പെട്ടെന്ന് ഏതെങ്കിലും വിശേഷാവസരത്തിന് പോകേണ്ടി വരുമ്പോഴാവും മിക്കവരും ഡ്രസ്സിനെപ്പറ്റി ഓർത്ത് ടെൻഷനടിക്കുക. ഏത് നിറത്തിൽ ഏത് സ്റ്റൈലിലുള്ള ഡ്രസ്സ് വേണം? വാർഡ്രോബിൽ ഡ്രസ്സുകൾ ഇഷ്‌ടം പോലെയുണ്ടാകുമെങ്കിലും അവയിൽ നിന്നും പറ്റിയ ഒരെണ്ണം തെരഞ്ഞെടുക്കുകയെന്നത് പ്രയാസകരമായിരിക്കും. അഥവാ കൂട്ടത്തിൽ നല്ലതെന്ന് കരുതി അണിഞ്ഞു കൊണ്ടു പോകുന്ന ഡ്രസ്സ് ഇണങ്ങുന്നതല്ലെങ്കിൽ പിന്നെ പറയുകയും വേണ്ട. ഉള്ള സന്തോഷം തന്നെ ഇല്ലാതാകും. ഇത്തരം അനുഭവം എല്ലാവർക്കും ഉണ്ടാകാറുണ്ട്. ഇങ്ങനെയുള്ള പ്രശ്നം ഒഴിവാക്കാനുള്ള ചില വഴികളുണ്ട്.
വാർഡ്രോബ് ബ്ലൻഡേഴ്സിൽ നിന്നും രക്ഷപ്പെടാം
ഭൂരിഭാഗം സ്ത്രീകളും സ്വന്തം വാർഡ്രോബ് ചിട്ടയായി വയ്‌ക്കാറില്ല. ഡ്രസ്സുകളൊക്കെ വലിച്ചുവാരിയാവും വയ്ക്കുക. വാർഡ്രോബ് അലങ്കോലപ്പെട്ടിരിക്കാൻ അനുവദിക്കാതെ ഓരോ ഡ്രസ്സും ചിട്ടയായി അടുക്കി വയ്ക്കുന്നതാണ് സമയലാഭവും സൗകര്യവും ഉണ്ടാക്കുക.
നിരീക്ഷിക്കാം
ഇടയ്ക്ക് സമയം കിട്ടുമ്പോഴൊക്കെ വാർഡ്രോബിലെ ഡ്രസ്സുകൾ പരിശോധിക്കാം. പരിശോധന വേളയിൽ ഏതെങ്കിലും ഡ്രസ്സ് അൺഫിറ്റോ ഔട്ട് ഡേറ്റഡായോ ഫാഷനബിൾ അല്ലാത്തതായോ തോന്നുന്നുവെങ്കിൽ വാർഡ്രോബിൽ നിന്നും ഉടനടി മാറ്റുക. വിശേഷാവസരങ്ങളിൽ അനുയോജ്യമായ ഡ്രസ്സ് തെരഞ്ഞെടുക്കുന്ന വേളകളിൽ ഇത്തരം ഡ്രസ്സുകൾ ബുദ്ധിമുട്ട് സൃഷ്ടിക്കും.
ആഗ്രഹം ഉപേക്ഷിക്കുക
മിക്കവരും അൺഫിറ്റായതും ഔട്ട് ഡേറ്റായതും സുഖപ്രദമല്ലാത്തതും സ്റ്റൈലിഷ് അല്ലാത്തതുമായ ഡ്രസ്സുകൾ വാർഡ്രോബിൽ കരുതി വയ്ക്കുന്നത് അവയുമായുള്ള ചില പ്രത്യേക ഓർമ്മകളുടെ പേരിലാവും. ഉദാ: ഗിഫ്റ്റ് കിട്ടിയതോ അതുമല്ലെങ്കിൽ ഏറെ വില കൊടുത്ത് വാങ്ങിയതോ അങ്ങനെ വല്ലതുമാകാം. ഇത്തരം ഡ്രസ്സുകൾ അണിയാൻ താൽപര്യമില്ലെങ്കിൽ സെന്‍റിമെന്‍റ്സ് ഒഴിവാക്കി അവ വാർഡ്രോബിൽ നിന്നും മാറ്റുന്നതാണ് ഉചിതം.
ആൽബം തയ്യാറാക്കാം
സ്വന്തം കയ്യിൽ ഏതെല്ലാം തരം ഡ്രസ്സുകൾ ഉണ്ട്, ഏതെല്ലാം നിറങ്ങളിൽ, പ്രിന്‍റുകളിൽ എന്നിങ്ങനെയുള്ള കാര്യങ്ങൾ മിക്കവർക്കും ഓർമ്മയുണ്ടാവില്ല. ചിലർ ചില ഡ്രസ്സുകളെക്കുറിച്ച് മറന്നു തന്നെ പോയേക്കാം. ഇതിന് ഒരു എളുപ്പ വഴിയുണ്ട്. മൊബൈലിൽ ഓരോ ഡ്രസ്സിന്‍റെയും ഫോട്ടോ എടുത്ത് ആൽബമായി സൂക്ഷിക്കുക. ആവശ്യമുള്ള സമയത്ത് ആൽബം ഓപ്പൺ ചെയ്‌ത് ഡ്രസ്സുകൾ പരിശോധിച്ച് യോജിച്ച ഒരെണ്ണം തെരഞ്ഞെടുക്കാം.
