ചർമ്മത്തിന്‍റെയും മുടിയുടെയും സംരക്ഷണം പോലെ തന്നെ സൗന്ദര്യ സംരക്ഷണത്തിന്‍റെ ഭാഗമാണ് നഖ സംരക്ഷണം. എന്നാൽ എല്ലാവരെയും സംബന്ധിച്ച് ബ്യൂട്ടി പാർലറിൽ പോയി പെഡിക്യൂർ, മാനിക്യൂർ ചെയ്യുക എന്നത് സമയക്കുറവു മൂലം കഴിയണമെന്നില്ല. വീട്ടിൽ വളരെ മികച്ച രീതിയിൽ മാനിക്യൂർ, പെഡിക്യൂർ ചെയ്യാം. പെഡിക്യൂർ, മാനിക്യൂർ എന്നിവ എങ്ങനെ ചെയ്യാമെന്ന് അറിയാം. കൈകളും കാലുകളും സ്വാഭാവികമായും ദിവസേന വിവിധ വസ്തുക്കളുമായി സമ്പർക്കം പുലർത്തുന്നു. മലിനീകരണം, അഴുക്കും പൊടിയും, ഡിറ്റർജന്‍റ് എന്നിങ്ങനെ നിരവധി കാര്യം കൈകാലുകളുടെ സൗന്ദര്യം നഷ്ടപ്പെടുത്താം.
നഖങ്ങൾ ആഴത്തിൽ വൃത്തിയാക്കുന്നതിലൂടെ മാലിന്യം, മൃത ചർമ്മകോശങ്ങൾ എന്നിവ നീക്കം ചെയ്യപ്പെടാൻ സഹായിക്കും. സ്ക്രബ്ബിംഗും മസാജിംഗും വിരലുകളിലും കാൽവിരലുകളിലും രക്‌തചംക്രമണം വർദ്ധിപ്പിക്കാൻ സഹായിക്കും. കാലുകൾ വെള്ളത്തിൽ മുക്കിവയ്ക്കുന്നത് സമ്മർദ്ദം അകറ്റാൻ സഹായിക്കും.
മാനക്യൂർ, പെഡിക്യൂർ ചെയ്യുന്നതിനുള്ള ഘട്ടങ്ങൾ സമാനമാണ്.
സ്റ്റെപ്പ് 1
മാനിക്യൂർ, പെഡിക്യൂർ എന്നിവ ചെയ്യുന്നതിനായി ഉചിതമായ ഒരു സ്‌ഥലം തെരഞ്ഞെടുക്കുക. തറയിൽ ടവ്വൽ അല്ലെങ്കിൽ പത്രം വിരിച്ച് അതിൽ ഒരു സ്റ്റൂളോ കസേരയോ വയ്ക്കുക. തൊട്ടടുത്തായി ഉപയോഗിച്ച് രണ്ടിനും ആവശ്യമായ എല്ലാ സാമഗ്രികളും ഒരുക്കി വയ്ക്കുക. ബക്കറ്റിൽ വെള്ളം നിറച്ച് വയ്ക്കുക. പാദങ്ങളും കൈകളും നനയ്ക്കുന്നതിനായി മറ്റൊരു ബക്കറ്റിൽ പകുതി ചൂടുവെള്ളം നിറച്ച് വയ്ക്കുക. പെഡിക്യൂർ, മാനിക്യൂർ ചെയ്യുന്നതിന് മുമ്പ് വീര്യം കുറഞ്ഞ സോപ്പ് ഉപയോഗിച്ച് കൈകളും കാലുകളും നന്നായി കഴുകുക. ശേഷം ഒരു സാനിറ്റൈസർ ഉപയോഗിച്ച് കൈകളും കാലുകളും അണുവിമുക്തമാക്കാം.
സ്റ്റെപ്പ് 2
നെയിൽ പോളിഷ് റിമൂവറും കോട്ടൺ ബോളുകളും ഉപയോഗിച്ച് നെയിൽ പോളിഷ് നീക്കം ചെയ്യുക. ശേഷം ചൂടുവെള്ളം ഉള്ള ബക്കറ്റിൽ കാലുകളും കൈകളും മുക്കി 10 മിനിറ്റ് സോക്ക് ചെയ്യാം.
