ഒരാളുടെ പാദം കണ്ടാൽ അറിയാം, അയാളുടെ ആരോഗ്യവും ശുചിത്വശീലവും എന്നാണ് ചൊല്ല്. പാദങ്ങളുടെ ശരിയായ പരിപാലനം, വളരെയധികം രോഗങ്ങളിൽ നിന്ന് നമ്മെ രക്ഷിക്കുകയും ചെയ്യും. പാദങ്ങൾ സുന്ദരവും സുരക്ഷിതവുമാക്കാൻ ഇതാ ചില ടിപ്സ്.
പാദങ്ങൾക്കും ശ്വസിക്കണം
കുളി കഴിഞ്ഞ് ഈർപ്പമുള്ള പാദങ്ങൾ നന്നായി തുടച്ച് ഉണക്കിയ ശേഷമേ ചെരിപ്പ്, ഷൂ ഇവ ധരിക്കാവൂ. നനഞ്ഞ പാദത്തിൽ ബാക്ടീരിയയുടെ സാന്നിദ്ധ്യം ഉണ്ടാകാൻ എളുപ്പമാണ്. അങ്ങനെയാണ് കാൽ വിരലുകൾക്കിടയിൽ തൊലി ഉരിഞ്ഞു പോകുന്നത്. പിന്നീടിത് പ്രയാസമുള്ള മുറിവായി രൂപാന്തരപ്പെടാം.
പുറത്തുപോയി തിരിച്ചുവരുന്ന വേളയിൽ പാദങ്ങൾ ചെരിപ്പിലും ഷൂസിനകത്തും പെട്ട് വേണ്ടത്ര ഓക്സിജൻ കിട്ടാതെ വിഷമിച്ചിട്ടുണ്ടാകുമല്ലോ. എത്ര മൃദുലമായ സോക്സ് അല്ലെങ്കിൽ ചെരിപ്പ് ആണെങ്കിലും പാദം ചൂടാകുകയും വിയർക്കുകയും ചെയ്യും.
ബ്ലഡ് സർക്കുലേഷൻ
• അധിക സമയം പാദങ്ങൾക്ക് സമ്മർദ്ദം നൽകി നിൽക്കരുത്. കുറച്ചു നേരമെങ്കിലും അവ ഉയർത്തിവച്ച് രക്‌തപ്രവാഹം ബാലൻസ് ചെയ്യുന്നത് നന്നായിരിക്കും.
• കൈവിരൽ കൊണ്ട് കാൽവിരലുകളെ ദിവസവും മൂന്ന് പ്രാവശ്യം അഞ്ച് മിനിറ്റ് വീതം തടവി കൊടുക്കുക. ഇടയ്ക്കിടെ കാൽവിരലുകൾ ഇളക്കുകയും വേണം.
• ഒരുപാട് സമയം കാൽ മടക്കിവച്ച് ഇരിക്കരുത്.
നല്ല ശീലങ്ങൾ
• കുളിക്കുന്ന സമയത്ത് പ്യൂമിക് സ്റ്റോൺ, ഫുട് സ്ക്രബ്, ഫൈലർ ഇവ ഉപയോഗിച്ച് കാൽപാദം വൃത്തിയാക്കാം. പാദങ്ങളിലെ മൃതകോശങ്ങൾ നീങ്ങാൻ ഇത് സഹായിക്കാം.
• രാത്രി ദിവസവും ഉറങ്ങുന്നതിനു മുമ്പ് പാദങ്ങളിൽ മോയിസ്ചുറൈസർ പുരട്ടുക. ഷിയ ബട്ടർ, കൊക്കോ ബട്ടർ അടങ്ങിയ ക്രീമുകൾ ഉപയോഗിച്ച് തടവിക്കൊടുത്ത ശേഷം മൃദുവായ സോക്സ് ധരിക്കുക.
• മസിൽ ഉരുണ്ടു കയറുന്ന പ്രശ്നങ്ങൾ ഉള്ളതാണെങ്കിൽ മസാജ് ക്രീം വാങ്ങുമ്പോൾ സാലിസിലിക് ആസിഡ് അടങ്ങിയവ വാങ്ങിയാൽ കൂടുതൽ ഗുണം ചെയ്യും.
• അടിയ്ക്കടി വയർപ്പ് ഉണ്ടാകുന്ന പാദങ്ങളാണെങ്കിൽ ഔഷധ ഗുണങ്ങളുള്ള പാദരക്ഷകൾ ഉപയോഗിക്കാം. ക്ലിട്രോ മാജോൾ പൗഡർ, ആന്‍റി ഫംഗൽ പാഡറുകൾ ഒക്കെ ഉപയോഗിക്കാവുന്നതാണ്.
• നഖങ്ങളുടെ വൃത്തിക്കായി ക്യൂട്ടിക്കൾ വിറ്റാമിൻ ഇ, പെട്രോളിയം ജെല്ലി ഇവ ഉപയോഗിക്കാം.
ഇവ മറക്കരുത്
• നഖങ്ങൾ സമയാസമയം വെട്ടി വെടിപ്പാക്കാൻ ഒട്ടും അമാന്തിക്കരുത്. നഖങ്ങൾ വൃത്തിഹീനമായാൽ താമസിയാതെ വേദനയും മറ്റു പ്രശ്നങ്ങളും ഉണ്ടാകും.
• നെയിൽ പോളിഷ് വളരെ അധികം സമയം വച്ചുകൊണ്ടിരിക്കരുത്. നെയിൽ പോളിഷ് ഇല്ലാതെ നഖങ്ങൾ കുറച്ചു സമയമെങ്കിലും സൂക്ഷിക്കണം.
• പഴയ നെയിൽ പോളിഷിന്‍റെ മുകളിൽ പുതിയത് ഇടരുത്. പഴയത് വൃത്തിയാക്കിയ ശേഷം പുതിയത് അണിയാം.
• പൊട്ടിയ നഖത്തിൽ പോളിഷ് ഇടുന്നത് സുരക്ഷിതമല്ല.
• തുറന്ന ചെരിപ്പുകൾ ധരിക്കുമ്പോൾ കാലിലും സൺ പ്രൊട്ടക്ഷൻ ക്രീം പുരട്ടാം.
ഫുട്‍വിയര്‍
• വളരെ ഉയർന്ന ഹീൽ ദിവസവും ധരിക്കുന്നത് അനാരോഗ്യം ഉണ്ടാക്കും.
• വിയർക്കുന്ന പാദങ്ങളാണെങ്കിൽ തുണികൊണ്ടുള്ള ചെരിപ്പുകൾ നല്ലതാണ്.
• കൃത്യമായ അളവിലുള്ള ചെരിപ്പ് ധരിക്കുക. അങ്ങനെ ചെയ്തില്ലെങ്കിൽ കാലിനും ശരീരത്തിനും വേദന ഉണ്ടാകും
