വെള്ളം നമ്മുടെ ദാഹം അകറ്റുക മാത്രമല്ല ചെയ്യുന്നത്. ചർമ്മം, മുടി, നഖം എന്നിവയെയും അത് ആരോഗ്യകരമാക്കുന്നു. ശരീരത്തിന്‍റെ ഊഷ്മാവ് നിയന്ത്രിച്ച് ബ്ലഡ് പ്രഷർ ക്രമീക്കരിച്ച് ഹാര്‍ട്ട്ബീറ്റ് റേറ്റ് നോർമലാക്കി നിലനിർത്താൻ വെള്ളം ശരീരത്തെ സഹായിക്കുന്നുണ്ട്.
ദഹന പ്രക്രിയ സുഗമമാക്കാനും വെള്ളത്തിനു കഴിവുണ്ട്. ശരീരത്തിലെ അവയവങ്ങളെ ഡിടോക്സിഫൈഡ് ചെയ്യുന്നതിലും നിർണ്ണായകമായ പങ്ക് വഹിക്കുന്നു.
ശരീരത്തിന്‍റെ സുഗമമായ പ്രവർത്തനം ഒരു പരിധി വരെ വെള്ളവുമായി ബന്ധപ്പെട്ടാണിരിക്കുന്നത്. മാംസപേശികൾക്കും ജോയന്‍റ്സിനും ശരിയായി പ്രവർത്തിക്കാൻ വെള്ളം കൂടിയേ തീരൂ.
രക്‌തസഞ്ചാരം ശരിയായി നടക്കാനും വെള്ളം ആവശ്യത്തിനു കുടിക്കേണ്ടതുണ്ട്. ശരീരത്തിന്‍റെ എല്ലാ ഭാഗത്തും പോഷകങ്ങൾ എത്തിക്കാനും വെള്ളം വേണം. വിഷാംശങ്ങൾ ശരീരത്തിൽ നിന്ന് പുറം തള്ളാനും വെള്ളത്തിനു കഴിവുണ്ട്.
വേനൽക്കാലത്ത് അധികം വിയർക്കന്നതിനാൽ നിർജ്ജലീകരണം സംഭവിക്കാം. ഇതു മൂലമുണ്ടാകുന്ന പ്രശ്നങ്ങൾ പരിഹരിക്കാൻ ധാരാളം വെള്ളം കുടിക്കുന്നത് ശീലമാക്കിയാൽ മതി.
ഹോട്ട് സ്ട്രോക്കിൽ നിന്ന് മോചനം നേടാനും ധാരാളം വെള്ളം കുടിക്കുക. അതിനാൽ വേനൽക്കാലത്ത് വെള്ളം കുടിയ്ക്കാൻ ദാഹം തോന്നണമെന്നില്ല. അല്ലാതെ തന്നെ ധാരാളം വെള്ളം കുടിയ്ക്കാൻ ശ്രമിക്കണം.
ദ്രവ പദാർത്ഥങ്ങളിൽ നിന്നും ശരീരത്തിന് ആവശ്യമായ വെള്ളം ലഭിക്കും. വേനലിൽ ജലാംശമടങ്ങിയ പഴങ്ങളും പച്ചക്കറികളും ഭക്ഷണത്തിൽ അധികമായി ഉൾപ്പെടുത്തണം. ഇങ്ങനെ ചെയ്യുന്നതിലൂടെ വേനൽക്കാല ശാരീരിക പ്രശ്നങ്ങൾ പിടിക്കൂടാതെ നോക്കാനാവും.
വെള്ളത്തിന്‍റെ കുപ്പി കയ്യിൽ കരുതുക
വേനലിൽ എപ്പോൾ പുറത്തേയ്‌ക്ക് ഇറങ്ങുകയാണെങ്കിലും ഒരു കുപ്പി വെള്ളം കൈയ്യിൽ കരുതുക. ചെറിയ ഇടവേളകളിൽ വെള്ളം കുടിക്കുന്നത് ശീലമാക്കുക. വേനലിൽ ശരീരം വിയർക്കുകയും അന്തരീക്ഷ ഊഷ്മാവ് ശരീരത്തിലെ ഈർപ്പം വലിച്ചെടുക്കുകയും ചെയ്യും. ഇങ്ങനെ നഷ്‌ടപ്പെടുന്ന ജലാംശം ശരീരത്തിന് തിരിച്ച് ലഭിക്കാനായി അതിലധികം വെള്ളം കുടിക്കണം.
