പ്രീഡിഗ്രി പഠനകാലത്ത് അപ്രതീക്ഷിതമായുണ്ടായ അപകട൦ പാലക്കാട് സ്വദേശിനിയായ പ്രിയ രാമകൃഷ്ണന്‍റെ ജീവിതത്തിൽ വലിയ മാറ്റമാണുണ്ടാക്കിയത്. പാലക്കാട് മേഴ്‌സി കോളേജിൽ നിന്ന് വീട്ടിലേക്കുള്ള മടക്കയാത്രയിൽ ബസിൽനിന്ന് തെറിച്ച് റോഡിൽ വീണ പ്രിയയ്ക്ക് ആദ്യം എന്താണ് സംഭവിച്ചതെന്ന് മനസ്സിലായില്ല. കുഴപ്പമില്ലായെന്ന തോന്നലിൽ ആ സമയത്ത് പതിയെ എഴുന്നേറ്റ് നിന്നു. ശരീരമാകെ തരിപ്പ്. വീട്ടിലെത്തിയ പ്രിയയെ വീട്ടുകാർ തുടർന്ന് സ്വകാര്യ ആശുപത്രിയിൽ എത്തിച്ചെങ്കിലും കൃത്യമായ ചികിത്സ ലഭിച്ചില്ല.
കുഴപ്പമില്ലായെന്നായിരുന്നു ഡോക്ടറുടെ മറുപടി. എന്നാൽ രണ്ട് ദിവസം കഴിഞ്ഞതോടെ വലത് കാലിന് മുട്ടിന് താഴെ കഠിനമായ വേദനയുണ്ടായി. തുടർന്നങ്ങോട്ട് ചികിത്സ നടത്തിയെങ്കിലും പരിക്ക് പൂർണ്ണമായും ഭേദമായില്ല. വീഴ്ചയുടെ ആഘാതത്തിൽ പ്രിയയുടെ നട്ടെല്ലിന് കാര്യമായ ക്ഷതമേറ്റിരുന്നു. അതോടെ ശരീര വളർച്ച നിലച്ചു. അതിനിടെ അസുഖം കഴുത്തിനെയും സാരമായി ബാധിച്ചു. കഴുത്ത് തിരിക്കാൻ വയ്യാതെയായി. കഴുത്തു തിരിച്ചു നോക്കാനോ മുകളിലേക്ക് നോക്കാനോ ശ്രമിച്ചാൽ കഠിനമായ വേദനയായിരിക്കും. അതിനെ തുടർന്ന് നീണ്ട 30 വർഷത്തെ ചികിത്സ. വൈദ്യശാസ്ത്രപരമായി പറഞ്ഞാൽ ലോക്കോ മോട്ടോർ എന്ന അവസ്ഥ.
16 വയസു വരെ ജീവിതത്തെക്കുറിച്ചു ഏറെ സ്വപ്നങ്ങൾ കണ്ടിരുന്ന പെൺകുട്ടി. ഒരുപാട് പ്രതീക്ഷകളോടെ കോളേജിൽ പോയിരുന്നവൾ. എന്നാൽ ആ വീഴ്ചയോടെ അവളുടെ ജീവിതം സങ്കടങ്ങളുടെയും ഏകാന്തതയുടെയും ലോകത്തായി. തുടർ ചികിത്സകൾ, മരുന്നുകൾ. അങ്ങനെ ജീവിതം തുടർന്നു. സങ്കടപ്പെട്ടിരുന്ന നാളുകളിൽ എപ്പോഴോ ഒരു ദിവസം ജീവിതത്തെക്കുറിച്ച് പുതിയ പ്രതീക്ഷകൾ പ്രിയയുടെ മനസ്സിൽ നാമ്പിട്ടു. അത് മനസിന്‌ കരുത്തു൦ പ്രകാശവും പകർന്നു. ശരീരത്തിന്‍റെ അസ്വസ്ഥകളെ പ്രിയ പിന്നെ വകവച്ചില്ല. ആ ഉൾക്കരുത്തിൽനിന്നാണ് അനേകം പേരുടെ താങ്ങും തണലുമായി മാറിയ പ്രിയ പുതിയൊരു ജീവിതത്തിലേക്ക് നടന്നു തുടങ്ങുന്നത്.
