ചോദ്യം: എന്‍റെ മുഖത്തിന് നല്ല നിറം ഉണ്ടെങ്കിലും കഴുത്ത് കറുത്താണിരിക്കുന്നത്. എന്‍റെ കഴുത്തിന്‍റെ നിറം മെച്ചപ്പെടുത്താൻ ഞാൻ എന്തുചെയ്യണം?
ഉത്തരം: കഴുത്തിന്‍റെ നിറം മെച്ചപ്പെടുത്താൻ, നിങ്ങൾക്ക് ഇനിപ്പറയുന്ന കാര്യങ്ങൾ പരീക്ഷിക്കാം- കറ്റാർ വാഴ ജെൽ കഴുത്തിൽ പുരട്ടുന്നത് ചർമ്മത്തിന് ഈർപ്പം നൽകുകയും നിറം മെച്ചപ്പെടുത്തുകയും ചെയ്യും. വെളിച്ചെണ്ണയിൽ തേൻ കലർത്തി പേസ്റ്റ് രൂപത്തിലാക്കി കഴുത്തിൽ പുരട്ടുക. 20-30 മിനിറ്റിനു ശേഷം കഴുകുക.
ചെറുപയർ മാവിൽ അൽപം തൈര്, ഒരു നുള്ള് മഞ്ഞൾ, അൽപം ചിയ സീഡ് കുതിർത്തത്, അര സ്പൂൺ ഒലിവ് ഓയിൽ എന്നിവ മിക്‌സ് ചെയ്ത് കഴുത്തിൽ മൃദുവായി മസാജ് ചെയ്യുക. 20 മിനിറ്റ് കഴിഞ്ഞു കഴുകുക. ഇത് ചർമ്മത്തിന്‍റെ നിറം മെച്ചപ്പെടുത്താൻ സഹായിക്കും. ചെറുനാരങ്ങാനീരും തേനും മിക്‌സ് ചെയ്ത് ഉണ്ടാക്കിയ മിശ്രിതം കഴുത്തിൽ പുരട്ടി അൽപസമയം വെയ്ക്കുക. എന്നിട്ട് കഴുകുക.
പപ്പായ മിക്സിയിൽ അടിച്ചെടുത്ത് അതിൽ അൽപം മഞ്ഞൾ ചേർക്കുക. ഈ മാസ്ക് കഴുത്തിൽ പുരട്ടി 15-20 മിനിറ്റിനു ശേഷം കഴുകുക. ഇത് പതിവായി ചെയ്യുകയായെങ്കിൽ കഴുത്തിന്‍റെ നിറം മെച്ചപ്പെടുത്താൻ കഴിയും. ശരിയായ ഫലങ്ങൾ ലഭിക്കുന്നതിന് ഈ പ്രതിവിധികൾ പതിവായി തുടരേണ്ടത് പ്രധാനനമാണ്.
ചോദ്യം: എന്‍റെ പുരികങ്ങൾക്ക് കട്ടി കൂടുതലാണ്. ത്രെഡ് ചെയ്യുമ്പോൾ വല്ലാത്ത വേദന അനുഭവപ്പെടുന്നു. ത്രെഡ് ചെയ്യാതിരിക്കാനും കഴിയില്ല. എന്താണ് ചെയ്യേണ്ടതെന്ന് നിർദ്ദേശിക്കാമോ?
ഉത്തരം: പുരികങ്ങൾ ത്രെഡ് ചെയ്യുന്നതിന് മുമ്പായി നിങ്ങളുടെ പുരികങ്ങളിൽ ഐസ് മസ്സാജ് ചെയ്യുക. ഇതുമൂലം ആ ഭാഗത്ത് അൽപ്പം മരവിപ്പ് അനുഭവപ്പെടുകയും വേദന ഉണ്ടാകാതിരിക്കുകയും ചെയ്യും. ത്രെഡ് നനയ്ക്കുന്നത് വേദന കുറയ്ക്കും. ത്രെഡിംഗ് സമയത്ത് ചർമ്മം ശരിയായി വലിച്ചുപിടിക്കുകയാണെങ്കിൽ വേദന കുറയും. മറ്റൊന്ന്, ലേസർ ഉപയോഗിച്ച് പുരികങ്ങൾക്ക് ശാശ്വതമായ ആകൃതി നൽകാനും കഴിയും.
