കോളിംഗ് ബെൽ അടിക്കുന്ന ശബ്ദം കേട്ട് അജിത വാതിൽ തുറന്നു. മുന്നിൽ സൗമ്യനായി പുഞ്ചിരിച്ചു നിൽക്കുന്ന നിഖിൽനെയാണ് കണ്ടത്. കയ്യിൽ ഒരു പൂച്ചെണ്ടും. വിവാഹ ദിനാശംസകൾ അവൻ പറഞ്ഞു.
താങ്ക്സ്, പൂച്ചെണ്ടു വാങ്ങുന്നതിനിടയ്ക്ക് അജിത മന്ദസ്മിതം തൂകി. അപ്പോൾ നിഖിലിന് ഞങ്ങളുടെ വിവാഹ വാർഷികം ഓർമ്മയുണ്ട് അല്ലേ?
എനിക്ക് ഈ ദിവസം എങ്ങനെ മറക്കാനൊക്കും. രണ്ടുകൊല്ലം മുമ്പല്ലേ ചേച്ചി എന്‍റെ ഉറ്റമിത്രത്തെ എന്നിൽ നിന്നും തട്ടിയെടുത്തത്.
അപ്പോൾ വിവാഹശേഷം അഞ്ജലിയും നിന്നെ ഇതുപോലെ തട്ടിയെടുക്കുമായിരിക്കും അല്ലേ.
അത് ശരിയാ, മുതിർന്നവരെ കണ്ടല്ലേ ചെറിയവർ അനുകരിക്കുന്നത്.
ആരെന്ത് അനുകരിച്ച് എന്നാ നിങ്ങൾ ഈ പറയുന്നത്? ഡ്രോയിംഗ് റൂമിൽ എത്തിയ ശ്രീകാന്ത് കാര്യമറിയാതെ ഇരുവരെയും നോക്കി.
ഇത് ഏട്ടത്തിയും അനിയനും തമ്മിലുള്ള പ്രശ്നമാണ്. നിങ്ങൾ ഇതിൽ ഇടപെടേണ്ട.
അതു കൊള്ളാം, ഏട്ടൻ ഇപ്പോഴും തയ്യാറായില്ലേ? നിഖിൽ ശ്രീകാന്തിനോട് ചോദിച്ചു.
തയ്യാറാവുകയോ എന്തിന്? എവിടെ പോകാനാണ്? അജിത അത്ഭുതം കൂറി.
ചേച്ചി, ഇന്നാണ് എയർ ഷോ. ഞാൻ അതിൽ പങ്കെടുക്കുന്നുണ്ട്. ശ്രീകാന്ത് ഏട്ടനും ഇതിൽ പങ്കെടുക്കണമെന്ന് ഉണ്ട് . ചേച്ചി സമ്മതിക്കുകയാണെങ്കിൽ….
നിഖിൽ ഇന്നത്തെ ദിവസത്തിന്‍റെ പ്രത്യേകത എന്താണെന്ന് അറിയാമല്ലോ.
അറിയാം ചേച്ചി, അതാ ഞാൻ നിർബന്ധിക്കാതിരുന്നത്. കഴിഞ്ഞ തവണത്തെ പോലെ ഇത്തവണയും ചേട്ടൻ തന്നെ സമ്മാനം തട്ടിയെടുക്കും എന്നാണ് പറയുന്നത്. അജിത പറഞ്ഞു മുഴുപ്പിക്കുന്നതിന് മുമ്പ് തന്നെ നിഖിൽ പറഞ്ഞു.
എന്ത്… ഞാനെപ്പോ പറഞ്ഞു. ഇവൻ ഒന്നാന്തരം കള്ളത്തരമാ പറയുന്നത്. ശ്രീകാന്ത് അസ്വസ്ഥനായി പറഞ്ഞു.
