വീടുകളാണ് ഈ മഹാമാരിക്കാലത്തെ ഏറ്റവും വലിയ അഭയ കേന്ദ്രവും ആഘോഷ കേന്ദ്രവും. അപ്പോൾ പിന്നെ ഈ ദീപാവലിക്കാലവും അവിടെത്തന്നെ ഗംഭീരമായി ആഘോഷിക്കാം. ദീപാവലി ദിവസം ദീപം കൊണ്ട് വീടും പരിസരവും അലങ്കരിക്കുന്നതാണ് പ്രധാന ചടങ്ങ്. പക്ഷേ ആ ആഘോഷവും ഒരുക്കവും വളരെ വ്യത്യസ്തമായിത്തന്നെ നിങ്ങൾക്ക് ചെയ്യാൻ കഴിയും. അൽപം ക്രിയേറ്റീവായ മനസ് ഉണ്ടെങ്കിൽ വീട് ഒരു അദ്ഭുത ലോകമാക്കി മാറ്റാൻ തരത്തിലുള്ള ദീപാലങ്കാര സാമഗ്രികൾ മാർക്കറ്റിൽ ലഭ്യമാണ്.
എൽഇഡി ലൈറ്റുകളുടെ ട്രെൻഡിംഗ് കാലമാണ് ദീപാവലി ഉത്സവകാലം. എൽഇഡിയും ട്രെഡീഷണൽ ലൈറ്റിംഗ്സും ചേർന്ന് ഇൻഡോ വെസ്റ്റേൺ സ്റ്റൈൽ തന്നെ ക്രിയേറ്റ് ചെയ്യാം. പലതരത്തിലുള്ള വിളക്കുകളും, പുതിയ രൂപത്തിലും ഭാവത്തിലും മാർക്കറ്റിൽ ലഭ്യമാണ്. വീടിന്‍റെ ഓരോ കോണുകളും അലങ്കരിക്കാൻ കഴിയുന്ന കാൻഡിലുകളും യഥേഷ്ടമുണ്ട്.
ദീപം, മെഴുകുതിരി, ഇലക്ട്രിക് ലൈറ്റുകൾ ഇവ വീടുകളിൽ മിക്സ് അപ്പ് ആയി ചെയ്യുമ്പോൾ ഹെവി ഷെയ്ഡുകൾ വേണമെന്നില്ല. കണ്ണടിച്ചു പോകുന്ന തിളക്കം വീടിനുള്ളിലും പുറത്തും അത്ര സുഖകരമായിരിക്കില്ല. വീടിന്‍റെ കോണുകൾക്ക് കൂടുതൽ സൗന്ദര്യം നൽകാൻ ഫെയറിലൈറ്റസ് തെരഞ്ഞെടുക്കാവുന്നതാണ്.
എൽഇഡി ലൈറ്റ്സിൽ രണ്ട് കളർ കോമ്പിനേഷനുകളാണ് കണ്ടു വരാറുള്ളത്. ഡ്രോയിംഗ് റൂമിലെ ഭിത്തിയുടെ നിറം കണക്കിലെടുത്തു കൊണ്ട് എൽഇഡി ലൈറ്റ്സ് കോമ്പിനേഷൻ കളർ കണ്ടെത്താവുന്നതാണ്. പച്ചയും മഞ്ഞയും നല്ല കോമ്പിനേഷനാണ്. ചുവപ്പും നാരങ്ങാ നിറവും നല്ലതാണ്. ഇവ ദീപാവലിയ്ക്ക് കൂടുതൽ ശോഭ നൽകുന്ന കളർ കോമ്പിനേഷനുകളാണ്. മഞ്ഞയും പച്ചയും കലർന്ന തിളക്കം വീടിന് ഒരു പ്രത്യേകതരം ഭംഗി തന്നെ നൽകുന്നുണ്ടാകും.
3-4 അടി ഉയരമുള്ള മ്യൂസിക്കൽ ലൈറ്റ് ട്രീ ലിവിംഗ് റൂമിൽ വയ്ക്കാവുന്നതാണ്. ചെറിയ എൽഇഡി ബൾബുകൾ കൊണ്ട് അലങ്കരിച്ച കൃത്രിമ ഇലകളും പൂക്കളും ചേർന്ന മ്യൂസിക്കൽ ലൈറ്റ്സ് ട്രീ ഗംഭീര കാഴ്ചയാണ്. വീടിന് ട്രഡീഷണൽ ലുക്ക് ആണ് ഇഷ്ടമെങ്കിൽ മൺചെരാതുകൾ ഉപയോഗിക്കാം. ഇലക്ട്രിക് ലൈറ്റുകൾ മൺചെരാതുകളുടെ രൂപത്തിലും ലഭ്യമാണ്. പല നിറത്തിലും ഇത്തരം ട്രഡീഷണൽ ലാബുകൾ അഥവാ ചെരാതുകൾ ലഭ്യമാണ്. വീടിന്‍റെ പ്രധാന കവാടങ്ങളും ജനാലകളും ഇവ ഉപയോഗിച്ച് അലങ്കരിക്കാം. രണ്ട് മീറ്റർ നീളത്തിൽ ലഭ്യമായതിനാൽ ആവശ്യാനുസരണം അലങ്കരിക്കുകയുമാവാം.