ചോദ്യം: മുടി നീട്ടി വളർത്തണമെന്നാണ് എന്‍റെ ആഗ്രഹം. എണ്ണ പുരട്ടുന്നത് മുടിയുടെ നീളം കൂട്ടാൻ സഹായിക്കുമോ? ഇതല്ലാതെ മുടിയുടെ നീളം കൂട്ടാൻ മറ്റെന്താണ് ചെയ്യേണ്ടത്?
ഉത്തരം: തേങ്ങ, ബദാം അല്ലെങ്കിൽ ഒലിവ് ഓയിൽ എന്നിവ മുടിയിൽ പുരട്ടി മസാജ് ചെയ്യുന്നത് മുടിയുടെ നീളം കൂട്ടാൻ സഹായിക്കും. മസാജ് ചെയ്യുന്നത് രക്തചംക്രമണം വർദ്ധിപ്പിക്കും. ഒപ്പം പോഷകങ്ങൾ അടങ്ങിയ ഭക്ഷണം കഴിക്കുന്നതിലൂടെ മുടിയ്ക്ക് കരുത്തും പകരും. അതിന് പ്രോട്ടീനും വിറ്റാമിനുകളും ധാതുക്കളും അടങ്ങിയ സമീകൃതാഹാരവും പ്രധാനമാണ്. അതുകൊണ്ട് ഭക്ഷണത്തിലെ പ്രോട്ടീന്‍റെ അളവ് കൂടുന്നത് മുടിക്ക് നീളം കൂട്ടും. ഇതിനായി പ്രോട്ടീൻ സമ്പന്നമായ ചിക്കൻ, മുട്ട, കിഡ്നി ബീൻസ്, സോയാബീൻ, മുളപ്പിച്ച പയർ വർഗ്ഗങ്ങൾ എന്നിവ കഴിക്കാം. ഇവയെല്ലാം മുടിയുടെ നീളം കൂട്ടാൻ സഹായിക്കുന്നു. ആവശ്യത്തിന് വെള്ളം കുടിക്കുക,
ചിട്ടയായ വ്യായാമം, ഗാഢമായ ഉറക്കം എന്നിവയും മുടിയുടെ ആരോഗ്യം മെച്ചപ്പെടുത്താൻ സഹായിക്കും. മുടിയുടെ അറ്റം പിളരുന്നത് തടയാൻ പതിവായി ട്രിം ചെയ്യേണ്ടതും പ്രധാനമാണ്. ഇതുകൂടാതെ, ഹീറ്റ് സ്റ്റൈലിംഗ് ടൂളുകളുടെ ഉപയോഗം കുറയ്ക്കുകയും ടൈറ്റ് ഹെയർസ്റ്റൈലുകൾ ഒഴിവാക്കുകയും ചെയ്യുന്നത് മുടിയെ കേടുപാടുകളിൽ നിന്ന് സംരക്ഷിക്കാൻ സഹായിക്കും.
ചോദ്യം: എന്‍റെ പുരികം ത്രെഡ് ചെയ്തതോടെ നേർത്തു പോയി. ഇപ്പോൾ കനംകുറഞ്ഞിരിക്കുന്നു. ഒരു പുരികം കനം കുറഞ്ഞതും ഒന്ന് കട്ടിയുള്ളതുമാണ്. ഇപ്പോൾ പുരികത്തിലെ രോമം പോലും വളരാത്തതിനാൽ എന്ത് ചെയ്യണമെന്ന് അറിയാത്ത അവസ്ഥയാണ്. ഇതിന് എന്താണ് ചെയ്യേണ്ടത്?