ഇന്ന് ഈ മത്സരത്തിൽ ഏട്ടനെങ്ങാനും പങ്കെടുത്താൽ ഞങ്ങളുടെ കാര്യം തഥൈവ, അതുമാത്രമല്ല മൗറീഷ്യസിലേക്കുള്ള സൗജന്യ യാത്ര ടിക്കറ്റും ഏട്ടൻ തന്നെ തട്ടിയെടുക്കും. നിഖിൽ സത്യാവസ്ഥ വെളിപ്പെടുത്തി.
അതെയോ, ഈ സൗജന്യ ടിക്കറ്റ് കൊണ്ട് ഭാര്യയെയും കൂടെ കൊണ്ടുപോകാൻ സാധിക്കുമോ? ശ്രീകാന്ത് ഒന്നുമറിയാത്തതുപോലെ നിഖിലിനെ നോക്കി.
ശരിയാണ് ചേച്ചിക്കും മൗറീഷ്യസിൽ പോകണമെന്ന് ആഗ്രഹമുണ്ട്. എന്തായാലും നിങ്ങൾക്ക് ഇന്ന് പോകാൻ സാധിക്കില്ല. ഇന്ന് നിങ്ങളുടെ വിവാഹ വാർഷികം അല്ലേ? വെറും രണ്ടു മണിക്കൂർ മാറിനിൽക്കുക തന്നെ ഏട്ടനെ സംബന്ധിച്ച് ഇന്ന് ബുദ്ധിമുട്ടായിരിക്കും.
നിഖിലിന്‍റെ ചെവിക്ക് പിടിച്ച് നുള്ളി കൊണ്ട് അജിത പറഞ്ഞു. നിഖിൽ, ശ്രീയേട്ടൻ ഇന്നത്തെ മത്സരത്തിൽ പങ്കെടുക്കാൻ പാടില്ല. അതല്ലേ കാര്യം. അങ്ങനെയാണെങ്കിൽ നിനക്ക് തന്നെ ഫസ്റ്റ് ആവാമല്ലോ അല്ലേ. എന്നിട്ട് അഞ്ജലിയെയും കൊണ്ട് നിനക്ക് മൗറീഷ്യസിലേക്ക് പറക്കാം. നിന്‍റെ മനസ്സിൽ ഇരിപ്പു കൊള്ളാം.
നിഖിൽ ചെവി തിരുമ്മി കൊണ്ട് പറഞ്ഞു. ശരി ചേച്ചി. പക്ഷേ ഒരു നിബന്ധനയുണ്ട്. അഞ്ജലി വരില്ലെന്ന് പറഞ്ഞാൽ ചേച്ചിയ്ക്ക് എന്‍റെയൊപ്പം വരേണ്ടിവരും.
നിന്നെ ഞാൻ… അജിത് നിഖിലിനെ അടിക്കുവാൻ കൈ ഓങ്ങിയപ്പോഴേക്കും ശ്രീകാന്ത് ഇടയ്ക്ക് കയറി. വെറും രണ്ടു മണിക്കൂർ കാര്യമല്ലേയുള്ളൂ ഞാൻ വേഗം മടങ്ങി വരാം.
ശരി നിഖിൽ, നീ ശ്രീ ഏട്ടനെയും കൂടെ കൊണ്ടുപോയി കൊള്ളൂ. പക്ഷേ ഇങ്ങേര് കൂടുതൽ ഷൈൻ ചെയ്യാനായി സാഹസികത വല്ലതും കാണിച്ചാൽ അറിയാമല്ലോ? അതിന്‍റെയെല്ലാം ഉത്തരവാദിത്വം നിനക്കായിരിക്കും.
ശരി ചേച്ചി, നിഖിൽ ചിരിച്ചു.
പിന്നെ, നീ വൈകുന്നേരം മടങ്ങിവരുമ്പോൾ അഞ്ജലിയെ നിർബന്ധമായും കൊണ്ടുവരണം. വൈകുന്നേരത്തെ ഭക്ഷണം നമുക്ക് ഒരുമിച്ച് ആകാം അജിത പറഞ്ഞു.
