതിലായിരുന്നു അവരുടെ ശ്രദ്ധ. തന്‍റെ ക്ലാസിലെ വെൽ ഡ്രെസ്ഡ് ഗേൾ എന്നാണ് മീന അറിയപ്പെട്ടിരുന്നത്. മീനയോടൊപ്പം വേണ്ടത്ര സമയം ഇരുന്ന് അവർ ഒരിക്കലും സംസാരിച്ചിട്ടില്ല. ഇതുപ്പോലെ ഫോൺ ചെയ്‌ത് കാര്യങ്ങൾ അന്വേഷിക്കും.

രാത്രി റീത്തയും മീനയും ഉറങ്ങാൻ കിടക്കുമ്പോഴും അന്ന് കണ്ട സിനിമയായിരുന്നു ചർച്ച. റീത്ത വികാര വായ്പ്പോടെ പറഞ്ഞു.” ഒരു കാമുകൻ വേണം, റോമാൻസ് ചെയ്യാനായി…”

“എങ്കിൽ ഒരു നല്ല പയ്യനെ വളച്ചോളൂ…” മീന ചിരിച്ചു.

“തീർച്ചയായും. പക്ഷേ സ്വപ്നത്തിൽ മാത്രം, ശരിക്കും കണ്ടുപിടിച്ചാൽ അച്ഛനും അമ്മയും എന്നെ വീട്ടിൽ നിന്ന് പുറത്താക്കും.”

“ അതിന് അവരോടിത് ആര് പറയാൻ പോകാനാ. അവർക്ക് തങ്ങളുടെ ജോലി ഒഴിഞ്ഞ നേരമില്ലല്ലോ. അതിനാൽ നമുക്കൽപ്പം വികൃതിയൊപ്പിക്കാം. ആരും അറിയാൻ പോകുന്നില്ല.”

“സംഗതി പ്രശ്നമായാൽ എന്തു ചെയ്യും?”

“എടി, തുടക്കം തന്നെ ഉടക്ക് വർത്തമാനം പറയാതെ. സംഗതി തുടക്കത്തിലെ കൂമ്പടഞ്ഞ് പോകും!”

“നിനക്ക് ഒട്ടും ഭയമില്ലെങ്കിൽ നീ തന്നെ ആദ്യം തുടങ്ങിക്കോ. ഞാൻ ദൂരെ മാറി നിന്ന് ആസ്വദിച്ചോളാം.”

“അതു പറ്റില്ല മോളേ, മുങ്ങുന്നെങ്കിൽ രണ്ടാളും ഒരുമിച്ച്… മനസ്സിലായോ?”

ഹോ മനസ്സിലായി ചങ്ങാതി. ആ പിന്നെ മറ്റൊരു കാര്യം ഞാനിപ്പോഴാണ് ഓർത്തത്. പരീക്ഷ തുടങ്ങുന്നതിനു മുമ്പ് ഒരു ഡോക്ടർ സ്കൂളിൽ വന്നിരുന്നു. അദ്ദേഹം സഖി എന്ന് പേരുള്ള ഗർഭനിരോധന ഗുളികയെ പറ്റി പറഞ്ഞിരുന്നു. പഠനത്തിനെറേ ചൂടിലായതിനാൽ ഞാൻ ശരിക്കും ശ്രദ്ധിച്ചിരുന്നില്ല. ഇനി ആ ലീഫ് ലെറ്റ് വായിച്ചു നോക്കാം. ഞാനന്ന് എന്‍റെ മലയാളം നോട്ട് ബുക്കിൽ വച്ചിട്ടുണ്ട്. ഇതു പറഞ്ഞ ശേഷം റീത്ത അതെടുക്കാനായി എഴുന്നേറ്റു.

