വളരെ ചരിത്ര പ്രാധാന്യമുള്ള ടൂറിസ്‌റ്റ് കേന്ദ്രമാണ് സ്പെയിനിന്‍റെ തലസ്‌ഥാനമായ മാൻഡ്റിഡ് . ധാരാളം വിദ്യാഭ്യാസ സ്‌ഥാപനങ്ങൾ ഈ നഗരത്തിന്‍റെ പ്രത്യേകതയാണ്. ലോകത്തിലെ 7-ാം സ്‌ഥാനം അലങ്കരിക്കുന്ന മാൻഡ്റിഡ് കോളേജ് ഇൻസ്റ്റിറ്റ്യൂട്ട് ദ എംപ്രസാ (Institute the empresa)യിൽ അനേകായിരം വിദ്യാർത്ഥികൾ എം.ബി.എ. കോഴ്‌സ് ചെയ്യുന്നു.
21-ാം നൂറ്റാണ്ടു മുതൽ സ്പെയിനിന്‍റെ തലസ്ഥാന നഗരിയായി അറിയപ്പെടുന്ന മാൻഡ്റിഡ് ചരിത്രസ്‌മാരകങ്ങൾ അതേപടി കാത്തു സൂക്ഷിക്കുന്നുണ്ട്. പ്രഡോ, റെയ്ന സോഫിയ, 3 സൺ, ബോൺ മോട്ട്സ തുടങ്ങിയ മ്യൂസിയങ്ങൾ കലാ-ചരിത്ര പാരമ്പര്യം വിളംബരം ചെയ്യുന്നതാണ്. ലോക പ്രശസ്ത ചിത്രകാരന്മാരായ പാബ്ളോ പിക്കാസോ, സാൽവഡോർ ഡാലി, വാൻ ഗോഗ്, മെട്രോ, മോണ, ഗോയാ എന്നിവരുടെ കൃതികൾ ഇവിടെ സൂക്ഷിച്ചിട്ടുണ്ട്.
രാജകൊട്ടാരങ്ങളുടെ നഗരി
പള്ളികൾ, കത്തീഡ്രൽ, രാജകൊട്ടാരങ്ങൾ എന്നിവ ഈ നഗരത്തിന്‍റെ വേറിട്ട കാഴ്ചകൾ സമ്മാനിക്കുന്നു. ഗോത്തിക്ക്, റിനൈസെൻസ്, മുറിഷ് ശൈലിയിൽ പണിതുയർത്തിയ കെട്ടിട സമുച്ചയങ്ങൾ നഗരത്തിന്‍റെ സമ്യദ്ധി വിളിച്ചോതുന്നു. 9-ാം നൂറ്റാണ്ടിൽ ഉമ്മയ്ദ് വംശത്തിലെ അഞ്ചാമൻ അമീർ മുഹമ്മദ് ഒന്നാമൻ മാൻഡ്റിഡ് നഗരം പണികഴിപ്പിച്ചു. 11-ാം നൂറ്റാണ്ടുവരെ ഈ നഗരം അറബ് അധീനതയിലായിരുന്നു. അതിനുശേഷം റോമൻ രാജാവ് അൽഫോൻസ് നാലാമൻ നഗരം പിടിച്ചടക്കി. ഏകദേശം 200 വർഷങ്ങളോളം അറബ് അധീനതയിലായതിനാൽ ചരിത്ര സ്‌മാരകങ്ങളിൽ അറബ് വാസ‌ശൈലിയുടെ പ്രഭാവം കാണാം. റോമൻ അറബ് സങ്കരശൈലിയിൽ നിർമ്മിച്ച ഭവനങ്ങളും ധാരാളമുണ്ട്.
മാൻഡ്റിഡ് പോലെതന്നെ മറ്റൊരു പ്രമുഖ നഗരമാണ് ബാർസിലോണ. സമുദ്രത്താൽ ചുറ്റപ്പെട്ടു കിടക്കുന്ന ഈ നഗരം വ്യവസായത്തിനും ടൂറിസം വളർച്ചയ്ക്കും ഏറെ ഊന്നൽ നൽകുന്നു. 1992ലെ ഒളിമ്പിക്സ് അരങ്ങേറിയത് ഇവിടെയാണ്.
രമണീയം ഈ സമുദ്രതീരം
നൈസ്സർഗ്ഗിക സൗന്ദര്യത്തിന്‍റെ പര്യായമായ മെഡിറ്ററേനിയൻ കടൽത്തീരത്തു കൂടി പ്രകൃതിയുടെ രമണീയത നുകർന്നു സഞ്ചരിക്കാം. സാൻടാന്‍റർ വാലൻസിയ, കൊറൂണ, സെൻ സെബാസ്‌റ്റ്യൻ എന്നീ കേന്ദ്രങ്ങൾ ടൂറിസ്‌റ്റുകളെ മാടി വിളിക്കുന്നു. അലികാൻ, മലാഗാ, കാഡിംഗ് പാൽമാ, ഇബിറ്റ്സാ തീരങ്ങൾ അവിസ്മരണീയ വിരുന്നൊരുക്കും.
