മിക്സ‌്‌ഡ് ട്രയാങ്കിൾ
ചേരുവകൾ
ചോളമാവ് ഒരു കപ്പ്
മൈദ അര കപ്പ്
വേവിച്ച് ഉടച്ച ഗ്രീൻപീസ് ഒരു കപ്പ്
ഇഞ്ചി അരച്ചത് ഒരു ടേബിൾ സ്‌പൂൺ
അയമോദകം അര ടീസ്‌പൂൺ
സോഡ ഒരു നുള്ള്
എണ്ണ ആവശ്യത്തിന്
മുളകുപൊടി അര ടീസ്‌പൂൺ
സോസിന് ആവശ്യമായ ചേരുവകൾ
തക്കാളി നാലെണ്ണം
ഗരം മസാല ഒരു നുള്ള്
ഉപ്പ് ആവശ്യത്തിന്.
തയ്യാറാക്കുന്ന വിധം
എണ്ണയൊഴികെ മറ്റു ചേരുവകളെല്ലാം ചുടുവെള്ളത്തിൽ കുഴച്ചെടുത്ത് പത്തിരുപത് മിനിറ്റ് വയ്ക്കുക. പിന്നീടിത് വീണ്ടും കുഴച്ച ശേഷം രണ്ടായി പകുത്ത് ഉരുളകൾ തയ്യാറാക്കണം. ഇത് അര സെ.മീ. കനത്തിൽ പരത്തിയെടുക്കുക.
ഒരു തവയിൽ അല്പം എണ്ണയൊഴിച്ച് തിരിച്ചും മറിച്ചുമിട്ട് ചപ്പാത്തി ചുടുന്നപോലെ ചുട്ടെടുക്കണം. തണുക്കുമ്പോൾ ത്രികോണാകൃതിയിൽ മുറിച്ചെടുക്കാം. പിന്നീട് എണ്ണ ചൂടാക്കി ബ്രൗൺ നിറമാവുന്നതു വരെ വറുക്കുക. ചൂടോടെയോ തണുപ്പിച്ചോ ഫ്രഷ് ടൊമാറ്റോ സോസിനൊപ്പം സർവ്വ് ചെയ്യാം.
ഫ്രഷ് ടൊമാറ്റോ സോസ് തയ്യാറാക്കുന്നതിന് തക്കാളി അരച്ച് ഉപ്പും ഗരം മസാലയും ചേർത്ത് കട്ടിയാവുന്നതു വരെ പാകം ചെയ്യുക.
റൈസ് ടിക്കി
ചേരുവകൾ
വേവിച്ചുടച്ച ചോറ് രണ്ട് കപ്പ്
ഗോതമ്പുപൊടി രണ്ടു ടേബിൾ സ്‌പൂൺ
കടലപ്പൊടി രണ്ട് ടേബിൾ സ്‌പൂൺ
ഉപ്പ് ആവശ്യത്തിന്
മുളകു പൊടി അര ടീസ്‌പൂൺ.
തയ്യാറാക്കുന്ന വിധം
ചോറ്, ഗോതമ്പുപൊടി, കടലപ്പൊടി എന്നിവ യോജിപ്പിച്ച് ഉപ്പും മുളകും ചേർത്ത് നന്നായി കുഴയ്ക്കണം. അല്പം മിശ്രിതമെടുത്ത് ഇടയ്ക്ക് വെജ് / നോൺവെജ് ഫില്ലിംഗ് നിറച്ച് ഉരുളകൾ തയ്യാറാക്കി ഒന്നമർത്തി എടുക്കുക. ഒരു നോൺസ്റ്റിക് പാനിൽ എണ്ണയൊഴിച്ച് ചൂടാക്കി ഇവ ഓരോന്നായി ചുട്ടെടുക്കണം. സോസിനൊപ്പമോ, പൊദിന ചട്‌നിക്കൊപ്പമോ സർവ്വ് ചെയ്യാം.
