എന്റമ്മേടെ ജിമിക്കി കമ്മൽ… ഈ പാട്ട് ഇറങ്ങിയ ശേഷം ആഭരണക്കടകളിലൊക്കെ പൂർവാധികം ശക്തമായി ജിമിക്കി കമ്മൽ പ്രേമം പൊടിപൊടിക്കുകയാണ്. ഇത് ഒരു ട്രെന്റാണ്. കാലത്തിനനുസരിച്ച് അതിവേഗം മാറുന്ന ഫാഷൻ ട്രെന്റിൽ പെട്ട ഒരു കാര്യം. വസ്ത്രങ്ങളായാലും ആക്സസറീസ് ആയാലും ഓരോ കാലത്തും മാറിക്കൊണ്ടിരിക്കും. ശരീരത്തിനിണങ്ങുന്ന നല്ലൊരു വസ്ത്രം ധരിക്കുന്നതാണോ ഏറ്റവും മികച്ച ഫാഷൻ? മറ്റുള്ളവരിൽ നിന്ന് വ്യത്യസ്തമായ ലുക്ക് വേണമെന്നാഗ്രഹിക്കുന്നവർ ഫോളോ ചെയ്യേണ്ട വാക്കാണ് ഫാഷൻ.
ശരീരത്തിനിണങ്ങുന്ന വസ്ത്രം ധരിക്കുന്നതിൽ മുതൽ വിരലിലണിയുന്ന മോതിരത്തിൽ വരെ ഫാഷൻ ക്രിയേറ്റ് ചെയ്യുകയോ ഫോളോ ചെയ്യുകയോ ആവാം. പക്ഷേ അത് ഫാഷൻ ആയി ഫീൽ ചെയ്യണമെങ്കിൽ അതു ശരിക്കും ഇണങ്ങുന്ന ആൾ തന്നെ ഉപയോഗിക്കണമെന്നു മാത്രം.
ഫാഷൻ സ്റ്റൈൽ എന്നു പറയുമ്പോൾ ഏറ്റവും ലളിതമായി ശ്രദ്ധിക്കേണ്ട ചില കാര്യങ്ങൾ ഉണ്ട്. ഇതേക്കുറിച്ച് ഫാഷൻ സ്റ്റൈലിസ്റ്റ് ആയ റിനി പ്രദീപ് പറയുന്നത് ഇങ്ങനെയാണ്. “ഫാഷനിൽ ഓരോ വ്യക്തിയും യൂണീക്ക് ആണ്.” ഫാഷൻ ഡിസൈനിംഗും ഗാർമെന്റ് ടെക്നോളജിയും പഠിച്ച ശേഷം വനിതാ മാഗസിനുകൾക്കു വേണ്ടി ഫ്രീലാൻസ് ഫാഷൻ ഫോട്ടോഷൂട്ട് ചെയ്യാറുള്ള റിനിയുടെ ആദ്യത്തെ വർക്ക് ബേൺ മൈ ബോഡി എന്ന ലഘുചിത്രമാണ്. പ്രദീപ് ജോർജ് ആണ് ജീവിതപങ്കാളി. റിനിക്ക് ഏറ്റവും ഇഷ്ടപ്പെട്ട ഫാഷൻ ഐക്കൺ സോനം കപൂർ ആണ്. “സോനത്തിന്റെ ഫാഷൻ സ്റ്റൈൽസും സെൻസും അമേസിംഗ് ആണ്.”
“ഒരു വ്യക്തിക്കും അനുകരണീയമല്ല മറ്റൊരാളുടെ ഫാഷൻ. കാരണം ഒരേ വസ്ത്രം തന്നെ ധരിച്ചാലും രണ്ട് പേർക്ക് രണ്ട് ലുക്ക് ആയിരിക്കും. മറ്റൊരാൾ ധരിച്ച ഡ്രസ്സ് കണ്ട് ആ സ്റ്റൈൽ തനിക്കും വേണം എന്നാഗ്രഹിച്ച് ഫോളോ ചെയ്തിട്ട് കാര്യമില്ല. തനിക്കിണങ്ങുന്ന ഫാഷനും സ്റ്റൈലും സ്വയം മനസ്സിലാക്കാൻ കഴിയുന്നില്ലെങ്കിൽ ഫാഷൻ സ്റ്റൈലിസ്റ്റിന്റെ സഹായം തേടാവുന്നതാണ്. ഫാഷനിൽ ഓരോ വ്യക്തിയും യൂണീക്ക് ആയതിനാൽ രൂപമോ, പ്രായമോ ബാധകമല്ല.
