ഐസിപിഎ ഹെൽത്ത് പ്രൊഡക്ട്‌സ് ലിമിറ്റഡ് എന്ന കമ്പനിയുടെ ഉടമയാണ് 45 കാരിയായ ആഭ ദമാനി. ആരോഗ്യ രംഗത്ത് അന്താരാഷ്ട്ര തലത്തിൽ ശ്രദ്ധിക്കപ്പെട്ട സ്ഥാപനം ആണ് ഐസിപിഎ. 50 വർഷം മുമ്പ് ആഭയുടെ പിതാവ് (ഫാർമസിസ്റ്റായിരുന്നു) ആരംഭിച്ച സ്ഥാപനം ആണിത്. ഗുജറാത്തിലെ അങ്കലേശ്വറിൽ സ്ഥാപിതമായ ഈ കമ്പനിയെ ആഭ ഏറ്റെടുത്ത് 22 വർഷം മുമ്പാണ്. കമ്പനിയെ അവർ പുതിയ ഉയരങ്ങളിലെത്തിക്കുകയും ചെയ്തു. ആഭ ദമാനിയുടെ ഭർത്താവ് ബിസിനസുകാരനാണ്, അവർക്ക് 9 വയസ്സുള്ള മകനുമുണ്ട്.
ഡെന്‍റൽ, ഡെർമ, ഇഎൻടി, ഹെർബൽ ഉൽപ്പന്നങ്ങളിൽ വൈദഗ്ദ്ധ്യം നേടിയ സ്ഥാപനം ആണ് ഐസിപിഎ. ദന്ത ഡോക്ടർമാർ, ഓങ്കോളജിസ്റ്റുകൾ, ഇഎൻടി സ്പെഷ്യലിസ്റ്റുകൾ, ഡിയോന്‍റോളജിസ്റ്റുകൾ എന്നിവർക്കിടയിൽ ഈ ഉൽപ്പന്നങ്ങൾ പ്രത്യേകിച്ചും ജനപ്രിയമാണ്. പോസ്റ്റ് കീമോ ഓറൽ അണുബാധ ഒഴിവാക്കാൻ ഓങ്കോളജിസ്റ്റുകളും റഫർ ചെയ്യുന്നു.
ആഭ കമ്പനിയിൽ ചേർന്നതിന് ശേഷം കമ്പനിയുടെ വിറ്റുവരവ് 10 മടങ്ങ് വർദ്ധിച്ചു. അവർ ഒരു പുതിയ നിർമ്മാണ യൂണിറ്റ് നിർമ്മിച്ചു. ഈ പ്ലാന്‍റ് നിരവധി അന്താരാഷ്ട്ര ഏജൻസികൾ അംഗീകരിച്ചു, തുടർന്ന് കമ്പനി ആഗോള വിപണിയിൽ പ്രവേശിച്ചു. ഇന്ന് ICPA അതിന്‍റെ ഉൽപ്പന്നങ്ങൾ ഓസ്‌ട്രേലിയ, യുകെ, മിഡിൽ ഈസ്റ്റ്, ആഫ്രിക്ക സൗത്ത് ഈസ്റ്റ് എന്നിവയുൾപ്പെടെ 35 രാജ്യങ്ങളിലേക്ക് കയറ്റുമതി ചെയ്യുന്നു. കമ്പനിയിൽ 800 ഓളം ജീവനക്കാർ ജോലി ചെയ്യുന്നു, അതിൽ 500 പേർ മാർക്കറ്റിംഗ് മേഖലയിലാണ്, മൊത്തം ജോലിക്കാരിൽ 150 പേർ സ്ത്രീകളാണ്, മാർക്കറ്റിംഗിൽ സ്ത്രീകൾ കുറവാണ്, പക്ഷേ പ്ലാന്‍റിലും ഓഫീസിലും ധാരാളം സ്ത്രീകൾ ജോലി ചെയ്യുന്നു.
ഐസിപിഎയുടെ ഉൽപ്പന്നങ്ങൾ രാജ്യാന്തര നിലവാരത്തിലുള്ളതാണെന്നും ഏറെ ഗവേഷണങ്ങൾക്ക് ശേഷമാണ് തയാറാക്കിയതെന്നും ആഭ ദമാനി പറയുന്നു. ഇവ എല്ലായിടത്തും ലഭ്യമാണ്. ഉൽപ്പാദനത്തിന് മുമ്പ് അസംസ്കൃത വസ്തുക്കൾ നന്നായി വിലയിരുത്തുകയും ജീവനക്കാരുടെ പരിശീലനത്തിന് പൂർണ്ണ ശ്രദ്ധ നൽകുകയും ചെയ്യുന്നു. ഇന്ന് ഈ ഉൽപ്പന്നങ്ങൾ മികച്ച മൂന്ന് ബ്രാൻഡുകളിൽ ഒന്നായതിന്റെ കാരണം ഇതാണ്.