ഇനി ഡ്രസ്സ് വാങ്ങാൻ ഷോപ്പിൽ പോവുകയാണെങ്കിൽ ഈ ചിത്രങ്ങൾ പരിശോധിച്ച് തീർത്തും വ്യത്യസ്‌ത സ്റ്റൈലിലും കളറിലുമുള്ള ഡിഫറന്‍റ് പ്രിന്‍റിലുള്ളത് തെരഞ്ഞെടുക്കാം.
വാർഡ്രോബ് പരിപാലനം
വാർഡ്രോബിന് പല അറകളുണ്ടാകാം. കാഷ്വൽ ഡ്രസ്സ്, പാർട്ടി ഡ്രസ്സ്, ഹെവി ഡ്രസ്സ്, ഒഫീഷ്യൽ ഡ്രസ്സ് എന്നിങ്ങനെ വേർതിരിച്ച് ഓരോന്നും പ്രത്യേകം അറകളിലായി സൂക്ഷിക്കാം. ആവശ്യമുള്ളപ്പോൾ അനായാസമായി ഡ്രസ്സ് തെരഞ്ഞെടുക്കാൻ ഇത് സഹായിക്കും.
ഹോംവർക്ക്
ഷോപ്പിംഗിന് പോകും മുമ്പേ നല്ല ഹോംവർക്ക് ചെയ്യുക. സാധ്യമെങ്കിൽ ഏത് സ്റ്റൈലിലുള്ളത്, കളർ, ബജറ്റ് തുടങ്ങിയ കാര്യങ്ങൾ മുൻകൂട്ടി നിശ്ച യിച്ച് ഷോപ്പിൽ പോകാം. കാഷ്വൽ, ഒഫീഷ്യൽ, ഹെവി അല്ലെങ്കിൽ പാർട്ടിവെയർ ഇവയിൽ ഏത് തരം ഡ്രസ്സാണ് വാങ്ങുന്നതെന്ന കാര്യം കൂടി ഉറപ്പിക്കുക.
നമ്പർ ഓഫ് ഡ്രസ്സ്സ്
വാർഡ്രോബിൽ ഡ്രസ്സുകളുടെ എണ്ണം കൂട്ടുന്നതിന് പകരമായി ക്വാളിറ്റിയ്ക്ക് പ്രാധാന്യം നൽകുക. ഭൂരിഭാഗം പേരും ക്വാളിറ്റി നോക്കുന്നതിന് പകരമായി എണ്ണത്തിന് പ്രാധാന്യം നൽകി കാണാറുണ്ട്. അത്തരക്കാരുടെ വാർഡ്രോബ് നിറഞ്ഞ് നിൽക്കുമെങ്കിലും വിശേഷാവസരത്തിന് യോജിച്ചവ ഉണ്ടാകണമെന്നില്ല. കാഷ്വൽ, ഒഫീഷ്യൽ, ഹെവി ഡ്രസ്സുകൾ എന്നിവയുടെ എണ്ണത്തിലും ശ്രദ്ധിക്കുക. പാർട്ടി ഡ്രസ്സ്, ഹെവി ഡ്രസ്സ് എന്നിവയുടെ എണ്ണം കൂടുന്നതും കാഷ്വൽ, ഒഫീഷ്യൽ ഡ്രസ്സുകളുടെ എണ്ണം കുറഞ്ഞിരിക്കുന്നതും നന്നല്ല.
ഡ്രസ്സിന്‍റെ ഫിറ്റിംഗ്
ഡ്രസ്സിന് എത്ര തന്നെ വില ആയിക്കൊള്ളട്ടെ അതിന്‍റെ ഫിറ്റിംഗ് ശരിയല്ലെങ്കിൽ അത് അണിഞ്ഞതു കൊണ്ട് പ്രയോജനമുണ്ടാകണമെന്നില്ല. അതു കൊണ്ട് ശരീരത്തിന് അനുസരിച്ചുള്ള ഡ്രസ്സ് തെരഞ്ഞെടുക്കുക. എന്നാലേ അത് നന്നായി ഇണങ്ങൂ. മറ്റൊരാൾക്ക് നന്നായി ഇണങ്ങുന്ന ഡ്രസ്സ് നിങ്ങൾക്ക് ഇണങ്ങണമെന്നില്ല. അതുകൊണ്ട് ഷോപ്പിൽ വച്ച് സ്വയം അണിഞ്ഞ് പരിശോധിച്ച ശേഷം വാങ്ങുക. ഒറ്റത്തവണത്തേക്ക് മാത്രം അണിഞ്ഞാൽ മതിയല്ലോ എന്ന് കരുതി ഡ്രസ്സ് വാങ്ങിക്കരുത്. ഏത് അവസരത്തിലേക്കുള്ളതായാലും ശരി അണിഞ്ഞ് നോക്കി യോജിച്ചതാണെങ്കിൽ മാത്രം വാങ്ങുക. അല്ലാതെ വാങ്ങിക്കൊണ്ടു വന്നശേഷം ഇഷ്‌ടമില്ലാതെ വാർഡ്രോബിൽ വച്ചിട്ട് എന്തു ഫലം.