40 വയസ്സു കഴിഞ്ഞാൽ മിനിസ്കർട്ടോ ഛെ! 50 കഴിഞ്ഞാൽ സ്ലീവ്ലസ് ഡ്രസ് മോശം! ഇങ്ങനെയൊക്കെ ചിന്തിക്കാൻ വരട്ടെ. പ്രായവും ഫാഷനും തമ്മിൽ ബന്ധമുണ്ട് എന്ന് ചിന്തിക്കുന്നവരാണ് ഭൂരിഭാഗവും. പ്രത്യേകിച്ചും സ്ത്രീകൾ. പക്ഷേ 9 വയസ്സു മുതൽ 90 വയസ്സു വരെയുള്ളവർ ജീൻസ് ധരിക്കുന്ന നാട്ടിൽ ഏതു വസ്ത്രമാണ് പ്രായത്തിന് ചേരാത്തത് എന്ന് ചിന്തിച്ച് മാറ്റി വയ്ക്കേണ്ടത്? 50 കളിൽ പോലും നല്ല ഷേപ്പ് ഉള്ളവർക്ക് ഏതു ഡ്രസ്സും അണിയാം.
ഫാഷൻ എന്നുപറഞ്ഞാൽ ആഡംബരമെന്നോ, ആധുനികമെന്നോ ചിന്തിക്കുന്നവരോട് പറയാൻ ഒരു കാര്യമേയുള്ളൂ. ഒരു വ്യക്തിക്ക് ഇണങ്ങുന്നതെന്തും ഫാഷൻ ആക്കാം. 30 വയസ്സുള്ള ഒരു സ്ത്രീക്ക് ചേരാത്ത മാക്സി ഡ്രസ്സ് ചിലപ്പോൾ പെർഫെക്ട് ഷേപ്പുള്ള 50 കാരിക്കും ചേർന്നേക്കാം. അത്രേയുള്ളൂ ഫാഷൻ സ്റ്റൈൽ. ഉദ്യോഗസ്ഥർക്ക് ഇളം നിറങ്ങളിലുള്ള വസ്ത്രങ്ങളാണ് കൂടുതൽ ഇണങ്ങുക. ഇളം നിറങ്ങൾ എപ്പോഴും ക്ലാസി ലുക്ക് നൽകും. ജ്വല്ലറിയും വാച്ചും പരമാവധി സിംപിൾ ആകുമ്പോൾ എലഗൻസ് കൂടും.
കോളേജിലൊക്കെ പോകുന്ന ടീനേജ് പ്രായത്തിലാണ് എന്തു ധരിക്കണമെന്ന കാര്യത്തിൽ കൂടുതൽ ടെൻഷൻ ഉണ്ടാകുന്നത്. പണം ഒത്തിരി ചെവലഴിക്കാതെ പരമാവധി സ്റ്റൈലിഷാകാനാണ് അവർക്ക് ആഗ്രഹം. ഇങ്ങനെയുള്ളപ്പോൾ ഏറ്റവും നല്ല വഴി സ്വയം ഒരു ഡിസൈനറാകാൻ ശ്രമിക്കുക എന്നതാണ്. മെറ്റീരിയൽ വാങ്ങിയ ശേഷം ഇഷ്ടം തോന്നുന്ന ഡിസൈനുകൾ സ്വയം വരച്ചു നോക്കുക. തയ്യൽക്കടയിൽ ചെന്നിട്ട് ഈ സ്കെച്ച് കൊടുത്താൽ തരക്കേടില്ലാതെ സ്വന്തം ശരീരത്തിന് ഭംഗിയായി സ്യൂട്ട് ചെയ്യുന്ന വസ്ത്രങ്ങൾ സൃഷ്ടിക്കാം. മാർക്കറ്റിൽ കിട്ടുന്നതിലും കുറഞ്ഞ വിലയിൽ ഡിസൈനർ വസ്ത്രങ്ങൾ ധരിക്കാൻ ഇതാണ് പോംവഴി.
ഓരോന്നും മാച്ച് ആവുക എന്ന കൺസെപ്റ്റ് ഇപ്പോൾ മാറി വന്നിട്ടുണ്ട്. മിക്സ് മാച്ച് ആണ് ഇപ്പോഴത്തെ ട്രെന്റ്. കയ്യിലുള്ള ഏതു ഡ്രസ്സും മിക്സ് മാച്ച് ചെയ്യാം. സ്വയം ഇണങ്ങുന്നതാണെന്ന ബോധ്യം ഉണ്ടെങ്കിൽ അതും കിടിലൻ ഫാഷനാക്കാം.