ഉത്തരം: പുരികങ്ങൾക്ക് രോമവളർച്ച നിലയ്‌ക്കുമ്പോൾ അവ വളർത്താൻ വലിയ പ്രയാസമാണ്. ഇതിനായി സ്ഥിരമായി മേക്കപ്പിന്‍റെ സഹായം തേടാം. ഐ ബ്രോ പെൻസിൽ ഉപയോഗിച്ച് പുരികങ്ങൾ ഷേപ്പ് ചെയ്യാം. ഒരേ ആകൃതിയിൽ ആവുകയും ചെയ്യും. ഇതോടെ നിങ്ങളുടെ പുരികങ്ങൾ ഏതാനും മിനിറ്റുകൾക്കുള്ളിൽ വളരെ മനോഹരമാകും. മറ്റൊന്ന് പെർമനെന്‍റ് ഐ ബ്രോ ഫില്ലിംഗ് ആണ്. ഇത് വളരെ സുരക്ഷിതമായ സാങ്കേതിക വിദ്യയാണ്, കാരണം ഇതിൽ ഉപയോഗിക്കുന്ന മെറ്റീരിയൽ ഇറക്കുമതി ചെയ്തതും സർക്കാർ അംഗീകരിച്ചതുമാണ്. വൈദഗ്ധ്യം നേടിയവരാണ് ഇത് ചെയ്യുന്നതെന്ന് ഉറപ്പു വരുത്തണം. അല്ലാത്തപക്ഷം പുരികങ്ങൾക്ക് എന്നെന്നേക്കുമായി കേടുപാടുകൾ സംഭവിച്ചേക്കാം. അത് ചെയ്യുന്നയാൾ വിദഗ്ധനല്ലെങ്കിൽ, ചിലപ്പോൾ പുരികങ്ങളുടെ ആകൃതിയും വ്യത്യസ്തമായിരിക്കും. ശുചിത്വവും പ്രധാനനമാണ്. അതുപോലെ ഉപയോഗിക്കുന്ന സൂചി പുതിയതായിരിക്കണം. അത് അണുബാധ ഉണ്ടാകുന്നത് തടയും. നിങ്ങളുടെ മുടിയുമായോ പുരികവുമായോ പൊരുത്തപ്പെടുന്ന നിറം ശ്രദ്ധാപൂർവ്വം തിരഞ്ഞെടുക്കുക.
ചോദ്യം: കൈമുട്ടുകൾ ശരീരത്തിന്‍റെ മറ്റ് ഭാഗങ്ങളെക്കാൾ ഇരുണ്ടതായി കാണപ്പെടുന്നതാണ് എന്‍റെ പ്രശ്നം. ഇത് വളരെ അഭംഗിയായി തോന്നുന്നു. ഇത് മാറി കിട്ടാൻ എന്തെങ്കിലും വഴിയുണ്ടോ?
ഉത്തരം: നിങ്ങളുടെ കൈമുട്ടിന്‍റെ നിറം ലഘൂകരിക്കാൻ, ആദ്യം അവയെ ബ്ലീച്ച് ചെയ്യുകയാണ് വേണ്ടത്. ദിവസവും അര നാരങ്ങയുടെ നീര് എടുത്ത് അതിൽ ഉപ്പ് ചേർക്കുക. ഇനി ഇതുപയോഗിച്ച് കൈമുട്ടുകളുകളിൽ പതുക്കെ തടവുക. കുറച്ച് സമയത്തിന് ശേഷം കഴുകി അവിടെ മോയ്സ്ചറൈസിംഗ് ക്രീം പുരട്ടുക. ഇത് പതിവായി ചെയ്യുകയാണെങ്കിൽ 15- 20 ദിവസം കൊണ്ട് കൈമുട്ടിന്‍റെ നിറം മെച്ചപ്പെടും.
തക്കാളി പകുതി മുറിച്ചതു പഞ്ചസാരയുടെ നേർത്ത് തരികളിൽ മുക്കിയെടുത്തു അത് കൊണ്ട് കൈമുട്ടുകളിൽ ഉരസുക. ഏതാനും മിനിട്ടുകൾക്ക് ശേഷം കഴുകി കളഞ്ഞു ക്രീം പുരട്ടുക. അപ്രകാരം കാപ്പിപൊടിയും തേനും ചേർത്ത മിശ്രിതത്തിൽ തക്കാളി കഷ്ണം മുക്കി കൈമുട്ടുകളിൽ ഉരസുന്നതും ആ ഭാഗത്തെ കറുപ്പും തഴമ്പും മാറികിട്ടാൻ സഹായിക്കും. എന്നാൽ കൈകളിൽ ഇപ്പോഴും മോയ്സചറൈസിംഗ് ക്രീം പുരട്ടാൻ മറക്കരുത്.
ഇത് കൊണ്ടും പ്രശ്നം പരിഹരിക്കപ്പെട്ടില്ലെങ്കിൽ കെമിക്കൽ പീൽ നടത്താം, അതുവഴി ചർമ്മത്തിന്‍റെ ഒരു പാളി നീക്കം ചെയ്യുകയും ഉള്ളിൽ നിന്ന് പുതുചർമ്മം പ്രത്യക്ഷപ്പെടാൻ തുടങ്ങുകയും ചെയ്യും. എന്നാൽ ഇതിൽ വൈദഗ്ധ്യം നേടിയവരുടെ മേൽനോട്ടത്തിൽ കെമിക്കൽ പീൽ ചെയ്യേണ്ടത് പ്രധാനമാണ്.