ഇക്കോ ഫ്രണ്ടലി ആയ എൽഇഡി ലൈറ്റുകളാണ് ദീപാവലിയുടെ അലങ്കാരങ്ങളിൽ പ്രധാനപ്പെട്ട ഒരു ആകർഷണം. സിംഗിൾ കളർ മുതൽ മൾട്ടി കളർ ഡിസൈനർ ലൈറ്റുകൾ പഴവർഗ്ഗങ്ങളുടെയും പച്ചക്കറികളുടെയും വരെ ആകൃതിയിലുള്ള ലൈറ്റുകൾ അലങ്കാരത്തിനായി ഉപയോഗിക്കാം. ഡീജെ ലേസർ ലൈറ്റുകൾ ദീപാവലി ആഘോഷവും കൂടുതൽ കളറാക്കിത്തരും. ഒരു ലേസർ പാനലിലെ പാറ്റേൺ, നൂറു മുതൽ 200 മീറ്റർ വരെ ഏരിയ കവറേജ് ലഭിക്കുന്ന തരത്തിലാണ്. ലേസർ ലൈറ്റ്സിന്‍റെ സ്പീഡ് നമുക്ക് ഇഷ്ടമനുസരിച്ച് നിയന്ത്രിക്കാനും കഴിയും. മൾട്ടി കളർ ജാലർ ലൈറ്റുകളും മികച്ചൊരു ഓപ്ഷനായി. അധികം വെളിച്ചം വേണമെന്ന് തോന്നുന്നവർക്ക് ഇത് ഉപയോഗിക്കാം.
റാന്തലുകൾ
ദീപാവലി ഉത്സവാഘോഷ വേളയിൽ ലാന്‍റേണുകൾ അഥവാ തൂക്കുവിളക്കുകൾ വളരെ പ്രശസ്തമാണ്. വളരെ രസകരമായ രീതിയിൽ ലാന്‍റേണുകൾ ഉപയോഗിച്ചാൽ അതിഥികളെ വിസ്മയിപ്പിക്കാം. കളർഫുൾ പേപ്പർ ബാഗ് ഉപയോഗിച്ച് പേപ്പർ ലാന്‍റേണുകൾ ഉണ്ടാക്കാവുന്നത്. ബാഗിന്‍റെ മുകൾ ഭാഗം താഴേയ്ക്ക് വച്ച് ആ ഭാഗം കെട്ടി വയ്ക്കുക. അകത്ത് ഒരു ബൾബ് വച്ച്, പുറം ഭാഗത്ത് റിബണും വർണ്ണക്കടലാസുകളും ഒട്ടിച്ച് അതി ഗംഭീരമായ പരമ്പരാഗത റാന്തലുകൾ ഉണ്ടാക്കാം.
സ്വയം ഉണ്ടാക്കാം
- പഴയ ചില്ലു കുപ്പിയിൽ മനസിന് ഇഷ്ടപ്പെട്ട പെയിന്‍റ് സ്പ്രേ ചെയ്‌ത ശേഷം താഴെയും മുകളിലും സ്വർണ്ണനിറം പ്രത്യേക ഡിസൈനായി സ്പ്രേ ചെയ്യുക. ഇതിൽ എൽഈഡി ലൈറ്റോ മെഴുകുതിരിയോ വയ്ക്കാം.
- കപ്പ് കേക്കിന്‍റെ ചെറിയ പാക്കുകളിലും വിളക്കുകളുടെ ഡിസൈൻ ഉണ്ടാക്കാം. ചെറിയ ബൾബ് വച്ച് ഡ്രോയിംഗ് റൂമിന്‍റെ ചില കോണുകൾ അലങ്കരിക്കാം.
- കൂൾഡ്രിങ്ക്, സോഫ്റ്റ് ഡ്രിങ്ക് ബോട്ടിലുകൾ മുറിച്ച ശേഷം അതിന്‍റെ മുകൾ ഭാഗത്തിന് പൂവിന്‍റെ ആകൃതി നൽകുക. അതിൽ കുറച്ച് ഗ്ലിറ്ററിംഗ് പൊടി വിതറുക. ഇതിന്‍റെ നടുക്കായി മെഴുകുതിരി കത്തിച്ചു വച്ച് ബാൽക്കണികൾ അലങ്കരിക്കാം.
- ചെമ്പുനിറത്തിലുള്ള പാത്രങ്ങളിൽ ദീപം അലങ്കരിച്ചാൽ അതീവ ഹൃദ്യമായിരിക്കും. ഇതിൽ ഇടയ്ക്കിടയ്ക്കായി പൊട്ടിയ ചില്ലുകൾ കൂടി പതിപ്പിച്ചാൽ വളരെ ഭംഗിയായി വെളിച്ചം പ്രതിഫലിപ്പിക്കും.