“നീ അധികം കളിക്കണ്ട ചങ്ങാതി, അതൊക്കെ കല്ല്യാണത്തിനുശേഷം ആലോചിക്കേണ്ട കാര്യങ്ങളാണ്. ഇപ്പഴേ അതൊക്കെ ആലോചിച്ചാൽ കുഴിയിൽ പോയി ചാടുമേ…”

“നീയൊരു പേടിതൊണ്ടിയാണല്ലോ… ജീവിതത്തിന്‍റെ രസം ഈ പ്രായത്തിലല്ലാതെ വയസ്സായിട്ടാണോ നുകരാൻ പോകുന്നത്? ഇതു പറഞ്ഞ് റീത്ത സഖിയുടെ പരസ്യം വായിക്കാൻ തുടങ്ങി. അതിൽ ഇങ്ങനെ എഴുതിയിരുന്നു. ഉടനെ കുട്ടികൾ ആഗ്രഹിക്കാത്തവർക്കും രണ്ട് കുട്ടികൾ തമ്മിൽ കാലതാമസം വേണമെന്നുള്ളവർക്കും എളുപ്പമാർഗ്ഗം.

“എനിക്ക് പ്രണയിക്കാനായി ഒരു കൂട്ടുകാരനെ വേണം… ആ പ്രണയത്തിൽ സഖി ആവശ്യമായിവരും. മനസ്സിലായോ എന്‍റെ പൊട്ടിക്കാളി…” റീത്ത മദാലസയായി ചിരിക്കാൻ തുടങ്ങി.

“മതി… മതി… നിർത്ത്. നിന്‍റെ അമ്മയെങ്ങാന്നും ഇതറിഞ്ഞാൽ കഥ കഴിഞ്ഞതു തന്നെ. നീ ആരുഷി വധത്തെ പറ്റി പത്രത്തിൽ വായിച്ചു കാണുമല്ലോ. അച്ഛനമ്മമാർ തന്നെ പ്രണയത്തിലക്കപ്പെട്ട മകളെ കൊന്ന കേസ്.

“ഉപദേശമൊക്കെ നിന്‍റെ കൈയ്യിൽ തന്നെ വച്ചോളൂ. എനിക്കെന്തായാലും ഒരു കാമുകനെ വേണം.”

രണ്ടാളും സംസാരിച്ച് ഉറക്കം പിടിച്ചു. നേരം വെളുത്തിട്ടും ഉൻമേഷത്തോടെ ചായ കുടിച്ചിട്ടും അവരുടെ ഉള്ളിൽ തലേന്ന് കണ്ട സിനിമയുടെ മൂഡ് മാഞ്ഞുപോയിരുന്നില്ല. അതിനെ ചുറ്റിപറ്റി തന്നെയായിരുന്നു അവരുടെ ചർച്ച.

“നിനക്ക് എങ്ങനെയുള്ള കാമുകനെയാണ് വേണ്ടത്?” റീത്ത ചോദിച്ചു.

“ആദ്യം നിന്‍റെ ഇഷ്ടം പറയൂ”

“ദുൽക്കർ സൽമാനെപ്പോലുള്ള ഒരാൾ”

“എനിക്ക് കുറെ കൂടി പ്രായമുള്ള ഒരാളെ മതി. മോഹൻലാലിനെപ്പോലെ…”

“നിനക്കപ്പോൾ കാമുകനെയാണോ വേണ്ടത് അച്ഛനെയോ?”

“അയാളുടെ ഒപ്പമായിരിക്കുമ്പോൾ ഞാൻ സുരക്ഷിതയായിരിക്കും. അങ്ങനെയുള്ള ഒരാളെയാണ് എനിക്ക് വേണ്ടത് മോളേ… ഒരു പൂവിൽ നിന്ന് മറ്റൊരു പൂവിലേയ്‌ക്ക് പറന്ന് പോകുന്ന ചെക്കന്മാരെ എനിക്കുവേണ്ട.”

