ഒരു വീടിന്‍റെ ഹൃദയഭാഗമാണ് അടുക്കള. വീട്ടിലെ ആരോഗ്യത്തിന്‍റെ ഉറവിടം. അലങ്കോലപ്പെട്ട് കിടക്കുന്ന അടുക്കള കാണുമ്പോൾ എന്തെങ്കിലും പാചകം ചെയ്‌ത് കഴിക്കാനുള്ള മൂഡ് തന്നെ പോകും. അടുക്കും ചിട്ടയും വൃത്തിയും വെടിപ്പുമുള്ള ഒരു അടുക്കളയിലാണെങ്കിലോ ഉത്സാഹവും ഉന്മേഷവും ഞൊടിയിടയിൽ നിറയും അല്ലേ... അതോടെ പാചകവും ഗംഭീരവുമാകും.
നിറം
അടുക്കളയ്ക്ക് ഇണങ്ങുന്ന കളർ തെരഞ്ഞെടുക്കുക പ്രധാനമാണ്. കാരണം ഈ നിറം അടുക്കളയുടെ മൊത്തം ലുക്കിനെ തന്നെ മാറ്റിമറിക്കും. അടുക്കളയ്ക്കായി ഇളം നിറം തെരഞ്ഞെടുക്കുന്നതാണ് നല്ലത്. വയലറ്റ് അല്ലെങ്കിൽ പച്ച തുടങ്ങി ഇരുണ്ട നിറങ്ങൾ ഒഴിവാക്കാം. മനസ്സിനിഷടം തോന്നുന്ന അന്തരീക്ഷമൊരുക്കാൻ അതിന് പകരമായി മഞ്ഞ, ലെമൺ യെല്ലോ, പീച്ച് തുടങ്ങിയ നിറങ്ങൾ തെരഞ്ഞെടുക്കാം.
ടൈൽസ്
അലങ്കാരങ്ങളുള്ള കിച്ചൺ ടൈലുകൾ ചുവരുകളുടെ നല്ലൊരു ഭാഗം മറച്ച് ചുവരുകളിൽ അഴുക്ക് പറ്റിപിടിക്കാതെ സഹായിക്കുന്നു. മാത്രവുമല്ല ടൈലുകൾ അടുക്കളയ്ക്ക് ചന്തം പകരുകയും ചെയ്യും. സെറാമിക്, പ്രിൻഡ് സെറാമിക്, റസ്റ്റിക്ക്, ഗ്ലോസി സീരിസ്, ഡിജിറ്റൽ വാൾ ടൈൽസ് തുടങ്ങിയ ഇഷ്ടമുള്ള വെറൈറ്റി തെരഞ്ഞെടുക്കാം. ഫലങ്ങളുടെ ചിത്രങ്ങളും മറ്റ് വിഭവങ്ങളുടെ ചിത്രങ്ങളും ആലേഖനം ചെയ്ത ടൈൽസും ഇഷ്‌ടമുള്ളവർക്ക് ചൂസ് ചെയ്യാം.
