ഇന്ന് ആകെയൊരു മുഷിപ്പ്. ജോലിക്കു പോകാനേ തോന്നുന്നില്ല. ഇങ്ങനെ തോന്നിയിട്ടുണ്ടോ. നമ്മുടെ മനസ്സിന്‍റെ ഊർജ്‌ജസ്വലത നഷ്ടപ്പെടാൻ നിരവധി കാരണങ്ങളുണ്ട്. പക്ഷേ, ആത്മവിശ്വാസത്തോടെ അതിനെയൊക്കെ അതിജീവിക്കാൻ ചില എളുപ്പ വഴികൾ സ്വീകരിക്കാവുന്നതാണ്.
ജോലിക്ക് പോകുവാനായി വീട്ടിൽ നിന്നും ഇറങ്ങുന്നതിനു മുമ്പേ നമ്മുടെ സന്തോഷത്തിന് ഭംഗം വരുത്തുന്ന രീതിയിൽ മൂഡോഫായി പോകുവാൻ മനസ്സിനെ ഒരിക്കലും അനുവദിക്കരുത്. പുറം ലോകത്തെ വെല്ലുവിളികൾക്കിടയിലേക്ക്, ഏതൊരു സാഹചര്യത്തേയും നേരിടാൻ തക്കവണ്ണം ഒരുങ്ങിയിരിക്കാം. ഇതിനായി ശ്രദ്ധിക്കേണ്ട ചില കാര്യങ്ങളാണ് താഴെ പറയുന്നത്.
വസ്ത്രം തെരഞ്ഞെടുക്കുമ്പോൾ
ആത്മവിശ്വാസത്തോടെ മാന്യമായ രീതിയിൽ നിങ്ങളെ സംതൃപ്തിപ്പെടുത്തുന്ന വസ്ത്രം ധരിക്കുക. വസ്ത്രത്തിന് നമ്മുടെ മൂഡിനെ സ്വാധീനിക്കാൻ കഴിയും. ജോലി സ്ഥലത്തേക്ക് പോകുമ്പോൾ ഏതെങ്കിലും കയ്യിൽ കിട്ടുന്ന വസ്ത്രം എടുത്തിടാതെ നേരത്തെ പ്ലാൻ ചെയ്‌ത് സമയമെടുത്ത് ചെയ്യുന്നത് വളരെ നല്ലതാണ്.
പുഞ്ചിരിക്കാം സദാ
ഏതൊരു കാര്യത്തേയും ചെറുപുഞ്ചിരിയോടെ സമീപിച്ചു നോക്കൂ. ചിരിക്ക് നമ്മുടെ പെരുമാറ്റത്തിൽ വളരെ വലിയ സ്വാധീനമാണുള്ളത്. പോസിറ്റീവായ ചിന്തകൾക്കൊപ്പം തലച്ചോറിലെ ദൈനംദിന പ്രവർത്തനങ്ങളെ സ്വാധീനിക്കാനും പുഞ്ചിരിക്ക് കഴിവുണ്ട്.
ഭക്ഷണശീലം
ഭക്ഷണത്തിന് ശരീരോർജ്ജത്തെ ചിട്ടപ്പെടുത്താനുള്ള പ്രക്രിയയിൽ വലിയ സ്‌ഥാനമുണ്ട്. വിഷാദം കുറയ്ക്കാനും എനർജി ലെവൽ ഉയർത്തുവാനും ആഹാരശീലങ്ങൾക്ക് കഴിയും. ഇതിനു ചെയ്യേണ്ടത് ഒമേഗ 3 ഫാറ്റി ആസിഡുകൾ കൂടുതലായി അടങ്ങിയ ആഹാരം തെരഞ്ഞെടുക്കുകയാണ്. മത്തി, കണ്ണൻ മത്തി, അയല ഇതൊക്കെ ഫാറ്റി ആസിഡുകൾ നിറഞ്ഞ മത്സ്യവിഭാഗങ്ങളാണ്.
നടപ്പുശീലമാകാം
നടത്തത്തിന്‍റെ പ്രയോജനങ്ങളെക്കുറിച്ച് മിക്കയാളുകൾക്കും അറിവുള്ളതാണ്. പക്ഷേ വെറുതെ നടന്നതു കൊണ്ട് ഗുണമുണ്ടാകണമെന്നില്ല. തലയുയർത്തിപ്പിടിച്ച് കാലടികൾത്തനുസരിച്ച് കൈകൾ വീശി നടക്കുമ്പോഴാണ് നമ്മുടെയുള്ളിൽ ഉൻമേഷം വർദ്ധിക്കുന്നത്. ശരിയായ നടത്തത്തിലൂടെ ആത്മവിശ്വാസം താനേ വരും.