നേവൽ ബേസിൽ ആകട്ടെ ശ്രീകാന്തും നിഖിലും എല്ലാവരുടെയും ശ്രദ്ധ ആകർഷിച്ചു. കഴിഞ്ഞ അഞ്ചുവർഷമായി മത്സരത്തിൽ ശ്രീകാന്ത് ഒന്നാമനും നിഖിൽ രണ്ടാമനും ആയിരുന്നു. ഇത്തവണയും എല്ലാവരുടെയും മുഴുവൻ പ്രതീക്ഷയും ഇവരിൽ തന്നെ. ശ്രീകാന്തും നിഖിലുമായുള്ള സൗഹൃദം സ്ക്വാഡ്റനിൽ ഒരു ചർച്ച വിഷയം ആയിരുന്നു. ഇവരുടെ ഉറച്ച സൗഹൃദം ഏവർക്കും മാതൃക തന്നെയായിരുന്നു.
എല്ലാ തയ്യാറെടുപ്പുകളോടെയും ശ്രീകാന്തും നിഖിലും തങ്ങളുടെ ഊഴവും കാത്ത് റൺവേക്കുള്ളിൽ നിലയുറപ്പിച്ചു.
സുഹൃത്തേ, രണ്ടു മണിക്കൂറിനുള്ളിൽ മടങ്ങി വന്നേക്കണം. പറഞ്ഞേക്കാം. അല്ലെങ്കിൽ ചേച്ചി എന്നെ ബാക്കി വെച്ചേക്കില്ല. കേട്ടോ… നിഖിൽ മുടിയിഴകൾ കൈക്കൊണ്ട് ഒതുക്കുന്നതിന് ഇടയ്ക്ക് പറഞ്ഞു.
അധിക സമയം ഒന്നും എടുക്കില്ല. അല്പ സമയത്തേക്ക് വ്യോമാഭ്യാസം ഡൽഹിയിൽ വച്ചായിരിക്കും. പിന്നീട് ജമ്മു വിമാനത്താവളം വരെ പോയി മടങ്ങി വരികയേ വേണ്ടൂ. എല്ലാം കൂടി 100 മിനിറ്റിലേറെ സമയമെടുക്കില്ലല്ലോ? നിന്‍റെ ഊഴം രണ്ടാമത് അല്ലേ. എന്‍റേത് പതിനഞ്ചാമതും. ഫ്രീ ആവുകയാണെങ്കിൽ അഞ്ജലിയെയും കൊണ്ട് എന്‍റെ വീട്ടിലെത്തിച്ചേരണം. അല്പസമയത്തിനുള്ളിൽ ഞാനും എത്തിച്ചേരാം. അജിതയ്ക്ക് നല്ലൊരു ഗിഫ്റ്റ് കൊടുക്കണം. അഞ്ജലിക്ക് ഗിഫ്റ്റ് സെലക്ഷൻ നന്നായി അറിയാമല്ലോ?
സ്ക്വാഡ്റൺ ലീഡർ നിഖിൽ, മൈക്കിലെ അനൗൺസ്മെൻറ് കേട്ട് നിഖിൽ ശ്രീകാന്തിനോട് യാത്ര പറഞ്ഞ് തന്‍റെ വിമാനത്തിനടുത്തേക്കു നീങ്ങി. വിമാനം റൺവേയിൽ നിന്നും മറഞ്ഞ് മേഘങ്ങൾക്കിടയിലേക്ക് പൊങ്ങി. പലതരം അഭ്യാസങ്ങൾ കാണിക്കാൻ തുടങ്ങി. താഴെ ഇരിക്കുകയായിരുന്ന എയർ വൈസ് മാർഷലും മറ്റ് അതിഥികളും നിഖിലിന്‍റെ ഈ കലാപ്രകടനങ്ങൾ കണ്ട് ശ്വാസമടക്കി നിന്നു.