ജനാലകൾ
ഒരു അടുക്കളയുടെ പ്രധാനപ്പെട്ട ഭാഗമാണ് ജനാല. അതുകൊണ്ട് ഏറ്റവും വെറൈറ്റിയിലുള്ള ഇഷ്‌ടപ്പെട്ട ജനാല തന്നെ പിടിപ്പിക്കാം. പ്രകൃതിദത്തമായ പ്രകാശം ഉള്ളിലേക്ക് കടത്തി വിടുകയാണ് ജനാലയുടെ ധർമ്മം. ഒപ്പം ഫ്രഷ് വായുവും. സൺബ്ലൈൻഡ് ഡിസൈനിലുള്ള ജനാലകൾക്ക് ഇപ്പോൾ പ്രിയമേറിയിരിക്കുകയാണ്. അടുക്കളയുടെ അഴക് വർദ്ധിപ്പിക്കാൻ ഇന്‍റീരിയർ ഡിസൈനർമാർ സൺബ്ലൈൻഡ് വിൻഡോയാണ് ഇപ്പോൾ അധികവും ഉപയോഗിക്കുന്നത്
ചിമ്മിനി
കിച്ചൺ ചിമ്മിനിയിൽ ഓരോ വർഷവും കുറെ മാറ്റം ഉണ്ടാകാറുണ്ട്. മാത്രവുമല്ല ഇതിന് ഡിമാന്‍റും കൂടി വരികയാണ്. കാരണം മൊഡ്യുളാർ കിച്ചണിന്‍റെ ഏറ്റവും അനിവാര്യമായ ഭാഗമാണിത്. കിച്ചൺ ചിമ്മിനി പ്രധാനമായും 3 തരം ഫിൽറ്റേഴസിനൊപ്പമാണ് ലഭിക്കുക. കാസറ്റ് ഫിൽറ്റർ, കാർബൺ ഫിൽറ്റർ, ബൈഫൽ ഫിൽറ്റർ. ഇതിൽ ബൈഫൽ ഫിൽറ്ററാണ് ഇന്ത്യൻ അടുക്കളക്ക് അനുയോജ്യം
കിച്ചൺ കൗണ്ടർ ടോപ്പ്
ശരിയായ കിച്ചൺ ടോപ്പ് തെരഞ്ഞെടുക്കുക വഴി കിച്ചണിന് സ്റ്റൈലൻ ലുക്ക് കൈവരുമെന്ന് മാത്രമല്ല അടുക്കള ജോലി ഈസിയുമാകും. ഗ്രാനൈറ്റ് കിച്ചൺ ടേബിൾ അല്ലെങ്കിൽ ടോപ്പ് ആണിപ്പോൾ ട്രെൻഡി. എന്നാൽ മാർബിൾ (ബ്ലാക്ക്, വൈറ്റ്) അതുമല്ലെങ്കിൽ പലതരം ചൈനാ ക്ലേയും വിപണിയിൽ ലഭിക്കുന്നുണ്ട്. കിച്ചൺ കൗണ്ടർ ടോപ്സിൽ കോംപാക്റ്റ് ക്വാർട്ടേഴ്സ് പോലുള്ളവയും ട്രെൻഡാണ്.
പ്രകാശം
അടുക്കളയിലെ പ്രകാശ സംവിധാനവും പ്രധാനമാണ്. അതുകൊണ്ട് അടുക്കളയുടെ സമ്പൂർണ്ണ നവീകരണത്തിനായി മികച്ച ക്വാളിറ്റിയിലുള്ള ലാംപ്, ബൾബ് എന്നിവ ഫിക്‌സ് ചെയ്യാം. എൽഇഡി, ഹാലോജൻ കിച്ചൺ ലൈറ്റുകൾക്കും ഇപ്പോൾ പ്രിയമേറിവരികയാണ്.
കിച്ചൺ കാബിനറ്റ്
കിച്ചൺ സ്റ്റോറേജിനെക്കുറിച്ചാണ് പറയുന്നതെങ്കിൽ കിച്ചൺ കാബിനറ്റ്സ് ഏറ്റവും പ്രധാനമാണ്. പ്രീലാമിനേറ്ററ്റ് പാർട്ടിക്കിൾ ബോർഡ്സ്, ഹാർഡ്‍വുഡ്, മറൈൻ പ്ലൈ, ഹൈബ്രിഡ് വുഡ്, പ്ലാസ്റ്റിക്ക് കോമ്പോസിറ്റ് എന്നിവ മികച്ച ചോയിസുകളാണ്. അടുക്കളയിലെ ഇത്തരം അലങ്കാരങ്ങൾക്കും ഉപാധികൾക്കും പുറമെ കിച്ചൺ കെറോസെല്ലും ഉപയോഗിക്കാം. അതുപോലെ സ്‌ഥലം ലാഭിക്കാനായി യോജിച്ച ടേബിളും വാങ്ങി അടുക്കളയ്ക്ക് മോടി കൂട്ടാം.