പഴങ്ങളും പച്ചക്കറികളും
പഴങ്ങളും സാലഡും ധാരാളം കഴിക്കുക. ഇതിൽ വെള്ളത്തിന്‍റെ അംശം ഉണ്ട്. നിങ്ങൾ സ്‌ഥിരമായി കഴിക്കുന്ന ഭക്ഷണത്തിനൊപ്പം ഒരു പ്ലേറ്റ് പഴങ്ങളും ഫ്രഷ് പച്ചക്കറി സാലഡും ഉൾപ്പെടുത്തിയാൽ ശരീരത്തിനു ആവശ്യമായ പോഷണം ലഭിക്കും. ഇതിലൂടെ ജലാംശം ലഭിക്കുക മാത്രമല്ല. വിറ്റാമിൻ, മിനറൽസ് ആന്‍റി ഓക്സിഡന്‍റ് എന്നിവയും ലഭിക്കുന്നു. ഓറഞ്ച്, തണ്ണിമത്തൻ, കക്കിരി, കുക്കുമ്പർ, പൈനാപ്പിൾ എന്നിവയിൽ ധാരാളം ജലാംശം അടങ്ങിയിട്ടുണ്ട്. ലെറ്റ്യൂസ്, ബ്രോക്കോളി, മുള്ളങ്കി, വെള്ളരി എന്നിവയും വേനലിൽ ധാരാളം കഴിയ്‌ക്കാം.
മറ്റ് ഭക്ഷ്യവസ്‌തുക്കൾ
വെള്ളം കൂടാതെ ശരീരത്തിൽ ജലാംശം നിലനിർത്താൻ സഹായിക്കുന്ന മറ്റ് ഭക്ഷ്യവസ്‌തുക്കളും ഉണ്ട്. പാൽ, തൈര്, മോര്, ഓട്സ് മീൽ, നാരങ്ങവെള്ളം, ഇളനീർ എന്നിവ വേനലിൽ നന്നായി സേവിക്കാം. തൈരും, മോരും പോഷണം നൽകുക മാത്രമല്ല ശരീരം തണുപ്പിക്കുകയും ചെയ്യും.
സൂപ്പും ജ്യൂസും
ആഹാരത്തിനൊപ്പം വെജിറ്റബിൾ സൂപ്പ് നിർബന്ധമാക്കുക. ദിവസത്തിൽ ചുരുങ്ങിയത് മൂന്ന് തവണ ജ്യൂസ് കഴിക്കുന്നതും വേനലിൽ നല്ലതാണ്. ഒരു നേരത്തെ ഭക്ഷണം ഒഴിവാക്കി ആ സമയത്ത് ഒരു കപ്പ് സൂപ്പ് അല്ലെങ്കിൽ ഒരു ഗ്ലാസ് ജ്യൂസ് കഴിക്കാം. ഇനി പാക്കേജ് ജ്യൂസാണ് വാങ്ങി കഴിക്കുന്നതെങ്കിൽ അതിൽ പഞ്ചസാരയുടെ അളവ് കൂടുതലായിരിക്കും. അതിനാൽ അതിൽ വെള്ളം ചേർത്ത് കഴിക്കാം. പ്രിസർവേറ്റീവ് ചേർത്ത പാക്കിലടച്ച ജ്യൂസ് കഴിക്കുന്നത് ഒഴിവാക്കണം.
ആൽക്കഹോളും സോഡയും
വേനൽക്കാലത്ത് മദ്യപിക്കുന്നതും സോഡ കുടിക്കുന്നതും ശരീരത്തിൽ നിർജ്ജലീകരണം സൃഷ്‌ടിക്കും. വേനലിൽ മദ്യപാനം തീർത്തും ഒഴിവാക്കുക. സോഡ കഴിക്കുന്നത് പല ഗുരുതര ആരോഗ്യ പ്രശ്നങ്ങൾക്കും കാരണമാകും. വേനലിൽ സോഡ ഒട്ടും വേണ്ട.
കഫീൻ കുറയ്‌ക്കാം
വേനൽക്കാലത്ത് കാപ്പിയും ചായയും കുറയ്‌ക്കുന്നതാണ് ഉത്തമം. ഇവ രണ്ടും നിർജ്ജലീകരണം വേഗത്തിലാക്കും. ഇനി ഒട്ടും കഴിക്കാതിരിക്കാൻ കഴിയില്ലെന്ന അവസ്‌ഥയാണെങ്കിൽ അതിന്‍റെ എണ്ണം കുറയ്‌ക്കുക. വെള്ളം നിങ്ങളെ ഈ വേനലിൽ കാത്തു രക്ഷിക്കട്ടെ.
