നമുക്കെല്ലാം സോഷ്യൽ മീഡിയ അക്കൗണ്ടുകളിൽ ദിവസേന നിരവധി സന്ദേശങ്ങൾ ലഭിക്കുന്നുണ്ട്. അടുത്തിടെ ഒരു നാവിക ഗ്രൂപ്പിൽ നിന്ന് ലഭിച്ച അത്തരം ഒരു വാട്ട്‌സ്ആപ്പ് സന്ദേശമാണ് തിരുവനന്തപുരത്ത് നിന്നുള്ള ആരോമൽ എന്ന കുട്ടിയെ ശ്രദ്ധിക്കാൻ ഇടയായത്. ലോകത്തെ വിവിധ യുദ്ധക്കപ്പലുകളുടെ മനോഹരമായ മോഡലുകളുമായി ഒരു നാവിക വിദഗ്ദ്ധനെപ്പോലെ വളരെ ആത്മവിശ്വാസത്തോടെ വിശദീകരിക്കുന്നതാണ് വീഡിയോ. വെറും 15 വയസ്സ് പ്രായമുള്ള ഈ കുട്ടി നാവിക പശ്ചാത്തലമില്ലാതെ, നാവിക യുദ്ധക്കപ്പലുകളെക്കുറിച്ചു നേടിയെടുത്ത അസാധാരണമായ അറിവ് എടുത്തു പറയേണ്ടതാണ്. വിവിധതരം യുദ്ധക്കപ്പലുകളെക്കുറിച്ചും അവയുടെ പ്രവർത്തനത്തെക്കുറിച്ചും ആരോമൽ വളരെ കൃത്യമായ വിവരങ്ങൾ ശേഖരിച്ചു കൊണ്ടാണ് മോഡലുകൾ ഉണ്ടാക്കിയിരിക്കുന്നത്. നാവികസേനയിൽ ജോലി ചെയ്തിരുന്ന ഒരാൾ എന്ന നിലയിൽ എനിക്ക് ഈ കുട്ടിയെ കുറച്ചുകൂടി മനസിലാക്കാൻ ജിജ്ഞാസ തോന്നി. അങ്ങനെ ആണ് വാട്സപ്പ് ഗ്രൂപ്പിൽ കൊടുത്തിരുന്ന ഫോൺ നമ്പറിൽ വിളിച്ചു ആരോമലിനെ പരിചയപ്പെടുന്നത്. സാധാരണക്കാരായ അച്ഛനമ്മമാരുടെ മകനായ ആരോമലിന്‍റെ അസാധരണമായ കഴിവുകൾ ആരോമലിനോട് തന്നെ ചോദിച്ചു മനസിലാക്കാം.
നാവികസേനയെ കുറിച്ച് ഇത്രയേറെ വിവരങ്ങൾ എങ്ങനെ ആണ് മനസിലാക്കിയത്?
ഇന്ത്യയുടെ അതിശക്തമായ ആയുധങ്ങളെക്കുറിച്ച് തിരയുന്നതിനിടയിൽ ഗൂഗിളിൽ നിന്ന് ഐ‌എൻ‌എസ് വിക്രമാദിത്യയുടെ ഒരു ചിത്രം ഞാൻ കണ്ടു. ഞാൻ യഥാർത്ഥത്തിൽ മിസൈലുകളെയും മറ്റ് ആയുധങ്ങളെയും കുറിച്ച് തിരയുകയായിരുന്നു. അതിനുമുമ്പ് നാവികസേനയെയും യുദ്ധക്കപ്പലുകളെയും കുറിച്ച് എനിക്ക് കാര്യമായ അറിവില്ലായിരുന്നു. ആ ചിത്രം കണ്ട ശേഷം ഞാൻ ഇന്ത്യയിലെ നാവിക കപ്പലുകളെക്കുറിച്ച് കൂടുതൽ തിരഞ്ഞു. യുദ്ധക്കപ്പലുകളെക്കുറിച്ചുള്ള വിവരങ്ങൾ കൂടുതൽ അറിയാൻ ഇത് എനിക്ക് പ്രേരണ ആയി. എനിക്ക് സ്കെയിൽ ചെയ്ത മോഡലുകൾ ഇഷ്ടമാണ്. അതിനാൽ ഞാൻ ചെറിയ മോഡലുകൾ നിർമ്മിക്കാൻ തുടങ്ങി. ഐ‌എൻ‌എസ് വിക്രമാദിത്യയായിരുന്നു എന്‍റെ ആദ്യത്തെ മോഡൽ യുദ്ധക്കപ്പൽ.