അശരണരായ സ്ത്രീകളെയും കുട്ടികളെയും അവൾ തനിക്കൊപ്പം ചേർത്തുപിടിച്ചു. അവരുടെ മുഖങ്ങളിൽ പുഞ്ചിരി നിറച്ചു. ശരീരത്തിനേറ്റ വൈകല്യം മനസ്സിനെ തളർത്തിയില്ല, മറിച്ചു അത് അവരെ പുതിയ കർമ്മപഥങ്ങളിലേക്ക് നയിക്കുകയാണുണ്ടായത്. രോഗാവസ്ഥയുടെ കാഠിന്യ൦ അലട്ടുമ്പോഴും പ്രിയ പഠനം തുടർന്നുകൊണ്ടിരുന്നു. പ്രീഡിഗ്രി, ഡിഗ്രി, എംഎസ് ഡബ്ലിയു, പിജിഡിസിഎ, എന്നിവയിൽ ഉന്നത വിജയം കരസ്ഥമാക്കി.
മനക്കരുത്തും ആത്മവിശ്വാസവും കൈമുതലാക്കി പ്രിയ പിന്നീട് അനേകം പേരുടെ ജീവിതത്തിലെ വെളിച്ചമായി മാറുകയായിരുന്നു. വേദനസംഹാരികൾ ജീവിതത്തിന്‍റെ ഭാഗമായെങ്കിലും പ്രിയയുടെ ഇച്ഛാശക്തിയെ തോൽപ്പിക്കാൻ ഒന്നിനും കഴിഞ്ഞില്ല. വിദ്യാഭ്യാസം നേടാൻ കഴിയാത്തവർക്കായി തണലാകണമെന്ന ചിന്തയിൽ നിന്നാണ് ജനനി എഡ്യൂക്കേഷണൽ ആൻഡ് കൾച്ചുറൽ ചാരിറ്റബിൾ സൊസൈറ്റിയും ജനനി വൊക്കേഷണൽ ട്രെയിനിംഗ് ഇൻസ്റ്റിറ്റ്യൂട്ടും 2003ൽ തുടങ്ങുന്നത്. സുഖമില്ലാത്തയാൾ ഇതിനൊക്കെ ഇറങ്ങി പുറപ്പെടണോ എന്നൊക്കെയുള്ള വിമർശനം ചുറ്റിലും നിന്നും ഉയർന്നെങ്കിലും അത്തരം വാക്കുകളൊന്നും പ്രിയയെ ഒട്ടും തളർത്തിയില്ല. ജനനിയുടെ പ്രവർത്തനത്തിന്‍റെ ഭാഗമായി സാമ്പത്തിക പ്രശ്‌നം ഉയർന്നപ്പോൾ ഒപ്പമുണ്ടായിരുന്നവർ പതിയെ പിൻവലിഞ്ഞു. എന്നിട്ടും പതറാതെ മുന്നോട്ട് നീങ്ങി.
2003ൽ തുടങ്ങിയ ജനനി ഇന്ന് ഒരു കൂട്ടായ്‌മയുടെ വിജയഗാഥയാണ് രചിക്കുന്നത്. ഇതിനെല്ലാം നേതൃത്വ൦ വഹിക്കുന്നത് പ്രിയയാണ്. ഒപ്പം കൂട്ടായി ജനനിയുടെ പ്രവർത്തങ്ങൾ ഏകോപിപ്പിക്കാൻ എക്സിക്യൂട്ടീവ് ഡയറക്ടർ ആയ ജിസയും ഒപ്പമുണ്ട്. ഗൾഫിൽ ടീച്ചർ ആയിരുന്ന ജിസ ജോമോൻ ഒരിക്കൽ നാട്ടിൽ എത്തിയപ്പോഴാണ് ജനനിയെയും പ്രിയയെയും കുറിച്ചറിയുന്നത്. അതോടെ ജിസ ജോമോനും കുടുംബവും ജനനിയുടെ സജീവപ്രവർത്തകരായി മാറി. കേരള സ്റ്റേറ്റ് യുവജന ക്ഷേമ ബോർഡിൽ ജീവനക്കാരിയാണ് 49കാരിയായ പ്രിയ. ജോലിസമയം കഴിഞ്ഞാണ് ജനനിയുടെ പ്രവർത്തനങ്ങൾക്കും സാമൂഹികപ്രവർത്തനങ്ങൾക്കും സമയം കണ്ടെത്തുന്നത്.
