പൈനാപ്പിൾ മധുരക്കറി

പൈനാപ്പിൾ കൊണ്ട് ജ്യൂസ്‌, ജാമും മാത്രമല്ല നല്ല കിടിലൻ കറിയും ഉണ്ടാക്കാം. സ്വദിഷ്ഠമായ മധുരമുള്ള പൈനാപ്പിൾ കറി ഉണ്ടാക്കി നോക്കിയാലോ?

ചേരുവകൾ

പൈനാപ്പിൾ ചെറുതായി അരിഞ്ഞത് ഒരു കപ്പ്

പഴുത്ത ഏത്തപ്പഴം ചെറുതായി അരിഞ്ഞത് അര കപ്പ്

കറുത്ത മുന്തിരി 10-12 എണ്ണം

മഞ്ഞൾപ്പൊടി ഒരു ടീസ്പൂൺ

മുളകുപൊടി അര ടീസ്പൂൺ

വെള്ളം അര കപ്പ്

തേങ്ങ ചിരകിയത് അര കപ്പ്

പച്ചമുളക് രണ്ടെണ്ണം

കടുക് ഒരു നുള്ള്

ശർക്കര/പഞ്ചസാര 2 ടീസ്പൂൺ

തൈര് 3 ടീസ്പൂൺ

വറ്റൽ മുളക് 2-3 എണ്ണം

കറിവേപ്പില 3 തണ്ട്

എണ്ണ ആവശ്യത്തിന്

ഉപ്പ് ആവശ്യത്തിന്

തയ്യാറാക്കുന്ന വിധം

ഒരു പാനിൽ പൈനാപ്പിളും പഴം നുറുക്കിയതും മഞ്ഞൾപ്പൊടിയും മുളകുപൊടിയും അൽപം ഉപ്പും ചേർത്ത് അര കപ്പ് വെള്ളവും ഒഴിച്ചു അടച്ചുവച്ച് വേവിക്കുക.

ആ സമയം കൊണ്ട് തേങ്ങ ചിരകിയതും കടുകും പച്ചമുളകും രണ്ട് ടേബിൾ സ്പൂൺ വെള്ളവും ചേർത്ത് നന്നായി അരച്ചെടുക്കാം.

പാനിലുള്ള കഷണങ്ങൾ വെന്ത ശേഷം ഒരു തവി കൊണ്ട് കഷണങ്ങൾ ഉടയ്ക്കുക. അതിലേക്ക് അരച്ചത് ചേർത്ത് നന്നായി മിക്സ് ചെയ്യുക. 2-3 മിനിറ്റ് നേരം കൂടി വേവിക്കുക.

ഇനി അതിലേക്ക് പഞ്ചസാര/ ശർക്കര ചേർത്ത് ഇളക്കാം. മധുരം ഇഷ്ടപ്പെടുന്നവർക്ക് അളവ് കൂട്ടാം.

ഒടുവിലായി മുന്തിരി ചേർക്കുക. മുന്തിരി വെന്ത് പോകരുത്. ഗ്യാസ് ഓഫാക്കി കറിയൽപ്പം തണുക്കാൻ അനുവദിക്കാം. അൽപം ചൂട് മാറിയ ശേഷം തൈര് ചേർക്കാം.

മറ്റൊരു പാനിൽ എണ്ണ അൽപം ചൂടാക്കി കടുക് പൊട്ടിക്കുക. ശേഷം കറിവേപ്പിലയും വറ്റൽ മുളകും ഇട്ട് മൂപ്പിച്ചശേഷം കറിയിലേക്ക് ചേർക്കാം

കുട്ടികൾക്കും മുതിർന്നവർക്കും ഒരേ പോലെ ഇഷ്ടപ്പെടുന്ന കറി ആണിത്..