ചൗവരി മിനി പൈ
ചേരുവകൾ
ചൗവരി ഒരു കപ്പ്
മൈദ ഒരു കപ്പ്
സോഡ ഒരു നുള്ള്
ഉപ്പ് ഒരു നുള്ള്
എണ്ണ ഒരു ടേബി ൾ സ്‌പൂൺ.
ഫില്ലിംഗിനുള്ള ചേരുവകൾ
കനം കുറച്ചരിഞ്ഞ ഉരുളക്കിഴങ്ങ് ഒന്ന്
തക്കാളി കനം കുറച്ചരിഞ്ഞത് ഒന്ന്
നീളത്തിൽ കനം കുറച്ചരിഞ്ഞ സവാള ഒന്ന്
നിലക്കടല രണ്ട് ടേബിൾ സ്‌പൂൺ
പച്ചമുളക് അരി ഞ്ഞത് രണ്ടെണ്ണം
മുളകുപൊടി അര ടീസ്‌പൂൺ
ഉപ്പ് ആവശ്യത്തിന്
മല്ലിയില അരിഞ്ഞത് ആവശ്യത്തിന്
എണ്ണ ഒരു ടേബിൾ സ്‌പൂൺ
കടുക് അര ടീസ്‌പൂൺ.
തയ്യാറാക്കുന്ന വിധം
ചൗവരി രണ്ടു മണിക്കൂർ നേരം വെള്ളത്തിൽ കുതിർക്കാനിടുക. ഇതിൽ പകുതിയോളം അരിപ്പയിൽ തന്നെ വയ്ക്കുക. ബാക്കിയുള്ള ചൗവരിയിൽ മൈദ, സോഡ, ഉപ്പ് എന്നിവയ്‌ക്കൊപ്പം എണ്ണയും ചേർത്ത് നന്നായി കുഴയ്ക്കുക. ഈ മാവ് നാലായി പകുത്തെടുത്ത് അര സെ.മി. കനത്തിൽ പരത്തിയെടുത്ത് ഓവനിൽ വച്ച് 180 ഡിഗ്രി സെന്‍റിഗ്രേഡിൽ പത്ത് മിനിറ്റ് ബേക്ക് ചെയ്യണം. എണ്ണ ചൂടാക്കിയ ശേഷം കടുക് പൊട്ടിച്ച് ഉരുളക്കിഴങ്ങും സവാളയുമിട്ട് ബ്രൗൺ നിറമാവുന്നതു വരെ വഴറ്റുക. ഇതിലേക്ക് തക്കാളിയും പച്ചമുളകും നിലക്കടലയുമിട്ട് വഴറ്റണം. അരിച്ചു വച്ചിരിക്കുന്ന ചൗവരിയിൽ ഉപ്പും മുളകുപൊടിയും ചേർത്ത് നന്നായി ഇളക്കുക. തീ അണച്ച് അഞ്ചുമിനിറ്റ് അടച്ചു വയ്ക്കണം. ഇത് പൈയിൽ നിറച്ച് മല്ലിയില കൊണ്ട് ഗാർണിഷ് ചെയ്‌ത്‌ സർവ്വ് ചെയ്യാം.
