ഫാഷൻ ട്രെന്‍റുകൾ ദിനം പ്രതി മാറി വരും. 2021 ലെ ഫാഷനെക്കുറിച്ച് പറഞ്ഞാൽ കംഫർട്ട ബിൾ ലുക്ക് നൽകുന്ന എന്തും ഫാഷനായി കരുതി എന്നതാണ് യാഥാർത്ഥ്യം. വർഷം അവസാനിക്കാൻ രണ്ട് മാസം കൂടി മാത്രം ബാക്കിയുള്ളപ്പോൾ വരും വർഷത്തെ ഫാഷൻ ട്രെന്‍റുകളെക്കുറിച്ചുള്ള പ്രതീക്ഷകൾ കുട വിടർത്തുകയാണ്. പ്രത്യേകിച്ചും കൊറോണക്ക് ശേഷം നോർമൽ ലൈഫിലേക്ക് ആളുകൾ തിരിച്ചു വരുന്ന സമയം ആണ്.
വർഷാന്ത്യത്തിലും പുതിയ വർഷത്തിന്‍റെ തുടക്കത്തിലും കംഫർട്ടബിൾ സ്കർട്ടുകൾ പെൺമനം കീഴടക്കുമെന്നാണ് ഫാഷൻ ഗുരുക്കളുടെ പ്രവചനം. ലോ വെയ്സ്റ്റിനെ മാറ്റി നിർത്തി ഹൈ വെയ്സ്റ്റ് ട്രൗസറുകളെയും, ഷോർട്ടുകളെയും ആൺമനം സ്നേഹിച്ചു തുടങ്ങിയിരിക്കുന്നു..
ഫാഷൻ സീക്വൻസുകളിൽ ഏറ്റവും അധികം ഉപയോഗിക്കപ്പെട്ടത് സ്ട്രൈപ്സുകളാണ്. ഗ്രാഫിക്സുകളും ഏറെ കണ്ടു. അസിമെട്രിക്കലായ പാറ്റേണുകളും കട്ടുകളും ഉള്ള വസ്ത്രധാരണരീതി കംഫർട്ടിബിളായി കരുതുന്നവർക്ക് ഫാഷൻ സ്റ്റാറുകളാകാൻ ഒട്ടും പ്രയാസമില്ല. വിദേശ ഫാഷൻ രംഗത്തെ ഇക്കുറി ഭരിച്ചത് അസിമെട്രിക്കൽ ഡിസൈനുകളാണ്.
തിളക്കം, മനോഹരം, സുഖകരം ഈ മൂന്ന് കാര്യങ്ങൾക്കാണ് യുവത്വം മുൻതൂക്കം നൽകുന്നത്. വ്യത്യസ്തമായ രീതിയിൽ ചെയ്ത സ്കർട്ടുകൾ, ഗൗണുകൾ, കുർതി, ടോപ്പ് ഇവയൊക്കെ നന്നായി സ്വീകരിക്കപ്പെട്ടതായി ഫാഷൻ ഡിസൈനർ അജയ് ഒബ്റോയ്. പക്ഷേ ഇത്തരം വസ്ത്രങ്ങൾ ലൈറ്റ് വെയ്റ്റ് ആണെന്നതും പ്രത്യേകതയാണ്. മാസ്ക് ധാരണത്തിനൊപ്പം ഈസി ആയി ശരീരത്തിന്ന് വായു ശ്വസിക്കാൻ കഴിയുന്ന വസ്ത്രം ആണ് പലർക്കും ലേറ്റസ്റ്റ് ഫാഷൻ. ധരിച്ചാൽ ഹെവിനസ് തോന്നുന്ന വസ്ത്രങ്ങളോട് യുവത്വം മാത്രമല്ല എല്ലാവരും മുഖം തിരിക്കുകയാണ്. ലൂസി പഫ്സ് ഉള്ള ടോപുകൾ ആണ് ഇപ്പോഴത്തെ മറ്റൊരു ട്രെൻഡ്.