ജനനിയുടെ പ്രവർത്തനങ്ങൾ
സ്ത്രീകൾക്കും കുട്ടികൾക്കും തൊഴിൽ പരിശീലനം, സാക്ഷരത തുടർ വിദ്യാഭ്യാസം, സ്ത്രീശാക്തീകരണ പ്രവർത്തനങ്ങൾ, കമ്പ്യൂട്ടർ പരിശീലനം, വൊക്കേഷണൽ ട്രെയിനിംഗ്, ഇതിനൊക്കെ പുറമെ പേപ്പർ ബാഗ് നിർമ്മാണം, ബ്യൂട്ടീഷ്യൻ പരിശീലനം, കൂൺകൃഷി പരിശീലനം, പേപ്പർ പെൻ നിർമ്മാണം, ജൂട്ട് ബാഗ് നിർമ്മാണം, മുള ഉത്പന്നങ്ങൾ നിർമ്മിക്കാനുള്ള പരിശീലനം, തുടർന്നത് മാർക്കറ്റ് ചെയ്യാനുള്ള പിന്തുണ നൽകൽ എന്നിങ്ങനെ വിവിധ മേഖലകളിലായി ജനനി സ്ത്രീകൾക്കും കുട്ടികൾക്കും താങ്ങുംതണലുമാകുന്നു.
ഇത് കൂടാതെ സൗജന്യ നിയമ സഹായം, സൗജന്യ കൗൺസലിംഗിനുള്ള സൗകര്യ൦ എന്നിവയും ജനനിയുടെ പ്രവർത്തങ്ങളിൽ ഉൾപ്പെടുന്നുണ്ട്. ശാരീരിക വൈകല്യമുള്ളവരും അല്ലാത്തവരുമായ ഏകദേശം 3000ത്തിലധികം സ്ത്രീകൾ ഇവിടെ നിന്ന് വിവിധ മേഖലകളിലായി പരിശീലനം നേടിയിട്ടുണ്. നബാർഡും കുടുംബശ്രീയുമായി യോജിച്ച് സ്ത്രീകളുടെ ക്ഷേമത്തിനായുള്ള വിവിധ പരിപാടികളിലും ജനനി സജീവമാണ്.
ഇനിയും ഒരുപാട് കാര്യങ്ങൾ ചെയ്യാനുണ്ട്
ഇതുവരെ ചെയ്‌ത എല്ലാ പ്രവർത്തനങ്ങളിലും നിറഞ്ഞ സംതൃപ്തി ഉണ്ടെങ്കിലും പ്രിയ അടിയുറച്ചു പറയുന്ന ഒരു കാര്യമുണ്ട്. “ഇനിയും ഏറെ കാര്യങ്ങൾ ഞങ്ങൾക്ക് ചെയ്യാനുണ്ട്. ഭിന്ന ശേഷിക്കാർക്കായുള്ള വൊക്കേഷണൽ ട്രെയിനിംഗ് ഇൻസ്റ്റിറ്റ്യൂട്ട് ആൻഡ് റീഹാബിലിറ്റേഷൻ സെന്‍റർ തുടങ്ങണമെന്നുണ്ട്. അതിനൊക്കെ നല്ല പണമാവശ്യമുണ്ട്. സാമ്പത്തിക പ്രയാസം വലിയ അളവിൽ ജനനിയുടെ പ്രവർത്തനത്തെ ബാധിക്കുന്നുണ്ട്. അത് മറികടക്കണം.” ഇൻസ്റ്റിറ്റ്യുട്ടിന്‍റെ കടം വീട്ടുവാൻ സ്വന്തം പേരിലുള്ള സ്ഥലവും വീടും വരെ പ്രിയയ്ക്ക് വിൽക്കേണ്ടി വന്നു. നിലവിൽ പ്രിയ അമ്മയ്ക്കും സഹോദരനുമൊപ്പം വാടക വീട്ടിലാണ് താമസം. അതിനിടെ കടന്നുവന്ന കൊറോണയും ലോക്ക്ഡൗണും ജനനിയുടെ പ്രവർത്തനത്തെ ഇടയ്ക്ക് സാരമായി ബാധിച്ചുവെങ്കിലും അതിനൊന്നും പ്രിയയുടെ ആത്മവീര്യത്തെ തളർത്താനാവില്ല.