മികച്ച ഫലങ്ങൾക്കായി മാനിക്യൂർ സോക്ക് തയ്യാറാക്കാം. രണ്ട് മുട്ടയുടെ മഞ്ഞക്കരു, കാൽ കപ്പ് പാൽ, ഒരു ടേബിൾ സ്പൂൺ തേൻ എന്നിവ എടുക്കുക. ഒരു ചെറിയ പാത്രത്തിൽ ചേരുവകൾ നന്നായി യോജിപ്പിക്കുക. വിരലുകളും നഖങ്ങളും ഏകദേശം 10 മിനിറ്റ് നേരം അതിൽ മുക്കി വയ്ക്കുക. തുടർന്ന് നന്നായി കഴുകുക. പാലിൽ നിന്നുള്ള കാത്സ്യവും മുട്ടയിൽ നിന്നുള്ള പ്രോട്ടീനും നഖങ്ങളെ ശക്തമാക്കും. പെഡിക്യൂറിനായി രണ്ട് ടേബിൾ സ്പൂൺ ചെറുചൂടുള്ള വെളിച്ചെണ്ണ ചെറുചൂടുള്ള വെള്ളത്തിൽ ചേർത്ത് പാദങ്ങൾ 10 മിനിറ്റ് നേരം അതിൽ മുക്കി വയ്ക്കാം.
മൃതചർമ്മം നീക്കം ചെയ്യാൻ ഒരു സ്ക്രബ് ഉപയോഗിക്കാം. ഇതിനായി ഒരു സ്ക്രബ് തയ്യാറാക്കാം. ഒമ്പത് ടേബിൾ സ്പൂൺ തൈരിൽ ആറ് ടേബിൾ സ്പൂൺ പഞ്ചസാരയും ഏതാനും തുള്ളി നാരങ്ങാനീരും ചേർത്ത് നന്നായി ഇളക്കുക. ഇത് പാദങ്ങളിൽ പുരട്ടി രണ്ടോ മൂന്നോ മിനിറ്റ് നേരം മൃദുവായി മസാജ് ചെയ്യുക. ഇളം ചൂടുവെള്ളം ഉപയോഗിച്ച് കഴുകിക്കളയുക. രണ്ട് ടേബിൾ സ്പൂൺ പഞ്ചസാര ഏതാനും തുള്ളി നാരങ്ങാനീര്, മൂന്ന് ടേബിൾസ്പൂൺ തൈര് എന്നിവ യോജിപ്പിച്ച് സമാനമായ സ്ക്രബ് കൈകൾക്കായി ഉപയോഗിക്കാം.
സ്ക്രബ് ചെയ്‌തശേഷം കൈകളും കാലുകളും കഴുകി തുടച്ച് ഉണക്കുക. നഖങ്ങളുടെ അടിഭാഗത്തും ചുറ്റിലും വൃത്തിയാക്കാൻ നെയിൽ ബ്രഷ് ഉപയോഗിക്കുക. നെയിൽ ബ്രഷ് ഇല്ലെങ്കിൽ നന്നായി വൃത്തിയാക്കിയതും അണുവിമുക്തമാക്കിയതുമായ മൃദുവായ രോമമുള്ളതും വൃത്തിയുള്ളതുമായ ടൂത്ത് ബ്രഷ് അതിനായി ഉപയോഗിക്കാം.