സ്പെയിനിന്‍റെ കിഴക്കുഭാഗത്ത് മെഡിറ്ററേനിയൻ തീരത്തുള്ള മണൽ നിറഞ്ഞ ചതുപ്പു പ്രദേശം മുന്തിരി, ഒലിവ് കൃഷിയുടെ പറുദീസയാണ്. മുന്തിരിയും ഒലിവുമൊക്കെ ഇവിടത്തുകാർക്ക് ഏറെ പ്രിയങ്കരവുമാണ്. മെഡിറ്ററേനിയൻ കടലിനോട് ഏറെ അടുത്തുകിടക്കുന്ന ദക്ഷിണ സ്പെയിനിൽ പല ഇനം കടൽ ജീവികളേയും പക്ഷികളേയും കാണാം.
ആഘോഷ നഗരി
തുകൽ കൊണ്ടു നിർമ്മിച്ച വസ്തുക്കളും ചെരിപ്പുമൊക്കെ ഇവിടെ ധാരാളമുണ്ട്. സ്പാനിഷ് ലെതറിന്‍റെ ഗുണമേന്മ ലോകപ്രശസ്തമാണ്. കൊത്തുപണികൾ ചെയ്ത ചെരിപ്പുകളാണ് സവിശേഷത. ലെതെർ കോട്ട്, ബെൽറ്റ്, പേഴ്‌സ് എന്നിവയ്ക്കും നല്ല ഡിമാന്‍റാണ്.
സന്തോഷവാന്മാരും സമാധാന പ്രിയരുമാണ് പൊതുവെ സ്പെയിൻ നിവാസികൾ. മതപരമായ ചടങ്ങുകളും ഉത്സവാഘോഷങ്ങളുമൊക്കെ സംസ്‌കാരത്തിന്‍റെ ഭാഗമാണ്. സ്പെയിനിലെ പ്രമുഖ നഗരങ്ങളിൽ മ്യൂസിക്, ഡാൻസ്, ഫിലിം, പ്ലേ ഫെസ്റ്റ‌ിവലുകൾ സംഘടിപ്പിക്കാറുണ്ട്. ലോകമെമ്പാടുമുള്ള കലാകാരന്മാരെ പങ്കെടുപ്പിച്ചു കൊണ്ടുള്ള ഈ ഉദ്യമം ജനപ്രിയമാണ്. അന്തർദ്ദേശീയ കലാപരി പാടികൾക്കും മേളകൾക്കും വേദിയൊരുക്കുന്നു മാൻഡ്റിഡ്, ബാർസിലോണ നഗരങ്ങൾ. ബുൾ ഫൈറ്റ് മിക്കവാറും എല്ലാ മേളകളുടെയും പ്രധാന ആകർഷണമാണ്.
കച്ചവടക്കാർ ഭൂരിഭാഗവും സ്പാനിഷ് ഭാഷയാണ് സംസാരിക്കുന്നത്. ഇംഗ്ലീഷ് സംസാരിക്കുന്നവരും വിരളമല്ല. ഇംഗ്ലീഷ് ഭാഷ വശമില്ലാത്തരോട് ആംഗ്യഭാഷയിൽ സഞ്ചാരികൾ വില പേശുന്നതും കാണാം.
നല്ല ഭക്ഷണം
ഇന്ത്യയിലെന്നതുപോലെ ഇവിടെയും ഓരോ പ്രദേശങ്ങളിലെയും ഭക്ഷ്യവിഭവങ്ങൾ വ്യത്യസ്ത‌മാണ്. വടക്കൻ, മെഡിറ്ററേനിയൻ, മെസിത, പടിഞ്ഞാറൻ രീതിയിൽ തയ്യാറാക്കിയ ഭക്ഷ്യമേള ടൂറിസ്റ്റുകൾക്കേറെ ഇഷ്ട്‌ടമാണ്. വടക്കൻ സ്പെയിനിൽ മഴ ശക്തമായതിനാൽ മാംസാഹാര പ്രിയരാണ് ഇവിടത്തുകാർ.
മെഡിറ്ററേനിയൻ ഭക്ഷണത്തിൽ ഗോതമ്പ്, ഒലിവ് എണ്ണ, വൈൻ എന്നിവ സുലഭമായി ഉപയോഗിക്കുന്നു. സ്വാദിഷ്ഠമായ വെജിറ്റേറിയൻ ഭക്ഷണമാണ് ഇവിടെ മുഖ്യം. തൈര്, പഴങ്ങൾ, വെണ്ണ എന്നിവയും ധാരാളം ഉപയോഗിക്കുന്നു.
ദക്ഷിണ പ്രദേശങ്ങളിൽ വെളുത്തുള്ളിയും വിനാഗിരിയുമൊക്കെ ചേർത്ത സീഫുഡ് ആണ് പ്രിയം. വൈൻ ഭക്ഷണത്തിന്‍റെ ഭാഗമാണ്. മുന്തിരിത്തോപ്പുകളുടെ സമ്പന്നതയാണ് രാജ ഭരണാധികാരികളെ വൈൻ പ്രിയരാക്കിയത്.
യാത്രാ മാർഗ്ഗം
സ്പെയിനിലേക്ക് നേരിട്ട് വിമാന സർവ്വീസില്ല. ലണ്ടൻ, ദുബായ് അല്ലെങ്കിൽ മറ്റേതെങ്കിലും യൂറോപ്യൻ നഗരത്തിൽ ഇറങ്ങിയതിനുശേഷം യാത്ര തുടരാം. ഏതു ബജറ്റിനനുസരിച്ചും ഹോട്ടൽ സൗകര്യമുണ്ട്. താമസവും ഭക്ഷണവും അടങ്ങിയ പാക്കേജ് ടൂർ സംവിധാനവുമുണ്ട്.
