മോഡേൺ വസ്ത്രധാരണം, വിലയേറിയ ആഭരണങ്ങൾ, ആകർഷണീയമായ സംസാരവും പെരുമാറ്റവും… ഒറ്റ നോട്ടത്തിലേ അറിയാം ഏതോ സമ്പന്ന ഗൃഹത്തിലെ പെൺകുട്ടിയാണെന്ന്. ആഡംബരകാറിൽ വന്നിറങ്ങിയ അവൾക്ക് ജ്വല്ലറിക്കാരുടെ വക ഉഗ്രൻ സ്വീകരണം.
അവൾ ആവശ്യപ്പെട്ടതനുസരിച്ച് സെയിൽസ്മാൻ പലതരം ഡിസൈനർ മാലകളും കമ്മലും മോതിരവുമൊക്കെ കാണിച്ചു കൊടുത്തു. ഏറെ നേരത്തെ തിരച്ചിലിനൊടുവിൽ ചെറിയൊരു മോതിരവും ഒരു ജോഡി കമ്മലും വാങ്ങി അവൾ സ്‌ഥലം കാലിയാക്കി
അല്പ സമയത്തിനുശേഷം ഷെൽഫിലെ ആഭരണങ്ങൾ പരിശോധിച്ചപ്പോഴാണ് രണ്ടു മാലയും കമ്മലുകളും നഷ്‌പ്പെട്ടുവെന്ന് സെയിൽസ്മാൻ കണ്ടുപിടിച്ചത്. ‘ഇങ്ങനെയും ആളുകളുണ്ടോ ലോകത്ത്’ എന്ന് മൂക്കത്ത് വിരൽ വെച്ച് നിന്നുപോയി അയാൾ.
മറ്റൊരു സംഭവം. കൊച്ചി നഗരം തന്നെ സ്‌ഥലം. ഒരു പ്രമുഖ ടെക്‌സ്‌റ്റൈൽ ഷോറൂമിൽ ഒരു പറ്റം ടീനേജേഴ്സ് ഷോപ്പിംഗിനെത്തി നഗരത്തിലെ ഒരു പ്രമുഖ വ്യക്തിയുടെ മകൾക്കൊപ്പമെത്തിയ അവരെ ആരും സംശയിച്ചതുമില്ല. പ്രമുഖന്‍റെ മകൾ രണ്ടു മൂന്നു വട്ടം ട്രയൽ റൂമിൽ ചെന്ന് ഡ്രസ്സ് തനിക്കിണങ്ങുന്നതാണോ അല്ലയോ എന്നു പരിശോധിക്കുന്നതിനിടയ്ക്ക് ഒരു കുട്ടുകാരി ആരുമറിയാതെ ഒന്നു രണ്ടു ഡ്രസ്സെടുത്ത് ബാഗിൽ തിരുകി. കടയുടമയെ കമ്പിളിപ്പിക്കാൻ സാധിച്ചല്ലോയെന്ന സന്തോഷമായിരുന്നു അവൾക്ക്. മോഷണം പിടിക്കപ്പെട്ടു.
പ്രതി ഹൈക്ലാസ് ഫാമിലിയിൽ നിന്നുള്ളവൾ. വെറുമൊരു ത്രില്ലിനുവേണ്ടി മോഷണം ശീലമാക്കിയവൾ. പിടിക്കപ്പെട്ടപ്പോൾ ചിരിച്ചു കൊണ്ട് ഒരു സോറിയും മോഷണ മുതലിന്‍റെ വിലയും നൽകി പ്രശ്നമൊതുക്കിത്തീർത്തു അവൾ.
