വളർത്തുമൃഗങ്ങളും ഇൻഡോർ പ്ലാന്‍റ്സും വീടിന് പ്രൗഢിയേകുമല്ലോ. ഇന്ന് ഏതൊരു വീട്ടിലും ഇവയൊക്കെയുണ്ട്. കുട്ടികൾ മാത്രമല്ല മുതിർന്നവരും വളർത്തുമൃഗങ്ങളെ ഏറെ ഇഷ്ടപ്പെടുന്നവരാണ്. എന്നാൽ വളർത്തുമൃഗങ്ങൾ രോഗാണു വാഹകരാണെന്ന കാര്യം നമ്മിൽ എത്ര പേർക്കറിയാം? ഗൃഹാന്തരീക്ഷം ശുദ്ധമായിരിക്കാൻ ഇൻഡോർ പ്ലാന്‍റ്സ് സഹായിക്കുന്നുണ്ട്. എന്നാൽ ഇവയിൽ ചിലതെങ്കിലും അലർജിയും ചർമ്മ സംബന്ധമായ രോഗങ്ങളും ഉണ്ടാക്കുന്നവയാണ്.
വളർത്തുമൃഗങ്ങൾ
കുട്ടികൾക്കും ഗർഭിണികൾക്കും ചായമായവർക്കും രോഗപ്രതിരോധശേഷി പൊതുവേ കുറവായിരിക്കും. വളർത്തുമൃഗങ്ങളിൽ നിന്നുള്ള ഇൻഫെക്ഷൻ ഇത്തരക്കാരെയാണ് എളുപ്പം ബാധിക്കുന്നത്. മൃഗങ്ങളുടെ ശരീരത്തിലും ഉമിനീരിലുമൊക്കെ ബാക്ടീരിയകളും ചെറുപ്രാണികളും വസിക്കുന്നുണ്ട്. ഇവയെ തൊടുകയോ ലാളിക്കുകയോ ചെയ്യുമ്പോൾ ഇവ നമ്മുടെ ശരീരത്തിലെത്തിച്ചേരും. സാൽമൊണലോസിസ്, ക്യാറ്റ് സ്ക്രാച്ച് ഫിവർ, റൗണ്ട് വേം എന്നീ രോഗങ്ങൾ വളർത്തു മൃഗങ്ങളിൽ നിന്നുണ്ടാവാം. ഇതു കൂടാതെ ഫംഗൽ ഇൻഫെക്ഷൻ, ചർമ്മത്തെയും മുടിയെയും നഖത്തേയും ബാധിക്കുന്ന രോഗങ്ങളുമുണ്ടാവാം. വളർത്തു തത്തകൾ പോലും പ്രത്യേകം രോഗം പരത്തുന്നവയാണ്.
ശ്രദ്ധിക്കേണ്ട കാര്യങ്ങൾ
വീട്ടിൽ വളർത്തുമൃഗങ്ങളുണ്ടെങ്കിൽ അവയുടെ ആരോഗ്യകാര്യത്തിലും പ്രത്യേകം ശ്രദ്ധ നൽകേണ്ടതുണ്ട്. വളർത്തു മൃഗങ്ങളിൽ നിന്നും പലതരം സാംക്രമിക രോഗങ്ങൾ പടരാൻ സാദ്ധ്യതയുണ്ടെന്നതിനാൽ ഇവയുടെ പരിപാലനവും ശ്രദ്ധയോടെയാവണം.
- മൃഗങ്ങൾക്ക് യഥാസമയം കുത്തി വെയ്പ്പു നൽകുക.
- നല്ലൊരു മൃഗഡോക്ടറെ കൊണ്ട് പരിശോധിപ്പിച്ച് ഇവയുടെ ആരോഗ്യസ്‌ഥിതി ഉറപ്പു വരുത്തുക.
- കുളിപ്പിക്കുന്നതോടൊപ്പം അവയുടെ കൂടും പരിസരവും വൃത്തിയായി സൂക്ഷിക്കുക.