ശ്രീകാന്ത് അഭിമാനത്തോടെ നിഖിലിന്‍റെ വിമാനം പറന്നുയരുന്നതും നോക്കി നിന്നു. നിഖിൽ തന്നെ ഒന്നാമൻ ആകട്ടെ എന്നയാൾ മനസാ ആഗ്രഹിച്ചു. കൂട്ടുകാരൻ എന്ന് വെച്ചാൽ സ്നേഹത്തിനായി ജീവിക്കുകയും സ്നേഹത്തിനായി മരിക്കുന്നവനും ആയിരിക്കണം. ശുദ്ധ ഹൃദയനായിരിക്കണം.
സത്യസന്ധനായ മനുഷ്യൻ. സ്നേഹം മാത്രം നിറച്ച കടലിന്‍റെ അഗാധതയെക്കാളും ഏറെ ആഴമുള്ള മനസ്സ്. ശ്രീകാന്ത് തന്‍റെ വാച്ചിലേക്ക് നോക്കി അടുത്തുള്ള കാന്‍റീനിലെ വെയിറ്ററോടു പറഞ്ഞു. ഇനി എന്‍റെ ഊഴം വരുന്നതിന് ഏറെ സമയം എടുക്കും അതുവരെ ഒരു കാപ്പി ആവാം അല്ലേ?
യെസ് സാർ.
അതിനുശേഷം ശ്രീകാന്ത് ക്യാപ്റ്റന്‍റെ അടുത്തേക്ക് നടന്നു.
തന്‍റെ കലാപ്രകടനങ്ങൾക്ക് ശേഷം നിഖിൽ ജമ്മു ഭാഗത്തേക്കാണ് വിമാനം പറത്തിയത്.
ജമ്മു വിമാനത്താവളത്തിൽ ഇറങ്ങിയതിനു ശേഷം വേഗം മടങ്ങണമെന്നായിരുന്നു അയാൾക്ക് ലഭിച്ച നിർദ്ദേശം. റൺവേയിൽ നിന്നും പറന്നുയരുന്നതിനുള്ള അനുവാദത്തിനായി കൺട്രോൾ ടവറുമായി ബന്ധപ്പെട്ടപ്പോൾ ജമ്മുവിൽ തന്നെ തങ്ങാനുള്ള അറിയിപ്പാണ് അയാൾക്ക് ലഭിച്ചത്. അയാൾ ആശ്ചര്യത്തോടെ തിരക്കി, എനിക്ക് അത്യാവശ്യമായി തിരികെ ഡൽഹിയിൽ എത്തിച്ചേരണം.
താങ്കൾ വേണമെങ്കിൽ ഡൽഹിയിലെ കൺട്രോൾ ടവറുമായി കോൺടാക്ട് ചെയ്യൂ.
എടിസി ഡൽഹിയിൽ നിന്നുള്ള സന്ദേശം കേട്ട് നിഖിലിന് കടുത്ത ആഘാതമേറ്റതുപോലെ തോന്നി. വിമാനം തന്‍റെ പിടിയിൽ നിന്നും കൈവിട്ട് തല കീഴായി വീഴുന്നതായി അയാൾക്ക് അനുഭവപ്പെട്ടു.
കൺട്രോൾ യുവർ സെൽഫ്, വിമാനത്തെ നിയന്ത്രിക്കൂ. ഇന്ത്യൻ എയർഫോഴ്സിന്‍റെ സമർത്ഥനായ പൈലറ്റ് ഇത്ര അധീരനാവരുത്. ഇത് കേവലം ഒരു അപകടം മാത്രം. ഷോ ഇപ്പോഴും തുടരുന്നുണ്ട്. നിങ്ങൾ നിങ്ങളുടെ പെർഫോമൻസിൽ ശ്രദ്ധിക്കൂ. അപകട സ്ഥലത്ത് നിന്നും വിമാന അവശിഷ്ടങ്ങൾ നീക്കം ചെയ്യുകയാണ്. താങ്കൾ ഒരു 10 മിനിറ്റു നേരം ജമ്മുവിൽ തങ്ങണം. അതിനുശേഷം ഡൽഹിയിലേക്ക് മടങ്ങാം. ഓവർ.
