കേരളത്തിന്‍റെ വിനോദസഞ്ചാര ഭൂപടത്തിൽ സുപ്രധാന സ്‌ഥാനമാണ് ഇക്കോ ടൂറിസം മേഖലയായ വാഗമണിന് ഇന്നുള്ളത്. കോട്ടയം, ഇടുക്കി ജില്ലകളെ തമ്മിൽ ബന്ധപ്പെടുത്തുന്ന അത്യാകർഷകമായ ഈ മലയോര പ്രദേശം സഞ്ചാരികളുടെ പറുദ്ദീസയാണ്. പുൽത്തകിടികൾ നിറഞ്ഞ കുന്നുകൾ, മലഞ്ചെരിവുകൾ, ഹെയർപിൻ വളവുകൾ, തേയിലത്തോട്ടങ്ങൾ, തടാകം തുടങ്ങി കണ്ണിനു കുളിർമയേകുന്ന ഏറെ കാഴ്‌ചകളുണ്ടിവിടെ. ഇവിടുത്തെ കാഴ്ചകൾ ഓരോന്നും നമ്മെ ഉത്സാഹഭരിതരാക്കും. അത്രയേറെ പ്രശാന്ത സുന്ദരമാണ് വാഗമൺ.
തങ്ങൾ മല, മുരുകൻ മല, കുരിശുമല എന്നീ മൂന്നു മലനിരകളുടെ സങ്കലനമായ വാഗമൺ കണ്ടിട്ടില്ലെങ്കിൽ കേരളത്തിലെ ഏറ്റവും സുന്ദരമായ ഭൂപ്രദേശം നിങ്ങൾ കണ്ടിട്ടില്ല എന്നാണർത്ഥം. വർഷം മുഴുവൻ വിനോദസഞ്ചാരികളുടെ പ്രവാഹമാണ് ഇവിടേക്ക്. മഴക്കാലത്ത് യാത്ര അല്‌പം ബുദ്ധിമുട്ടുള്ളതാണ് എന്നൊഴിച്ചാൽ മറ്റ് മാസങ്ങളിലെല്ലാം തന്നെ ഇവിടെ നല്ല കാലാവസ്‌ഥയാണ്.
തങ്ങൾ പാറ, കുരിശുമല, ആശ്രമം, മലഞ്ചെരിവ്, തേയിലത്തോട്ടം, പൈൻ-യൂക്കാലിപ്‌സ് തോട്ടം, ഇൻഡോ- സ്വിസ് പ്രൊജക്‌ട്, തടാകം എന്നിവയാണ് ഇവിടുത്തെ പ്രധാന കാഴ്ചകൾ. പ്രത്യേക ജനുസ്സിൽപ്പെട്ട ചെറുതും വലുതുമായ നിരവധി സസ്‌തനികളും പക്ഷികളും ശലഭങ്ങളും വാഗമണിലുണ്ട്.
ലൊക്കേഷൻ
സമുദ്രനിരപ്പിൽ നിന്ന് 1100 അടി ഉയരത്തിലാണ് ഈ ഹിൽ സ്‌റ്റേഷൻ. കോട്ടയം, ഇടുക്കി ജില്ലകളുമായി ബന്ധപ്പെട്ട് കിടക്കുന്ന പ്രദേശമാണിത്. കൊച്ചിയിൽ നിന്നും ഏകദേശം 100 കിലോമീറ്റർ അകലമുണ്ട്. ട്രെയിൻ വഴി വരുമ്പോൾ കോട്ടയത്ത് ഇറങ്ങി റോഡ് മാർഗ്ഗം 64 കിലോമീറ്റർ സഞ്ചരിച്ചാൽ വാഗമണിലെത്താം. കുമരകം പക്ഷി സങ്കേതം, മൂന്നാർ, ഇടുക്കി എന്നിവിടങ്ങളിൽ നിന്ന് ഇവിടേക്ക് അധികം ദൂരമില്ല. 10 മുതൽ
23 ഡിഗ്രി സെന്‍റിഗ്രേഡാണ് ഇവിടുത്തെ താപനില.
