നമ്മുടെ വീടുകളിൽ ഏറ്റവും സുലഭമായി കിട്ടുന്ന ഒന്നാണ് കഞ്ഞിവെള്ളം. കാരണം അരിയാഹാരമാണല്ലോ നമ്മുടെ പ്രധാന ഭക്ഷണം. എന്നാൽ ഭൂരിഭാഗംപ്പേരും ചോറ് വാർത്തു കഴിഞ്ഞാലുടൻ ഈ കഞ്ഞി വെള്ളം എടുത്ത് കളയും. നാം നിസ്സാരമെന്ന് കരുതുന്ന ഈ കഞ്ഞി വെള്ളത്തിന് ചില അദ്ഭുത ഗുണങ്ങളുണ്ടെന്ന കാര്യം എത്രപ്പേർക്കറിയാം. ആരോഗ്യത്തിനും സൗന്ദര്യത്തിനും ഉത്തമമായ പാനീയമാണ് കഞ്ഞിവെള്ളം.

ഒരു എനർജി ഡ്രിങ്ക് പോലെ ഒരു ഗ്ലാസ് കഞ്ഞിവെള്ളം കുടിക്കുന്നത് ക്ഷീണമകറ്റും ആവശ്യമെങ്കിൽ കഞ്ഞി വെള്ളത്തിൽ മുറിച്ച പൊദീനയിലയും വറുത്ത ജീരകപൊടിയും ഇന്തുപ്പും ചേർത്ത് ഒരു ടേസ്റ്റി ഡ്രിങ്കുമാക്കാം.
കഞ്ഞിവെള്ളം കുടിക്കുന്നത് ശരീരത്തിന്‍റെ താപമാനത്തെ സന്തുലിതമായി നിലനിർത്തും. വേനൽക്കാലത്ത് ഇതിന്‍റെ ഉപയോഗം ഗുണകരമാണ്.
മലബന്ധമകറ്റാനും കഞ്ഞിവെള്ളം കുടിക്കുന്നത് സഹായിക്കും.
കാർബോഹൈഡ്രേറ്റിന്‍റെ മികച്ച കലവറയാണ് കഞ്ഞിവെള്ളം.
അൾഷിമർ പോലെയുള്ള പ്രശ്നങ്ങൾ തടയുന്നതിന് ദിവസവും ഒരു ഗ്ലാസ് കഞ്ഞിവെള്ളം കുടിക്കുന്നത് നല്ലതാണ്.
ഡയറിയയുള്ളപ്പോൾ കഞ്ഞിവെള്ളം കുടിക്കുന്നത് ഉത്തമമാണ്. ഇത് കുട്ടികൾക്കും മുതിർന്നവർക്കും ഒരുപോലെ ഗുണം ചെയ്യും.
ഗ്യാസ് സംബന്ധമായ പ്രശ്നങ്ങളുള്ളവർക്ക് കഞ്ഞിവെള്ളം നല്ലതാണ്.

കഞ്ഞിവെള്ളം ആരോഗ്യ ദായിനി മാത്രമല്ല നല്ലൊരു സൗന്ദര്യ വർദ്ധക കൂടിയാണ്. കഞ്ഞിവെള്ളത്തിൽ ധാരാളം പോഷകങ്ങളും ധാതുക്കളും അടങ്ങിയിരിക്കുന്നതാണ് കാരണം.