“ നീ ഭയങ്കര ദീർഘ വീഷണത്തോടെയാണല്ലോ സംസാരിക്കുന്നത്” “ഞാനെപ്പോഴും കരുതലോടെയാണ് കരുക്കൾ നീക്കുന്നത് കൂട്ടാ… നീയെന്നെപറ്റി എന്താണ് വിചാരിച്ചത്? പിന്നെ നിന്നെയും വഴിതെറ്റാൻ ഞാൻ സമ്മതിക്കില്ല കെട്ടോ…”

“അതു കൊള്ളാമല്ലോ”

രണ്ടാളും തലയറിഞ്ഞു ചിരിച്ചു. രണ്ടാളും ചിരിക്കുന്ന ഒച്ചകേട്ടാണ് റീത്തയുടെ അച്ഛൻ ഡോക്ടർ അശോക് അകത്തേയ്‌ക്ക് വന്നത്. “ ഒരു ദിവസം കൂടി അവധി ആഘോഷിച്ചോളൂ. നാളെ മുതൽ നിന്‍റെ ഡ്രൈവിംഗ് ക്ലാസ്സ് തുടങ്ങും. ഞാനൊരു ഡ്രൈവറെ ഏർപ്പാടാക്കിയിട്ടുണ്ട്. അയാൾ ദിവസവും രാവിലെ 7 മണിക്ക് നിന്നെ ഡ്രൈവിംഗ് പഠിപ്പിക്കാനെത്തും.”

“ശരിയാണോ ഡാഡി, എനിക്ക് കാറോടിക്കാൻ തരുമോ?” എത്ര നല്ല ഡാഡിയാണ് എന്‍റേത്… താങ്ക്യൂ ഡാഡി”

“നിന്‍റെ അമ്മ 2 മണിക്ക് നിന്നെ കുക്കിംഗ് ക്ലാസ്സിനും ബുക്ക് ചെയ്‌തിട്ടുണ്ട്. ഉച്ചയ്‌ക്ക് ഒരു മണിക്കൂർ അവിടെയും പോകേണ്ടി വരും. പിന്നെ വൈകുന്നേരം ഒരു മണിക്കൂർ ജിമ്മിലും സമയം ചിലവഴിക്കാം.”

“അതു ശരി. ഒരു ദിവസത്തേയ്‌ക്ക് മുഴുവനുമുള്ള പരിപാടിയുണ്ടല്ലോ. ഇനി ബോറടിക്കാനുള്ള സമയം പോലും കിട്ടില്ലല്ലോ.”

മീന അന്ന് ഉച്ചയ്‌ക്ക് തന്‍റെ വീട്ടിലേയ്‌ക്ക് മടങ്ങി.

അടുത്ത ദിവസം കാർ പഠിക്കാനായി ഡ്രൈവർക്കൊപ്പം പുറത്ത് പോയപ്പോൾ മുതൽ എന്തെന്നില്ലാത്ത സന്തോഷമായിരുന്നു റീത്തയ്‌ക്ക്. ഒരു മണിക്കൂർ ഡ്രൈവിംഗ് സീറ്റിലിരുന്നതും അവൾക്ക് ഡ്രൈവിംഗ് വഴങ്ങി തുടങ്ങി. അപ്പോഴേക്കും അവളുടെ ശ്രദ്ധ മുഴുവനും ഡ്രൈവറിലേയ്‌ക്ക് തിരിഞ്ഞു. നല്ല സ്മാർട്ടായിരുന്നു അയാൾ. കാണാൻ ദുൽക്കറിനേക്കാൾ ഒട്ടും മോശമായിരുന്നില്ല. അധികം കാശുണ്ടാക്കാനായി പാർട്ട് ടൈമായി ഡ്രൈവിംഗ് പഠിപ്പിക്കുകയാണ് ആ ചെറുപ്പക്കാരൻ. അവിചാരിതമായി അവളുടെ കൈ അയാളുടെ കൈയിൽ തട്ടി. അവൾ അയാളുടെ കണ്ണുകളിലേയ്‌ക്ക് തന്നെ നോക്കിയിരുന്നുപ്പോയി. ഇപ്പോൾ ഊണിലും ഉറക്കത്തിലും അവളുടെ മനസ്സിൽ ആ ചെറുപ്പക്കാരനും സുന്ദരനുമായ ഡ്രൈവറാണ്. അവൾ മീനയെ വിളിച്ചു പറയുകയും ചെയ്‌തു. താൻ തേടി നടന്ന ചെക്കനെ കണ്ടെത്തിയ കാര്യം. ഇനി പ്രണയിക്കാനുള്ള കാലമാണടാ… ഫോണിലൂടെ മീന തന്‍റെ ചങ്ങാതിയുടെ ആഹ്ലാദഭരിതമായ മനസ്സ് കാണുക തന്നെ ചെയ്‌തു.