- മൃഗങ്ങളെ ലാളിക്കുന്ന ശീലമുള്ളവരാണോ, എങ്കിൽ കൈകൾ നന്നായി കഴുകിയശേഷം മാത്രം മറ്റു ജോലികൾ ചെയ്യുക. കുട്ടികളിലും ഈ ശീലം വളർത്തുക.
- ഗർഭിണികൾ വളർത്തു മൃഗങ്ങളുമായി അടുത്തിടപഴകുന്നത് ഒഴിവാക്കുക. ഗർഭസ്‌ഥ ശിശുവിന് ജന്മനായുള്ള വൈകല്യങ്ങൾ/ ടോക്സോ പ്ലാസ്മോസിസ് പോലുള്ള മാരകരോഗങ്ങൾ പിടിപെടാനുള്ള സാദ്ധ്യതയേറെയാണ്.
ഇൻഡോർ പ്ലാന്‍റ്
വീടിന്‍റെ അകത്തളങ്ങൾ മനോഹരമാക്കുന്നതിനു ഡ്രോയിംഗ് റും, ബാൽക്കണി എന്നുവേണ്ട അടുക്കളയിൽ വരെ ഇൻഡോർ പ്ലാന്‍റ്സ് വച്ചു പിടിപ്പിക്കുന്നത് ഇന്നൊരു ഫാഷനായിട്ടുണ്ട്. മണിപ്ലാന്‍റ്, ക്രോട്ടൺ. കാക്ക്റ്റസ്, എക്സോറ, മിനിയേച്ചർ, ബോൺസായ്, കോളിയസ്സ്, സ്നേക്ക് പ്ലാന്‍റ്, അർക്കേറിയ, ബോഗൻവില്ല, ഫോൺ, പ്ലാന്‍റൻ എന്നിവയാണ് പൊതുവെ ഉപയോഗിക്കുന്ന ഇൻഡോർ പ്ലാന്‍റ്സ്.
നാം പുറന്തള്ളുന്ന കാർബൺ ഡൈ ഓക്സൈഡ് വലിച്ചെടുക്കുമെന്നു മാത്രമല്ല ബെൻസീൻ, ടാല്യൂൺ, ജായ്‌ലിൻ പോലുള്ള ഹാനികരങ്ങളായ വാതകങ്ങളും പിടിച്ചെടുത്ത് ഗൃഹാന്തീക്ഷം ശുദ്ധമാക്കുന്നു. അതേസമയം പലതരം അലർജിക്കും സ്‌കിൻ – ടോക്സിക്ക് റിയാക്ഷനും കാരണമാവുന്നു എന്നതാണ് ന്യൂനത. ചില ചെടികളുടെ രുക്ഷമായ ഗന്ധവും അലർജിയ്ക്ക് കാരണമാകാറുണ്ട്.
വിഷസസ്യങ്ങൾ
ഇൻഡോർ പ്ലാന്‍റ്സ് മുറിക്കുമ്പോഴൊ വൃത്തിയാക്കുന്ന വേളയിലോ അവയിൽ നിന്ന് സ്രവിക്കുന്ന ദ്രവം ചിലരിലെങ്കിലും അസ്വസ്‌ഥതകൾ ഉണ്ടാക്കാറുണ്ട്. ചിലയിനം സസ്യങ്ങളിലുള്ള പദാർത്ഥങ്ങൾ കണ്ണ്, മൂക്ക്, ശ്വാസകോശം, ദഹനവ്യവസ്‌ഥ എന്നിവയെ പ്രതികൂലമായി ബാധിക്കുന്നവയാണ്.