നിഖിൽ മഞ്ഞുകട്ട കണക്കെ മരവിച്ചുറച്ചു നിന്നു. സ്ക്വാഡ്റൺ ലീഡർ ശ്രീകാന്ത് രക്ഷപ്പെടുവാൻ എന്തെങ്കിലും ചാൻസ് ഉണ്ടോ? നിഖിൽ വിഷമിച്ച് കൺട്രോൾ ടവറുമായി ബന്ധപ്പെട്ടു.
ഞങ്ങൾക്ക് ഖേദമുണ്ട്. അദ്ദേഹം അകാല മൃത്യു കൈവരിച്ചു. ഇന്ത്യൻ എയർഫോഴ്സിന് സമർത്ഥനും പ്രഗത്ഭനുമായ ഒരു പൈലറ്റിനെ നഷ്ടമായി. ഇപ്പോൾ തൽക്കാലം താങ്കൾ ലാൻഡിങ്ങിൽ ശ്രദ്ധിക്കൂ… താങ്കൾ റൺവേയിലേക്ക് അപ്പ്രോച്ച് ചെയ്യുകയാണ്.
ജമ്മുവിൽ എത്തിയതിനു ശേഷം നിഖിൽ ഹെഡ് കോർട്ടേഴ്സിലേക്ക് ഫോൺ ചെയ്ത് സിവിൽ എയർലൈൻസിൽ മടങ്ങുന്നതിനുള്ള അനുവാദം വാങ്ങി. അയാളുടെ ശാരീരികവും മാനസികവുമായ സ്ഥിതി കണക്കിലെടുത്ത് അയാൾക്ക് തിരിച്ചുപോകാനുള്ള അനുമതി നൽകി. ഡൽഹി എയർപോർട്ടിൽ എത്തിച്ചേർന്ന അയാൾക്ക് ഒരടി മുന്നോട്ടു നീങ്ങുവാനുള്ള ശക്തി പോലും ഇല്ലായിരുന്നു. കണ്ണിനു മുന്നിൽ ഇരുട്ട് കട്ടപിടിച്ചു കൊണ്ടേയിരുന്നു.
ഞാനിനി അജിത ചേച്ചിയെ എങ്ങനെ അഭിമുഖീകരിക്കും. അവരുടെ ആഹ്ളാദഭരിതമായ ജീവിതം ഒരു നിമിഷം കൊണ്ട് തകർന്നു തരിപ്പണമായില്ലേ. നിഖിൽ സ്വയം ശപിച്ചുകൊണ്ടിരുന്നു. ഭാര്യയിൽ നിന്നും രണ്ടു മണിക്കൂർ നേരത്തെ അനുവാദം വാങ്ങിയാണ് ശ്രീകാന്ത് മരണത്തിന്‍റെ ഇരുട്ടിലേക്ക് മറഞ്ഞത്. അതിന് പകരം സമ്മാനമായി മൗറീഷ്യസിലേക്ക്! ശ്രീകാന്ത് ഇല്ലാത്ത ഈ ലോകത്ത് ഞാൻ എങ്ങനെ?
അജിത ഒരിക്കലും ശ്രീകാന്തിനെ അനാവശ്യമായി പുറത്തു പോകാൻ അനുവദിക്കില്ലായിരുന്നു. സന്തോഷത്തോടെ വിവാഹ വാർഷികം ആഘോഷിക്കാം എന്ന് തീരുമാനിച്ചിരുന്ന ശ്രീകാന്തിനെ ഞാനല്ലേ വലിച്ചിഴച്ച് മരണ വക്രത്തിൽ എത്തിച്ചത്. സുഹൃത്തെന്നു നടിച്ച് സുഹൃത്തിന്‍റെ കഴുത്തറുത്തല്ലോ ഞാൻ. ഞാൻ കുറ്റക്കാരനാണ്… കൊലപാതകിയാണ്… അപരാധിയാണ്…
എങ്ങോട്ടാണ് പോകേണ്ടത് സാർ. ടാക്സി ഡ്രൈവറുടെ ശബ്ദം അയാളെ ചിന്തയിൽ നിന്നുണർത്തി. ജീവിതത്തിലെ ആ ഭയാനക നിമിഷങ്ങൾ നിഖിൽനെയും പ്രതീക്ഷിച്ചിരിക്കുകയായിരുന്നു. ടാക്സിയിൽ നിന്നിറങ്ങി വീടിനടുത്ത് എത്താൻ ഒരുപാട് സമയം എടുത്തത് പോലെ… അയാൾക്ക് തോന്നി.