സ്ത്രീകൾക്ക് ഈ രംഗത്ത് മുന്നേറാനാകും
ഇക്കാലത്ത് സ്ത്രീകൾക്ക് മിക്ക ഇടങ്ങളിലും സ്വീകാര്യതയുള്ളതിനാൽ വെല്ലുവിളികൾ കുറവാണ് എന്ന് പറയാം. നേരത്തെ ജോലിക്കായി മാർക്കറ്റിൽ പോകേണ്ടി വന്നാൽ പ്രശ്‌നങ്ങളുണ്ടാകുമായിരുന്നു. അക്കാലത്തെ വിപണിയിൽ എല്ലായിടത്തും പുരുഷന്മാർ മാത്രമായിരുന്നു, സ്ത്രീകളെ എളുപ്പം അംഗീകരിക്കാൻ അന്നൊന്നും കഴിഞ്ഞില്ല. പക്ഷേ, ഞാൻ പരിശ്രമം
ഒരിക്കലും നിർത്തിയില്ല. പരിശ്രമത്തിന് ഫലം ഉണ്ടാകുമെന്ന് ഞാൻ വിശ്വസിക്കുന്നു.
ഒരു കമ്പനിയുടെ ഉടമ ആകണമെങ്കിൽ
നിങ്ങൾ അതിന് ആവശ്യമായ ജോലികളിൽ ഏർപ്പെടണം, അതിനുശേഷം മാത്രമേ ആളുകളിൽ നിന്ന് യഥാർത്ഥ ബഹുമാനം നേടാൻ കഴിയു. എന്‍റെ സമയത്തിന്‍റെ പകുതിയും ഞാൻ പ്ലാന്‍റിലാണ് ചെലവഴിക്കുന്നത്. കുടുംബത്തിനും വീടിനുമൊപ്പം ജോലിയും എങ്ങനെ കൈകാര്യം ചെയ്യണമെന്ന് സ്ത്രീകൾ അറിഞ്ഞിരിക്കണം. ഇതോടൊപ്പം സാങ്കേതിക പരിജ്ഞാനം വർദ്ധിപ്പിക്കേണ്ടതും പ്രധാനമാണ്. ഫാർമ വളരെയധികം സാങ്കേതികത ഉള്ള മേഖലയാണ്. ഓരോ രാജ്യത്തും വ്യത്യസ്തമായ നിയമങ്ങളും നിയന്ത്രണങ്ങളുമുണ്ട്. അതും പ്രധാനമാണ്. 800-ലധികം ജീവനക്കാരെ കൈകാര്യം ചെയ്യേണ്ടി വരുമ്പോൾ, എച്ച്ആർ അറിവും ആവശ്യമാണ്. ധാരാളം യാത്രകൾ ചെയേണ്ടി വരും. ഈ മാർക്കറ്റ് വളരെ തിരക്കുള്ളതാണ്, പക്ഷേ ഫാർമ നിയന്ത്രിത വ്യവസായമാണ്, നിർമ്മാണത്തിന്‍റെയും വിപണനത്തിന്‍റെയും നിയമങ്ങളെക്കുറിച്ചും ഉൽപ്പന്നങ്ങളെക്കുറിച്ചും സാങ്കേതിക അറിവ് ഉണ്ടായിരിക്കണം, അതിനാൽ സ്വയം വളരെ അപ്‌ഡേറ്റ് ചെയ്യേണ്ടതുണ്ട്.
നല്ല ബിസിനസുകാരിയാകാൻ
സ്ത്രീകൾ സ്വന്തം ജോലിയിൽ ശ്രദ്ധ കേന്ദ്രീകരിക്കണം. അവർ തങ്ങളുടെ കുടുംബത്തിലും ഓഫീസ് ജോലിയിലും പൂർണ ശ്രദ്ധ ചെലുത്തേണ്ടത് പ്രധാനമാണ്. ക്ഷമ പാലിക്കേണ്ടതും പ്രധാനമാണ്. പലപ്പോഴും സാഹചര്യങ്ങൾ നമ്മുടെ നിയന്ത്രണത്തിലല്ല. ആ സമയത്ത് ക്ഷമ നഷ്ടപ്പെടരുത്. ഇതുകൂടാതെ നിരാശപ്പെടരുത്. നിങ്ങൾ ഒരു സ്ത്രീയാണ്, അതിനാൽ നിങ്ങൾക്ക് അത് ചെയ്യാൻ കഴിയില്ലെന്ന് ആളുകൾ പലപ്പോഴും പറയും. എന്നാൽ നിങ്ങൾ അത് ചെയ്തുകൊണ്ട് തെളിയിക്കണം, കാരണം നിങ്ങൾ വഴക്കിട്ടാലും സംസാരിച്ചാലും ഒന്നും സംഭവിക്കില്ല, പക്ഷേ നിങ്ങൾ ക്ഷമയോടെ ഓരോന്നും നേടിയെടുക്കുമ്പോൾ സ്വീകാര്യതയും ബഹുമാനവും ലഭിക്കും. ഒരിക്കലും തളരരുത്, എത്ര വലിയ വെല്ലുവിളികൾ ഉണ്ടായാലും ധൈര്യം നഷ്ടപ്പെടരുത്. എന്നാൽ, സ്വന്തം ആരോഗ്യത്തെക്കുറിച്ച് വളരെയധികം ശ്രദ്ധിക്കേണ്ടതുണ്ട്. ആരോഗ്യമില്ലാതെ ഒന്നും ചെയ്യാൻ കഴിയില്ല.