മലയോരപാത
വളവുകളും തിരിവുകളും നിറഞ്ഞ മലഞ്ചെരിവുകളിലൂടെയുള്ള യാത്ര സഞ്ചാരികളെ ആകർഷിക്കാതിരിക്കില്ല. ചെങ്കുത്തായ മലനിരയിൽ നിന്നും വളരെ ആഴത്തിലേക്കുള്ള കാഴ്‌ച അനുഭൂതി പകരുന്നതാണ്. പലപ്പോഴും ഇവിടെ മഞ്ഞു മൂടിവഴി കാണാൻ കഴിയാതെ ആകും. റോഡിന്‍റെ വശങ്ങളിൽ വാഹനം പാർക്ക് ചെയ്‌ത് കാഴ്ചകൾ വീക്ഷിക്കുന്ന സംഘങ്ങളെയും മനോഹര ദൃശ്യങ്ങൾ ക്യാമറയിൽ പകർത്താൻ ഉത്സാഹിക്കുന്ന സഞ്ചാരികളേയും യാത്രയിലുടനീളം കാണാം. സുഹൃത്തുക്കൾക്കും സഹപ്രവർത്തകർക്കും കുടുംബാംഗങ്ങൾക്കുമൊപ്പം ഒരു അടിച്ചുപൊളി യാത്രക്ക് പറ്റിയ പ്രദേശം തന്നെ.
പച്ചപ്പിന്‍റെ താഴ്വര
വാഗമണിനെ മലനിരയിലെ വിസ്‌മയം എന്നു വിശേഷിപ്പിക്കാം. ഭൂവിശാലതയിൽ പച്ചവിരിച്ച് നിൽക്കുന്ന തേയിലത്തോട്ടങ്ങൾ ഇവിടത്തെ പ്രധാന കാഴ്‌ചയാണ്. കൃഷിയിടങ്ങളും പൈൻമരങ്ങളും യൂക്കാലിപ്‌സ് മരങ്ങളും നിറഞ്ഞ പ്രദേശത്ത് കൂടിയുള്ള നടത്തം ഒഴിവാക്കാൻ കഴിയില്ല. കുളിർക്കാറ്റ് നിങ്ങൾക്ക് കൂട്ടുതരും. നടന്നു ക്ഷീണിക്കുമ്പോൾ ഇളം പുല്ലുനിറഞ്ഞ കുന്നിൻ ചെരിവിൽ വിശ്രമിക്കാം. പ്രകൃതിയുടെ വിസ്‌മയം മനുഷ്യന്‍റെ ആയുസ് കൂട്ടുന്ന അനുഭവമാകുന്നു.
ആരോഗ്യപരിപാലനം
ഹെൽത്ത് ടൂറിസം മേഖലയിലും വാഗമണിന് പ്രത്യേകം സ്‌ഥാനമുണ്ട്. ഇവിടുത്തെ പ്രകൃതി ചികിത്സാകേന്ദ്രങ്ങളും മെഡിക്കൽ സെന്‍ററുകളും യോഗ-ധ്യാന കേന്ദ്രങ്ങളും സഞ്ചാരികൾക്ക് ആശ്വാസമാണ്. കുളിർമ്മ പകരുന്ന അന്തരീക്ഷത്തിൽ മനസ്സും ശരീരവും സുസജ്‌ജമാക്കുകയെന്ന ലക്ഷ്യം ഇവിടെ യാഥാർത്ഥ്യമാക്കാം.
തടാകം
വേനലിലും നിറഞ്ഞുനിൽക്കുന്ന മനോഹരമായ ഒരു തടാകവും ഇവിടെ ഉണ്ട്. തടാകത്തിനു ചുറ്റും സ്‌റ്റെപ്പുകൾ വെട്ടിത്തിരിച്ചിട്ടുണ്ട്. ഇതൊരു വാക് വേ ആയി ഉപയോഗിക്കുന്നു. മഴക്കാലത്താണ്‌ വാഗമണിലേക്കുള്ള യാത്രയെങ്കിൽ വഴിയിൽ ചെറിയ വെള്ളച്ചാട്ടങ്ങളും കാണാം.