മെൻസ് ഫാഷൻ പൂർണ്ണമായും കണ്ടംപററി സ്റ്റൈൽ ആയി എന്നു പറയാം. നെഹ്റു ജാക്കറ്റിനും കുർത്തയ്ക്കുമൊക്കെ ഇപ്പോൾ നല്ല പ്രിയമാണ്. മുൻകാലങ്ങളെ അപേക്ഷിച്ച് നോക്കിയാൽ ഈ ട്രെന്റിന് ഡിമാൻഡ് കൂടി വരികയാണ്. നിറങ്ങളെ കുറിച്ച് പറയുമ്പോൾ മോണോ കളറുകൾക്കാണ് താൽപര്യം. ബ്ലാക്ക്, വൈറ്റ്, ഗ്രെ, കോൾ തുടങ്ങിയ നിറങ്ങളാണ് മെൻ ഫാഷൻ ഇപ്പോഴും സ്റ്റൈലിഷ് ആക്കുന്ന നിറങ്ങൾ. ബോയ്സ് ആക്സസറീസും ഒരുപാട് മാറ്റം കൊണ്ടു വന്നിട്ടുണ്ട്. ബേസിക് മെറ്റൽ റിംഗ്, ബീഡ്സ് മാല, കമ്മൽ, റിസ്റ്റ് ബാന്റ് ഇതൊക്കെ കൂൾ ലുക്ക് തരുന്ന നോർമൽ ആക്സസറീസായിക്കഴിഞ്ഞു.
കൗമാരക്കാർക്കിടയിൽ മാത്രമല്ല പ്രായഭേദമെന്യേ എല്ലാവരും ഇഷ്ടപ്പെടുന്ന പോപ്പുലർ ഡിസൈനാണ് അസിമെട്രിക്കൽ പാറ്റേൺസ്. പോംപോം, ടസൽസ്, ട്രഡീഷണൽ മോട്ടിഫ്സ് എല്ലാം ഇപ്പോൾ ട്രെൻഡി ആണ്. വില കൂടിയ ഡ്രസ്സുകൾ വാങ്ങേണ്ടി വരുമ്പോൾ ട്രെന്റ് ഔട്ട് ആകാത്ത സ്റ്റൈലുകളും നിറങ്ങളും തെരഞ്ഞെടുക്കാം. വെള്ള ടീഷർട്ട് കുർത്തയുമൊക്കെ ഡെനിം, സ്കാർവ്സ്, ഷ്രഗ്സ് ഇവയുടെ ഒപ്പം ധരിക്കാവുന്നതാണ്.
എവർഗ്രീൻ ഫാഷൻ
മാക്സി ഡ്രസ്സുകൾ ഫിള്പ്ഡ് നിറ്റ്ടോപ്പ്, ഷർട്ട് ഡ്രസ്സ്, ലോംഗ് സ്ലീവ്ഡ് ബ്ലൗസ് ഇതൊക്കെ 80-90 ഫാഷനിൽ നിന്ന് കളം മാറി വന്നതു തന്നെ. 70കളിൽ തരംഗമായിരുന്ന ലൂസ് പാന്റിന്റെ പുത്തൻ വേർഷനാണ് പലാസോ. ഈ വസ്ത്രം ഏത് അവസരത്തിനും ഉപയോഗിക്കാം. “പലാസോയിൽ എനിക്ക് ഏറ്റവും ഇഷ്ടപ്പെട്ട ചോയിസ് പോൾക്കാ ഡോട്ട്സ് ആണ്. അത് എല്ലാ ടോപ്പുകളുമായി മാച്ച് ചെയ്യും. അതിനൊരു ഡ്രമാറ്റിക് ലുക്ക് നൽകാനും കഴിയും.”
ഇന്ത്യൻ വസ്ത്രങ്ങൾക്ക് തന്നെയാണ് വിവാഹാവസരങ്ങളിൽ ഡിമാന്റ്. എന്നാൽ ട്രഡീഷണൽ കളറുകളിൽ നിന്ന് ന്യൂജനറേഷൻ മാറിച്ചിന്തിക്കുന്നു. പേസ്റ്റൽ, മിന്റി ഗ്രീൻ, സെസ്റ്റി ഓറഞ്ച് തുടങ്ങിയ നിറങ്ങൾ ഓവറോൾ ലുക്കിന് തിളക്കം നൽകുന്നു. മിനിമം വർക്കുള്ള, കംഫർട്ട് ഡ്രസ്സിംഗിലേക്ക് വിവാഹ വസ്ത്രവും മാറിക്കഴിഞ്ഞു.
