എന്താണ് ഈ കൊവാക്സിൻ?
പരമ്പരാഗത രീതിയിൽ നിർമ്മിച്ച ഒന്നാണത്. അതായത് പണ്ടു കാലം മുതൽ നിർമ്മിച്ചു വന്ന രീതിയിൽ.
എന്നു വച്ചാൽ എന്താണ്?
പകർച്ചവ്യാധികളെ ചെറുക്കാനായി ശരീരത്തെ സജ്ജമാക്കുന്ന ഇൻജെക്ഷൻ ആണ് വാക്‌സിൻ. രോഗം വരുത്താതെ പ്രതിരോധം ജനിപ്പിക്കുക എന്നതാണ് വിദ്യ. അവ പലതരം. അതിൽ inactivated വാക്‌സിൻ ആവുമ്പോൾ രോഗാണുവിന്‍റെ അംശങ്ങൾ ഉണ്ടാവും, കൂടെ ചമ്മന്തിക്ക് തേങ്ങാപ്പീര പോലെ ഒരു adjuvant ഉം. ഈ മിശ്രിതമാണ് കുത്തിവയ്ക്കുന്നത്.
മറ്റാരെങ്കിലും ഇതുപയോഗിച്ചിട്ടുണ്ടോ?
ഇതേ പരമ്പരാഗത രീതിയാണ് പാൻഡെമിക് കണ്ടയുടൻ തന്നെ ഈയിനത്തിൽ പെട്ട വൈറസിനെ പറ്റി ഏറ്റവും അധികം ഗവേഷണം നടത്തി പാരമ്പര്യമുള്ള ചൈന സ്വീകരിച്ചത്. അവർ മാസങ്ങൾക്കുള്ളിൽ ക്ളിനിക്കൽ ട്രയലുകൾ പബ്ലിഷ് ചെയ്യാൻ കാത്തു നിൽക്കാതെ എത്രയും വേഗം ലക്ഷക്കണക്കിന് പൗരന്മാർക്ക് ആ വാക്‌സിൻ എത്തിച്ചു കൊടുത്തു. ചൈനയിൽ മരണങ്ങൾ പൊടുന്നനെ കുറയാൻ ഒരു കാരണമായി ചൂണ്ടിക്കാണിക്കപ്പെടുന്നത് അവരുടെ അതിവേഗ വാക്സിനേഷൻ പ്രോഗ്രാമാണ്.
എന്തിനാണ് adjuvant ചേർക്കുന്നത്? വെറുതെ അൽപം വൈറസ് പൊടിച്ച് അരച്ചു കുത്തിവച്ചാൽ പോരേ?
ജീവനുള്ള വൈറസ് ആണ് കൂടുതൽ പ്രഹരശേഷിയുള്ളത്. അതു കുത്തിവച്ചാൽ Adjuvant ഇല്ലാതെ തന്നെ സിസ്റ്റം ഓണായിക്കൊള്ളും. എന്നാൽ കോവിഡ് ഉണ്ടാകാൻ സാധ്യത ഉള്ളതിനാൽ തൽക്കാലം ജീവനുള്ള കൊറോണാ വൈറസ് കൊണ്ട് വാക്‌സിൻ ഇറക്കിയിട്ടില്ല. അതിനാൽ “നിര്യാതനായ” (inactivated) വൈറസ് ഉപയോഗിക്കുമ്പോൾ ഇമ്മ്യൂൺ സിസ്റ്റം ഉണർന്നു വരാനുള്ള ഒരു ബൂസ്റ്റർ ആണ് ഈ adjuvant.
കോവാക്സിൻ adjuvant ന്‍റെ പ്രത്യേകത?
ഏറ്റവും പുതിയ മോഡൽ adjuvant ആണ് ഇതിൽ ചേർത്തിട്ടുള്ളത്. ഉണ്ടാകാവുന്നതിൽ ഏറ്റവും മെച്ചപ്പെട്ട തരം ഇമ്മ്യൂൺ റെസ്പോൺസ് ഉണ്ടാവാൻ വേണ്ടി ഏറെ അന്വേഷിച്ചാണ് പണ്ട് മുതൽ ഉപയോഗിച്ചു വന്ന വെറും പച്ച ALUM എന്നതിനു പകരം toll-like receptor 7/8 agonist ആയ IMDG അതിൽ ALUM -നോടൊപ്പം ചേർത്തിട്ടുള്ളത്. അതിന് ALUM-IMDG എന്നു പറയുന്നു. ചൈന ഉപയോഗിച്ച വെറും ALUM – നേക്കാൾ മെച്ചപ്പെട്ടതാണിത്.