ട്രൗസറുകളിലെ വിവിധ പരീക്ഷണങ്ങൾ: ജെഗ്ഗിംഗ്സ്, ബോട്ടംസ്പെവ്ലം സ്കർട്ട്സ്, ഷോർഡർ, കോളർ, നെക് ലൈൻ ഇവിടങ്ങളിൽ ചെറിയ ഡിസൈനുള്ള വസ്ത്രങ്ങൾ, ഷർട്ടുകൾ ഇവയൊക്കെ കുറച്ചുകാലം കൂടി ഓടും. ഇന്ത്യൻ ഫാഷൻ രംഗത്ത് ഡ്രേപ്സിന് എപ്പോഴും സ്ഥാനമുണ്ട്. എ-ലൈൻ ഡ്രസുകൾ, സ്ട്രയിറ്റ് ഫിറ്റഡ് ഡ്രസ് വിത്ത് ഡ്രേപ്സ്, ഫ്ളെയേഡ് അനാർക്കലീസ് ഇവയൊക്കെ ഔപചാരിക അവസരങ്ങളിൽ കൂടുതലായി ഉപയോഗിക്കപ്പെടുന്നുണ്ട്. ഈ വസ്ത്രങ്ങളുടെ നിർമ്മാണത്തിലുള്ള വിവിധ ഡീറ്റെയിംലിംഗിനാണ് മാർക്ക്! ഡീറ്റേയിലിംഗ് എത്ര സൂക്ഷ്മമാണോ അത്രയും ഗംഭീരമാകും വസ്ത്രം!
“ലളിതവും ക്ലാസിക്കുമായ കട്ടുകൾ ആണ് ഞാൻ കൂടുതലും ഉപയോഗിക്കുക. എന്നാൽ ഒരല്‌പം ഭാവന ചേർത്താൽ ഉദാഹരണത്തിന് ഹെവി ബ്രൈറ്റ് നിറമുള്ള വസ്ത്രത്തിൽ കളർ ബ്ലോക്കിംഗ് ചെയ്താൽ കണ്ണുകൾക്ക് ആശ്വാസം തോന്നും ആ മാറ്റം.” ട്രെൻഡ് സെറ്റർ ഫാഷൻ ഡിസൈനർ രാജ്ദീപ് പറയുന്നു.
സിൽക്ക് വെൽവെറ്റിൽ എംബ്രോയ്ഡറി, പിച്ചള ബട്ടനുകൾ, മുത്തുകൾ, കല്ലുകൾ ഇവയൊക്കെ ഫാഷൻ ലോകം വളരെയധികം ഉപയോഗിച്ചു. വരാൻ പോകുന്ന സീസണിലും വെൽവെറ്റും സ്റ്റഡും നവതരംഗം തീർക്കുമെന്നാണ് ഫാഷൻ ഡിസൈനർമാരുടെ പ്രത്യാശ. വസ്ത്രധാരണത്തിൽ ആക്സസറീസുകളിലുള്ള പ്രാധാന്യം കുറഞ്ഞു പോയ ഫാഷൻ സീസൺ ആണിത്. ആ ട്രെന്‍റ് ഇനിയും തുടരാൻ സാധ്യത ഉണ്ട്. എന്തായാലും മധ്യകാലഘട്ടത്തിലെ ആഭരണ ശൈലികൾ ആണ് ഇനി തരംഗമാകാൻ പോകുന്ന ആക്സസറീസ്.
ഡിജിറ്റൽ, ഫ്ലോറൽ ഡിസൈനുകളും ഇപ്പോൾ ട്രൻഡി ആണ്. സിംപിൾ പക്ഷേ ഫണ്ണി, ഇതാണ് ഡിജിറ്റൽ പ്രിന്‍റ് നൽകുന്ന ഇംപ്രഷൻ. കഫ്താൻ, മാക്സി, പെൻസിൽ സ്കർട്ട് തുടങ്ങിയവയിൽ ഡിജിറ്റൽ പ്രിന്‍റ് കൂൾ ലുക്ക് പകരും.
ഗ്രാഫിക്‌സും സ്ട്രൈപ്സും ജ്യോമെട്രിക്കൽ പ്രിന്‍റും നിറഞ്ഞ കളർഫുൾ റാമ്പ് അതാണ് ഇപ്പോഴത്തെ ട്രെൻഡ് എന്ന് ഫാഷൻ ഡിസൈനർ അർച്ചന കൊച്ചർ പറയുന്നു. അനിമൽ പ്രിന്‍റ് ഉള്ള വസ്ത്രങ്ങൾ ഉണ്ടെങ്കിൽ അത് മടക്കി മാറ്റി വയ്ക്കണ്ട. വരുന്ന സീസണിലും അത് ഹിറ്റായിരിക്കും. ഇൻഡോ വെസ്റ്റേൺ പാറ്റേൺ ആണ് ഫാഷൻ രംഗത്ത് കൂടുതൽ പേർ തെരഞ്ഞെടുക്കുന്നത്. അസിമെട്രിക്കൽ പാറ്റേൺ ഉള്ള ട്യൂണിക്സും കുർത്തകളും സ്വീകരിക്കപ്പെട്ടു. ജ്യോമെട്രിക്ക്, സിംഗിൾ ഫ്ളോറൽ തുടങ്ങിയ ഡിസൈനുകൾക്ക് വളരെയധികം ആരാധകർ ഇപ്പോഴുമുണ്ട്.