ചേന കബാബ്
ചേരുവകൾ
ചേന 500 ഗ്രാം
വേവിച്ച് ഉടച്ച ഉരുളക്കിഴങ്ങ് രണ്ടെണ്ണം
കടലമാവ് വറുത്തത് നാല് ടേബിൾ സ്‌പൂൺ
കടലപ്പരിപ്പ് വേവിച്ചത് അര കപ്പ്
പച്ചമുളക് കനം കുറച്ചരിഞ്ഞത് മൂന്നു നാലെണ്ണം
ഇഞ്ചി കനം കുറച്ചരിഞ്ഞത് ഒരു ടേബിൾ സ്‌പൂൺ
കായം രണ്ടു നുള്ള്
സവാള വട്ടത്തിൽ കനം കുറച്ചരിഞ്ഞത് ഒന്ന്
മുളകുപൊടി അര ടീസ്‌പൂൺ
ഉപ്പ് ആവശ്യത്തിന്
തയ്യാറാക്കുന്ന വിധം
ചേന നന്നായി കഴുകി വൃത്തിയാക്കി ചെറിയ കഷണങ്ങളാക്കി മുറിക്കുക. ഇതിൽ അല്പം ഉപ്പു പുരട്ടി അര മണിക്കൂർ വയ്ക്കണം. വീണ്ടും ഒന്നുകൂടി കഴുകി കുറച്ചു വെള്ളവും ഒഴിച്ച് കുക്കറിൽ വേവിച്ച് ഉടച്ചെടുക്കണം. ഇതിൽ ഉടച്ചെടുത്ത ഉരുളക്കിഴങ്ങ്, കടലമാവ്, ഉപ്പ്, കായം, മുളകുപൊടി എന്നിവയും ചേർത്ത് നന്നായി കുഴച്ചെടുക്കുക. അല്പം മിശ്രിതമെടുത്ത ശേഷം പരിപ്പും പച്ചമുളകും ഇഞ്ചിയും അതിൽ നിറയിക്കണം. ഉരുള തയ്യാറാക്കി ഒന്നമർത്തിയെടുക്കുക. ഇത് ഒരു നോൺ സ്‌റ്റിക് പാനിൽ തിരിച്ചും മറിച്ചുമിട്ട് വേവിക്കണം. സവാള സ്ലൈസോ, പൊദിനയില ചട്നിയോ ചേർത്ത് സർവ്വ ചെയ്യാം…
ചനാ മസാല ടാർട്ട്
ചേരുവകൾ
മൈദ ഒരു കപ്പ്
എണ്ണ ഒരു ടേബിൾ സ്‌പൂൺ
സോഡാപ്പൊടി ഒരു നുള്ള്
ഉപ്പ് ഒരു നുള്ള്
ഫില്ലിംഗിനുള്ള ചേരുവകൾ
ബ്രൗൺ കടല വേവിച്ചത് അര കപ്പ്
സവാള കനം കുറച്ചരിഞ്ഞത് ഒന്ന്
ഇഞ്ചി അരിഞ്ഞത് ആവശ്യത്തിന്
പച്ചമുളക് അരിഞ്ഞത് രണ്ടെണ്ണം
തക്കാളി അരിഞ്ഞത് ഒരെണ്ണം
എണ്ണ ഒരു ടേബിൾ സ്‌പൂൺ
ജീരകം കാൽ ടീസ്‌സ്പൂൺ
മാങ്ങാപ്പൊടി അര ടീസ്‌പൂൺ
തയ്യാറാക്കുന്ന വിധം
മൈദയിൽ സോഡാപ്പൊടിയിട്ട് ആവശ്യത്തിന് ഉപ്പും എണ്ണയും ചേർത്ത് കട്ടിയായി കുഴച്ചെടുക്കുക. എണ്ണ ചൂടാക്കിയതിൽ ജീരകമിട്ട് മൂപ്പിച്ച് സവാള, ഇഞ്ചി, പച്ചമുളക് എന്നിവയും ഇട്ട് വഴറ്റണം. ഇതിൽ തക്കാളി മുറിച്ചതും ഇടണം. പിന്നീട് കടലയും മാങ്ങാപ്പൊടിയും ചേർത്ത് വേവിക്കുക.
കുഴച്ചുവെച്ച മാവ് അര സെ.മീ. കനത്തിൽ പരത്തി ടാർട്ട് ടിന്നിൽ നിറയ്ക്കണം. കമ്പികൊണ്ട് കോർത്ത് ഓവനിൽ 180 ഡിഗ്രി സെന്‍റി ഗ്രേഡിൽ ബേക്ക് ചെയ്‌ത ശേഷം ടിന്നിൽ നിന്നെടുത്ത് തണുക്കാൻ വയ്ക്കുക. ഓരോ ടാർട്ടിനകത്തും ചനാ മസാല നിറച്ച് തക്കാളി കഷണങ്ങൾ കൊണ്ട് അലങ്കരിച്ച് സർവ്വ് ചെയ്യാം.