ഏതാണ് എടുക്കേണ്ടത്? കോവിഷീൽഡോ കോവാക്സിനോ?
ഏതാണോ ആദ്യം കിട്ടുക അതെടുക്കുക. ഇതാണ് ലോകമെമ്പാടും വിദഗ്ദ്ധർ ഒരേ സ്വരത്തിൽ പറയുന്നത്.
ഏതാണ് നല്ലത്?
ഉത്തരമില്ലാത്ത ചോദ്യമാണിത്. രണ്ടും മെച്ചപ്പെട്ട വാക്‌സിൻ എന്ന് എന്‍റെ വ്യക്തിപരമായ അഭിപ്രായം. ടോയോട്ടയാണോ ഹോണ്ടയാണോ നല്ലത് എന്നു ചോദിച്ചാൽ എന്നതു പോലെയാണ്.
കോവിഷീൽഡിനില്ലാത്ത എന്തെങ്കിലും ഗുണം കോവാക്സിനുണ്ടോ?
കോവിഷീൽഡ്‌ വൈറസിന്‍റെ മുള്ളിനെതിരെ മാത്രം പ്രതിരോധം ഉല്പാദിപ്പിക്കുന്നു. കോവാക്സിൻ മൊത്തം വൈറസിനെതിരെയും. അതിനാൽ ഭാവിയിൽ കാര്യമായ ജനിതകമാറ്റം വൈറസിൽ ഉണ്ടായാൽ ഒരു പക്ഷേ ചെറുത്തു നിൽകാൻ സഹായിക്കുക കോവാകസിൻ ആവാം. ഇത് ഒരു എഡ്യൂക്കേറ്റഡ് ഗസ്സ്‌ മാത്രം ആണ്; കാരണം അങ്ങനെ വലിയ രീതിയിൽ ഒരു ജനിതക മാറ്റം ഇതു വരെ സംഭവിച്ചിട്ടില്ലല്ലോ.
കൊവാക്സിൻ ഫലപ്രദം ആണെന്ന് തെളിവുണ്ടോ?
ഒരു കോവിഡ് വാക്സിനിൽ ഞാൻ പ്രതീക്ഷിക്കുന്ന എല്ലാ കാര്യങ്ങളും ഇതു തരുന്നതായി തെളിവുണ്ട്. എനിക്കു വേണ്ടത് പ്രധാനമായും ഒരു പ്രത്യേക തരത്തിലുള്ള ടി സെൽ റെസ്പോൺസ് ആണ്. Th-1 എന്നു പറയും. അതോടൊപ്പം ആവശ്യത്തിന് ആന്‍റിബോഡിയും ഉത്പാദിപ്പിക്കുന്നുണ്ട് എന്ന് എണ്ണൂറോളം മനുഷ്യരിൽ പഠനം നടത്തി പബ്ലിഷ് ചെയ്‌തു കഴിഞ്ഞു. ദീർഘ കാലത്തേക്കുള്ള സംരക്ഷണവും ഗുരുതര രോഗത്തിൽ നിന്നുമുള്ള പരിരക്ഷയും പ്രധാനമായും ടി സെൽ മുഖേനയാണ് നമുക്ക് ലഭിക്കുക എന്ന് നിരവധി സമീപകാല പഠനങ്ങൾ ഞാൻ വിശദമായി ട്വീറ്റ് ചെയ്തിട്ടുണ്ട്. (@rajeevjayadevan )
കോവാക്സിൻ സുരക്ഷിതമാണോ?
പണ്ടുമുതൽ പ്രയോഗിച്ചു വരുന്ന രീതിയിൽ നിർമ്മിക്കുന്ന കോവാക്സിന്‍റെ സുരക്ഷിതത്വത്തെപ്പറ്റി ഈ ഫീൽഡറിയാവുന്ന ആർക്കും ആശങ്കയില്ല. ന്യൂ ജനറേഷൻ വാക്‌സിനുകളായ കോവിഷീൽഡ്‌, ഫൈസർ, മോഡർന, സ്പുട്നിക് മുതലായവയെ ചുറ്റിപ്പറ്റിയായിരുന്നു ആശങ്ക കൂടുതൽ. മറ്റൊന്നും കൊണ്ടല്ല; പുതിയ ടെക്നോളജി ആയത് കൊണ്ടു മാത്രം. ട്രയലുകളിൽ അവർ സുരക്ഷിതം എന്ന് തെളിഞ്ഞിട്ടുണ്ട്. പോരാത്തതിന് മേൽപ്പറഞ്ഞ ട്രയലിൽ കോവാക്സിനും സുരക്ഷിതം എന്നു തെളിഞ്ഞിട്ടുണ്ട്.