“നിനക്ക് വട്ടാണൊടി. ഒരു ഡ്രൈവറെയാണോ നിനക്ക് കാമുകനായി കിട്ടിയത്?” മീന ചോദിച്ചു.

“അതിനെന്താ, ഒരു ഡ്രൈവർക്ക് കാമുകനാവരുതെന്ന് ഉണ്ടോ? ഞാൻ ജീവിതകാലം മുഴുവനുമുള്ള കാര്യമല്ല പറയുന്നത്. ഇതെന്‍റെ പാർട്ട്ടൈം കാമുകനാണ് പൊന്നെ…”

“നിനക്ക് ശരിക്കും വട്ടാണ് ഭായ്, ഇതു നിന്‍റെ അമ്മയെങ്ങാനും അറിഞ്ഞാൽ നിന്നെ കൊന്നതു തന്നെ… നീയായിട്ടിനി മറ്റൊരു ആരുഷി കേസ് ആവർത്തിക്കരുത്.”

“ഞാനത്ര മണ്ടിയൊന്നുമല്ല. എന്‍റെ ഈ ഒളിച്ചു കളി മമ്മി അറിയാനൊന്നും പോകുന്നില്ല.”

അടുത്ത ദിവസം മീന ചങ്ങാതി റീത്തയുടെ വീട്ടിലെത്തിയപ്പോഴേക്കും അവൾ കുസൃതിയെല്ലാം ഒപ്പിച്ചു വച്ചിരുന്നു. മമ്മിയുടെ പേഴ്സിൽ നിന്ന് സഖി ഗുളിക എടുത്ത് കഴിച്ചിരുന്നു. ഗുളിക കഴിച്ചതും അവളുടെ ആത്മവിശ്വാസം വർദ്ധിച്ചു. പിന്നെ അതിന്‍റെ ഒരു ബലത്തിലായിരുന്നു അവളുടെ സംസാരവും നടപ്പുമെല്ലാം. കാമുകനു മുന്നിൽ സ്വയം സമർപ്പിച്ചു കഴിഞ്ഞിരുന്നു അവൾ. കാറിന്‍റെ പിൻ സീറ്റിൽ വച്ചായിരുന്നു പിന്നീടുള്ള സംഭവങ്ങൾ എല്ലാം നടന്നത്. മീന അലസഭാവത്തിൽ റീത്തയെ കണ്ടതും കാര്യങ്ങൾ അവൾക്ക് ബോധ്യമായി.

അവൾ റീത്തയെ ശകാരിക്കാൻ തുടങ്ങി.

“നീയിതെന്താടി കാണിച്ചു വച്ചിരിക്കുന്നത്. ഗുളിക ഏറ്റില്ലെങ്കിലോ? ഇനി നീയെന്തു ചെയ്യും? നമ്മൾ ആ സിനിമ കണ്ടതാണ് എല്ലാം കുഴപ്പമായത്.”

“നീ കൂടുതൽ സംസാരിക്കുകയൊന്നും വേണ്ട. ഉടനെപ്പോയി ഒരു കാമുകനെ ഒപ്പിക്കാൻ നോക്ക്.”

“നിന്‍റെ ഉപദേശമൊന്നും എനിക്ക് വേണ്ട. ഇനി നീ വീണ്ടും ഈ ഏർപ്പാടിനുപോയാൽ ഞാൻ ഗുലുമാലാക്കും…”

“അങ്ങനെയാണെങ്കിൽ ഞാനിനി നിന്നോടൊന്നും പറയുന്നില്ല. നീ സത്യവാൻ സാവിത്രി ചമഞ്ഞ് നടന്നോ. ജീവിതത്തിന്‍റെ രസങ്ങൾ കളഞ്ഞ് കുളിക്കാൻ ഞാനില്ല.”

ഇവളോട് കൂടുതലൊന്നും പറയാതിരിക്കുന്നതാണ് നല്ലതെന്ന് മീനയ്ക്ക് തോന്നി. ഇപ്പോൾ എന്തു പറഞ്ഞാലും അവളുടെ തലയിൽ കയറുകയില്ല.