ആഹ്ലാദകരമായ നിമിഷങ്ങൾ
ജീവിതത്തിൽ ഇതുവരെ സന്തോഷം പകർന്നിട്ടുള്ള നിമിഷങ്ങളെ ഓർത്തെടുക്കുക. ഏതെങ്കിലും അവസരങ്ങളിൽ മുമ്പ് അനുഭവിച്ച അതേ സന്തോഷമാണ് ഇപ്പോൾ തോന്നുന്നതെന്ന് എടുത്തു പറയുക. രസകരമായ സംഭവങ്ങളെ സഹപ്രവർത്തകരോട് പങ്കുവയ്ക്കുക. നിങ്ങൾക്ക് ചുറ്റും എപ്പോഴും ഒരു പോസിറ്റീവ് വൈബ് നിലനിർത്തുവാൻ ശ്രദ്ധിച്ചാൽ അതുകൊണ്ട് നിരവധി ഗുണങ്ങളുണ്ടാകും. അഡ്രിനാലിന്‍റെ വ്യതിയാനത്തോടൊപ്പം വിജയത്തിന്‍റെ മാധുര്യവും നിങ്ങളെ തേടി വരും.
പോസിറ്റീവ് ചിന്ത
ഒരു മീറ്റിംങ്ങിന്‍റെ അവസാനം എന്താകുമെന്ന് ആലോചിച്ച് ടെൻഷനടിക്കാതെ നിങ്ങൾക്ക് ഗുണപ്രദമാകുന്ന രീതിയിലായിരിക്കും റിസൽറ്റ് വരിക എന്ന് ചിന്തിക്കുക. ബോസിന്‍റെ മുമ്പിൽ പ്രസന്‍റേഷൻ അത്ര ഭംഗിയായില്ല എന്ന് കരുതാതെ കഴിവിന്‍റെ പരമാവധി ഞാൻ ചെയ്‌തിട്ടുണ്ട് എന്ന് ആത്മവിശ്വാസത്തോടെ സ്വയം പറയുക ഇതെല്ലാം വ്യക്‌തിത്വത്തിൽ വലിയ മാറ്റങ്ങളുണ്ടാക്കാവുന്ന ഘടകങ്ങളാണ്.
പകൽ സ്വപ്നം
തിരക്കുപിടിച്ച ഓട്ടത്തിനിടയിൽ പകൽ സ്വപ്നമൊക്കെ കണ്ടു നിൽക്കാൻ പറ്റുമോ? സാമൂഹിക ശാസ്ത്രഞ്ജന്മാർ പറയുന്നത് നിങ്ങളുടെ യാത്രാ വേളകളിൽ ഒരു പകൽ സ്വപ്നത്തിലെന്ന പോലെ മനസ്സിൽ രൂപപ്പെടുത്തിയെടുത്ത വ്യക്‌തികളുമായി സംവദിക്കുന്നത് ഊർജ്ജവും ഉൻമേഷവും നൽകുമെന്നാണ്. എന്താ പരീക്ഷിച്ചു നോക്കുന്നോ!
സുഗന്ധപൂരിതമായ അന്തരീക്ഷം
നല്ല മൂഡിനെ സ്വാധീനിക്കുന്ന നിരവധി സുഗന്ധങ്ങളുണ്ട്. നിങ്ങളെ തൃപ്തിപ്പെടുത്തുന്ന ഇഷ്‌ടമുള്ള സുഗന്ധങ്ങൾ തെരഞ്ഞെടുത്ത് എനർജി ലെവൽ ഉയർത്താം. സുഗന്ധം നിറയ്ക്കുന്ന ഉൽപന്നങ്ങൾ ഇന്ന് മാർക്കറ്റിൽ ലഭ്യമാണ്. ബാഗിലെപ്പോഴും ഇത്തരം വസ്‌തുക്കളെതെങ്കിലും സൂക്ഷിക്കുന്നത് നല്ലതാണ്.
ആയുർവേദം
ശരീരത്തേയും മനസ്സിനേയും സ്വാധീനിക്കുന്ന ഉൻമേഷദായകമായ നിരവധി സുഖ ചികിത്സകളും, സൗന്ദര്യ ചികിത്സകളും ആയുർവേദത്തിലുണ്ട്. ചൂടുവെള്ളത്തിൽ നല്ലൊരു ഹെർബൽ ബാത്ത് നടത്തുന്നത് നിങ്ങളുടെ ദിവസത്തെ കൂടുതൽ സുന്ദരമാക്കും. നിങ്ങളുടെ ശരീരത്തിനിണങ്ങുന്ന രീതിയിലുള്ള സൗന്ദര്യ പരിചരണത്തെക്കുറിച്ച് നല്ലൊരു ആയുർവേദ വൈദ്യന്‍റെ അരികിൽ നിന്നും നിർദ്ദേശങ്ങൾ സ്വീകരിക്കുക.