നിറങ്ങൾ തെരഞ്ഞെടുക്കുമ്പോൾ
എല്ലാ നിറങ്ങളും എല്ലാവർക്കും ഇണങ്ങണമെന്നില്ല. അതുകൊണ്ട് ഡ്രസ്സിട്ട ശേഷം നാച്ചുറൽ ലൈറ്റിൽ സ്വയം നിറം പരിശോധിച്ച് നോക്കുക. ഏത് നിറത്തിലുള്ള ഡ്രസ്സാണ് ശരീരത്തിന് ഗ്ലോ തരുന്നത് എന്നറിയുക. അത്തരം നിറം തെരഞ്ഞെടുക്കാം.
എക്സ്ക്ലുസീവ് ഡ്രസ്സ്
എക്സ്ക്ലുസീവ് ഡ്രസ്സുകളുടെ കാലമാണിപ്പോൾ. അതുകൊണ്ട് ആരെയും അനുകരിക്കാതിരിക്കുക. സ്വന്തമായ ഒരു സ്റ്റൈൽ സൃഷ്ടിക്കുക. ടിവി സീരിയൽ താരത്തെയോ അല്ലെങ്കിൽ ഏതെങ്കിലും സിനിമ നായികയെയോ ഇക്കാര്യത്തിൽ കോപ്പി ചെയ്യരുത്. സ്വന്തം പ്രായം, പ്രൊഫഷൻ, കോംപ്ലക്ഷൻ തുടങ്ങിയവയ്‌ക്ക് അനുസരിച്ച് ഡ്രസ്സ് തെരഞ്ഞെടുക്കാം.
വിൻഡോ ഷോപ്പിംഗ്
സമയം കിട്ടുമ്പോൾ വിൻഡോ ഷോപ്പിംഗ് ചെയ്യുക. വിൻഡോ ഷോപ്പിംഗ് വഴി പുതിയ ട്രെന്‍റ്, റേറ്റ് തുടങ്ങിയ കാര്യങ്ങൾ മനസ്സിലാക്കുക. ഒപ്പം ഔട്ട്ഡേറ്റഡ് ആയ ഡ്രസ്സ് വാർഡ്രോബിൽ നിന്നും ഒഴിവാക്കുകയും ചെയ്യാം.
ഡ്രസ്സിന്‍റെ പരിചരണം
ഡെയ്‍ലി വിയർ ഡ്രസ്സുകൾ പ്രത്യേകം മാറ്റി വയ്ക്കുക. അവയുടെ വൃത്തി കാര്യത്തിൽ പ്രത്യേകം ശ്രദ്ധ നൽകാം. ഹെവി ആന്‍റ് പാർട്ടി വെയർ ഡ്രസ്സുകൾ ഡ്രൈക്ലീൻ ചെയ്യിക്കാം. ഏതെങ്കിലും ഡ്രസ്സിന്‍റെ തയ്യൽ വിട്ടു പോയിട്ടുണ്ടെങ്കിൽ അത് ഉടനടി റിപ്പയർ ചെയ്യിക്കാം. ജറി, മുത്തുകൾ എന്നിവ ഇളകിയിട്ടുണ്ടെങ്കിൽ അത് കൃത്യമായി റിപ്പയർ ചെയ്‌ത് മോടി കൂട്ടുക. കുറേ ഡ്രസ്സുകൾ ഒരു കൂമ്പാരമായി വാർഡ്രോബിൽ വയ്ക്കരുത്.
വാർഡ്രോബിൽ ഓരോ ഡ്രസ്സും കൃത്യമായ ഇടങ്ങളിൽ അടുക്കി ചിട്ടയോടെ വയ്ക്കുക. ഹാങ്കറിൽ ഇടേണ്ടവ ഹാങ്കറിൽ കൃത്യമായി തൂക്കിയിടുക. ഒരിക്കൽ അണിഞ്ഞ ഡ്രസ്സ് പുറത്ത് ഇളം വെയിലിലിട്ട് വിയർപ്പ് മണം മാറിയ ശേഷം മടക്കി വയ്ക്കുക. തുണികൾക്കിടയിൽ നാഫ്തലീൻ ബോൾസ് ഇടാം. പാറ്റ, കീടങ്ങൾ തുടങ്ങിയവയുടെ ശല്യമുണ്ടാകില്ല.