വാതിൽ തുറന്നു അജിത വെളുത്ത സാരിയുടുത്ത് ഒരുങ്ങാതെ മുന്നിൽ നിൽക്കും. എന്നിട്ട് എന്നോട് പറയും, എനിക്ക് സൗഭാഗ്യങ്ങൾ സമ്മാനങ്ങൾ നൽകിയ… കാർമേഘം അല്ലേ… എന്‍റെ സുഖകരമായ ജീവിതം താറുമാറാക്കിയവനല്ലേ നീ…
എന്തുപറ്റി? എന്താണ് ആലോചിക്കുന്നത് സ്ക്വാഡ്റൺ ലീഡർ? താൻ എപ്പോഴാണ് കോളിംഗ് ബെൽ അടിച്ചത് എന്നോ അജിത ചേച്ചി എപ്പോഴാണ് വാതിൽ തുറന്നത് എന്നോ ഒന്നും അയാൾക്ക് മനസ്സിലായില്ല. കണ്ണുതുറന്നപ്പോൾ മുന്നിൽ അണിഞ്ഞൊരുങ്ങി വിവാഹ വസ്ത്രം ധരിച്ചു നിൽക്കുന്ന അജിതയെ ആണ് കണ്ടത്. രണ്ടുവർഷം മുമ്പാണ് ഇതേ വേഷത്തിൽ അവരെ കണ്ടത്.
കൊള്ളാമല്ലോ ആശാൻ ഒറ്റയ്ക്കാണോ വന്നത്.
അപ്പോൾ അജിത ഇതുവരെ നടന്നതൊന്നും അറിഞ്ഞില്ലേ. ജീവിതത്തിലെ ഈ ഭീകരമായ യാഥാർത്ഥ്യം അവൾക്കിപ്പോഴും അജ്ഞാതമാണോ? എന്നോർത്ത് നിഖിൽ വളരെയേറെ വിഷമിച്ചാണ് മറുപടി നൽകിയത്.
അതെ
നീ ഒറ്റയ്ക്ക് വരും എന്ന് എനിക്ക് തോന്നിയിരുന്നു.
അത് ചേച്ചി … ശ്രീകാന്ത്… ശ്രീകാന്ത്…
എനിക്കറിയാം ശ്രീകാന്ത് എവിടെയാണെന്ന് എന്ന് പറഞ്ഞ് അജിത ഒരു ഗ്ലാസ് വെള്ളം നിഖിലിന് കൊടുത്തു.
എവിടെ, നിഖിൽ അറിയാതെ ചോദിച്ചു.
കേക്ക് മേടിക്കാൻ പോയി കാണും. ഞാനറിയാതെ എഗ്ഗ്ലെസ് കേക്ക് വാങ്ങാനായി പോയതായിരിക്കും. എപ്പോഴും ഇങ്ങനെയാ പതിവ്.
ഇല്ല… ഇല്ല, ചേച്ചി ഇനി ശ്രീകാന്ത് ഏട്ടൻ ഒരിക്കലും കേക്ക് കൊണ്ടുവരില്ല.