കഞ്ഞിവെള്ളം നല്ലൊരു ഫേഷ്യൽ ക്ലീനർ ആയി ഉപയോഗിക്കാം. പഞ്ഞി കൊണ്ട് കഞ്ഞി വെള്ളത്തിൽ മുക്കി മുഖത്ത് പുരട്ടി മൃദുവായി കൈകൊണ്ട് മസാജ് ചെയ്യുക. ഉണങ്ങിയ ശേഷം മുഖം കഴുകി വൃത്തിയാക്കുക. ഇത് പതിവായി ഉപയോഗിക്കുന്നതിലൂടെ ചർമ്മം വൃത്തിയുള്ളതും മൃദുലവുമാകും. ഒപ്പം ചർമ്മത്തിന് നല്ല മൃദുത്വവും തിളക്കവും കിട്ടും.
ഫേഷ്യൽ ടോണറായി ഇത് ഉപയോഗിക്കാം. കോട്ടൺ ബോൾ കഞ്ഞി വെള്ളത്തിൽ മുക്കി ചർമ്മത്തിൽ പുരട്ടുക. ചർമ്മത്തിലെ തുറന്ന സുഷിരങ്ങളെ അടച്ച് ചർമ്മത്തിന് മുറുക്കം നൽകും. ഒപ്പം ചർമ്മത്തിന് നല്ല തിളക്കവും കിട്ടും.
മുഖക്കുരുവുള്ള ചർമ്മത്തിന് ഇതേറ്റവും ഗുണപ്രദമായിരിക്കും.
കഞ്ഞി വെള്ളത്തിലുള്ള സ്റ്റാർച്ച് മൂലിക എക്സിമയെ ഭേദപ്പെടുത്തും.
വൃത്തിയുള്ള കോട്ടൺ തുണി കഞ്ഞിവെള്ളത്തിൽ മുക്കി എക്സിമയുള്ളയിടത്ത് തുണി പൊത്തി വച്ചിരിക്കുക. തുണിയുണങ്ങി കഴിയുമ്പോൾ വീണ്ടും അതാവർത്തിക്കുക. പതിവായി ചെയ്യുന്നതിലൂടെ നല്ല മാറ്റം ഉണ്ടാകും.
വെയിലേറ്റ് കരുവാളിച്ച ചർമ്മത്തിൽ തണുത്ത കഞ്ഞിവെള്ളം പുരട്ടുക. നല്ല പ്രയോജനമുണ്ടാകും.
മുടിയുടെ ആരോഗ്യവും സൗന്ദര്യവും വർദ്ധിപ്പിക്കാനും നിലനിർത്താനും കഞ്ഞിവെള്ളം പതിവായി ഉപയോഗിക്കുക. മുടി ഷാംപൂ ചെയ്ത ശേഷം കഞ്ഞിവെള്ളം തലയിൽ പുരട്ടി മൃദുവായി മസാജ് ചെയ്യുക. ശേഷം തണുത്ത വെള്ളം കൊണ്ട് തല കഴുകാം. നല്ല പ്രയോജനമുണ്ടാകും. ആഴ്ചയിൽ 1-2 തവണ ഇപ്രകാരം ചെയ്യാം.
നല്ലൊരു ഹെയർ കണ്ടീഷണറും കൂടിയാണ് കഞ്ഞിവെള്ളം. ഇതിൽ ഏതാനും തുള്ളി ലാവണ്ടർ അല്ലെങ്കിൽ റോസ്മെറി ഓയിൽ ചേർത്ത് മുടിയിൽ പുരട്ടുക. 10 മിനിറ്റിനു ശേഷം തലകഴുകുക.
കഞ്ഞിവെള്ളം നല്ലൊരു ആന്‍റി ഓക്സിഡന്‍റ് കൂടിയാണ്. ഈർപ്പത്തേയും അൾട്രാവയലറ്റ് രശ്മികളേയും വലിച്ചെടുക്കാനുള്ള ക്ഷമത അതിനുണ്ട്. അതുപോലെ ചർമ്മത്തിലുണ്ടാവുന്ന വരകളേയും ചുളിവുകളേയും തടയാൻ ഫലവത്താണിത്.
ചർമ്മത്തിലെ നീറ്റലും ചുവന്ന പാടുകളും അകലാൻ തണുത്ത കഞ്ഞി വെള്ളമുപയോഗിച്ച് കഴുകുക.
കേശപരിചരണത്തിനായി കഞ്ഞിവെള്ളം പതിവായി ഉപയോഗിക്കുന്നത് മുടിയ്ക്ക് കരുത്തും തിളക്കവും പകരും. അതുപോലെ മുടി പൊട്ടുന്നത് തടയുകയും ചെയ്യും, മുടിയ്ക്ക് നല്ല നീളവും ഉണ്ടാകും. മികച്ച ഫലം കിട്ടാൻ മുടിയിൽ 20 മിനിറ്റ് നേരം കഞ്ഞിവെള്ളം പുരട്ടിയിരിക്കുക. അതിനു ശേഷം തണുത്ത വെള്ളം കൊണ്ട് കഴുകുക.

ഇനി മുതൽ ചോറ് വാർത്തു കഴിഞ്ഞാൽ കഞ്ഞിവെള്ളം കളയാൻ വരട്ടെ. കഞ്ഞിവെള്ള് ഒരു പാത്രത്തിലൊഴിച്ച് ഫ്രിഡ്ജിൽ സൂക്ഷിക്കുക. ഇപ്രകാരം 4-5 ദിവസം വരെ കഞ്ഞിവെള്ളം സൂക്ഷിച്ച് വയ്ക്കാം. ഉപയോഗിക്കും മുമ്പ് നന്നായി ഇളക്കുക.