“മമ്മി, ഞാൻ എവിടെ നിന്നാ വന്നേ?”
ഈ ചോദ്യം എല്ലാ കുട്ടികളും ചോദിക്കാറുണ്ട്. അതിനെ അവഗണിച്ചുതള്ളാതെ കൃത്യമായ മറുപടി കൊടുക്കുന്നതിൽ യാതൊരു തെറ്റുമില്ല. നിന്നെ അമ്പാട്ടി തന്നതാ, ആശുപത്രിയിൽ നിന്ന് വാങ്ങിയതാണ് എന്നിങ്ങനെയൊക്കെയാണ് അമ്മമാർ കൊഞ്ചിച്ചു മറുപടി കൊടുക്കുക. കുട്ടിക്കാലത്തു തന്നെ ഇളം മനസ്സിൽ അബദ്ധ ചിന്ത നിറയ്ക്കുന്നതിന്‍റെ ആദ്യപടിയാണിത്. ഈ പ്രായത്തിൽ മൃഗങ്ങളുടെയും ചെടികളുടേയും ഉദാഹരണത്തിലൂടെ കാര്യങ്ങൾ പറഞ്ഞു കൊടുക്കാവുന്നതാണ്. അവർക്ക് പെട്ടെന്ന് മനസ്സിലാവുകയും ചെടിയിൽ പൂക്കൾ ഉണ്ടാകുന്നതുപോലെയാണ് കുഞ്ഞുങ്ങൾ ഉണ്ടാകുന്നതെന്നു പറയാം. അമ്മയുടെ വയറിനുള്ളിൽ അത് വളരും. വളർന്നു വലുതാകുമ്പോൾ പുറത്തേക്കു വരും. ഇത്രയും പറഞ്ഞാൽ അവർക്ക് ജനനത്തെ കുറിച്ചുള്ള മനോഹരമായ ആശയം മനസ്സിൽ ലഭിക്കും.
സെക്സ് എന്താണ്
അച്ഛനും അമ്മയും പരസ്രം വളരെയധികം സ്നേഹിക്കുന്നതാണ് സെക്സ് എന്നു പറഞ്ഞുകൊടുക്കാം. ഈ പ്രായത്തിൽ അതിൽ കവിഞ്ഞൊരു വിശദീകരണം അവർ ആഗ്രഹിക്കുന്നില്ല. മനസ്സിലാക്കുകയും വേണ്ട.
അവന്‍റെ എന്താ അങ്ങനെ?
പെൺകുട്ടികളും ആൺകുട്ടികളും കുഞ്ഞുപ്രായത്തിൽ തന്നെ രഹസ്യാവയവങ്ങളെ കുറിച്ച് ചോദിക്കുന്നത് സ്വാഭാവികമാണ്. എന്‍റെ എന്താ ഇങ്ങനെ? അവളുടേത് അങ്ങനെയല്ലല്ലോ എന്നാവും അവരുടെ സംശയം. ഇത്തരം സന്ദർഭങ്ങളിലും മൃഗങ്ങളെ കൂട്ടുപിടിക്കാം. നായ്ക്കളേയോ പശുക്കളേയോ ഒക്കെ ചൂണ്ടിക്കാട്ടി വ്യത്യാസം പറഞ്ഞുകൊടുക്കാം. ആണിന്‍റെയും പെണ്ണിന്‍റെയും ചില അവയവങ്ങൾക്ക് വ്യത്യാസമുണ്ടെന്നു പറയാം.
സാനിട്ടറി നാപ്കിൻ എന്തിനാ?
ടിവിയിലെ പരസ്യം കണ്ടിട്ട് ഏതു കൊച്ചുകുട്ടിയും ചോദിക്കാം. എന്താ അത് എന്ന്. പ്രത്യേകിച്ച് സാനിട്ടറി നാപ്കിനുകളുടെ പരസ്യങ്ങൾ നിറയെ വരുന്ന കാലമാണിത്. ഈ ചോദ്യം കേൾക്കുമ്പോൾ ഒട്ടും മടിക്കാതെ ഉത്തരം കൊടുക്കാം. അതിങ്ങനെ പറയാം. കയ്യും മുഖവും തുടയ്ക്കാൻ ടിഷ്യു പേപ്പർ ഉപയോഗിക്കുന്നതുപോലെ പ്രൈവറ്റ് പാർട്സ് തുടയ്ക്കാൻ ഇത് ഉപയോഗിക്കുന്നു. എന്നാൽ ഈ നാപ്കിൻ കുട്ടികൾ മുതിർന്നു കഴിഞ്ഞിട്ടാണ് ഉപയോഗിക്കുന്നത്. കുഞ്ഞുങ്ങൾക്ക് ഈ നാപ്കിൻ ആവശ്യമില്ല. അമ്മയുടേയും കുഞ്ഞിന്‍റെയും ഉടുപ്പിൽ വ്യത്യാസമില്ല. അതുപോലെയാണ് കുട്ടികളുടേയും മുതിർന്നവരുടേയും നാപ്കിന്‍റെ വ്യത്യാസം എന്നും പറയാം.
പിരീയ്ഡ്സ് എന്താണ്?
പെൺകുട്ടികൾ ചോദിക്കുന്നതിനു മുമ്പേ തന്നെ പിരീയ്ഡ്സിനെക്കുറിച്ച് അമ്മമാർ പറഞ്ഞുകൊടുക്കേണ്ട സംഗതിയാണ്. 10 വയസ്സാകുമ്പോഴേക്കും ചില പെൺകുട്ടികൾ ഋതുമതി ആവുന്നുണ്ട്. അതിനാൽ അവളരുടെ വളർച്ച മനസിലാക്കി അമ്മയ്ക്കു നേരത്തെ കാര്യം പറഞ്ഞുകൊടുക്കാം. ഇക്കാര്യം മറ്റുള്ളവർ പറഞ്ഞ് അറിയുന്നതിനേക്കാൾ നല്ലത് അമ്മയിൽ നിന്ന് അറിയുന്നതാണ്. എല്ലാ പെൺകുട്ടികൾക്കും ഉള്ള ഒരു കാര്യമാണിതെന്നും ഭയക്കേണ്ട സംഗതിയല്ലെന്നും ആദ്യം തന്നെ ബോദ്ധ്യപ്പെടുത്തണം. അമ്മയ്ക്ക് തന്‍റെ ആദ്യത്തെ മാസമുറ അനുഭവം കുട്ടിയ്ക്ക് പറഞ്ഞുകൊടുക്കാം. വേദന ഉണ്ടാകാം. എന്നാൽ അതുമായി പതുക്കെ പൊരുത്തപ്പെട്ടു പോകുമെന്നും ആ സമയത്ത് എങ്ങനെ പാഡ് ഉപയോഗിക്കണമെന്നും ശുചിത്വം പാലിക്കണമെന്നും പറയണം.