റീത്ത ആസ്വദിച്ചു കൊണ്ടാണ് എല്ലാ കാര്യങ്ങളും മീനയോട് പറഞ്ഞത്. ലോകത്തിലെ ഏറ്റവും വലിയ സുഖം താൻ അനുഭവിച്ചു എന്ന മട്ടിലായിരുന്നു അവളുടെ വെളിപ്പെടുത്തൽ. പക്ഷേ റീത്തയുടെ സംസാരമൊന്നും ഒരു തരത്തിലും മീനയെ സ്വാധീനിച്ചില്ല. തന്‍റെ നല്ല ചിന്തകളിൽ ജീവിക്കാനായിരുന്നു അവൾക്കിഷ്‌ടം. റീത്തയുടെ ഡ്രൈവിംഗ് പഠിക്കൽ അവസാനിച്ചു. എന്നിട്ടും ഡ്രൈവർ മനുവുമായുള്ള ബന്ധങ്ങൾ അവൾ തുടർന്നു. അവനിൽ നിന്ന് അകലം പാലിക്കണമെന്ന് ഉണ്ടായിരുന്നെങ്കിലും അതിന് കഴിഞ്ഞില്ല. ഇനി റിസൾട്ട് വരാൻ ഏതാനും ദിവസങ്ങളെ ഉള്ളൂ. ശരീരത്തിൽ ചില മാറ്റങ്ങൾ വരുന്നത് റീത്ത അറിഞ്ഞു. എന്തോ പ്രശ്നം ഉണ്ട്. ഈ മാസം പിരിയഡ്സും വന്നിട്ടില്ല. അവൾ ഒരു ആഴ്ചകൂടി കാത്തിരുന്നു. അവളുടെ ജീവൻ പോകുന്നതുപ്പോലെ ഭയം അവളെ വേട്ടയാടാൻ തുടങ്ങി. അവൾ മീനയെ വീട്ടിലേയ്‌ക്ക് വിളിപ്പിച്ച് തന്‍റെ ആശങ്കകൾ പങ്കുവച്ചു.

മീന പൊട്ടിതെറിച്ചു കൊണ്ടാണ് അവളോട് ആദ്യം സംസാരിച്ചത്. “കാമുകനുമായുള്ള രസത്തിനു പിന്നാലെ പോയിട്ടിപ്പോ എന്തായി. എല്ലാം നശിപ്പിച്ചില്ലെടീ. കർമ്മഫലം അനുഭവിച്ചേ പറ്റുള്ളൂ. മണ്ടി പെണ്ണേ സഖി ഗുളികളും നിന്നെ പറ്റിച്ചുവല്ലോ…”

“ഇങ്ങനെയോരോന്ന് പറഞ്ഞ് എന്നെ കൂടുതൽ വിഷമിപ്പിക്കല്ലേ.?എന്തെങ്കിലും ഒരു പരിഹാരം പറയൂ.”

“സഖി ഗുളിക സ്‌ഥിരമായി കഴിച്ചിട്ടില്ലായിരുന്നോ?”

“ആ കാര്യമൊക്കെയങ്ങ് വിട്, ഇനി മുഖം രക്ഷിക്കാനുള്ള ഒരു വഴി പറഞ്ഞു താ…”

“നിന്‍റെ മമ്മിയോട് എല്ലാം പറയാം. അവർ ഡോക്ടർ ആണല്ലോ. ഇനി എന്തു ചെയ്യണമെന്ന് മമ്മിയ്‌ക്ക് നന്നായി അറിയാമായിരിക്കും.”

“മമ്മിയോട് പറയാനോ, എത്ര നല്ല ഇപദേശമാണ് നീ തരുന്നത്. കൊള്ളാം. ഈ നാട്ടിൽ വേറെ ഡോക്‌ടർമാരൊന്നും ഇല്ലേ?”

“ഡോക്ടർമാർ ഒരുപാട് ഉണ്ട്. പക്ഷേ എന്തെങ്കിലും അത്യാഹിതം സംഭവിച്ചാൽ നിന്‍റെ മമ്മി അതറിയും.”

