എല്ലാവരും ഇഷ്‌ടപ്പെടുന്ന കാലാവസ്‌ഥയാണ് മഞ്ഞുകാലം. പക്ഷേ പലർക്കും തണുപ്പ് കാലം ഒരു വില്ലനായി മാറാറുണ്ട്. മഞ്ഞുകാലത്ത് ചർമ്മം നിർജ്ജീവവും വരണ്ടതുമായി മാറുന്നു. ഇത്തരം സാഹചര്യത്തിൽ ചർമ്മ പരിപാലനത്തിനായി വിന്‍റർ ബ്യൂട്ടി ടിപ്സ്...
ചർമ്മത്തെ മോയിസ്ച്ചുറൈസ് ചെയ്യുക
തണുപ്പ് കാലത്ത് ചർമ്മത്തിൽ ഈർപ്പം നിലനിർത്തുന്നതിന് വാട്ടർ ബേസ്ഡ് മോയിസ്ച്ചുറൈസറിന്‍റെ സ്‌ഥാനത്ത് ഓയിൽ ബേസ്ഡ് മോയിസ്ച്ചുറൈസർ പ്രയോഗിക്കാം. ഇത് ചർമ്മത്തിലെ ഈർപ്പം നിലനിർത്തും. എങ്കിലും സ്വന്തം സ്കിൻ ടൈപ്പിനനുസരിച്ചുള്ള പ്രൊഡക്റ്റുകൾ വാങ്ങുക. പ്രൊഡക്റ്റ് മികച്ചതായാൽ മാത്രമേ ശരിയായ ഫലം കിട്ടൂ. പകൽ മുഴുവനും ചർമ്മം മൃദുലമായിരിക്കാൻ 2-3 തവണ മോയിസ്ച്ചുറൈസർ അപ്ലൈ ചെയ്യുക.
സൺസ്ക്രീൻ പുരട്ടാൻ മറക്കരുത്
തണുപ്പുകാലത്തും നമ്മുടെ ശരീരത്തിൽ സൂര്യകിരണങ്ങൾ ഏൽക്കാറുണ്ട്. ചർമ്മം ഇരുണ്ടതാകാൻ ഇതിടവരുത്തും. അതിനാൽ പുറത്തു പോകുന്ന അവസരങ്ങളിൽ സൺസ്ക്രീൻ പുരട്ടാൻ മറക്കരുത്. ചർമ്മത്തിന് ശരിയായ സംരക്ഷണം കിട്ടും.
സ്ക്രബ്ബിംഗ് ആവശ്യം
ഏത് കാലാവസ്‌ഥയിലും സ്ക്രബ്ബിംഗ് ആവശ്യമാണ്. ചർമ്മോപരിതലത്തിലുള്ള മൃതചർമ്മത്തെയും ബ്ലാക്ക് ഹെഡ്സിനെയും നീക്കം ചെയ്യാൻ ഇതാവശ്യമാണ്. സ്ക്രബ്ബിംഗിലൂടെ ചർമ്മം ക്ലീനാകും. എന്നാൽ തണുപ്പ് കാലത്ത് ആഴ്ചയിൽ ഒരു തവണ മാത്രമേ സ്ക്രബ്ബിംഗ് ചെയ്യാവൂ. അല്ലെങ്കിൽ ഡ്രൈനസ് ഉണ്ടാകും.
ടോണിംഗിലൂടെ ചർമ്മത്തിന് തിളക്കം
ചർമ്മത്തിന് ടോണിംഗ് ഏറ്റവും ആവശ്യമാണ്. കാരണം നിരന്തരം അഴുക്കും പൊടിയുമുള്ള അന്തരീക്ഷവുമായി സമ്പർക്കം പുലർത്തേണ്ടി വരാം. ഈ സാഹചര്യത്തിൽ ചർമ്മത്തിൽ അടിഞ്ഞു കൂടിയ അഴുക്കും മെഴുക്കും നീക്കം ചെയ്യേണ്ടത് ആവശ്യമാണ്. ഇത് ചർമ്മത്തിന് തിളക്കം കൊണ്ടുവരുമെന്ന് മാത്രമല്ല നല്ല ഈർപ്പവും നൽകും. അതുവഴി ചർമ്മത്തിന് നല്ല തിളക്കവും കിട്ടും.
ധാരാളം വെള്ളം കുടിക്കുക
തണുപ്പുകാലത്ത് ദാഹം തോന്നുന്നത് കുറവാണെങ്കിലും 8-10 ഗ്ലാസ് വെള്ളം നിർബന്ധമായും കുടിച്ചിരിക്കണം. അല്ലെങ്കിൽ വെള്ളത്തിന്‍റെ അഭാവം മൂലം പലവിധ അസുഖങ്ങൾ പിടിപെടാം. ചർമ്മം വരളുന്നതിനൊപ്പം ചർമ്മ കാന്തിയ്ക്ക് മങ്ങലേൽക്കാം. ഏതെങ്കിലും തരത്തിലുള്ള ജ്യൂസോ പാനീയമോ ഇടയ്‌ക്കിടയ്‌ക്ക് കുടിക്കാം. ചൂട് വെള്ളത്തിൽ നാരങ്ങാ നീര് ഒഴിച്ച് കുടിക്കുക. ശരീരത്തിലെ വിഷാംശങ്ങളെ പുറന്തള്ളാൻ ഇത് സഹായിക്കും. ഇതിന് പുറമെ ഗ്രീൻ ടീ, കരിക്കിൻ വെള്ളം, മുളപ്പിച്ച ധാന്യങ്ങൾ, പഴങ്ങൾ എന്നിവയും ഭക്ഷണത്തിൽ ഉൾപ്പെടുത്തുക. പോഷക സമ്പന്നമായ ഭക്ഷണം കഴിക്കാൻ പ്രത്യേകം ശ്രദ്ധ നൽകാം
മസാജിംഗ്
ചർമ്മത്തിലെ വരൾച്ചയും ഡ്രൈനസ്സും തടയാൻ ഇളം ചൂടുള്ള എണ്ണ കൊണ്ടുള്ള മസാജിംഗ് അത്യുത്തമമാണ്. എന്നാൽ മസാജിംഗിന് ഉപയോഗിക്കുന്ന എണ്ണ അധികം കൊഴുപ്പുള്ളതായിരിക്കരുത്. മറിച്ച് ചർമ്മത്തിലേക്ക് അനായാസം ആഴ്ന്നിറങ്ങുന്നതാവണം. ഉദാ: ജോജോബാ, ഒലിവ് ഓയിൽ, അലോവെര ഓയിൽ എന്നിവ ഉപയോഗിക്കാം. കുളിക്കുന്നതിനോ അല്ലെങ്കിൽ ഉറങ്ങുന്നതിനോ ഒരു മണിക്കൂർ മുമ്പ് എണ്ണ മസാജ് ചെയ്യാം. ഇത് ചർമ്മത്തിൽ നല്ല ഫലമുളവാക്കും.
ഉറക്കം
ചർമ്മ സൗന്ദര്യത്തിന് ശരിയായതും പൂർണ്ണവുമായ ഉറക്കം ഫലവത്താണ്. അതുകൊണ്ട് 7-8 മണിക്കൂർ ഉറങ്ങുക. നമ്മുടെ ശരീരത്തിനത് ഉണർവും ഉന്മേഷവും പകരും.