എന്താണ് ക്ലിനിക്കൽ ട്രയൽ മോഡ് എന്നൊക്കെ വച്ചാൽ?
വ്യത്യസ്തമായ അപ്രൂവൽ ആയതിനാൽ കോവാക്സിൻ എടുക്കുന്ന വ്യക്തികൾ അഡീഷനലായി ഒരു ഫോം പൂരിപ്പിക്കണം എന്ന് ആരോഗ്യ മന്ത്രാലയം ആവശ്യപ്പെട്ടിട്ടുണ്ട്. ആശുപത്രിയിൽ പോയാൽ നമുക്ക് ചികിത്സയിൽ എതിർപ്പില്ല എന്ന് സാക്ഷ്യപ്പെടുത്തിക്കൊണ്ടുള്ള ഇത്തരം നിരവധി ഫോമുകൾ ഒപ്പിടേണ്ടി വരാറുണ്ട്, അതു പോലെ തന്നെ ബാങ്ക് അക്കൗണ്ട് തുടങ്ങുമ്പോൾ, MRI സ്‌കാൻ എടുക്കേണ്ടി വരുമ്പോൾ. സാങ്കേതികമായ കാര്യമാണ്. അതിൽ ഒരു കുഴപ്പവും ഇല്ല എന്നാണ് ഔദ്യോഗിക പദവിയിൽ ഉള്ളവരിൽ നിന്നും അറിയാൻ കഴിഞ്ഞത്. ഇക്കാര്യത്തിൽ ഇത്തരം സമ്മത പത്രം ഒപ്പിടാൻ എനിക്ക് യാതൊരു ബുദ്ധിമുട്ടും ഇല്ല.
എന്താണ് ചിലർ ഇതു വേണ്ടാ എന്നു പറയുന്നത്?
അമിതമായ ആലോചനയാണ് പലപ്പോഴും തെറ്റായ തീരുമാനങ്ങളിലേക്ക് നമ്മെ നയിക്കുന്നത്. അതിന് ഇൻഫർമേഷൻ ഓവർലോഡ് ആൻഡ് ഓവർ തിങ്കിംഗ് എന്നു പറയും. വർഷങ്ങൾക്കു മുൻപ് എഴുതിയിട്ടുള്ള വിഷയമാണിത്. കടയിൽ വച്ച് ഏതു മാങ്ങ വാങ്ങണം എന്നു തീരുമാനിക്കാൻ നാം ലൈബ്രറിയിൽ പോയി ഫ്രൂട്ട്സിനെ പറ്റിയുള്ള എൻസൈക്ലോപീഡിയ നോക്കാൻ തുനിഞ്ഞാൽ, അല്ലെങ്കിൽ പത്തു പേരോട് അഭിപ്രായം ചോദിച്ചാൽ, ചിലപ്പോൾ ഒന്നും തീരുമാനിക്കാൻ സാധിക്കാതെ വെറും കയ്യോടെ മടങ്ങി എന്നു വരും. ഒരു പക്ഷേ മാങ്ങ ഇനി മേലാൽ വാങ്ങരുതെന്നും അതിനേക്കാൾ നല്ലത് ആപ്പിളാണെന്ന് തീരുമാനിച്ചെന്നും ഇരിക്കും.
വാക്‌സിന്‍റെ കാര്യത്തിൽ ഏറെ അറിവും എക്സ്‌പീരിയൻസും ഉള്ളവർ പറയുന്നത് നമുക്കു വിശ്വസിക്കാം. പിന്നെ വാക്‌സിൻ എടുക്കണോ വേണ്ടേ എന്നുള്ളത് ഓരോ വ്യക്തിയുടെയും തീരുമാനമാണ്. ആരെയും വാക്‌സിൻ എടുക്കാൻ നിര്ബന്ധിക്കേണ്ടതില്ല.
വാക്‌സിൻ എടുത്തവർക്ക് പിൽക്കാലത്ത് അഥവാ വൈറസ് ബാധിച്ചാലും ഗുരുതര രോഗം പിടിപെടാതെ രക്ഷപെടാം എന്നുള്ള പ്രതീക്ഷയാണ് നിലവിലുള്ള എല്ലാ കോവിഡ് വാക്‌സിനുകളും നമുക്കു നൽകുന്നത്.