“എന്തു അത്യാഹിതം സംഭവിക്കാനാണ്. 10-15 മിനിറ്റ് നേരത്തെ കാര്യമാണെന്നാണ് ഞാൻ കേട്ടത്. ആരും അതറിയാനും പോകുന്നില്ല.”

“ ചില കേസുകൾ പ്രശ്നമാകാറുണ്ട്. ബ്ലീഡിംഗ് നിലയ്‌ക്കുകയില്ല. അപ്പോൾ സംഗതി വഷളാവും. ഏതായാലും നീ ഒരു തെറ്റ് ചെയ്‌തു. ഇനി വലിയൊരു തെറ്റ് കൂടി ചെയ്യണ്ട. നിന്‍റെ മമ്മിയോട് എല്ലാം തുറന്ന് പറയൂ. അവർക്കേ ഇനി നിന്നെ ഈ പ്രശ്നത്തിൽ നിന്ന് രക്ഷിക്കാനാവൂ.”

“എനിക്കതിനുള്ള ധൈര്യമില്ല മീനു… ഞാൻ മമ്മിയോട് ഒന്നും പറയാൻ പോകുന്നില്ല.” റീത്തയ്‌ക്ക് കരച്ചിൽ വന്നു.

എങ്കിൽ എല്ലാം ഒരു കടലാസിൽ എഴുതി കൊടുത്താൽ മതി. നിന്നെ വഴക്കു പറയുമായിരിക്കും. ദേഷ്യപ്പെടുമായിരിക്കും. പക്ഷേ നീ സുരക്ഷിതയായിരിക്കും.”

റീത്ത എന്തു ചെയ്യാനും ഒരുക്കമായിരുന്നു. അവൾ നടന്ന സംഭവമെല്ലാം ഒരു കടലാസിൽ എഴുതി അമ്മയുടെ പേഴ്സിൽ എടുത്തു വച്ചു. അമ്മയെ അഭിമുഖീകരിക്കാൻ അവൾക്ക് പേടി തോന്നി നാണകേടും. മകളെഴുതിയ കത്ത് വായിച്ചതും കാൽചോട്ടിൽ നിന്ന് മണ്ണിളകി പോകുന്നതു പ്പോലെ അവർക്ക് തോന്നി. എന്‍റെ മകൾ ഇത്ര വലിയ തെറ്റ് എങ്ങനെ ചെയ്‌തു? അവർ എന്തെന്നില്ലാത്ത തലപെരുക്കം അനുഭവപ്പെട്ടു. ഭർത്താവിനോട് ഇതു പറയണോ… അതോ മറച്ചു വയ്‌ക്കണോ.അന്ന് അവർ നേരത്തെ ആശുപത്രിയിൽ നിന്നെത്തി വീട്ടിലെ മുറിയിൽ കയറി വാതിലടച്ചിട്ടിരുന്നു. കുറെ കരഞ്ഞു. പിന്നെ 1-2 മണിക്കൂർ കഴിഞ്ഞപ്പോൾ മനസൊന്നു തണുത്തു. അവൾ മകളെ വിളിച്ചു.

“ മമ്മി ഞാൻ നിങ്ങളുടെ പേഴ്സിൽ നിന്ന് കിട്ടിയ സഖി ഗുളികയാണ് കഴിച്ചത്.”