ഓ, കൊണ്ടുവന്നില്ലെങ്കിൽ വേണ്ട. കേക്ക് എനിക്ക് അത്രയ്ക്ക് ഒന്നും ഇഷ്ടമല്ല. പക്ഷേ നിഖിൽ ഒറ്റയ്ക്ക് വന്നത് എന്തിനാണെന്ന കാര്യമാണ് എനിക്ക് മനസ്സിലാകാത്തത്.
ഹോ, ചേച്ചിയെ ഞാൻ എങ്ങനെ പറഞ്ഞു മനസ്സിലാക്കും.
നീ ശരിക്കും ഒരു ഭീരു തന്നെ. സത്യാവസ്ഥ വെളിപ്പെടുത്താൻ എന്തിനാണ് ഭയപ്പെടുന്നത്.
അതെ ചേച്ചി, എനിക്ക് ഭയമാണ് എല്ലാവരെയും.
അഞ്ജലിയെയും നിനക്ക് ഭയമാണോ? എന്നിട്ടാണോ എന്നോട് പറഞ്ഞത്, ഞാൻ ശ്രീയേട്ടനെയും മറ്റും നിന്നിൽ നിന്നും തട്ടിയെടുത്തു എന്നൊക്കെ. ഇപ്പോഴേ ഭാര്യയുടെ അടിമയാണോ നാണമില്ലേ നിനക്ക്? അവർ കളിയാക്കി. നിനക്ക് കുടിക്കാൻ ചായ വേണോ കൂൾ ഡ്രിങ്ക്സ് വേണോ?
ഒന്നും വേണ്ട ചേച്ചി നിഖിൽ അജിതയെ നോക്കി കുറ്റബോധത്തോടെ പറഞ്ഞു. ചേച്ചി എന്നോട് ക്ഷമിക്കണം.
മാപ്പ് നൽകണോ? ഒരിക്കലുമില്ല. നിന്‍റെ തെറ്റ് പൊറുക്കാൻ പറ്റിയതല്ല. നീ ശിക്ഷിക്കപ്പെടേണ്ടവനാണ്.
അപ്പോൾ ചേച്ചിക്ക് എല്ലാം അറിയാമോ? നിഖിൽ ആശ്ചര്യത്തോടെ ചോദിച്ചു.
പിന്നല്ലാതെ. എനിക്ക് സമ്മാനം കൊണ്ടുവരാം എന്ന് പറഞ്ഞു നീ വെറും കയ്യോടെ അല്ലേ വന്നത്. പുറത്തെ വണ്ടി വന്നു നിൽക്കുന്ന ശബ്ദം കേൾക്കുന്നു. ശ്രീകാന്ത് ഏട്ടൻ മടങ്ങി വന്നതായിരിക്കും.
ചേച്ചി നിഖിൽ ഉറക്കെ അലറി. ശ്രീകാന്ത് ഏട്ടൻ മരിച്ചു. ചേട്ടന്‍റെ വിമാനം ഒരു തീ ഗോളമായി എരിഞ്ഞു തീർന്നു. അതോടൊപ്പം ചേച്ചിയുടെ ഭാവനകൾ, ആഗ്രഹങ്ങൾ, സ്നേഹം, ജീവിതം… ഇത്രയും പറഞ്ഞ് നിഖിൽ സോഫയിൽ കുഴഞ്ഞുവീണു.
നിഖിലിനു ബോധം തെളിഞ്ഞപ്പോൾ തലയ്ക്കൽ ഇരിക്കുന്ന അജിതയെയും മുന്നിലിരുന്ന് തന്നെ നിർന്നിമേഷയായി നോക്കിയിരിക്കുന്ന അഞ്ജലിയെയും കണ്ടു.
നിഖിൽ ഒറ്റയ്ക്ക് വന്നതുകൊണ്ട് എനിക്ക് അഞ്ജലിയെ വിളിപ്പിക്കേണ്ടിവന്നു.
അഞ്ജലിയെ കുറിച്ച് ചോദിക്കുന്തോറും നീ അസ്വസ്ഥനാകുമെന്ന് എനിക്കറിയില്ലായിരുന്നു. ഒരു തമാശ പറഞ്ഞാൽ ബോധക്കേട് ഉണ്ടാവുകയോ?