പരിസ്ഥിതി സൗഹൃദമുള്ള ഫാഷൻ ട്രെന്‍റുകൾക്കും യുവത്വം പ്രാധാന്യം നൽകുന്നുണ്ട്. പ്രകൃതിദത്തമായ നിറങ്ങളും കൈത്തറിത്തുണികളും ഉപയോഗിച്ചുള്ള ഫാഷനബിൾ വസ്ത്രങ്ങൾക്ക് കൂടുതൽ ഡിമാന്‍റ് വരുന്നു. ഇന്ത്യൻ ഹാന്‍റ്ലൂമിന് വികസിക്കാനുള്ള ഒരു മാർഗം കൂടിയാണ് ട്രെന്‍റിയായ വസ്ത്ര നിർമ്മാണരംഗത്തേക്ക് കടന്നുവരുമ്പോൾ ലഭിക്കുന്നത്. വരും വർഷം അത്തരം ഒരു കുതിച്ചുചാട്ടം ഫാഷൻ രംഗത്തും ഹാന്‍റ്ലൂം രംഗത്തും ഉണ്ടാകുമെന്നാണ് ഡിസൈനർ ഗൗതം ഗുപ്ത ചൂണ്ടിക്കാട്ടുന്നത്.
എത്ത്നിക് ഫ്യൂഷൻ ഗൗണുകൾ, സ്റ്റിച്ചഡ് സാരി, ഹാഫ്സാരി, ഷോർട്ട്സാരി, തുടങ്ങിയവ ആഘോഷവേളകളിലേക്ക് കൂടുതൽ സ്റ്റൈലിഷായി കൊണ്ടുവരികയാണ് ഫാഷൻ രംഗം.
ഫാഷൻ രംഗത്ത് ഫ്ളൂറസെന്‍റ് നിറങ്ങളുടെ പരീക്ഷണവും വിജയിച്ചു. ഫാഷൻ സങ്കൽപ്പങ്ങളിൽ ഒരിക്കലും ഒളി മങ്ങാത്ത നിറമാണ് വെള്ള. വൈബ്രന്‍റ് നിറമാണ് താൽപര്യമെങ്കിൽ ഓറഞ്ച്, കോറൽ റെഡ്, ബ്ലഷ് പിങ്ക്, ആപ്പിൾ ഗ്രീൻ, മഞ്ഞ, നീല ഇവയാണ് അഭികാമ്യം. ക്രിസ്പ് വൈറ്റ് ആന്‍റ് ബ്ലാക്ക് കോമ്പിനേഷനും വളരെ സുരക്ഷിതമായ ഫാഷൻ ട്രെന്‍റാണ്. കളർ ട്രെന്‍റിൽ ഇപ്പോൾ മെറ്റാലിക് നിറങ്ങൾക്കും പ്രാധാന്യമുണ്ട്.
കളർ ബ്ലോക്കിംഗ് എന്ന തന്ത്രമാണ് ഇപ്പോഴത്തെ ഫാഷൻ ഡിസൈനർമാർ പ്രയോഗിക്കുന്നത്. വളരെ കടുത്ത നിറമുള്ള ഒരു ഫാബ്രിക്കിൽ അതിനെ കോൺട്രാസ്റ്റ് ചെയ്യുന്ന മറ്റൊരു കളർ ഉപയോഗിച്ചാണ് കളർ ബ്ലോക്കിംഗ് ചെയ്യുന്നത്. മെറ്റാലിക് നിറങ്ങളിൽ കൂടുതൽ ഫാഷൻ സെൻസ് സൃഷ്ടിക്കാൻ കളർ ബ്ലോക്കിംഗ് ഉപയോഗിക്കാം.
എന്തായാലും ഇന്ത്യൻ വസ്ത്രധാരണരീതിയിൽ നിറങ്ങൾക്ക് വളരെയധികം പ്രാധാന്യമുണ്ട്. പിങ്ക്, പർപ്പിൾ, ബ്ലൂ, ഗ്രീൻ, യെല്ലോ നിറങ്ങൾക്ക് കൂടുതൽ ആവശ്യക്കാരുണ്ടായേക്കുമെന്നാണ് ഫാഷൻ ഗുരുക്കളുടെ കണക്കുകൂട്ടൽ.