തങ്ങൾ പാറ
പ്രത്യേക രൂപത്തോടു കൂടിയ ഒരു മലയാണിത്. വാഗമണിലെത്തുന്നവർ ഇവിടം സന്ദർശിക്കാതെ മടങ്ങിയാൽ അതൊരു നഷ്‌ടമാകും. കിലോമീറ്ററോളം നടന്ന് ഇവിടേക്കുള്ള യാത്ര ആനന്ദകരമാണ്. തങ്ങൾ പാറയിൽ നിന്ന് നോക്കുമ്പോൾ കുന്നുകളും താഴ്‌വരകളും ഒരു രേഖാചിത്രം പോലെ മനോഹരമായി കാണാം. വാഗമണിലെ മായാക്കാഴ്‌ചകളിൽ ഒന്നായി സഞ്ചാരികളുടെ മനസ്സിലിടം നേടുകയും ചെയ്യും.
കുരിശുമല
വാഗമണിലെ മറ്റൊരു പ്രധാന കേന്ദ്രമാണ് കുരിശുമല. ഇവിടുത്തെ ആശ്രമം പേരുകേട്ടതാണ്. പ്രാർത്ഥന, പഠനം, ജോലി എന്നിവയിലൂടെ ഇവിടെ വസിക്കുന്നവർ മാനസികവും ശാരീരികവുമായ ഉന്മേഷം നേടുന്നു. പുലർച്ചെ നാലുമണിക്ക് ആശ്രമം ഉണരും. ആധുനിക ജീവിതത്തിന്‍റെ പിരിമുറുക്കങ്ങൾ അകറ്റാൻ നിരവധി പേർ ദിനംപ്രതി ഇവിടെ എത്തുന്നു.
പാലിന്‍റെയും തേനിന്‍റെയും പ്രധാന ഉറവിടം കൂടിയാണ് കുരിശുമല. മലനിരയിൽ തേനിന്‍റെ വലിയൊരു ശേഖരം തന്നെയുണ്ടെന്ന് പറയാം. കൂടാതെ പശു പരിപാലനകേന്ദ്രവും സ്ഥിതി ചെയ്യുന്നതിനാൽ പാലിനാൽ സമ്പന്നമാണ് വാഗമൺ. ഇവിടെ നിന്നും 1500 ലിറ്ററിലധികം പാൽ ദിവസവും ശേഖരിക്കുന്നുണ്ട്. കേരളത്തിലെ ഏറ്റവും വലിയ കന്നുകാലി പ്രജനന കേന്ദ്രവും ഇവിടെയാണ്. നൂറിലധികം കുടുംബങ്ങൾ പശു പരിപാലനവുമായി ബന്ധപ്പെട്ട് പ്രവർത്തിക്കുന്നു. മലമുകളിലെ ക്ഷീരവിപ്ലവം!
സൗകര്യങ്ങൾ
നിരവധി കുടുംബങ്ങൾ അധിവാസിക്കുന്ന വാഗമണിൽ ആവശ്യമായ ജീവിതസൗകര്യങ്ങളെല്ലാം ഉണ്ട്. വിവിധ വ്യാപാര സ്ഥാപനങ്ങളും വിദ്യാലയങ്ങളും ഇവിടെ സ്ഥിതി ചെയ്യുന്നു. സഞ്ചാരികൾക്കും തൊഴിലാളികൾക്കുമായി ഭക്ഷണശാലകളും ഒരുക്കിയിട്ടുണ്ട്. താമസത്തിന് ഹോം സ്റ്റേകളും റിസോർട്ടുകളും ടൂറിസ്റ്റ് ടാക്സി സൗകര്യങ്ങളും ലഭ്യമാണ്.
സാഹസികത ഇഷ്ടപ്പെടുന്നവരുടെ പ്രിയ സ്ഥലമാണിത്. ഗ്ലൈഡിംഗ്, ട്രക്കിംഗ് തുടങ്ങി നിരവധി അഡ്വഞ്ചറസ് സ്പോർട്സിനങ്ങളും അവിടെ നടക്കാറുണ്ട്. 1100 മീറ്ററോളം ഉയരത്തിലുള്ള മലനിരകളിലാണ് ട്രക്കിംഗ് പരിശീലനം നടത്തുന്നത്. ക്യാമ്പടിച്ച് പരിശീലനം നടത്താനുള്ള സൗകര്യവും ഇവിടുണ്ട്.