പലപ്പോഴും ഗൃഹാലങ്കാരത്തിനുപയോഗിക്കുന്ന സസ്യങ്ങളിൽ നിന്നും മാത്രമല്ല ചെടിച്ചട്ടിയിലെ മണ്ണ്, വെള്ളം, വളം എന്നിവയിൽ നിന്നും വിഷമയമുള്ള വോൾടൈൽ ഓർഗാനിക്ക് കോമ്പൗണ്ട് പുറത്തുവരാറുണ്ട്. ഇത് ഗൃഹാന്തരീക്ഷം മലിനമാക്കും. ലില്ലി, വിപ്പിംഗ് ഫിഗ്, എറിക്ക്‌പാം പ്ലാന്‍റിലുമൊക്കെയാണ് വോൾടൈൽ ഓർഗാനിക്ക് കോമ്പൗണ്ട് കണ്ടുവരുന്നത്. രാത്രി കാലങ്ങളെ അപേക്ഷിച്ച് പകലാണ് ഇവ അധികമായി പുറപ്പെടുവിക്കുന്നതെന്നു പഠനങ്ങൾ പറയുന്നു.
സാധാരണയായി ഒരാൾക്ക് അലർജിയുണ്ടാക്കുന്ന ചെടികൾ മറ്റൊരാളിൽ അലർജ്ജിയുണ്ടാക്കണമെന്നില്ല. ഏതു ചെടിയാണ് അലർജി/ അസ്വസ്‌ഥതകളുണ്ടാക്കുന്നതെന്ന് തിരിച്ചറിഞ്ഞ് അത് നീക്കം ചെയ്യുക.
പരിപാലനം
ഇൻഡോർ പ്ലാന്‍റ്സിന്‍റെ പരിചരണത്തിലും പ്രത്യേകം ശ്രദ്ധ നൽകേണ്ടതുണ്ട്. ഇല്ലെങ്കിൽ ഇവ എളുപ്പം ഉണങ്ങി പോയെന്നു വരാം. കൊഴിഞ്ഞു വീഴുന്ന ഇലകൾ വൃത്തിയാക്കിയില്ലെങ്കിലും ചെടിച്ചട്ടിയിൽ വെള്ളം കെട്ടിക്കിടന്നാലും ചെറുജീവികളും വിഷവാതകങ്ങളും ഉണ്ടാവാം. അന്തരീക്ഷം മലിനമാവാതിരിക്കാൻ ചെടിച്ചട്ടികൾ, ചെടികൾ യഥാസമയം വൃത്തിയാക്കുക. ഇലകൾ ഉണങ്ങുന്നുവെങ്കിൽ ഇടയ്ക്കക്കിടയ്ക്ക് വളം ഇട്ടു കൊടുക്കണം. ചെടിയ്ക്ക് ആവശ്യത്തിനു വെയിൽ കി ട്ടുന്നുണ്ടെന്നും ഉറപ്പുവരുത്തുക. ചെടികളിലെ കീടങ്ങളുടെയും പ്രാണികളുടെയും ശല്യം ഒഴിവാക്കാൻ മരുന്ന് തളിക്കുക.
- ചില ചെടികളിലെങ്കിലും നേരത്തെ തന്നെ ഇലകൾ പൊഴിഞ്ഞു തുടങ്ങാറുണ്ട്. ഇതിന്‍റെ കാരണം കണ്ടെത്തുക. ഒരു പക്ഷേ കാലാവസ്ഥമാറ്റം, ഉപയോഗിക്കുന്ന വളം കീടനാശിനി എന്നിവ മൂലമാവും ഇതു സംഭവിക്കുന്നത്. അതിനാൽ വിദഗ്ദ്ധരോട് സംസാരിച്ച് സഹായമാരായാം.
- പലപ്പോഴും ചെടികളുടെ വളർച്ച മുരടിക്കുകയോ ദുർബ്ബലമാവുകയോ ചെയ്യാം. ഇലകൾ തീർത്തും ചെറുതായെന്നും വരാം. ഈയൊരവസരത്തിൽ ചെടികൾ തുറന്ന സ്‌ഥലത്ത് ഇടയ്ക്കെടുത്തുവച്ച് കാറ്റും വെളിച്ചവും കൊള്ളിക്കുക.
- ചെടികൾ വളരുന്നതിനും തളിർക്കുന്നതിനും ഉചിതമായ ഊഷ്‌മാവ് അനിവാര്യമാണ്.