“ഇനി ഒരക്ഷരം മിണ്ടിപോകരുത്. തെറ്റിന്‍റെ ശിക്ഷ നിശബ്ദമായി അനുഭവിച്ചു തീർത്തോ. ഞാൻ എത്രയോ ബുദ്ധിശൂന്യരായ പെൺകുട്ടികളുടെ അബോർഷൻ ചെയ്‌തിരിക്കുന്നു. പക്ഷേ ഒരിക്കലും തന്‍റെ മകൾ ഇത്തരം ആവശ്യമായി അടുത്ത് വരുമെന്ന് ഞാനൊരിക്കലും ചിന്തിച്ചതേയില്ല. നിന്‍റെ അറിവില്ലായ്മയാണ് നിന്നെ കൊന്നത്. എന്‍റെ അഭിമാനം കളഞ്ഞത്. നിന്നെ ഉപദേശിക്കാനും നേർവഴിയ്‌ക്ക് നയിക്കാനുമുള്ള സമയവും എനിക്ക് കണ്ടെത്താൻ കഴിഞ്ഞില്ല. എന്‍റെ മകൾ വളർന്നു വലുതായതൊന്നും ഞാനറിയാതെ പോയി. ഞാനും നിന്‍റെ ഡാഡിയും ജോലി ജോലി എന്നും പറഞ്ഞ് ഓടി നടക്കുകയായിരുന്നല്ലോ… അതിന്‍റെ ഫലം ഞങ്ങൾ രണ്ടാൾക്കും കിട്ടി. ജീവിതകാലം മുഴുവൻ ഞാനീ കുറ്റബോധവും പേറി നടക്കേണ്ടി വരും.

വാ, ഇന്നു വൈകുന്നേരം തന്നെ കാര്യങ്ങൾ ശരിയാക്കാം. ഇന്ന് അദ്ദേഹവും വീട്ടിലില്ലല്ലോ. ഇന്നി ഡാഡി ഇതൊന്നും അറിയണ്ട. വെറുതെ വിഷമിക്കണ്ട. എല്ലാ ഭാരവും ഞാൻ തന്നെ പേറികൊള്ളാം. നിന്‍റെ വഴിവിട്ട പോക്കാണ് എല്ലാം തുലച്ചത്.”

“മമ്മി എനിക്ക് മാപ്പ് തരൂ…”

വീട്ടിലെ ക്ലിനിക്കിൽ വച്ച് അന്ന് വൈകുന്നേരം അമ്മ തന്‍റെ മകൾ ചെയ്‌ത തെറ്റിനുള്ള പരിഹാരം ചെയ്‌തു. ശാരീരികമായ കളങ്കം മാഞ്ഞുപോയെങ്കിലും മാനസികമായി ഈ സംഭവം ഇരുവരെയും വേട്ടയാടി.

ശരിയായ ലൈംഗിക വിദ്യാഭ്യാസം ഇല്ലാത്തതിന്‍റെ കുറവാണ് റീത്തയെ കുഴിയിൽ ചാടിച്ചത്.

വിവാഹിതരായ സ്ത്രീകൾ പോലും ഇത്തരം കാര്യങ്ങളിൽ അജ്ഞരാണെന്ന് റീത്തയുടെ അമ്മയ്ക്ക് പലപ്പോഴും തോന്നിയിട്ടുണ്ട്. എത്ര കേസുകളാണ് അവരുടെ പക്കൽ വരാറ്. കുരങ്ങന്‍റെ കൈയിൽ കിട്ടിയ പൂമാലപോലെയാണ് പലർക്കും ലൈംഗീക ജീവിതം.

പഠന കാലത്തു തന്നെ ഇതേക്കുറിച്ച് ശരിയായ അറിവ് കുട്ടികൾക്ക് നൽകേണ്ടതുണ്ടെന്ന് അവർക്ക് തോന്നി. എത്ര പെൺകുട്ടികൾ ഇത്തരം ഗുളികളുടെ ദുരുപയോഗം നടത്തിയിട്ടുണ്ടാവും…

താൻ നല്ലൊരു അമ്മയായിരുന്നില്ല. ഇനി തന്‍റെ മകൾക്ക് പറ്റിയ അമളി മറ്റൊരു പെൺകുട്ടികൾക്കും പറ്റരുതെന്നാണ് അവൾ മനസ്സ് കൊണ്ട് അതിയായി ആഗ്രഹിച്ചു.

തെറ്റ് തന്‍റേതു കൂടിയാണെന്ന് തിരിച്ചറിഞ്ഞ ആ അമ്മ മകളെ അധികം വഴക്ക് പറഞ്ഞില്ല. ക്ഷീണിച്ചു കിടന്നുറങ്ങുന്ന അവളുടെ അടുത്ത് അവർ ആദ്യമായി അമ്മയായ ദിവസത്തെ അതേ മാനസ്സികാവസ്‌ഥയോടെ കിടന്നു.