കാരണമില്ലാതെ കൊച്ചു കൊച്ചു മോഷണങ്ങൾ നടത്തുന്ന ഒരു പ്രത്യേകതരം മനോരോഗികളുമുണ്ട് ഇക്കൂട്ടരിൽ. ഒരു പ്രമുഖ ബിസിനസ്സുകാരൻ കുടുംബസമേതം നഗരത്തിലെ ഒരു റെസ്‌റ്റോറന്‍റിലെത്തി. ഭക്ഷണത്തിന് ഓർഡർ നൽകുന്നതിനിടയ്ക്ക് ഭാര്യ ആരുമറിയാതെ ഒന്നു രണ്ടു സ്‌പൂണും ഫോർക്കും നാപ്കിനുമൊക്കെ മോഷ്‌ടിച്ച് പേഴ്സിലിട്ടു. ഭാര്യയുടെ ഈ ശീലത്തെക്കുറിച്ചറിയാവുന്ന ഭർത്താവ് വെയ്റ്ററോടു രഹസ്യമായി കാര്യം പറഞ്ഞ് മോഷണ വസ്‌തുക്കളുടെ വില കൂടി ബില്ലിൽ അഡ്‌ജസ്‌റ്റു ചെയ്‌തു. പിടിക്കപ്പെട്ടാൽ അപമാനിതരാവരുതല്ലോ. മുംബൈ പോലെ തിരക്കുള്ള നഗരങ്ങളിലാണ് ഇത്തരം സംഭവങ്ങൾ കൂടുതൽ അരങ്ങേറുന്നത്. സമ്പന്നഗൃഹങ്ങളിലെ സ്ത്രീകളിലാണ് ഇത്തരത്തിലുള്ള പ്രവണത കൂടുതൽ ‘ഇഞ്ചക്കാടൻ മത്തായി ആന്‍റ് സൺസ്’ എന്ന ചിത്രത്തിൽ ഉർവശി ഇങ്ങനെയൊരു മനോരോഗിയുടെ റോൾ മികവോടെ അഭിനയിച്ചു ഫലിപ്പിച്ചിട്ടുണ്ട്.
ഉടമകളുടെ സിസ്സഹായത
“ഇന്നിപ്പോൾ ഇത്തരം മോഷണങ്ങൾ സാധാരണമായിത്തീർന്നിരിക്കുന്നു. അതുകൊണ്ട് രഹസ്യ ക്യാമറയിലൂടെ ഞങ്ങൾ കസ്‌റ്റമേഴ്‌സിനെ നിരീക്ഷിക്കാറുണ്ട്. പക്ഷേ, എത്ര ശ്രദ്ധിച്ചാലും സമർത്ഥകളായ ചില സ്ത്രീകൾ എന്തെങ്കിലുമൊക്കെ ഒളിപ്പിച്ചു കടത്തും.” കൊച്ചിയിലെ ഒരു ജ്വല്ലറി ഉടമ അഭിപ്രായപ്പെടുന്നു.
ബ്യൂട്ടി സെന്‍റർ നടത്തുന്ന ഉമേഷ് വർമ്മയുടെ പ്രതികരണം ഇപ്രകാരമായിരുന്നു. “ഇത്തരക്കാർക്ക് പണത്തിനോ, സുഖസൗകര്യങ്ങൾക്കോ ഒരു കുറവും കാണില്ല. മോഷണം നടത്തി കടക്കാരനെ വിഡ്ഢ‌ിയാക്കിയല്ലോ എന്ന സന്തോഷമാകും ഇവർക്ക്. മിക്കവാറും ഇത്തരം കസ്‌റ്റമേഴ്‌സിനെ കാണുമ്പോഴേ മനസ്സിലാവും. അപ്പോൾ ഞങ്ങൾ അധികം ആഭരണങ്ങൾ ഡിസ്പ്ലേ ചെയ്യില്ല. കൂടുതൽ കെയർഫുൾ ആയിരിക്കുകയും ചെയ്യും.”