- ചുവന്ന നിറത്തിലുള്ള ക്രാക്ക്ഡ് ഗ്ലാസിനുള്ളിൽ കാൻഡിലോ ദീപമോ വയ്ക്കാം.
- പൂക്കളുടെയും മറ്റും ആകൃതിയിൽ ടീലൈറ്റുകളും അറേഞ്ചു ചെയ്യാവുന്നതാണ്. വീടിന്‍റെ ഇരുണ്ട അകത്തളങ്ങളിൽ ഇവ ഹോൾഡറുകൾ ഉപയോഗിച്ച് പിടിപ്പിക്കാം.
മെഴുകുതിരിജാലം
മെഴുകുതിരികൾ പല നിറത്തിൽ ലഭ്യമാണ്. പല നിറത്തിലുള്ള മെഴുകുതിരികൾ ഒരുമിച്ച് വച്ച ശേഷം നാലു കോണുകളിലായി കത്തിച്ചു വയ്ക്കാവുന്നതാണ്. ഡക്കറ്റേറീവ് പീസുകൾക്കുള്ളിലും മെഴുകുതിരി കത്തിച്ചു പ്രകാശം ജ്വലിപ്പിക്കാം. മെഴുകുതിരികൾ പല ആകൃതിയിലും ലഭ്യമാണ്. ഫ്ളോട്ടിംഗ് കാൻഡിലുകളും വളരെ രസകരമായ അലങ്കാര മാതൃകയാണ്.
മണ്ണു കൊണ്ടോ, ലോഹം കെണ്ടോ നിർമ്മിച്ച വലിയ ബൗളിൽ വെള്ളം നിറച്ച ശേഷം ഫ്ളോട്ടിംഗ് കാൻഡിലുകൾ അതിൽ ഒഴുക്കിയിടാം. വെള്ളത്തിൽ ഒഴുകി നടക്കുന്ന ദീപങ്ങൾ മനോഹരമായ കാഴ്ചയാണ്. ഈ വെള്ളത്തിൽ റോസാദളങ്ങൾ വിതറിയിടാം.
ഇതിനു പുറമെ ഇപ്പോൾ മാർക്കറ്റിൽ എൽഇഡി കാൻഡിലുകൾ കൂടി ലഭ്യമാണ്. പില്ലർ കാൻഡിലകൾ, അലങ്കാര മെഴുകുതിരികൾ പ്രിന്‍റഡ് മൊട്ടിഫ്സ് കാൻഡിലുകൾ ഇങ്ങനെ വ്യത്യസ്തങ്ങളായ ഡിസൈനുകളും ലഭ്യമാണ്. കളർചേഞ്ചിംഗ് കാൻഡിലുകളാണ് മറ്റൊരു താരം. റിമോട്ട് കൺട്രോൾ ഉപയോഗിച്ച് ഇവയുടെ നിറവും പാറ്റേണുമൊക്കെ മാറ്റാനും കഴിയും. സുഗന്ധ പൂരിതവുമാണ്.
പരമ്പരാഗതശൈലി
മൺചെരാതുകളിൽ ദീപം തെളിയിക്കുന്ന പരമ്പരാഗത ശൈലിക്ക് ഇപ്പോഴും വലിയ പ്രിയം തന്നെയാണ്. വീടിന്‍റെ പ്രധാന വാതിലിന് ചെരാതിന്‍റെ രൂപം നൽകി ദീപം തെളിയിക്കാം. പൂക്കൾ കൊണ്ട് എല്ലായിടവും അലങ്കരിക്കും. സുഗന്ധവും ദീപ പ്രഭയും അലൗലികമായ ആനന്ദം സൃഷടിക്കുക തന്നെ ചെയ്യും.
ട്രെന്‍റുകൾ കൂടുതൽ കാണുന്നത് ഇലക്ട്രിക് ചെരാതുകളിലാണ്. 20 ചെരാതുകൾ ചേർന്ന ഇലക്ട്രിക് ദീപങ്ങൾ ജനാലകൾ അലങ്കരിക്കാൻ ഉത്തമമാണ്. തൂക്കിയിടാനും സാധിക്കും.
ബാറ്ററി കൊണ്ട് പ്രവർത്തിപ്പിക്കാവുന്ന ദീപാലങ്കാരങ്ങളും ഉപയോഗിക്കാവുന്നതാണ്. മുപ്പത് രൂപയോളം വരും ഒരു വിളക്കിന്. ലേസ് കുന്തൻ, സ്വരോസ്കി ഇവ ഉപയോഗിച്ചും ദീപാലങ്കാരം വ്യത്യസ്തമാക്കാം. ബാറ്ററി കൊണ്ട് പ്രവർത്തിക്കുന്ന ഗോളാകൃതിയിലുള്ള എൽഇഡി ലൈറ്റുകൾ ഏത് ആഘോഷ അവസരത്തിലും അനുയോജ്യമാണ്.