സ്റ്റെപ്പ് 3
ക്യൂട്ടിക്കിൾ പുഷർ ഉപയോഗിച്ച് ക്യൂട്ടിക്കിളുകൾ മൃദുവായി പിന്നിലേക്ക് തള്ളുക. ക്യൂട്ടിക്കിൾ പുഷർ ഇല്ലെങ്കിൽ മൃദുവായ വാഷ്ക്ലോത്ത് ഉപയോഗിക്കാം. ബാക്ടീരിയകളിൽ നിന്നും അണുബാധകളിൽ നിന്നും നഖങ്ങളെ സംരക്ഷിക്കാൻ സഹായിക്കുന്നതിനാൽ പുറംതൊലിയ്ക്ക് ക്ഷതം ഏല്ക്കാതെ സൂക്ഷിക്കുക. പുറംതൊലി മൃദുവും ആരോഗ്യകരവുമാക്കാൻ അൽപം വെളിച്ചെണ്ണ പുരട്ടി നഖത്തിന് ചുറ്റുമുള്ള ചർമ്മത്തിൽ മസാജ് ചെയ്യുക. ഒരു നെയിൽ കട്ടർ ഉപയോഗിച്ച് നഖങ്ങൾ ആവശ്യമുള്ള നീളത്തിലും ആകൃതിയിലും മുറിക്കുക. എന്നിട്ട് നഖങ്ങൾ പ്രത്യേക നെയിൽ ഫയൽ അല്ലെങ്കിൽ നെയിൽ കട്ടറിലുള്ളത് ഉപയോഗിച്ച് ഫയൽ ചെയ്യുക. ഒരു വശത്ത് നിന്ന് മധ്യഭാഗത്തേക്കും പിന്നീട് മറുവശത്ത് നിന്നും മധ്യഭാഗത്തേക്കും വേണം നഖങ്ങൾ ഫയൽ ചെയ്യാൻ.
നഖങ്ങൾ ബഫർ ചെയ്യാം. ഇത് ഉപരിതലത്തെ മിനുസപ്പെടുത്തുകയും നഖങ്ങളിലെ മഞ്ഞ പാടുകൾ നീക്കം ചെയ്യുകയും ചെയ്യുന്നു. നെയിൽ ബഫർ ഇല്ലെങ്കിൽ സാധാരണ പേപ്പർ ഉപയോഗിക്കുക. വൃത്തിയുള്ള ഒരു വെള്ള പേപ്പർ എടുക്കുക. വൃത്താകൃതിയിൽ ഓരോ നഖത്തിലും ഇത് കൊണ്ട് തടവുക. കുറച്ച് ബദാം അല്ലെങ്കിൽ ഒലിവ് ഓയിൽ എടുത്ത് നഖങ്ങളിൽ പുരട്ടുന്നത് നഖങ്ങൾ മിനുസമാർന്നതും തിളക്കമുള്ളതുമായി മാറാൻ സഹായിക്കും.
സ്റ്റെപ്പ് 4
തുടർന്ന് കൈകൾക്കും കാലുകൾക്കും ഒരു പ്രത്യേക പരിചരണം നൽകേണ്ടതുണ്ട്. നന്നായി മസാജ് ചെയ്യുക. നല്ലൊരു മോയ്സ്ചറൈസിംഗ് ലോഷൻ എടുത്ത് കൈകളിലും കാലുകളിലും പുരട്ടുക. വൃത്താകൃതിയിൽ വേണം മസാജ് ചെയ്യാൻ. മസാജിനായി എത്ര സമയം വേണമെങ്കിലും എടുക്കാം. ലോഷനിൽ ഒന്നോ രണ്ടോ തുള്ളി എസ്സൻഷ്യൽ ഓയിൽ ചേർക്കുക. പഞ്ഞിയിൽ അല്പം നെയിൽ പോളിഷ് റിമൂവർ എടുത്ത് നഖങ്ങളിൽ ഉള്ള ലോഷനും മറ്റും തുടച്ച് വൃത്തിയാക്കുക. അതിനുശേഷം നഖങ്ങളിൽ ബേസ് കോട്ട് ഇടുക. ഇത് ഉണങ്ങിക്കഴിഞ്ഞാൽ ഇഷ്ടപ്പെട്ട ഷെയ്ഡിൽ ഉള്ള നെയിൽ പോളിഷ് എടുത്ത് ശരിയായി പുരട്ടുക. ശരിയായ കവറേജിനും വേഗത്തിൽ ഉണക്കുന്നതിനും പോളിഷ് തിൻ കോട്ടിംഗായി ഇടുക. ആദ്യത്തെ കോട്ടിംഗ് ഉണങ്ങിയ ശേഷം രണ്ടാമത്തെ കോട്ടിംഗ് അപ്ലൈ ചെയ്യാം. ഉണങ്ങിയ ശേഷം ടോപ്പ് കോട്ട് ഇടാം.