“ബില്ലിനൊപ്പം എക്സ്ട്രാ ബില്ല് അടിച്ചിരിക്കുന്നു എന്നു പറഞ്ഞു ബഹളം കൂട്ടുന്നവരോട് മാന്യമായി കാര്യം പറഞ്ഞു മനസ്സിലാക്കാം. അപ്പോൾ പലരും നിന്നു വിളറി വെളുക്കും. ബിൽ പെയ്മെന്‍റിന് തയ്യാറല്ലെങ്കിൽ മോഷണവസ്‌തു അവർ തിരികെ ഏൽപിക്കും. കളവ് മുതൽ മടക്കി വാങ്ങാൻ ഇതേ ഒരൊറ്റമൂലിയുള്ളൂ. കസ്‌റ്റമർ ഞങ്ങളുടെ കണ്ണ് വെട്ടിച്ച് കളവ് നടത്തിയെന്നറിഞ്ഞാൽ ബിൽ പേയ്മെന്‍റ് നടത്തുമ്പോൾ ഈ ദൃശ്യം അവരെ കാണിക്കാം.”
“ചില സാഹചര്യങ്ങളിൽ ഫുൾ ജ്വല്ലറി ബോക്സാവും കസ്‌റ്റമേഴ്സ‌ിനു മൂന്നിൽ ഡിസ്പ്ലേ ചെയ്യുക. അതു ശരിയായ നടപടിയല്ല. ആഭരണങ്ങൾ ഡിസ്പ്ലേ ചെയ്യുന്നതിനു മുമ്പും ശേഷവും വെയ്റ്റ് പരിശോധിക്കുന്നത് കസ്റ്റമേഴ്സിൽ മോഷണ പ്രവണതയ്ക്കുള്ള സാധ്യത കുറയ്ക്കും.” ആഭരണ വ്യാപാരി സഞ്ജയ അഭിപ്രായപ്പെടുന്നു.
സ്ത്രീകളിലെ പോക്കറ്റടി സ്റ്റൈലിലുള്ള മോഷണത്തെക്കുറിച്ച് മനോരോഗ വിദഗ്‌ധൻ ചന്ദ്ര കിരൺ ഇപ്രകാരം വിലയിരുത്തുന്നു. “ക്ലെപ്റ്റോമാനിയ” എന്ന മനോരോഗത്തിനടിപ്പെട്ട സ്ത്രീകളിൽ ഈ പ്രവണത കൂടുതലായി കണ്ടുവരുന്നു. എന്തെങ്കിലും വസ്തുക്കൾ കണ്ടാൽ അവ ഉടനെ മോഷ്ടിക്കണമെന്ന തീവ്രമായ ഇച്ഛ ഇത്തരക്കാരിൽ കാണും.”
“ക്ലെപ്റ്റോമാനിയ രോഗികൾ ചില പ്പോൾ നിസ്സാര വില മാത്രമുള്ള വസ്തുക്കളാവും എടുക്കുക. ഇത് വാസ്തവത്തിൽ മോഷണമല്ല.”
സൈക്യാട്രിസ്‌റ്റ് സോണിയയുടെ അഭിപ്രായത്തിൽ, “സമ്പന്ന സ്ത്രീകളിലാണ് ഈ മനോരോഗം കൂടുതൽ പ്രകടമായുള്ളത്. ഈ പ്രവണത അവർക്ക് ആത്‌മനിർവൃതി പകരും. വിജയിച്ച് എന്ന മനോഭാവമാവും പലർക്കും.”
സമൂഹ ദൃഷ്ടിയിൽ
ജീവിതത്തിൽ മടുപ്പും ഏകാന്തതയും അനുഭവിക്കുന്നവർ മറ്റുള്ളവരുടെ ശ്രദ്ധ ആകർഷിക്കാൻ വേണ്ടി ഇത്തരം മോഷണങ്ങളിലേയ്ക്ക് തിരിയുന്നുണ്ട്. ക്ലെപ്റ്റോമാനിയ രോഗികൾ സമൂഹത്തെക്കുറിച്ചോ നിയമത്തെക്കുറിച്ചോ ആശങ്കാകുലരാവുന്നില്ല. മുതിർന്നവരിലെ ഈ ദുഃശീലം കുട്ടികളും അനുകരിച്ചേക്കാം. തല മുറകൈ മാറിക്കിട്ടുന്ന ഈ ശീലം സമൂഹത്തെയും ദോഷകരമായി ബാധിക്കുന്നു.