- ചെടിച്ചട്ടിയിലെ മണ്ണ് ഇടയ്ക്ക് പരിശോധിക്കുക കിടങ്ങളും പ്രാണികളും ആക്രമിച്ചു തുടങ്ങിയിട്ടുണ്ടെങ്കിൽ മണ്ണ് ഉടനെ മാറ്റുക.
- ചിലപ്പോഴെങ്കിലും ചെടികളുടെ നാമ്പ് വാടുകയോ ചീഞ്ഞു തുടങ്ങുകയോ ചെയ്യാറുണ്ട്. കാരണം കണ്ടെത്തുക പ്രയാസമാണ്. മണ്ണിലെ ഈർപ്പക്കുറവ്, അമ്ലാംശം അധികമാവുക, വളത്തിന്‍റെ കുറവ്, വിഷപദാർത്ഥങ്ങൾ, ഫ്ളോറൈഡ്‌സ് ടോക്സിറ്റി എന്നിവ ചെടികൾ വാടാൻ കാരണമാവാറുണ്ട്.
- പുതിയതായി നട്ടുവളർത്തിയ ചെടിയാണെങ്കിൽ ആദ്യ ദിവസങ്ങളിൽ മതിയായ വെളിച്ചവും സൂര്യപ്രകാശവും വേണ്ടി വരാറുണ്ട്. വീടിനകത്തെ അന്തരീക്ഷവുമായി ഇണങ്ങിയ ശേഷം മാത്രം ചട്ടി അകത്തു വയ്ക്കുക.
- ചെടിച്ചട്ടിയിൽ വളം കൂടി പോയിട്ടുണ്ടെങ്കിൽ കൂടുതൽ അളവിൽ വെള്ളം ഒഴിക്കുക. മണ്ണിലുടെ അധിക വളം ഒലിച്ചിറങ്ങി പുറത്തു പോകാനാണിത്.
- ജനാലയിലൂടെയോ, വെന്‍റിലേറ്ററിലൂടെയോ വെയിൽ നേരിട്ടു പതിക്കുന്നയിടത്ത് ചെടിച്ചട്ടി വയ്ക്കരുത്. ആദ്യ ദിവസങ്ങളിൽ വെയിലുള്ള ഭാഗത്ത് വയ്ക്കാം. പിന്നീട് സാവകാശം പ്രകാശം കിട്ടുന്ന ഭാഗത്തേക്ക് നീക്കി വച്ചാലും മതിയാവും. ആവശ്യത്തിനു വെളിച്ചം ഒരുക്കി കൊടുക്കാം.
- ഒട്ടുമിക്ക ഇൻഡോർ പ്ലാന്‍റ്സിനും പകൽ 65 മുതൽ 75 വരെയും രാത്രി 10 മുതൽ 15 ഡിഗ്രി വരെയും ഫാരൻഹീറ്റ് ആവശ്യമായി വരാറുണ്ട്.
- ഈർപ്പവും ചെടിയുടെ വളർച്ചയ്ക്ക് ആവശ്യമാണ്. ഇത് കാറ്റിൽ നിന്നും ലഭിക്കുന്നുണ്ട്. ശൈത്യത്തിൽ റൂം കണ്ടീഷണർ/ എയർ ബ്ലോവർ ഉപയോഗിക്കുന്നത് ഈർപ്പത്തിന്‍റെ അളവ് കുറയ്ക്കാൻ കാരണമാവും. ഇതൊഴിവാക്കാൻ റൂം ഹ്യൂമീഡിഫൈയർ ഉപയോഗിക്കുക. ഇടയ്ക്ക് വെള്ളം സ്പ്രേ ചെയ്തു കൊടുക്കുന്നതും ഈർപ്പം നിലനിർത്തും.
- മൺചട്ടികൾക്കു പകരം പ്ലാസ്‌റ്റിക്ക് ചട്ടികൾ ഉപയോഗിക്കുക.
- ക്ലോറിൻ ബ്ലീച്ച് വെള്ളത്തിലിട്ട് മിശ്രിതം കൊണ്ട് കഴുകി പുതിയ ചെടിചട്ടികൾ സ്റ്റെറിലൈസ് ചെയ്യുക.