സമൂഹത്തിലെ സ്ത്രീകളുടെ അവസ്ഥ
സമൂഹത്തിൽ സ്ത്രീകളുടെ അവസ്ഥയിൽ കാര്യമായ മാറ്റം വന്നു, ഇപ്പോൾ എല്ലായിടത്തും അവരെ സ്വീകരിക്കാനും അംഗീകരിക്കാനും തുടങ്ങിയിരിക്കുന്നു. സ്ത്രീകൾക്ക് എല്ലാ മേഖലകളിലും അറിവ് വർദ്ധിച്ചു. എന്നാൽ ജോലി സമ്മർദവും ഇവരിൽ വർദ്ധിച്ചിട്ടുണ്ട്. മുമ്പ് സമൂഹത്തിൽ സ്ത്രീകളുടെയും പുരുഷന്മാരുടെയും പങ്ക് എന്താണെന്ന് വളരെ വ്യക്തമായിരുന്നു. പുരുഷന്മാർ പുറത്ത് ജോലി ചെയ്ത് പണം സമ്പാദിക്കണം, സ്ത്രീകൾക്ക് അടുക്കളയും വീടും കുട്ടികളും നോക്കണം. ഇതായിരുന്നു സാമൂഹ്യ വ്യവസ്ഥിതി അതൊക്കെ മാറിക്കഴിഞ്ഞു. എങ്ങനെ സ്വതന്ത്രമായി ജീവിക്കാമെന്നും പുറത്തുപോയി ജോലി ചെയ്യാമെന്നും നമ്മൾ പെൺമക്കളെ പഠിപ്പിച്ചു. എന്നാൽ വീട്ടുജോലികൾ എങ്ങനെ ചെയ്യണമെന്നും ഭാര്യമാരെ എങ്ങനെ പരിപാലിക്കണമെന്നും നമ്മൾ ആൺ മക്കളെ പഠിപ്പിച്ചില്ല. വീട്ടിലും പുറത്തും ജോലി ചെയ്യേണ്ടി വരുന്നതിനാൽ ഈ സമയം സ്ത്രീകൾക്ക് കൂടുതൽ ബുദ്ധിമുട്ടാണ്. എല്ലാം സന്തുലിതമാക്കണം. എന്നാൽ വീട്ടുജോലികൾ ചെയ്യണമെന്നോ കുട്ടികളെ പരിപാലിക്കണമെന്നോ അമ്മമാർ ആൺമക്കളെ പഠിപ്പിക്കാത്തതിനാൽ പുരുഷന്മാർ ഇതുവരെ കുടുംബ ഉത്തരവാദിത്തങ്ങൾ പഠിച്ചിട്ടില്ല. ഉത്തരവാദിത്തം പങ്കുവയ്ക്കുന്ന അവസ്ഥ വേണം. അതുകൊണ്ട് സ്ത്രീകളുടെ പാത ഇപ്പോഴും കഠിനമാണ്.
കമ്പനിയിലെ സ്ത്രീ പ്രാതിനിധ്യം
ഞങ്ങൾ സ്ത്രീകൾക്ക് സൗകര്യപ്രദമായ ജോലി സമയം നൽകുന്നു. ആവശ്യമുണ്ടെങ്കിൽ, അവർക്ക് വീട്ടിൽ നിന്ന് ജോലി ചെയ്യാനും അനുവദിക്കുന്നു. പ്രസവാവധി നൽകുന്നുണ്ട്. ചെറിയ കുട്ടികളുള്ളവർക്കു വേണ്ടി നിർമ്മാണ പ്ലാന്‍റിൽ ക്രഷ് റൂമുകളും ഉണ്ട്.
നിർമ്മാണ പ്ലാന്‍റുകളുടെ പേരിൽ നിരവധി അവാർഡുകൾ ലഭിച്ചിട്ടുണ്ടെന്ന് ദമാനി പറയുന്നു. ആശുപത്രികളിൽ ഉപകരണങ്ങൾ ദാനം ചെയ്യുന്നതുൾപ്പെടെ പല തരത്തിലുള്ള സാമൂഹിക പ്രവർത്തനങ്ങളും ഇവർ ചെയ്യുന്നുണ്ട്.. പെൺകുട്ടികളുടെ വിദ്യാഭ്യാസത്തിനും തൊഴിലിനുമായി നിരവധി പ്രവർത്തനങ്ങൾ നടക്കുന്നു.
ജീവിതത്തിൽ വെല്ലുവിളികൾ വന്നാലും ശ്രമിക്കുമ്പോൾ വഴികൾ തെളിഞ്ഞു വരും. ആഭ പറയുന്നു. അങ്ങനെ നമ്മളെ സഹായിക്കാൻ കഴിയുന്ന നിരവധി ആളുകളെ നാം കണ്ടെത്തും…