പരിഹാരം
“കടയിൽ നിന്നും എന്തെങ്കിലും വസ്‌തു എടുത്തു കൊണ്ടു പോകുന്നത് മോഷ്ടിക്കണമെന്ന ഉദ്ദേശ്യത്തോടെയാവില്ല. ക്ലെപ്റ്റോമാനിയ എന്ന മനോരോഗത്തിനടിപ്പെട്ടവരാണിവരിൽ പലരും. ഇവരെ മനോരോഗചികിത്സ നൽകി സാധാരണ ജീവിതത്തിലേക്ക് മടക്കിക്കൊണ്ടുവരാം.”
മോഷ്ടിക്കണമെന്ന ഉദ്ദേശ്യത്തോടെ തന്നെ കടയിൽ നിന്ന് സാധങ്ങൾ എടുത്തുകൊണ്ടു പോകുന്നവരുമുണ്ട്. കൗൺസിലിംഗിലൂടെ ഇത്തരക്കാരുടെ ശീലം മാറ്റിയെടുക്കാൻ സാധിക്കും.
എന്തു കൊണ്ട്?
- ആത്മസംതൃപ്തിക്ക്, വിജയാഹ്ളാദത്തിന്.
- വിഷാദമോ, ബോറടിയോ മാറ്റാൻ.
- കഴിവു തെളിയിക്കാൻ
- ഈ പ്രവണത തടയാൻ മനഃശാസ്ത്രജ്‌ഞനെ സമീപിക്കാം.
- തെറ്റ് മനസ്സിലാക്കി സ്വയം മാറാം.
- ക്ലപ്റ്റോമാനിയ ബാധിച്ചവരോട് സമൂഹവും കുടുംബവും പുലർത്തുന്ന അവഗണന ഒഴിവാക്കുക.
- അമിതമായ ധനമോഹം പാടില്ല.
- സ്വന്തം സമ്പാദ്യം ചെലവഴിക്കാനുള്ള മടി മാറ്റുക.
- വിശ്വാസക്കുറവ് പാടില്ല.
എത്ര തരം?
- ക്ലപ്റ്റോമാനിയ എന്ന രോഗത്തിനടിപ്പെട്ടവർ വെറും രസത്തിനു വേണ്ടി മോഷണം നടത്തുന്നവരാണിവർ.
- മോഷ്ടിക്കണമെന്ന ഉദ്ദേശ്യത്തോടെ തന്നെ വിലപിടിപ്പേറിയതും പ്രയോജനമുള്ളതുമായ വസ്തുക്കൾ മോഷ്‌ടിക്കുന്നത്. ഇത് രോഗമല്ല, ശീലമാണ്.
വ്യാപാരികൾ അറിയാൻ
- ഹിഡൻ ക്യാമറയിലൂടെ രഹസ്യമായി നിരീക്ഷിക്കുക.
- പുതിയ വാച്ച്മാനെ നിയമിക്കുക.
- മോഷണവസ്തുവിനും കൂടി ബിൽ തയ്യാറാക്കുക.
- ഡിസ്പ്ലേ ബോക്‌സിൽ ആവശ്യത്തിനു മാത്രം ആഭരണങ്ങൾ വയ്ക്കുക. ജ്വല്ലറി ബോക്സ‌് വെയ്റ്റ് നോക്കിയ ശേഷം മാത്രം ഡിസ്പ്ലേ ചെയ്യുക.
- ഷോപ്പിംഗ് മാളുകളിൽ മാഗ്നെറ്റിക്. സിസ്റ്റം സ്‌ഥാപിക്കുക.