എന്‍റെ കുടുംബത്തിൽ നാവിക ഓഫീസർമാരൊന്നും ഇല്ല. അതിനാൽ ഗൂഗിളിൽ നിന്ന് ഞാൻ ഈ വിവരങ്ങൾ ശേഖരിക്കുകയായിരുന്നു. കൂടുതൽ വിശദമായി പഠിക്കാൻ വിക്കിപീഡിയ ഉപയോഗിച്ചു..
ഭാവിയിൽ ഈ മേഖലയിൽ ഫോക്കസ് ചെയ്യാൻ ഉദ്ദേശിക്കുന്നുണ്ടോ
അതേ. ഇന്ത്യൻ നാവികസേനയിൽ ചേരാൻ ഞാൻ ആഗ്രഹിക്കുന്നു. കാരണം ഒരു നാവിക കപ്പലിൽ ജോലി ചെയ്യുന്നത് അഭിമാനകരമാണ്. ഒരു യുദ്ധക്കപ്പൽ നിർമ്മിക്കുന്നതിൽ പങ്കാളിയാകുന്നത് വലിയൊരു പ്രിവിലേജ് ആണ്... മറൈൻ എഞ്ചിനീയർ ആവാൻ എനിക്ക് ഇഷ്ടമാണ്.+ 2 ന് ശേഷം യുപി‌എസ്‌സി എഴുതാൻ ആഗ്രഹിക്കുന്നു. അതിനാൽ ഇപ്പോൾ കണക്ക്, ഭൗതികശാസ്ത്രം, രസതന്ത്രം എന്നിവയിൽ ശ്രദ്ധ കൊടുക്കുന്നുണ്ട്. ഞാൻ വ്യായാമവും ആരംഭിച്ചു. ഇന്ത്യൻ നാവികസേനയിൽ ചേർന്ന് കൂടുതൽ പഠിക്കാൻ ഞാൻ ആഗ്രഹിക്കുന്നു.
ഇന്ത്യൻ നാവികസേന ഉപയോഗിക്കുന്ന സാങ്കേതികവിദ്യകളെ കുറിച്ച് എന്താണ് അഭിപ്രായം?
ഇന്ത്യൻ സാങ്കേതികവിദ്യകൾ വളരെ വേഗത്തിൽ വികസിപ്പിക്കുന്നുണ്ട്. എങ്കിലും കൂടുതൽ കരുത്തുറ്റതാക്കാൻ കൂടുതൽ ആധുനിക സാങ്കേതികവിദ്യകൾ ഇനിയും നമ്മുടെ യുദ്ധ കപ്പലുകളിൽ വേണം എന്ന് ഞാൻ കരുതുന്നു. ഡയറക്റ്റ് എനർജി ലേസർ എയർ പ്രതിരോധ സംവിധാനങ്ങൾ നമ്മുടെ യുദ്ധക്കപ്പലുകൾക്ക് മുതൽക്കൂട്ടാകും. ആധുനിക സാങ്കേതികവിദ്യകളുള്ള പുതിയ യുദ്ധക്കപ്പലുകളുടെ വരവ് നമ്മുടെ നാവികസേനയെ ശക്തമാക്കുന്നു. നാവികസേനയ്ക്ക് കൂടുതൽ മിസൈൽ ലോഞ്ചിങ് പാഡുകൾ ആവശ്യമാണ്. ബ്രാമോസ് മിസൈൽ സംവിധാനം മികച്ചതാണ്. എങ്കിലും ഞാൻ വിശ്വസിക്കുന്നു, നമുക്ക് ഇപ്പോൾ ഉള്ളതിനേക്കാൾ മികച്ചത് ചെയ്യാൻ കഴിയും.