ചേച്ചി, ഞാൻ ചേച്ചിയെ എങ്ങനെ പറഞ്ഞു മനസ്സിലാക്കും? ശ്രീകാന്ത് ഏട്ടൻ…
നീ എന്താ കുറെ നേരമായിട്ട് ശ്രീകാന്ത് ഏട്ടന്‍റെ പേര് പറഞ്ഞു കൊണ്ടിരിക്കുന്നത്. നീ ബോധംകെട്ട് കിടക്കുന്നത് കണ്ട് അദ്ദേഹം ആറേഴു ഡോക്ടർമാരെ എങ്കിലും വിളിച്ചിട്ട് ഉണ്ടാവും. ഇപ്പോൾ അവരെയും പ്രതീക്ഷിച്ച് പുറത്ത് നിൽക്കുകയാണ്.
എന്താ, ചേച്ചി ഈ പറയുന്നത്?
നിഖിൽ എന്താ നിനക്ക് സുഖമില്ലേ? ജമ്മുവിൽ വച്ച് നിന്‍റെ ആരോഗ്യനില മോശമായിരുന്നില്ലെങ്കിൽ, നീയാകുമായിരുന്നു ഈ മത്സരത്തിൽ വിജയിയെന്ന് സി. ഒ. സാർ പറഞ്ഞു.
അപ്പോൾ ആ അപകടം, എയർ ക്രാഷ്… നിഖിൽ വിക്കി വിക്കി ചോദിച്ചു.
ഭയാനകം തന്നെ. ഓർക്കുമ്പോൾ പേടി തോന്നുന്നു. ഞാൻ പറപ്പിക്കുവാൻ ഉദ്ദേശിച്ചിരുന്ന ഒരു ആ വിമാനം നിമിഷനേരത്തിനുള്ളിൽ ഒരു തീഗോളമായി മാറി. നീ പോയതിനുശേഷം ഞാൻ കാന്‍റീനിലേക്ക് കാപ്പി കുടിക്കുവാൻ പോയി. അവിടെവച്ച് തട്ടി താഴെ വീണു കാലിൽ മുറിവ് ഉണ്ടായി. ഒപ്പം നീരും. ഞാൻ ഒരുപാട് നിർബന്ധിച്ചിട്ടും എനിക്ക് ഫ്ലയിങ്ങിനുള്ള അനുമതി നൽകിയില്ല. എനിക്ക് പകരം അത് സ്ക്വാഡ്റൺ ലീഡർ ശ്രീകാന്ത് മേനോൻ ആണ് നൽകിയത്. അങ്ങനെ എന്‍റെ മരണം സ്വയം ശ്രീകാന്ത് മേനോൻ ഏറ്റെടുക്കുകയായിരുന്നു. കഷ്ടം ആ ഓഫീസർ ഒരു കാരണവും കൂടാതെ കൊല്ലപ്പെട്ടു. നല്ല മനുഷ്യനായിരുന്നു അയാൾ. നിങ്ങളുടെ മെഡൽ ഞാൻ തട്ടിയെടുക്കും നോക്കിക്കോ എന്ന് പറഞ്ഞ് ഇറങ്ങിയതാണ്. വിധിവൈപരീതം… മെഡൽ അല്ല പകരം മരണമാണ് അയാൾ തട്ടിയെടുക്കാൻ പോകുന്നതെന്ന് കാര്യം ആർക്കും അറിയില്ലായിരുന്നല്ലോ…. ഇത് പറയുമ്പോൾ ശ്രീകാന്തിന്‍റെ കണ്ണ് നിറഞ്ഞു.
ഓ… അപ്പോൾ ഇങ്ങനെയൊക്കെയാണ് കാര്യങ്ങൾ. നിഖിലിനപ്പോൾ ഒരു പുതിയ ജന്മം ലഭിച്ച പോലെ തോന്നി.