ചോദ്യം: എനിക്ക് 24 വയസ്സാണ്. കൈകളിൽ മെഹന്ദി അണിയാൻ എനിക്കിഷ്ടമാണ്. പക്ഷേ എന്‍റെ കൈകളിൽ മെഹന്ദി ഉണങ്ങി ഇളകി വരാൻ തുടങ്ങുമ്പോൾ അതിന്‍റെ ചർമ്മത്തിൽ അതിന്‍റെ മോശം ഫലം കണ്ടു തുടങ്ങും. ചർമ്മം വരണ്ടു പൊട്ടും. ഞാൻ എന്താണ് ചെയ്യേണ്ടത്?
ഉത്തരം: വിപണിയിൽ നിന്ന് ലഭിക്കുന്ന മെഹന്ദിയിൽ PPD, Diamine എന്നീ രാസവസ്തുക്കൾ അടങ്ങിയിട്ടുണ്ട്, ഇത് ചർമ്മത്തെ വരണ്ടതാക്കുകയും എരിച്ചിലുണ്ടാക്കുന്നതായും തോന്നും. ഒപ്പം ചൊറിച്ചിൽ, വീക്കം എന്നിവയ്ക്കും കാരണമാകും. മെഹന്ദിയുടെ നിറം ഇരുണ്ടതാക്കാൻ വേണ്ടിയാണ് രാസവസ്തുക്കൾ ചേർക്കുന്നത്. അതിനാൽ പ്രകൃതിദത്തമായ മെഹന്ദി മാത്രം ഉപയോഗിക്കാൻ ശ്രദ്ധിക്കുക, ഉപയോഗിക്കുന്നതിന് മുമ്പ്, പായ്ക്കിൽ രേഖപ്പെടുത്തിയിട്ടുള്ള അതിലുള്ള ചേരുവകളെക്കുറിച്ചുള്ള വിവരണങ്ങൾ വായിക്കുക. മെഹന്ദി പുരട്ടിയ ശേഷം കൈകളിൽ വരൾച്ച ഉണ്ടാകുന്നുവെങ്കിൽ വെർജിൻ വെളിച്ചെണ്ണ പുരട്ടി നന്നായി മസാജ് ചെയ്യുക.
ചോദ്യം: എനിക്ക് 18 വയസ്സുണ്ട്. എന്‍റെ മുടി വളരെ എണ്ണമയമുള്ളതാണ്. ഷാംപൂ ചെയ്തു പിറ്റേ ദിവസം നോക്കുമ്പോൾ മുടിയിൽ എണ്ണമയമുള്ളതായി തോന്നും. ഷാംപൂ ചെയ്യുന്നതിന് മുമ്പ് ഞാൻ വെളിച്ചെണ്ണ മുടിയിൽ പുരട്ടാറുണ്ടായിരുന്നു. ഞാൻ എണ്ണ പുരട്ടേണ്ടതുണ്ടോ?
ഉത്തരം: ഷാംപൂ നന്നായി ചെയ്തു മുടിയിൽ നിന്ന് ശരിയായ രീതിയിൽ എണ്ണ നീക്കം ചെയ്യാത്തതാണ് നിങ്ങളുടെ പ്രശ്നത്തിന് കാരണം. മുടിയുടെ പോഷണത്തിനായി എണ്ണയ്ക്ക് പകരം ഹെയർ ടോണിക്ക് പുരട്ടുക. ഇതോടെ മുടി ആരോഗ്യമുള്ളതായിരിക്കുകയും എണ്ണ നിയന്ത്രണത്തിലാവുകയും ചെയ്യും. എണ്ണ നിയന്ത്രിക്കാൻ, ഷാംപൂവിൽ ഏതാനും തുള്ളി നാരങ്ങാനീരും കൂടി ചേർത്ത് ഉപയോഗിക്കുക. മുടി കഴുകിയ ശേഷം, തലയോട്ടിയിൽ നിന്ന് 2-3 ഇഞ്ച് വിട്ട് കണ്ടീഷണർ പുരട്ടുക.
