സൗമ്യ പാണ്ഡ്യ ഠാക്കൂർ വൈറ്റ് ബ്രഷ് ആർട്ടിസ്റ്റാണ്. അഹമ്മദാബാദിലെ കാങ്കരിയ ലേക്കിനോടു ചേർന്ന റോഡിൽ അവർ വരച്ച പെർമെനന്‍റ് ത്രിഡി പെയിന്‍റിംഗ് ഫേസ് ബുക്കിൽ വൈറലായതോടെയാണ് സൗമ്യ താരമായത്. ദൂരെ നിന്നു കണ്ടാൽ എന്തോ ഒരു തടസ്സം റോഡിലുണ്ടെന്ന് തോന്നുന്ന വിധത്തിലുള്ള പെയിന്‍റിംഗ് ആണിത്. പാഞ്ഞു വരുന്ന ഏതു വാഹനവും ഈ പെയിന്‍റിംഗിനു മുന്നിൽ ബ്രെയ്ക്ക് ചവിട്ടി പോകും. ഹൈവേ ഫോർ റോഡ് സേഫ്റ്റിക്കു പുറമെ, സേവ് നേച്ചർ, പ്രമോട്ട് ഹെറിറ്റേജ് എന്നിവയാണ്. സൗമ്യയുടെ ത്രീഡി പെയിന്‍റിംഗ് വിഷയങ്ങൾ.
അക്വാ ഷാഡോ പെയിന്‍റിംഗ് ചെയ്തതിന് ലിംകാ ബുക്ക് ഓഫ് റെക്കോർഡ്സിൽ ഇടം നേടിയിട്ടുണ്ട്. ഇതിനകം 50 അവാർഡുകൾ ഈ നേട്ടത്തിനു ലഭിച്ചു.
സൗമ്യയുടെ ത്രീഡി ആർട്ട് വർക്കിന്‍റെ തുടക്കം തന്നെ വളരെയധികം ശ്രദ്ധിക്കപ്പെട്ടിരുന്നു. മണിനഗറിലെ കരിയറിലേക്ക് സ്ട്രീറ്റിൽ വരച്ച ത്രീഡി പെയിന്‍റിംഗിലൂടെയാണ് സൗമ്യ ഈ രംഗത്ത് തുടക്കം കുറിച്ചത്. അതിന് ശേഷം ഇന്ത്യയിലെ ഏറ്റവും വിശാലമായ ത്രീഡി ഹൈവേ പെയ്ന്റിംഗ് ഈ വർഷം വരച്ചു. ഈ ആർട്ട് വർക്കും ലിംകാ ബുക്ക് ഓഫ് റെക്കോർഡിൽ രേഖപ്പെടുത്തപ്പെട്ടു. സബർമതി ഫെസ്റ്റിവലിൽ, വേൾഡ് ഹെറിറ്റേജ് സൈറ്റ് സന്ദർശിക്കുന്ന റാണിയുടെ ത്രീഡി ചിത്രം, കാക്കരിയ കാർണിവലിൽ ഇന്ത്യൻ ഹെറിറ്റേജ് പ്രമോട്ട് ചെയ്യുന്ന ജമാ മസ്ജിദിന്‍റെ ത്രീഡി മോഡൽ, സൈപറോ ആർട്ട് വർക്ക് എന്നിവ ചെയ്‌തു. ഹാർലി ഡേവിഡ്സൺ ബൈക്ക് കമ്പനിക്കുവേണ്ടി വരച്ച ത്രീഡി പെയ്ന്റിംഗ് സൗമ്യ ചെയ്ത ആർട്ട്വർക്കുകളിൽ ഏറ്റവും മികച്ചതാണ്.
ബബിൾ പെയ്ന്റിംഗ്
വെള്ളത്തുള്ളിയിൽ പ്രതിഫലിക്കാറുള്ള ഇളം നീല നിറമാണ് സൗമ്യയ്ക്ക് പ്രിയങ്കരം. ബബിൾസ് ബ്യൂട്ടി സൃഷ്ടിക്കാൻ ആയി പുതിയ സാങ്കേതിക വിദ്യ സൗമ്യ കണ്ടെത്തിയിട്ടുണ്ട്. രാസവസ്‌തുക്കളുടെ പ്രത്യേക മിശ്രണത്തിലൂടെ ബബിൾസ് ക്രിയേറ്റ് ചെയ്യുന്നു. അവയെ സ്പർശിക്കാൻ കഴിയും. അതേസമയം ഭിത്തിയിൽ ബബിളുകൾ ഒട്ടിക്കാനും കഴിയും.
സാധാരണ രീതിയിലുള്ള ആർട്ട് വർക്കുകളെ മറികടന്ന് ഓരോ കാര്യങ്ങൾ ചെയ്യാനാണ് സൗമ്യക്കിഷ്ടം. പരിസ്‌ഥിതി ദിനത്തിൽ ഗുജറാത്തിൽ സൗമ്യ ചെയ്ത ഷാഡോ പെയിന്‍റിംഗ് ഒരു ലക്ഷം പേരാണ് കാണാനെത്തിയത്.
ഹെറിറ്റേജ് പെയിന്‍റിംഗ്
വൈറ്റ് ബ്രഷ് ഉപയോഗിച്ച് നിരവധി ഹെറിറ്റേജ് ആന്‍റ് വില്ലേജ് ആർട്ട്‍വർക്ക് ഈ കലാകാരി ചെയ്‌തു കഴിഞ്ഞു. പാരമ്പര്യവും ആധുനികതയും സമന്വയിപ്പിച്ച ത്രിഡി ഇഫക്ട് ആർട്ട് വർക്കുകൾ എലീസ് ബ്രിഡ്ജ്, കോട്ടകൾ, വിന്‍റേജ് ക്ലോക്കുകൾ, കാർ, ബൈക്ക് ഇവയെ കേന്ദ്രീകരിച്ചാണ്. പ്രകൃതിയെ രക്ഷിക്കൂ എന്ന സന്ദേശവുമായി എല്ലാ വർഷവും സൗമ്യ കലാപ്രദർശനം നടത്താറുണ്ട്.
റോഡ് സുരക്ഷയ്ക്കായി സൗമ്യ വരച്ച ത്രീഡി പെയ്ന്റിംഗ് ലോകമെമ്പാടും പ്രിയങ്കരമായപ്പോഴാണ് അതിന്‍റെ സ്രഷ്ടാവിനെ ലോകം തെരഞ്ഞത്. അതിന് മുമ്പും നിരവധി അവാർഡുകൾ സൗമ്യ നേടിയിട്ടുണ്ടായിരുന്നു.
“സ്വന്തം സമയം പ്രോഗ്രസീവായി ഉപയോഗിക്കാൻ ഓരോ വ്യക്‌തിക്കും കഴിയണം. പെൺകുട്ടികൾക്ക് സ്വന്തം സമയം സ്വന്തം ഇഷ്‌ടപ്രകാരം വിനിയോഗിക്കാൻ പലപ്പോഴും പ്രതിബന്ധങ്ങളുണ്ടാകാറുണ്ട്. അവരെ ആ പ്രതിബന്ധങ്ങൾ മറികടക്കാൻ കുടുംബവും സമൂഹവും സഹായിച്ചാൽ അദ്ഭുതങ്ങൾ സൃഷ്ടിക്കാൻ പെൺകുട്ടികൾക്ക് കഴിയും” സൗമ്യ പറയുന്നു.