ബഹുമതികൾ
യുവജന ക്ഷേമ പ്രവർത്തനങ്ങൾക്ക് 2006ൽ രാഷ്ട്രപതി എ.പി.ജെ. അബ്ദുൽ കലാമിൽ നിന്ന് നാഷണൽ യൂത്ത് അവാർഡ് പ പ്രിയ നേടിയിട്ടുണ്ട്. 2010ൽ നെഹ്‌റു യുവ കേന്ദ്ര അവാർഡ് ലഭിച്ചു. അങ്ങനെ ഒരുപാടു പുരസ്‌കാരങ്ങൾ. മികച്ചൊരു സാമൂഹിക പ്രവർത്തക എന്നതിനൊപ്പം ആർച്ചറി സൗത്ത് ഇന്ത്യൻ ചാമ്പ്യൻ കൂടിയാണ് പ്രിയ. പാര ഒളിംപിക്സിൽ പങ്കെടുക്കാനുള്ള പരിശീലനത്തിലാണ് പ്രിയ ഇപ്പോൾ. പ്രിയയുടെ വലിയൊരു സ്വപ്നനവും ലക്ഷ്യവുമാണത്. വായനയും, കവിതയെഴുത്തുമാണ് പ്രിയയുടെ മറ്റ് ഇഷ്ടമേഖലകൾ. സമയം കിട്ടുമ്പോൾ കവിതയെഴുതാറുണ്ട്. 25 വർഷം മുമ്പ് കർമ്മഭൂമി എന്ന കവിതസംഹാരം പ്രസിദ്ധികരിക്കുകയുമുണ്ടായി.
എനിക്ക് പറയാനുള്ളത്
പ്രതിസന്ധികളിൽ തളരാതെ സമൂഹനന്മയ്ക്കായി എപ്പോഴും പ്രവർത്തിച്ചുകൊണ്ടിരിക്കുക, നിങ്ങളിലുള്ള കഴിവുകളെ മറ്റുള്ളവർ കാണുകയോ പ്രോത്സാഹിപ്പികയോ ചെയ്യണമെന്നില്ല. അതൊന്നും കാര്യമാക്കാതെ സ്വന്തം പരിമിതികളെ അതിജീവിച്ചു മുന്നേറുക. ഒരിക്കൽ ലോകം നിങ്ങളെ തിരിച്ചറിയും എന്നാണ് പ്രതിസന്ധികളിൽ തളർന്നു പോകുന്നവർക്ക് പ്രിയ നൽകുന്ന സന്ദേശം. പരിമിതികളെയോർത്ത് പരിതപിക്കാതെ സാമൂഹിക നന്മയ്ക്കായി കർമ്മനിരതയായിരിക്കുന്ന പ്രിയ കഴിഞ്ഞ 30 വർഷമായി കർമ്മനിരതമായ സ്വന്തം ജീവിതം കൊണ്ട് നമ്മെ അത്ഭുതപ്പെടുത്തുകയാണ്.
